Ke Tou Maʼu Ia Te ʼu Koloa ʼAē “ʼe Fufū Fakalelei Iā Te Ia”

“ ʼE fufū fakalelei iā te ia te ʼu koloa fuli ʼo te poto pea mo te ʼatamai mālama.”—KOL. 2:3.

1, 2. (a) Koteā te ʼu koloa ʼaē neʼe maʼu ʼi te taʼu 1922, pea kua tuku nei ʼifea? (b) Koteā te fakaafe ʼe fai e te Folafola ʼa te ʼAtua ki te hahaʼi fuapē?

KĀ MAʼU he ʼu koloa neʼe fufū, pea ʼi te agamāhani ʼe ko he ʼu logo ʼe maʼuhiga ʼaupitō. Ohagē lā ʼi te taʼu 1922, ko te tagata alekeoloke Pilitānia ko Howard Carter neʼe gāue kinakina iā taʼu e hogofulu tupu ʼi te ʼu ʼaluʼaga faigataʼa, neʼe ina maʼu leva ia te mātaga fakaofoofo, neʼe ko te falemaka fakahau ʼo te Falaone ko Toutankhamon, pea neʼe tānaki ai te ʼu naunau e teitei 5 000.

² Logolā te taulekaleka ʼaupitō ʼo te ʼu koloa ʼaia neʼe maʼu e Carter, kae ʼe lahi ʼi te ʼu koloa ʼaia kua tuku nei ʼi te ʼu fale tānakiʼaga mātaga, pe neʼe toʼo e niʼihi ʼe natou tānaki ia te ʼu taʼi faʼahiga koloa ʼaia. ʼE lagi ʼi te hisitolia ʼo te mālamanei ʼe maʼuhiga peʼe matalelei te ʼu koloa ʼaia, kae ki totatou maʼuli takitokotahi ʼe mole hona ʼaoga peʼe mole hona fua. Kae ko te Folafola ʼa te ʼAtua ʼe ina fakaafe tātou ke tou kumi ia te ʼu koloa ʼe ʼaoga moʼoni ki totatou maʼuli. Pea ko te fakaafe ʼaia, ʼe fai ki te hahaʼi fuapē, pea ko tona ʼu lelei ʼe laka maumau age ia ʼi te ʼu koloa fuli ʼe feala ke kita maʼu.—Lau ia Tāʼaga Lea 2:1-6.

3. Ko te ʼu koloa fea ʼaē ʼe fakalotomālohiʼi e Sehova tana kau ʼatolasio ke natou kumi ke fua lelei ki tonatou maʼuli?

³ Tou vakaʼi age muʼa, te maʼuhiga ʼo te ʼu koloa ʼaē ʼe fakalotomālohiʼi e Sehova ia tana kau ʼatolasio ke natou kumi. ʼI te ʼu koloa ʼaia, ʼe ʼi ai “te manavasiʼi kiā Sehova,” ʼaē ʼe feala ke liliu ko he puipui pea mo he haofakiʼaga kiā tātou ʼi te ʼu temi faigataʼa. (Pes. 19:9) Ko te maʼu ʼo “te ʼatamai mālama ʼo ʼuhiga mo te ʼAtua,” ʼe ina fakafealagia ki he tahi ke ina maʼu ia te toe pilivilēsio ʼe lahi tokotahi, ʼaē ke felōgoi mo te Māfimāfi. Pea ʼaki te ʼu koloa ʼaē neʼe foaki e te ʼAtua ʼaē ko te poto, mo te ʼatamai mālama, pea mo te fakasiosio tonu, ʼe feala ai anai ke tou fakatokatoka totatou ʼu fihifihia pea mo totatou ʼu hoha ʼo te ʼaho fuli. (Taag. 9:10, 11) ʼE tou lava maʼu feafeaʼi ia te ʼu taʼi koloa maʼuhiga ʼaia?

Ke Tou Maʼu Te ʼu Koloa Fakalaumālie

4. ʼE tou lava maʼu feafeaʼi ia te ʼu koloa ʼaē ʼe fakapapauʼi mai e te ʼAtua?

