ʼE Feala Koa Hakotou Mahino Ki Te Tohi-Tapu?
“ ʼE lau ʼe toku fāmili ia te Tohi-Tapu ʼi te ʼAhotapu fuli. Neʼe mole au faʼa leleiʼia te faʼahi ʼaia. Neʼe au tui ko te Tohi-Tapu ʼe ko te Folafola ʼa te ʼAtua, kae neʼe lahi te ʼu meʼa neʼe au lau neʼe faigataʼa ʼaupitō taku mahino kiai.”—Ko Steven, ʼi Pilitānia.
“ ʼI toku taʼu 17, neʼe au faiga ke au lau te Tohi-Tapu. Neʼe faigataʼa kiā au taku mahino kiai, koia neʼe mole au hoko atu.”—Ko Valvanera, ʼi Sepania.
“Neʼe au lau ia te Tohi-Tapu heʼe ʼi taku manatu neʼe tonu ke au lau he neʼe au Lotu Katolika. Neʼe taʼu tolu taku lau kātoa ia te Tohi-Tapu! Kae neʼe veliveli taku mahino kiai.”—Ko Jo-Anne, ʼi Ositalalia.
KO TE Tohi-Tapu ʼe ko te tohi pē ʼaia ʼe ʼiloa ʼi te mālamanei kātoa. ʼE kei fakalaka tona fakatau pea mo tona tufa ʼi te tahi age ʼu tohi fuli, ʼo tokolahi ia te hahaʼi ʼaē ʼe natou lava maʼu te tohi ʼaia, ʼi ni ʼu lea ʼe lahi age, pea neʼe mole gata ʼaki pē ʼi tona tā ki te laupepa, kae neʼe toe puke ki te ʼu fime pea mo te ʼu pā fakatagi. Kae tokolahi te hahaʼi ʼaē ʼe nonofo mo hanatou Tohi-Tapu ʼe faigataʼa kiā nātou tanatou mahino kiai. ʼE kotou fēia koa mo koutou?
Ko Ia ʼAē Neʼe Ina Foaki Mai Te Tohi-Tapu ʼe Ina Loto Koa Ke Tou Mahino Ki Tana Folafola?
ʼE ʼui fēnei ʼi te Tohi-Tapu: “Ko te Tohi-Tapu kātoa ʼe haʼu mai te ʼAtua.” (2 Timoteo 3:16) ʼEī, ko Sehova ʼAtua ʼaē neʼe ina foaki mai te Tohi-Tapu. ʼE ina loto koa ke tou mahino ki tana Folafola? Peʼe mole ina loto ke mahino kiai te hahaʼi fuli gata pē ki he kiʼi kūtuga, ohagē ko te kau takitaki lotu pea mo te kau sivi Tohi-Tapu?
Kotou tokagaʼi ia te ʼu vaega Tohi-Tapu ʼaē ʼe hoa mai:
“Ko te fakatotonu ʼaenī ʼe au fakatotonu atu kiā koe iā ʼaho nei, ʼe mole faigataʼa fau kiā koe, pea ʼe mole mamaʼo ia.”—Teutalonome 30:11.
“Ko te fakahā ʼo tau ʼu folafola ʼe ina fakamālamagia kita, ʼo mahino ai te hahaʼi ʼaē ʼe mole popoto.”—Pesalemo 119:130.
“ ʼI te hola pē ʼaia, [ko Sesu] neʼe fonu ia ʼi te fiafia ʼi te laumālie māʼoniʼoni pea neʼe ʼui māʼana: ‘Tamai, ʼe au vikiviki kiā te koe iā muʼa ʼo te hahaʼi, ʼAliki ʼo te lagi mo te kele, he neʼe ke fufū fakalelei te ʼu meʼa ʼaenī ki te kau popoto pea mo te hahaʼi ʼaē ʼe gāue fakaʼatamai, kā kua ke fakahā koe kiā nātou liliki.’ ”—Luka 10:21.
ʼE hā mai ai ʼe loto e Ia ʼaē neʼe ina foaki mai ia te Tohi-Tapu, ke kotou mahino ki tana Folafola! Kae ʼe kei tokolahi ʼi te hahaʼi ʼaē ʼe loto fakamālotoloto, ʼe kei faigataʼa kiā nātou hanatou mahino kiai. Koteā ʼaē ʼe feala ke tokoni kiā nātou? Ko te ʼu ʼalatike ʼaē kā hoa mai, ʼe fakahā lelei ai ia te ʼu tokoni e tolu ʼe feala ai ke kotou mahino ki te Tohi-Tapu.