Te ʼu Fehuʼi ʼa Te Kau Lautohi
Koteā Tona Fakaʼuhiga ʼAē Ko Sesu Pea Mo Tana Tamai ʼe Nā Tahi?
Neʼe ʼui fēnei e Sesu: “Ko au pea mo te Tamai, ʼe tahi ia māua.” (Soane 10:30) ʼE fakaʼaogaʼi e ʼihi ia te vaega ʼaia moʼo fakamoʼoni ʼaki, ko Sesu pea mo tana Tamai ʼe ko te ʼu ʼipotasi e lua ʼo te Tahitolu. ʼE ko te fakaʼuhiga koa ʼaia ʼo te ʼu palalau ʼaē neʼe fai e Sesu?
Tou haga vakaʼi age muʼa ia te ʼu vaega ʼaē ʼe tuʼu ʼi muʼa atu ʼo te vaega ʼaia. ʼI te vaega 25, neʼe ʼui e Sesu neʼe ina fai te ʼu gāue ʼaki te huafa ʼo tana Tamai. ʼI te ʼu vaega 27 ki te 29, neʼe talanoa ʼo ʼuhiga mo te faga ovi fakatā, ʼaē neʼe foaki age e tana Tamai. Kanapau lā ko Sesu pea mo tana Tamai neʼe ko nāua ko he foʼi tokotahi peʼe nā tatau, neʼe feala pē ki te hahaʼi ʼaē neʼe fakalogo ki te ʼu palalau ʼaia ʼa Sesu ke mole natou faʼa mahino lelei kiai. ʼI tona fakahagatonu, neʼe fakaʼuhiga fēnei ia te ʼu palalau ʼa Sesu: ‘Ko taku Tamai pea mo au ʼe mā logotahi lelei, ʼo mole feala ki he tahi ke ina toʼo ia te faga ovi iā te au, ʼo toe fēia ʼe mole feala ki he tahi ke ina toʼo nātou mai taku Tamai.’ ʼE hagē pē ko he palalau ʼa he foha ʼe fai ki te ʼu fili ʼo tana tamai, ʼo ina ʼui fēnei: ‘Kapau ʼe kotou fai he meʼa ki taku tamai, pea ʼe hagē pē ʼe kotou fai mai ia te meʼa ʼaia kiā au.’ ʼE mole manatu anai ia he tahi, ko te foha pea mo tana tamai ʼe ko he foʼi tokotahi pē. Kae ʼe feala pē kiā tātou fuli ke tou mahino ki tanā felōgoi lelei ʼaupitō.
Ko Sesu pea mo tana Tamai, ia Sehova ʼAtua, ʼe nā “tahi” heʼe nā logotahi ʼo ʼuhiga mo te ʼu fakatuʼutuʼu pea mo te ʼu lēkula. Neʼe mole he temi neʼe fia maʼuli faʼifaʼitaliha ai Sesu mai te ʼAtua, ʼo mole hagē ia ko Satana te Tēvolo pea mo te ʼuluaki taumātuʼa ʼaē ko Atama mo Eva. Neʼe fakamahino fēnei e Sesu: “Ko te ʼAlo ʼe mole feala ke ina fai he meʼa ʼi tona loto faʼitaliha, kae ʼe ina fai pē te meʼa ʼaē neʼe sio ʼe fai e te Tamai. He ko meʼa fuli ʼaē ʼe ina fai e Ia nei, ʼe toe fai fēia pē e te ʼAlo.”—Soane 5:19; 14:10; 17:8.
Kae ko te noʼo mālohi ʼaia ʼo te logotahi ʼe mole fakaliliu ai ia te ʼAtua pea mo tona ʼAlo ko Sesu ʼo nā tatau. ʼE nā kehekehe. ʼE nā tahi maʼu tona ʼulugaaga. Ko Sesu ʼe ina maʼu te ʼu meʼa ʼaʼana ʼi tona loto, mo ʼana manatu, mo te ʼu meʼa neʼe hoko kiā ia totonu pea mo tona loto faʼitaliha. Kae neʼe ina filifili ko tona finegalo ke mulimuli ki te finegalo ʼo tana Tamai. Iā Luka 22:42, neʼe ʼui fēnei e Sesu: “Ke mole ko toku finegalo ʼaē ʼe tonu ke fai, kae ʼo koe ia.” ʼE mole ʼi ai anai he ʼuhiga ʼo te ʼu palalau ʼaia mo kanapau lā neʼe tatau ia tona finegalo mo ʼaē ʼo tana Tamai. Kanapau lā ko Sesu pea mo tana Tamai neʼe ko he foʼi tokotahi pē, he koʼē neʼe faikole Sesu ki te ʼAtua pea mo ina fakahā lelei ia tana mole ʼiloʼi ʼaē ia te ʼu meʼa neʼe ʼiloʼi ʼāteaina pē ia e tana Tamai?—Mateo 24:36.
ʼE lahi te ʼu lotu ko tona ʼu hahaʼi ʼe natou tauhi ki he ʼu ʼatua ʼe ʼui ʼe natou fihi pea mo tau mo tonatou fāmili totonu. Ohagē lā, ʼi te mitolosia Keleka, ko Cronus neʼe ina fakahifo tana tamai ko Uranus ʼi tona tuʼulaga pea neʼe ina folo ia tana ʼu fānau. ʼE kehekehe ʼosi ia pea mo te logotahi ʼa Sehova ʼAtua pea mo tona ʼAlo, ko Sesu, ʼaē ʼe fakatafito ki te ʼofa moʼoni! Ko te logotahi ʼaia ia nāua, ʼe ina uga iā tātou ke tou ʼoʼofa lahi kiā nāua! ʼI tona fakahagatonu, ʼe tou maʼu ia te toe pilivilēsio lahi ʼaē ke tou logotahi mo nāua ʼaia ʼaē ʼe nā māʼoluga tokotahi age ʼi te ʼatulaulau kātoa. ʼO ʼuhiga mo tana ʼu tisipulo, neʼe faikole fēnei ia Sesu: “ ʼE au . . . fai . . . te kole . . . ke feala ke natou logotahi fuli, ohagē pē ko koe Tamai ʼe ke logotahi mo au, pea ʼe au logotahi mo koe, ke toe fēia foki mo nātou ke natou logotahi mo tāua.”—Soane 17:20, 21.
Koia, ʼi te ʼui fēnei ʼa Sesu: “Ko au pea mo te Tamai, ʼe tahi ia māua,” neʼe mole talanoa ia ʼo ʼuhiga mo he Tahitolu ʼaē ko he misitelio ia, kae neʼe talanoa ia ki he logotahi fakatalakitupua, ko he felōgoi lelei ʼaupitō ʼe lava maʼu e he toko lua.