⁴ Ko te kau alekeoloke pea mo te hahaʼi fai kumi, ʼe fai tanatou ʼu kumi ʼi te ʼu potu fuli ʼo te kele, kae kiā tātou ʼe tou ʼiloʼi lelei pē ia te tukuʼaga ʼo te ʼu koloa fakalaumālie. Ko te Folafola ʼa te ʼAtua ʼe hagē ko he mape moʼo kumi he koloa, ʼe ina fakahā mai te koga meʼa totonu ʼaē ʼe feala ai anai ke maʼu ia te ʼu koloa ʼaē neʼe fakapapauʼi mai e te ʼAtua. ʼO ʼuhiga mo Kilisito, neʼe ʼui fēnei e te ʼapositolo ko Paulo: “ ʼE fufū fakalelei iā te ia te ʼu koloa fuli ʼo te poto pea mo te ʼatamai mālama.” (Kol. 2:3) Kā tou lau te ʼu palalau ʼaenī, pea ʼe lagi tou feʼekeʼaki fēnei: ‘He koʼē ʼe tonu ke tou kumi ia te ʼu koloa ʼaia? ʼE fakaʼuhiga feafeaʼi tona ‘fufū ʼaē iā’ Kilisito? Pea ʼe feafeaʼi hatatou maʼu ia te ʼu koloa ʼaia?’ Moʼo tali ki te ʼu fehuʼi ʼaenī, tou vakaʼi age muʼa te fakaʼuhiga ʼo te ʼu palalau ʼa te ʼapositolo.

5. He koʼē neʼe faitohi Paulo ʼo ʼuhiga mo te ʼu koloa fakalaumālie?

⁵ Neʼe fai e Paulo tana ʼu palalau ʼaia ki tona ʼu tehina mo tuagaʼane ʼi Kolose. Neʼe ina ʼui age kiā nātou, neʼe tonu ke faiga mālohi ia maʼa nātou, ke ‘fakafīmālie ʼonatou loto pea mo natou logotahi ʼi te ʼofa.’ (Lau ia Kolose 2:1, 2.) He koʼē neʼe hoha ki te faʼahi ʼaia? ʼE hā mai, neʼe mahino kiā Paulo neʼe feala pē ke fakahalaʼi ia te ʼu tehina ʼo Kolose e niʼihi pē iā nātou, ʼaē neʼe natou fakamaʼuhigaʼi he ʼu filosofia Fakakeleka, pe neʼe natou loto ke fakaʼaogaʼi te Lao ʼa Moisese. Neʼe ina fakatokaga mālohi fēnei te ʼu tehina: “Kotou tōkakaga, heʼe lagi feala ke ʼi ai he tahi ʼe ina toho anai koutou ki he hele, ʼaki te filosofia pea mo te ʼu kākā ʼaē ʼe vaʼiganoa, ʼo mulimuli ki te talatuku fakatagata, ʼo mulimuli ki te ʼu meʼa tāfito ʼo te mālamanei, kae mole mulimuli kiā Kilisito.”—Kol. 2:8.

6. He koʼē ʼe tonu ke tou tokagaʼi ia te tokoni ʼa Paulo?

⁶ Iā ʼaho nei, ʼe tou tau mo te ʼu fakahala fēia mai iā Satana pea mo tana mālama agakovi. Ko te filosofia ʼo te mālamanei, ʼaē ʼi te agamāhani ʼe ina fakamaʼuhigaʼi fau te matagafua ʼo te tagata iā meʼa fuli peʼe ina akoʼi te akonaki ʼo te evolisio, ʼe ina faʼufaʼu te faʼahiga manatu ʼa te tagata, tana ʼu aga ʼaē ʼe tonu ke fai, mo tana ʼu fakatuʼutuʼu pea mo te ʼu meʼa ʼaē ʼe maʼuhiga ki ai. Ko te lotu hala ʼe lagolago mālohi ki te ʼu ʼaho lalahi ʼaē ʼe fai ʼi te mālamanei. ʼE lahi te ʼu polokalama ʼi te televisio, mo te ʼu ʼata, mo te musika, ʼe natou fakatupu ia te ʼu holi ʼo te kakano ʼaē ʼe kovi, pea ʼe lahi mo te ʼu naunau ʼi te Neti ʼe fakatupu tuʼutāmaki moʼoni ki te kau tūpulaga pea mo te hahaʼi. Ko hata sio pea mo logo tuʼumaʼu ki te ʼu meʼa ʼaia pea mo ʼihi age meʼa ʼo te mālamanei, ʼe feala aipē he fakahalaʼi ʼo totatou loto pea mo tatatou aga ki te takitaki ʼaē ʼe foaki mai e Sehova, ʼo tupu ʼaki ai hatatou mole kei tui mālohi ki te maʼuli moʼoni. (Lau ia 1 Timoteo 6:17-19.) ʼE hā lelei mai, ʼe tonu ke tou mahino ki te fakaʼuhiga ʼo te ʼu palalau ʼa Paulo ʼaē ki te kau Kolose pea mo fakalogo lelei ki tana tokoni, mo kapau ʼe mole tou fia tō ki te ʼu hele ʼa Satana.

