Te Tokoni Ke Kita Mahino Ki Te Tohi-Tapu
ʼE MOLE ʼi ai he tahi tohi ʼe tatau mo te Tohi-Tapu. ʼE fakahā e tona ʼu tagata faitohi neʼe takitaki nātou e te laumālie maʼoniʼoni ʼo te ʼAtua, pea ʼe fakamoʼoni ki te faʼahi ʼaia te ʼu manatu ʼaē ʼe tuʼu ʼi loto. (2 Timoteo 3:16) ʼI te ʼu meʼa ʼaē ʼe fakahā mai e te Tohi-Tapu, ʼe tou maʼu ai pe neʼe feafeaʼi te kamataʼaga ʼo te malamanei, pe koʼe neʼe fakatupu tatou, pea koteā te ka haʼu ʼo te malamanei. ʼE mahino papau ia ʼe ko he tohi ʼe tonu ke tou lau!
Lagi neʼe kua koutou ʼahiʼahi lau te Tohi-Tapu kae ʼe mata faigataʼa hakotou mahino kiai. Lagi ʼe mole koutou ʼiloʼi peʼe koutou kumi ʼi fea he ʼu tali ki ʼakotou ʼu fehuʼi. Kapau koia, pea ʼe mole ko koutou tokotahi pe. Neʼe feiā mo te tagata neʼe maʼuli ʼi te ʼuluaki sēkulō. Neʼe fagona te tagata ʼaia ʼi te saliote, neʼe haʼu mai Selusalemi ki tona fenua ko Etiopea. Neʼe lau leʼo lahi e te ofisie Etiopea ʼaia te lea faka polofeta ʼo te tohi ʼo Isaia, neʼe tohi kua hili kiai taʼu e fitugeau.
Fokifā pe, neʼe ʼalofa age kia ia te tagata neʼe lele ia tafa ʼo te saliote. Neʼe ko Filipo, ko te tisipulo ʼa Sesu, pea neʼe ina fehuʼi fēnei age ki te tagata Etiopea: “Pe e ke mahino kia mea e ke lau?” Pea tali age maʼa te tagata Etiopea: “O feafeai haku mahino, e mole he tahi ke ina taki au?” Pea neʼe ina fakaafe ia Filipo ke heka age ki te saliote. Neʼe fakamahinohino age e Filipo te ʼuhiga ʼo te vaega ʼaē neʼe ina lolotoga lau pea neʼe ina faka mafola age “te Logolelei o Sesu.”—Gaue 8:30-35.
Ohage ko te tokoni ʼaē neʼe fai e Filipo kua fualoa atu ki te tagata Etiopea ke mahino ki te Folafola ʼa te ʼAtua, ʼe toe feiā mo te tokoni ʼa te kau Fakamoʼoni ʼa Sehova ki te hahaʼi ke nātou mahino ki te Tohi-Tapu ia ʼaho nei. ʼE nātou fiafia anai ʼi hanatou tokoni atu kia koutou. ʼI te agamāhani ʼe lelei ke fai he fakatuʼutuʼu moʼo ako te Tohi-Tapu, ke kamata ako te ʼu ʼuluaki akonaki ʼo te Tohi-Tapu. (Hepeleo 6:1) Mokā kua koutou tuputupu leva, ʼe feala anai hakotou toʼo te meʼa ʼaē ʼe higoaʼi e te ʼapositolo ko Paulo ko te “meakai fefeka”—ʼe ko he ʼu moʼoni ʼe loloto age. (Hepeleo 5:14) Tatau aipe pe ko te Tohi-Tapu ʼaē ʼe koutou lolotoga ako, kae ʼe feala ke koutou kumi pea mo mahino ki te ʼu vaega faka tohi-tapu ʼo ʼuhiga mo he ʼu faʼahiga fehuʼi kehekehe, ʼaki he fakaʼaogaʼi ʼo te tahi ʼu tohi faka Tohi-Tapu.
ʼE fakalogo kia koutou te temi pea mo te koga meʼa ʼaē ʼe feala ke fai ai te ako. Ko ʼihi ʼe fai tanatou ako ʼi te telefoni. ʼE mole fai te ako ʼi he faleako, kae ʼe ko he fakatuʼutuʼu ʼe fai mo te hahaʼi takitokotahi, ʼo mulimuli pe ki tokotou ʼaluʼaga pea mo tokotou maʼuli. ʼE mole totogi te ako ʼaia. (Mateo 10:8) ʼE mole fai he sivi, pea ʼe mole koutou loto hoha anai. ʼE koutou maʼu anai he ʼu tali ki ʼakotou ʼu fehuʼi, pea ʼe koutou ako anai peʼe feafeaʼi hakotou fakaōvi ki te ʼAtua. Kae he koʼe koa ʼe tonu ke koutou ako te Tohi-Tapu? Koutou fakatokagaʼi te ʼu tupuʼaga ʼaē ʼe koutou lava fiafia ai ʼi tokotou maʼuli ʼi takotou ako te Tohi-Tapu.