ʼE Kotou Lava Mahino Feafeaʼi Ki Te Tohi-Tapu?

3. Kotou Tali Ke Tokoni Atu Niʼihi

Ko te tagata folau fai kumi ko Edward John Eyre, ʼi te temi ʼaē neʼe fai ai tona fagona faigataʼa ʼaē ʼi te toafa ʼo te mafa ʼo Nullarbor, ko te kau Aborigènes, neʼe natou akoʼi age kiā Eyre, peʼe feafeaʼi te ʼohu ʼo te vai ʼi te ʼu mataʼone pea mo te ʼu fuʼu ʼakau ʼaē ko te eucalyptus. ʼI tana tali te tokoni ʼa te hahaʼi ʼaia ʼaē neʼe mahino ki te fenua, neʼe haofaki ai e Eyre ia tona maʼuli ki muli age.

OHAGĒ ko tona fakahā e te faʼifaʼitaki ʼaenī, ke fua lelei he fakatuʼutuʼu faigataʼa, ʼe ʼaoga ʼi ʼihi temi ke tokoni mai he tahi ʼe mahino lelei age ki he meʼa iā tātou. ʼE toe fēia pē ki te Tohi-Tapu mokā kotou kamata lau.

Neʼe mole ʼamanaki ia Sesu ke mahino tokotahi pē ia tana ʼu tisipulo ki te Tohi-Tapu. ʼI te tahi ʼaluʼaga, “neʼe ina ʼavahi kātoa ai tonatou ʼatamai ke natou mahino ki te ʼu Tohi.” (Luka 24:45) Neʼe ʼiloʼi e Sesu ko te hahaʼi ʼaē ʼe natou lau te Tohi-Tapu, ʼe ʼaoga ke tokoni niʼihi kiā nātou ke tupu ʼaki ai hanatou mahino ki te ʼu akonaki Fakatohi-tapu.

Ko Ai ʼAē ʼe Feala Ke Tokoni Mai?

Neʼe fakatotonu e Sesu ki tana ʼu tisipulo ke natou foaki ia te tokoni ʼaia. ʼI muʼa ʼo tana hake ki selō, neʼe fakatotonu fēnei e Sesu: “Kotou ʼolo pea ke kotou fai ni ʼu tisipulo ʼi te hahaʼi ʼo te ʼu fenua fuli pē, . . . ʼo kotou akoʼi ia nātou ke natou mulimuli ki te ʼu meʼa fuli pē ʼaē neʼe au fakatotonu atu kiā koutou.” (Mateo 28:19, 20) Ko te ʼuluaki gāue ʼaē ʼe tonu ke fai e te kau Kilisitiano ʼe ko te akoʼi te hahaʼi, pea ko tona fakaʼuhiga ko te fakamahino ki te hahaʼi peʼe natou lava maʼuliʼi feafeaʼi ia te ʼu pelesepeto ʼo te Tohi-Tapu ʼi te ʼaho fuli pē. Ko te kau Kilisitiano moʼoni ʼe natou tokoni ki te hahaʼi ke natou mahino ki te Tohi-Tapu.

Mole faʼa fualoa ki te ʼosi foaki e Sesu ia te fakatotonu ʼaia, neʼe hoko ia te meʼa ʼe ʼaoga ke tou fakatokagaʼi. ʼE talanoa te Tohi-Tapu ki te tagata faifekau ʼo te fale hau ʼi Etiopea, neʼe ina lolotoga lau ia te koga tohi ʼo te lea fakapolofetā ʼo Isaia. Neʼe ina lau ia te koga tohi neʼe mole mahino ia kiai. ʼI te fakamatala ʼo te Tohi-Tapu, ʼe ko te ʼu vaega ʼaenī ʼaē neʼe mole mahino kiai: “Ohagē ko he ovi neʼe ʼave ke tāmateʼi, pea ohagē ko he ʼakeno ʼe fakalogologo ʼi muʼa ʼo tona tagata fai kosi, pea ʼe mole ina ʼavahi tona gutu. Lolotoga tona fakalainoaʼi neʼe toʼo iā te ia te fakamāu. Ko ai koa ʼaē kā ina fakamatala anai te ʼu meʼa fuli ʼo tona taʼiake? Koteʼuhi kua toʼo tona maʼuli ʼi te kele.”—Gāue 8:32, 33; Isaia 53:7, 8.

Ko te tagata faifekau ʼaia neʼe ina fehuʼi fēnei age kiā Filipo, ʼaē neʼe ko he Kilisitiano kua fakapotopoto mo mahino lelei ki te Tohi-Tapu: “Ko ai koa ʼaē ʼe talanoa ki ai te polofetā? ʼE talanoa koa ia kiā ia totonu peʼe ki he tahi tagata?” (Gāue 8:34) Ko te tagata Etiopea loto fakamālotoloto ʼaia neʼe kua ʼalu ki Selusalemi moʼo tauhi, pea neʼe lagi faikole ke ina maʼu he takitaki. ʼE mahino ia, neʼe lolotoga lautohi fakamālotoloto pea ʼaki he agavaivai. Kae neʼe mole heʼeki lava mahino te tagata faifekau ʼaia ki te koga Tohi-Tapu ʼaē neʼe ina lau. ʼAki he agavaivai, neʼe ina kole kiā Filipo ke tokoni age. ʼI te fiafia ʼaupitō ʼa te tagata ʼi te fakamahino ʼaē neʼe fai age e Filipo, neʼe uga ai ia ia ke liliu ko he Kilisitiano.—Gāue 8:35-39.