7. Koteā te ʼu meʼa e lua ʼaē neʼe ʼui e Paulo ʼe tokoni anai ki te kau Kilisitiano ʼo Kolose?

⁷ Kā tou toe liliu mai ki te ʼu palalau ʼaē ʼa Paulo ki te kau Kolose, ʼe tou fakatokagaʼi ʼi tana ʼosi talanoa ki te meʼa ʼaē ʼe ina tuʼaniaʼi, neʼe talanoa leva ia kiā meʼa e lua, ʼe tokoni anai kiā nātou ke natou maʼu te lotofīmālie pea mo te logotahi ʼi te ʼofa. ʼUluaki, neʼe talanoa ki te “tui papau ʼo tonatou ʼatamai.” Neʼe ʼaoga ke natou tui papau, neʼe totonu tanatou mahino ʼaē ki te ʼu vaega Fakatohi-tapu, ke fakatafito ai tanatou tui ki he tafitoʼaga ʼe moʼoni. (Hep. 11:1) Koia, neʼe talanoa ai “ki he ʼatamai mālama totonu ʼo ʼuhiga mo te ʼu meʼa fakalilo ʼa te ʼAtua.” Neʼe mole tonu ke gata pē tonatou ʼatamai mālama ʼi te ʼu ʼuluaki moʼoni tāfito pea neʼe tonu ke natou mahino lelei ki te ʼu meʼa loloto ʼa te ʼAtua. (Hep. 5:13, 14) ʼE toe ʼaoga foki kiā tātou ia te tokoni lelei ʼaia neʼe fai ki te kau Kolose! ʼE feafeaʼi hatatou maʼu te taʼi tui papau ʼaia pea mo te taʼi ʼatamai mālama ʼaia? Neʼe fakahā e Paulo te manatu tāfito ʼi tana palalau maʼuhiga neʼe ina fai ʼo ʼuhiga mo Sesu Kilisito: “ ʼE fufū fakalelei iā te ia te ʼu koloa fuli ʼo te poto pea mo te ʼatamai mālama.”

Te ʼu Koloa ‘ ʼe Fufū Iā’ Kilisito

8. Kotou fakamahino te fakaʼuhiga ʼo te kupusiga palalau ‘ ʼe fufū iā’ Kilisito.

⁸ Ko te ʼui ʼaē ko te ʼu koloa fuli ʼo te poto pea mo te ʼatamai mālama ‘ ʼe fufū iā’ Kilisito, ʼe mole fakaʼuhiga leva ʼe mole feala hona maʼu. Ko tona fakaʼuhiga, ʼe tonu ke tou faiga mālohi mo kapau ʼe tou fia maʼu, pea ke tou tokagaʼi tuʼumaʼu ia Sesu Kilisito. ʼE ʼalutahi mo te ʼu palalau ʼaenī neʼe ʼui e Sesu: “Ko au ko te ala pea mo te moʼoni pea mo te maʼuli. ʼE mole he tahi ʼe haʼu ki te Tamai ʼi tuʼa atu iā te au.” (Soa. 14:6) ʼEī, ke tou maʼu te ʼatamai mālama ʼo ʼuhiga mo te ʼAtua, ʼe tonu ke tou maʼu e tātou totonu ia te tokoni pea mo te takitaki ʼaē ʼe foaki e Sesu.

