Kotou Fakaovi Ki Te ʼAtua
“Ko Au Ia Sehova Tokotou ʼAtua ʼe Au Māʼoniʼoni”
“MĀʼONIʼONI, māʼoniʼoni, māʼoniʼoni ia Sehova ʼAtua.” (Fakahā 4:8) ʼAki te ʼu palalau ʼaia, ʼe fakamahino ʼi te Tohi-Tapu ko Sehova ʼe māʼoniʼoni, ko tona fakaʼuhiga ʼe maʼa pea mo faitotonu ʼi hona ʼaluʼaga ʼe māʼoluga ʼaupitō. ʼE mole he pikipikiga ʼo te ʼAtua pea mo te agahala; ʼe mole feala ke fakahalaʼi peʼe ke ʼulihi ia ia e te agahala. Ko tona fakaʼuhiga koa ʼe mole feala anai ki te hahaʼi agahala ke natou felōgoi ʼi he temi mo te ʼAtua māʼoniʼoni? ʼE mole ko tona fakaʼuhiga ʼaia! Tou vakaʼi age muʼa ia te ʼamanaki ʼaē ʼe feala ke tou maʼu ʼi te ʼu palalau ʼaē ʼe tuʼu iā Levitike kāpite 19.
Neʼe ʼui fēnei age e Sehova kiā Moisese: “Palalau ki te hahaʼi fuli ʼo te ʼu foha ʼo Iselaele.” Ko te ʼu folafola ʼaē neʼe fai age leva e Sehova ki muli age, neʼe fakaʼuhiga ia ki te hahaʼi fuli ʼo te puleʼaga. Koteā ʼaē neʼe ʼui age e Moisese kiā nātou? Neʼe hoko atu fēnei e te ʼAtua: “ ʼE tonu anai ke ke ʼui fēnei age kiā nātou: ‘ ʼE tonu ke kotou fakahā ʼe kotou māʼoniʼoni, koteʼuhi ko au ia Sehova tokotou ʼAtua ʼe au māʼoniʼoni.’ ” (Vaega 2) Neʼe tonu ke fakahā e te kau Iselaele takitokotahi ʼe natou māʼoniʼoni. Ko te ʼui ʼaē “ ʼe tonu,” ʼe fakahā ʼaki ai neʼe ko he fakatotonu, kae neʼe mole ko he meʼa neʼe feala ke natou filifili. Neʼe feala koa ki te ʼAtua ke ina kole he meʼa ʼe mole feala ki te hahaʼi ke natou fai?
Kotou tokagaʼi ko Sehova neʼe mole talanoa ki tona māʼoniʼoni ke fakatatau age he tahi kiai, kae ke feala ai ki te hahaʼi ke natou mahino ki te tupuʼaga ʼo tana foaki ʼaē ʼo te fakatotonu. ʼI tona fakahagatonu, neʼe mole ʼui age e Sehova ki tana kau ʼatolasio heʼe haohaoa ʼaē ʼi Iselaele ke natou māʼoniʼoni ohagē ko ia, ʼaē ko he faʼahi neʼe mole feala ia. Ko Sehova, “te Māʼoniʼoni ʼAupitō,” ʼe māʼoluga age ia tona māʼoniʼoni ʼi te hahaʼi fuli. (Tāʼaga Lea 30:3) Kae mai tona ʼaluʼaga ʼaē ko Sehova ʼe māʼoniʼoni, ʼe ina loto ke toe māʼoniʼoni mo tana kau ʼatolasio, ʼo mulimuli pē ki te fealagia ʼo te hahaʼi heʼe haohaoa. Ko te ʼu ʼaluʼaga fea ʼaē neʼe feala ai ke natou fakahā ʼe natou māʼoniʼoni?
ʼI tana ʼosi foaki ia te fakatotonu ʼaē ke natou māʼoniʼoni, ko Sehova ʼaki ia Moisese neʼe ina fakahā lelei ia te ʼu fakamaʼua ʼaē neʼe pipiki ki te ʼu faʼahi kehekehe ʼo te maʼuli. Ko te kau Iselaele takitokotahi neʼe tonu ke fakalogo ki te ʼu lēkula ʼaenī ʼo ʼuhiga mo te aga: Ke fakaʼapaʼapa ki te ʼu mātuʼa pea mo te hahaʼi mātutuʼa (te ʼu vaega 3, 32); ke ina tokagaʼi ia te tuli, mo te kivi, pea mo te hahaʼi ʼaē neʼe fakaʼofaʼofa (te ʼu vaega 9, 10, 14); ke gāue fakahagatonu pea ke mole fakapalatahi (te ʼu vaega 11-13, 15, 35, 36); pea mo ʼofa kiā ia ʼaē neʼe ʼatolasio kiā Sehova ohagē ko tona ʼofa kiā ia totonu. (Vaega 18) ʼI tana fakalogo ki te ʼu lēkula ʼaia pea mo ʼihi age lēkula, ko te tagata Iselaele neʼe ina “fakahā lelei ai ʼe māʼoniʼoni ki [tona] ʼAtua.”—Faka au 15:40.
ʼAki te fakatotonu ʼo ʼuhiga mo te māʼoniʼoni, ʼe tou ako ai te faʼahiga manatu ʼaē ʼa Sehova ʼAtua pea mo tona ʼu agaaga. Ohagē lā, ʼe tou ako ai, ke feala hatatou felōgoi lelei mo ia, ʼe tonu ke tou faiga fakamālotoloto ʼi totatou maʼuli ke tou muliʼi ia tana ʼu lēkula ʼo ʼuhiga mo te aga maʼa. (1 Petelo 1:15, 16) ʼI tatatou fakalogo ʼaē ki te ʼu lēkula ʼaia, ʼe tou maʼu ai ia te maʼuli ʼaē ʼe lelei tokotahi.—Isaia 48:17.
Ko te fakatotonu ʼaē ke tou māʼoniʼoni, ʼe toe hā ai ia te falala ʼaē ʼa Sehova ki tana kau ʼatolasio. ʼE mole fakamaʼua e Sehova ʼi he temi he ʼu meʼa ʼe mole tou lavaʼi. (Pesalemo 103:13, 14) ʼE ina ʼiloʼi ko tātou tagata, ʼaē neʼe faʼu tātou ki tona pāki, ʼe tou maʼu iā tātou ia te fealagia ʼaē ke tou māʼoniʼoni, ʼo mulimuli pē foki ki totatou ʼu fealagia. (Senesi 1:26) ʼE kotou lotomālohi koa ke kotou ako lahi age peʼe feafeaʼi hakotou fakaovi ki te ʼAtua māʼoniʼoni, ia Sehova?
[Paki ʼo te pasina 23]
ʼE tou maʼu iā tātou ia te fealagia ʼaē ke tou māʼoniʼoni