ʼE kei hoko atu pē e te kau Fakamoʼoni ʼa Sehova ia te gāue ʼaē neʼe fai e Filipo pea mo ʼihi age Kilisitiano ʼo te ʼuluaki sēkulō. Iā fenua e 235, ko te kau Fakamoʼoni ʼe natou tokoni ʼaki he lotolelei ki te hahaʼi, ke natou mahino ki te ʼu manatu ʼaē ʼe akoʼi moʼoni mai ʼi te Tohi-Tapu. ʼE natou fai te faʼahi ʼaia ʼaki he ako Tohi-Tapu. Ko te faʼahiga fai ʼaia ʼo te ako Tohi-Tapu ʼe fakaʼuhiga ki te vakavakaʼi pe koteā ʼaē ʼe ʼui ʼi te Tohi-Tapu ʼo ʼuhiga mo he manatu tāfito.a—Vakaʼi ia te fakamatala ʼaē ʼe ʼātakai “Ko He ʼu Tali ʼe Tō Tonu Mo Te ʼu Fehuʼi Fakatohi-tapu.”

“Neʼe Tali Te Tohi-Tapu Ki Taku ʼu Fehuʼi Fuli”

Ko Steven, mo Valvanera, pea mo Jo-Anne ʼaē neʼe tou talanoa ki ai ʼi te ʼuluaki ʼalatike, neʼe natou kamata ako te Tohi-Tapu mo te kau Fakamoʼoni ʼa Sehova. ʼE ʼui fēnei e Steven: “Neʼe au punamaʼuli ʼaki pē taku fakatatau ʼaē ʼo he ʼu pelesepeto Fakatohi-tapu peʼe ko he ʼu fakamatala, neʼe feala aipē ke au maʼu ʼi te Tohi-Tapu ia te tali tonu ʼo ʼuhiga mo he meʼa. ʼI muʼa ʼo taku ako te Tohi-Tapu, neʼe mole heʼeki he tahi neʼe kua ina fakahā mai, peʼe feafeaʼi te fai ʼo te faʼahi ʼaia. Neʼe au maʼu ia he toe lotofīmālie ʼi taku ʼiloʼi ʼaē, ʼe mole tuʼu ʼi te Tohi-Tapu he ʼu fihi ki he ʼu kihiʼi meʼa noa pē pea mole kita maʼu ai he ʼu manatu ʼe fefakafeagaiʼaki.”

ʼE toe fēia mo te manatu ʼa Valvanera. ʼE ina ʼui fēnei: “Ko te ʼu manatu fuli ʼe felōgoi lelei pea mo fefakahoahoa lelei. Neʼe mahino kiā au, ʼe mole gata pē taku tui ki te moʼoni ʼo te ʼu manatu ʼuhi heʼe ʼui e ‘te ’Ēkelesia’ ʼe moʼoni, kae neʼe au tui kiai, he neʼe ʼi ai tona ʼu fakamahino lelei kiā faʼahi fuli pē.” ʼE ʼui fēnei e Jo-Anne: “ ʼUhi ʼaē neʼe tali te Tohi-Tapu ki taku ʼu fehuʼi fuli, neʼe au fonu ʼi te manavasiʼi, ko he toe fakaʼapaʼapa lahi kiā Ia ʼaē neʼe ina foaki mai te Tohi-Tapu, he neʼe ʼiloʼi fakatomuʼa e te ʼAtua te ʼu faʼahi ʼaia, ʼo ina tohi he ʼu tali ʼe tō tonu mo te ʼu fehuʼi fuli pē ʼaē ʼe feala ke fai e he tahi.”

ʼE kotou ʼiloʼi koa he Fakamoʼoni ʼa Sehova? He koʼē ʼe mole kotou fehuʼi age peʼe feafeaʼi te fai ʼo te taʼi ako ʼaia? Kapau ʼe mole kotou ʼiloʼi he Fakamoʼoni ʼa Sehova, kotou faitohi ki te tuʼasila ʼi te ʼu tuʼasila ʼaē ʼe tuʼu ʼi te pāsina 4 ʼo te nusipepa ʼaenī. ʼE kotou mahino anai ki te Folafola ʼa te ʼAtua ʼaki te tokoni ʼa te laumālie māʼoniʼoni ʼo te ʼAtua, mo kapau ʼe kotou toʼo te ʼu manatu hala ʼaē ʼe kotou maʼu ʼi tokotou ʼatamai ʼo ʼuhiga mo te Tohi-Tapu, pea mokā tokoni atu he tahi. ʼE kotou lava mahino ki te Tohi-Tapu!

[Nota]

[Talanoa ʼo te pasina 6]

Ko He ʼu Tali ʼe Tō Tonu Mo Te ʼu Fehuʼi Fakatohi-tapu

Ko he ʼu kupu tāfito ʼe fai palalau kiai te kau Fakamoʼoni ʼa Sehova mokā natou fai te ʼu ako Tohi-Tapu:

• Koteā te fakatuʼutuʼu ʼa te ʼAtua ʼo ʼuhiga mo te kele?

• ʼE ʼifea te kau mate?

• ʼE tou māʼuʼuli koa ʼi “te ʼu ʼaho fakamuli”?

• He koʼē koa ʼe fakagafua e te ʼAtua te ʼu mamahi?

• Koteā ʼaē ʼe feala ke au fai ke maʼuli fiafia toku fāmili?

[Fakamatala ʼo te pasina 7]

Ke feala hakotou mahino ki te Tohi-Tapu . . . kotou kole ia te laumālie ʼo te ʼAtua, kotou toʼo te ʼu manatu hala ʼaē ʼe kotou maʼu ʼi tokotou ʼatamai ʼi te temi ʼaē ʼe kotou lau ai te Tohi-Tapu, pea kotou tali ke tokoni atu niʼihi