9. Koteā te ʼu tuʼulaga ʼaē neʼe foaki age kiā Sesu?

⁹ ʼO mole gata pē ʼi tona tuʼulaga ʼaē ko “te ala,” kae neʼe ʼui e Sesu ʼe ko ia “te moʼoni pea mo te maʼuli.” ʼE hā mai ai, ko tona tuʼulaga ʼe maʼuhiga ʼaupitō age. ʼE mole gata pē ʼi tana haga ʼaē ʼo fakaovi tātou ki te Tamai, kae ʼe toe maʼu e Sesu ia te ʼu tuʼulaga ʼe maʼuhiga ʼo ʼuhiga mo tata mahino ʼaē ki te moʼoni ʼo te Tohi-Tapu pea mo maʼu te maʼuli heʼegata. ʼI tona fakahagatonu, ʼe fufū iā te ia te ʼu moʼoni fakalaumālie ʼe maʼuhiga ʼaupitō, pea ʼe feala ke maʼu e nātou ʼaē ʼe natou ako fakamālotoloto te Tohi-Tapu. Tou vakaʼi age muʼa he ʼu moʼoni ʼe malave fakahagatonu ki totatou kā haʼu pea mo tatatou ʼu felōgoi ʼaē mo te ʼAtua.

10. Koteā ʼaē ʼe tou lava ako ʼo ʼuhiga mo Sesu mai te koga tohi ʼo Kolose 1:19 pea mo te 2:9?

¹⁰ ‘ ʼE nofo iā te ia te kātoa ʼo te kalitātē fakaʼatua.’ (Kol. 1:19; 2:9) Mai tona ʼaluʼaga ʼaē, neʼe nofo ʼi he toe temi loaloaga mo tana Tamai ʼaē ʼe ʼi selō, ʼe gata pē kiā Sesu ʼe ina ʼiloʼi lelei te ʼulugaaga ʼo te ʼAtua pea mo tona finegalo. Lolotoga tana minisitelio ʼi te kele, neʼe akoʼi e Sesu ki te hahaʼi ia te ʼu akonaki ʼaē neʼe akoʼi age e tana Tamai kiā te ia, pea ʼi tana ʼu aga neʼe ina fakahā ia te ʼu kalitātē ʼaē neʼe akoʼi age e tana Tamai. Koia ʼaē neʼe feala ai ke ʼui fēnei e Sesu: “Ko ʼaē kua sio kiā te au, kua toe sio foki ia ki te Tamai.” (Soa. 14:9) Ko te poto fuli pea mo te ʼatamai mālama ʼo ʼuhiga mo te ʼAtua ʼe fufū peʼe nofo iā Kilisito, pea ʼe mole he tahi age ala ʼe lelei maʼa tātou, ke tou ako ʼo ʼuhiga mo Sehova, gata pē mokā tou ako fakalelei ia meʼa fuli ʼe tou lavaʼi ʼo ʼuhiga mo Sesu.

11. Koteā te pikipikiga ʼo Sesu pea mo te ʼu lea fakapolofetā Fakatohi-tapu?

¹¹ “Ko te ʼu lea fakapolofetā ʼaē neʼe fai ʼaki te takitaki ʼa te laumālie māʼoniʼoni, neʼe fai moʼo fakamoʼoni kiā Sesu.” (Fakh. 19:10) ʼE hā mai ʼi te ʼu palalau ʼaenī, ko Sesu ʼe ko te tafitoʼaga ʼo te fakahoko ʼo te ʼu tuʼuga lea fakapolofetā Fakatohi-tapu. Mai te ʼuluaki lea fakapolofetā ʼa Sehova, ʼaē ʼe tuʼu iā Senesi 3:15, ʼo aʼu ki te ʼu meʼa fakakolōlia ʼaē neʼe hā ʼo te tohi Fakahā, hoki feala hatatou mahino lelei ki te ʼu lea fakapolofetā Fakatohi-tapu mokā ʼe tou mahino ki te tuʼulaga ʼo Sesu ʼi tona Puleʼaga Fakamēsia. ʼE tou mahino ai leva, pe koʼē ko nātou ʼaē ʼe mole natou tali ia Sesu ko te Mēsia ʼaē neʼe fakapapauʼi mai, ʼe mole feala hanatou mahino ki te ʼu tuʼuga lea fakapolofetā ʼaē ʼe tuʼu ʼi te ʼu Koga Tohi-Tapu Fakahepeleo. ʼE tou toe mahino ai, pe koʼē kiā nātou ʼaē ʼe mole natou fakamaʼuhigaʼi ia te Koga Tohi-Tapu Fakahepeleo, ʼaē ʼe maʼu ai te ʼu tuʼuga lea fakapolofetā ʼo ʼuhiga mo te Mēsia, ʼe natou fakaʼuhiga pē ia Sesu ko he tagata ʼe maʼuhiga tokotahi, ʼo gata aipē.—2 Ko. 1:20.

