ʼE Tou Maʼu Te ʼu Koloa Maʼuhiga Ke Tou Vaevae
1 ʼE mahu ʼi te Folafola ʼa te ʼAtua ia te ʼu koloa fakalaumālie ʼe maʼuhiga kiā tātou. (Pes. 12:6; 119:11, 14) ʼI te tahi lakaga, neʼe fakaʼaogaʼi e Sesu ia te ʼu lea fakatātā neʼe fakamatala ai ia te ʼu agaaga kehekehe ʼo te Puleʼaga, pea neʼe ina fehuʼi fēnei age ki tana kau tisipulo: “ ʼE kua kotou mahino lā ki te fakaʼuhiga ʼo te ʼu meʼa fuli ʼaia?” ʼI tanatou tali age “ ʼeī,” neʼe ina ʼui fēnei age kiā nātou: “Koia ko te tupuʼaga lā ʼaia ko te tagata faiakonaki fuli pē, kā kua ʼosi akonakiʼi ia ia ʼo ʼuhiga mo te puleʼaga ʼo selō, pea ʼe fakatatau ia ki he tagata, ki he pule ʼo he ʼapi, ʼe ina toʼo ki tuʼa mai tona koloa te ʼu meʼa foʼou pea mo te ʼu meʼa ʼāfea.”—Mat. 13:1-52.
2 Ko te ʼu moʼoni ʼo te Tohi-Tapu ʼaē neʼe tou ako ʼi tatatou kamata ako, ʼe feala ke fakaʼuhiga ohagē ko he ʼu koloa ʼāfea. ʼAki tatatou tuputupu ʼi tatatou ako ia te ʼu meʼa loloto ʼo te Folafola ʼa te ʼAtua, ʼe tou maʼu ai te tahi ʼu moʼoni ʼo te Tohi-Tapu, ʼe ko he ʼu koloa foʼou ʼaia kiā tātou. (1 Ko. 2:7) Pea ʼaki “te tagata kaugana agatonu mo poto” ʼe tou mahino ai ki te ʼu koloa foʼou.—Mat. 24:45.
3 ʼE maʼuhiga ʼaupitō kiā tātou ia te ʼu koloa fakalaumālie ʼaia, ʼaē ʼe ʼāfea pea mo ʼaē ʼe foʼou. ʼE uga ai tātou ke tou kumi ke akoʼi tātou pea ke tou liliu ko he kau faiako ʼo te Folafola ʼa te ʼAtua, ʼo tou vaevae lahi ki te hahaʼi ia te ʼu moʼoni maʼuhiga ʼaē neʼe tou ako.
4 Tou Ako Mai Te Faʼifaʼitaki ʼa Sesu: Neʼe fakahā e Sesu tana manatu ʼo ʼuhiga mo te ʼu koloa ʼaia, ʼo ina faiga lahi ai ke ina vaevae mo te hahaʼi. Māʼiapē lā mo te ʼu temi ʼaē neʼe gaʼegaʼe ai, neʼe mole gata tana toʼo mai ki tuʼa ia te ʼu koloa ʼaē mai tona “fale koloa.”—Soa. 4:6-14.
5 Ko te ʼofa ʼa Sesu kiā nātou ʼaē neʼe māsisiva ʼi te faʼahi fakalaumālie, neʼe ina uga ai ia ia ke ina vaevae ia te ʼu koloa ʼo te ʼu moʼoni ʼa te ʼAtua, ʼaē ʼe natou haofaki ia te ʼu maʼuli. (Pes. 72:13) Neʼe fakaʼofaʼofa ki te ʼaluʼaga ʼo nātou ʼaē neʼe ʼāhua ʼi te faʼahi fakalaumālie, ʼo uga ai ia ia ke ina ‘akonakiʼi age kiā nātou ia te ʼu tuʼuga meʼa.’—Mko. 6:34.
6 Tou Faʼifaʼitakiʼi Ia Sesu: Kapau ʼe maʼuhiga ʼaupitō kiā tātou ia te ʼu koloa ʼaē ʼe tou maʼu, pea ohagē ko Sesu, ʼe tou fia fakahā anai ki te hahaʼi ia te ʼu koloa fakalaumālie, ʼo tou fakahā age ʼi te Tohi-Tapu. (Taag. 2:1-5) Logolā ʼi ʼihi temi ʼe lagi tou gaʼegagaʼe, kae ʼe tou palalau anai ʼo ʼuhiga mo te ʼu moʼoni Fakatohi-tapu ʼaki he loto fiafia moʼoni. (Mko. 6:34) Ko totatou loto fakafetaʼi lahi ki te ʼu koloa ʼaē ʼe tou maʼu, ʼe ina uga ai anai tātou ke lahi tatatou gāue ʼi te minisitelio, ʼo tou kumi tuʼumaʼu ke lahi age tatatou vaevae ia te ʼu koloa ʼaia.