Nima Talatuku: Ko Malia Ko Te Faʼē ʼa Te ʼAtua

ʼE haʼu maifea ia te talatuku ʼaia? “Neʼe mālohi ia te tauhi ʼo te faʼē ʼa te ʼAtua ʼi te temi ʼaē neʼe . . . kua tafoki mai kiai ia te hahaʼi pagani e tokolahi . . . ko tanatou aga fakalotu pea mo tonatou leʼo ʼo loto fakalotu [ʼa te hahaʼi pagani ʼaē kua tafoki ki te Lotu Fakakilisitiano] neʼe faʼufaʼu ʼaki te tauhi kua fualoa ʼo te ‘kui fafine’ pea mo te ‘tāupoʼou fakaʼatua.’ ”—The New Encyclopædia Britannica (1988), Tohi 16, pāsina 326-327.

Koteā te manatu ʼi te Tohi-Tapu? “E ke fuafatui anai, e ke faelei anai he tama, pea e ke fakahigoa anai ia ko Sesu. E lahi anai pea e fakahigoa anai ko te Alo o te Matuaki-Maoluga. . . . Pea e maonioni anai iaʼia ka tupu mai, pea e higoai anai ko te Alo o te Atua.”—Ko mātou ʼaē neʼe matou fakaʼiloga keheʼi; Luka 1:31-35, Tauhi Foou.

ʼE hā lelei ʼi te vaega Fakatohi-tapu ʼaia, ko Malia neʼe ko te faʼē ʼa te “Alo o te Atua” kae mole ko te faʼē ʼa te ʼAtua. Neʼe feala koa hana fuafatuʼi ia Ia ʼaē ‘māʼia mo te lagi ʼe mole ina lava fakamalumaluʼi’? (1 Hau 8:27) Neʼe mole fai ʼi he temi e Malia ia he palalau fēia. Ko te akonaki ʼo ʼuhiga mo te Tahitolu ʼaē neʼe tupu ai ia te mole kei mahino lelei ʼa te hahaʼi ki te ʼuhiga ʼo Malia. ʼI tanatou tala ko Malia e Théotokos (ko te kupu Fakakeleka ko tona fakaʼuhiga “fuafatuʼi te ʼAtua”) peʼe ko te “Faʼē ʼa te ʼAtua,” neʼe fakatupu ai e te Fono ʼaē ʼi Efesi ʼi te taʼu 431 ʼo totatou temi, ia te tauhi ʼaē kiā Malia. Ko te kolo ʼo Efesi ʼaē neʼe fai ai te fono lotu, lolotoga ni ʼu sēkulō neʼe ʼomai te hahaʼi kiai ʼo ʼatolasio ki te ʼatua fafine fānaunau ko Alatemisi.

Koia lā ʼaē neʼe lahi ai ia te ʼu agaaga ʼo te tauhi ʼo te fakatātā ʼo Alatemisi ʼaē “nee to ifo mai te lagi” ohagē lā ko te ʼu polosesio, ʼaē neʼe fai ai ki te tauhi ʼo Malia. (Gāue 19:35, Tauhi Foou) Neʼe ʼi ai te tahi toʼotoʼoga neʼe fakahū māmālie ki te ʼu akonaki Fakakilisitiano, neʼe ko te fakaʼaogaʼi ʼi te tauhi ia te ʼu pāki ʼo Malia pea mo ʼihi atu.

Vakaʼi ia te ʼu vaega Fakatohi-tapu ʼaenī: Mateo 13:53-56; Maleko 3:31-35; Luka 11:27, 28

TE MANATU ʼAĒ ʼE MOʼONI:

Ko Malia neʼe ko te faʼē ʼo te ʼAlo ʼo te ʼAtua, kae neʼe mole ko te faʼē ia ʼa te ʼAtua. Ko te talatuku ʼo te Tahitolu neʼe iku ki te tauhi ʼaē kiā Malia ko te Faʼē ʼo te ʼAtua