12, 13. (a) ʼE liliu feafeaʼi ia Sesu ko “te mālama ʼo te mālamanei”? (b) ʼI tanatou kua ʼāteaina mai te fakapōʼuli fakalotu, koteā ʼaē kua fakamaʼua kiai te ʼu tisipulo ʼa Kilisito?

¹² “Ko au ko te mālama ʼo te mālamanei.” (Lau ia Soane 8:12; 9:5.) Fualoa iā muʼa ʼo te tupu tagata ʼa Sesu ʼi te kele, neʼe fakakikite fēnei e te polofetā ko Isaia: “Ko te hahaʼi ʼaē neʼe haʼele ʼi te fakapōʼuli neʼe natou sio ki he mālama lahi. Kae ko nātou ʼaē neʼe natou nonofo ʼi te fenua ʼo te malu loloto, kiā nātou neʼe tapa ki ai te mālama.” (Isa. 9:2) Neʼe fakamahino e te ʼapositolo ko Mateo, ko Sesu neʼe ina fakahoko ia te lea fakapolofetā ʼaia ʼi te temi ʼaē neʼe kamata fai fakamafola ai pea mo ina ʼui fēnei: “Kotou fakahemala, he kua fakaovi mai te puleʼaga ʼo selō.” (Mat. 4:16, 17) Ko te minisitelio ʼa Sesu neʼe ina foaki ki te hahaʼi ia te mālama fakalaumālie pea mo fakaʼāteaina nātou mai te nofo pōpula ki te ʼu akonaki ʼo te ʼu lotu hala. Neʼe ʼui fēnei e Sesu: “Neʼe au haʼu ohagē ko he mālama ki te mālamanei, koteʼuhi ko ʼaē ʼe tui kiā te au, ke ʼaua naʼa nofo ʼi te fakapōʼuli.”—Soa. 1:3-5; 12:46.

¹³ Hili te ʼu taʼu ki muli age, neʼe ʼui fēnei e te ʼapositolo ko Paulo ki tona ʼu tehina: “Neʼe kotou fakapōʼuli ʼi muʼa atu, kae ʼi te temi nei kua kotou mālama ʼo ʼuhiga mo te ʼAliki. Kotou haga haʼele ohagē ko ni fānau ʼo te mālama.” (Efe. 5:8) ʼI tanatou kua ʼāteaina mai tanatou nonofo pōpula ʼi te ʼu fakapōʼuli fakalotu, kua fakamaʼua ki te kau Kilisitiano ke natou haʼele ohagē ko ni fānau ʼo te mālama. ʼE ʼalutahi mo te ʼu palalau ʼaenī neʼe fai e Sesu ki tana ʼu tisipulo ʼi te Akonaki ʼi te Moʼuga: “Ke . . . mū . . . tokotou mālama ʼi muʼa ʼo te hahaʼi, koteʼuhi ke natou sio ki ʼakotou gāue lelei pea natou fakakolōlia ai ki takotou Tamai ʼaē ʼe ʼi selō.” (Mat. 5:16) ʼE kotou leleiʼia koa te ʼu koloa fakalaumālie ʼaē neʼe kotou maʼu iā Sesu, ʼo tupu ʼaki hakotou fia fakahā ki niʼihi, ʼi takotou fai fakamafola pea ʼi takotou aga Fakakilisitiano?

14, 15. (a) Koteā ʼaē neʼe fakaʼaogaʼi kiai te ʼu ovi pea mo ʼihi manu ʼi te tauhi moʼoni ʼi te temi muʼa? (b) He koʼē ko Sesu ʼe ko he koloa makehe ʼi tona tuʼulaga ko “te ʼAkeno ʼo te ʼAtua”?

¹⁴ Ko Sesu ʼe ko “te ʼAkeno ʼo te ʼAtua.” (Soa. 1:29, 36) ʼI te Tohi-Tapu kātoa, neʼe maʼuhiga ia te ovi moʼo fakamolemole te ʼu agahala pea mo te fakaovi ʼa te hahaʼi ki te ʼAtua. Ohagē lā, ʼi te ʼosi tali ʼaē e Apalahamo ke ina mōlagaʼi tona foha ko Isaake, neʼe ʼui age ki ai ke ʼaua naʼa ina fai he meʼa ʼe kovi kiā Isaake pea neʼe foaki age ki ai te ʼakeno, peʼe ko he tao tagata. (Sen. 22:12, 13) ʼI te temi ʼaē neʼe fakaʼāteaina ai te kau Iselaele mai Esipito, neʼe kei maʼuhiga aipē ia te ovi, ʼi te temi leva ʼaia ʼo ʼuhiga mo te “Pāsikate ʼo Sehova.” (Eke. 12:1-13) Tahi ʼaē, ko te Lao ʼa Moisese neʼe ina fakafealagia te sākilifisio ʼo he ʼu manu kehekehe, ʼo kau ai te ʼu ovi pea mo te ʼu tao tagata.—Eke. 29:38-42; Lev. 5:6, 7.

¹⁵ ʼE mole he sākilifisio ʼi te ʼu sākilifisio fuli ʼaia, neʼe ina lava fakaʼāteaina ʼo talu ai te hahaʼi mai te agahala pea mo te mate. (Hep. 10:1-4) Tahi ʼaē faʼahi, ko Sesu ʼe ko “te ʼAkeno ʼo te ʼAtua ʼaē ʼe ina toʼo te agahala ʼo te mālamanei.” ʼAki pē te faʼahi ʼaia, ʼe liliu ai Sesu ko he koloa ʼe maʼuhiga age ʼi te ʼu koloa fuli kua feala ke maʼu ʼi te mālamanei. Koia, ʼe ʼaoga ai ke tou toʼo he temi moʼo akoʼi fakalelei te sākilifisio faitotogi pea mo tui tuʼumaʼu ki te fakatuʼutuʼu taulekaleka ʼaia. Kapau ʼe tou fai te faʼahi ʼaia, pea ʼe tou maʼu ai anai he tapuakina lahi pea mo he fakapale, maʼa te “kiʼi faga ovi” ia te kolōlia pea mo te fakaʼapaʼapa mo Kilisito ʼi te lagi pea ki te “tahi ʼu ovi” ia te maʼuli heʼegata ʼi te Palatiso ʼi te kele.—Luka 12:32; Soa. 6:40, 47; 10:16.

16, 17. He koʼē ʼe maʼuhiga ke tou mahino ki te tuʼulaga ʼo Sesu ko “te Tupuʼaga Tāfito ʼo tatatou tui, ia Ia ʼaē ʼe ina fakaaʼu ki tona lelei ʼaupitō.”

¹⁶ Ko Sesu ʼe ko te “Tupuʼaga Tāfito ʼo tatatou tui, ia Ia ʼaē ʼe ina fakaaʼu ki tona lelei ʼaupitō.” (Lau ia Hepeleo 12:1, 2.) ʼI te kāpite 11 ʼo Hepeleo, ʼe tou maʼu ai te akonaki maʼuhiga ʼa Paulo ʼo ʼuhiga mo te tui, ʼaē ʼe tou maʼu ai tona fakamahino lelei pea mo te lisi ʼo te ʼu tagata pea mo te ʼu fafine tui ohagē lā ko Noe, mo Apalahamo, mo Sala pea mo Laape. ʼI te manatuʼi e Paulo ia te ʼu ʼaluʼaga fuli ʼaia, neʼe ina fakalotomālohiʼi ai tona ʼu tehina mo tuagaʼane ke natou ‘sioʼi tuʼumaʼu ki te Tupuʼaga Tāfito ʼo tatatou tui, ia Ia ʼaē ʼe ina fakaaʼu ki tona lelei ʼaupitō: ia Sesu.’ He koʼē neʼe talanoa Paulo ʼo ʼuhiga mo Sesu?

¹⁷ Logolā ko te ʼu tagata mo fafine agatonu ʼaia ʼe talanoa ki ai te kāpite 11 ʼo Hepeleo neʼe natou maʼu ia te tui mālohi ki te fakapapau ʼa te ʼAtua, kae neʼe mole natou mahino kātoa peʼe fakahoko feafeaʼi anai e te ʼAtua ia tana ʼu fakapapau ʼaki te Mēsia pea mo te Puleʼaga. Ki te faʼahi leva ʼaia, ko tanatou tui neʼe mole kātoa. ʼIo, māʼia mo nātou ʼaē neʼe fakaʼaogaʼi e Sehova moʼo tohi ia te ʼu tuʼuga lea fakapolofetā ʼo ʼuhiga mo te Mēsia neʼe mole natou mahino kātoa ki te maʼuhiga ʼo te ʼu manatu ʼaē neʼe natou tohi. (1 Pet. 1:10-12) ʼAki pē ia Sesu ʼe feala ke lelei ʼaupitō ai tatatou tui, peʼe ke kātoa. ʼE ko he faʼahi maʼuhiga hatatou mahino fakalelei pea mo fakamoʼoni ki te tuʼulaga ʼo Sesu ko “te Tupuʼaga tāfito ʼo tatatou tui, ia Ia ʼaē ʼe ina fakaaʼu ki tona lelei ʼaupitō”!

Tou Haga Kumi

18, 19. (a) Fakahā he tahi age ʼu koloa maʼuhiga fakalaumālie ʼe fufū iā Kilisito. (b) He koʼē ʼe tonu ke tou haga sio kiā Sesu ʼo ʼuhiga mo te ʼu koloa fakalaumālie?

¹⁸ Neʼe tou vakaʼi pē ʼihi tuʼulaga maʼuhiga ʼo Sesu ʼi te fakatuʼutuʼu ʼa te ʼAtua moʼo haofaki ia te mālamanei. ʼE kei ʼi ai te tahi age ʼu koloa maʼuhiga ʼe fufū iā Kilisito. Kā tou maʼu ia te ʼu koloa ʼaia, pea ʼe tou maʼu ai anai te fiafia pea mo tona ʼu lelei. Ohagē lā, ko te ʼapositolo ko Petelo neʼe ina fakahigoaʼi Sesu ko te “Tupuʼaga Tāfito ʼo te maʼuli” pea mo “te fetuʼu ʼaho” ʼe malaga ake. (Gāue 3:15; 5:31; 2 Pet. 1:19) Pea ʼi te Tohi-Tapu ʼe fakaʼuhiga ia te kupu “Ameni” kiā Sesu. (Fakh. 3:14) ʼE kotou ʼiloʼi koa ia te ʼuhiga pea mo te maʼuhiga ʼo te tuʼulaga ʼaia? Ohagē ko tona ʼui e Sesu: “Kotou haga kumi, pea ʼe kotou maʼu anai.”—Mat. 7:7.

¹⁹ ʼE mole he tahi talu mai te kamata ʼo te hisitolia ʼo te tagata, ko tona maʼuli neʼe maʼuhiga ʼaupitō pea mo malave lahi ki totatou maʼuli fīmālie ohagē ko te maʼuli ʼaē ʼo Sesu. Iā ia ʼe maʼu ai te ʼu koloa fakalaumālie ʼe maʼu gafua pē e te hahaʼi fuli ʼaē ʼe natou kumi fakamālotoloto. ʼOfa pē ke kotou fiafia pea mo tapuakina kotou ʼi takotou maʼu te ʼu koloa ʼaē “ ʼe fufū fakalelei iā te ia.”

ʼE Kei Kotou Manatuʼi Koa?

• Ko te ʼu koloa fea ʼaē ʼe fakalotomālohiʼi te kau Kilisitiano ke natou kumi?

• He koʼē ko te tokoni ʼaē neʼe fai e Paulo ki te kau Kilisitiano ʼo Kolose ʼe kei ʼaoga pē kiā tātou ʼi te temi nei?

• Fakahā pea mo fakamahino ʼihi koloa ʼo te ʼu koloa fakalaumālie ‘ ʼe fufū iā’ Kilisito.

[Paki ʼo te pasina 11]

Ko te Tohi-Tapu ʼe hagē ko he mape ʼe ina taki tātou ki te ʼu koloa “ ʼe fufū fakalelei iā” Kilisito