Papitema ʼi Te Huafa ʼo Ai Pea Koteā Tona Fakaʼuhiga?

“Kotou ʼolo pea ke kotou fai ni ʼu tisipulo . . . ʼo papitemaʼi ia nātou ʼi te huafa ʼo te Tamai pea mo te ʼAlo pea mo te laumālie māʼoniʼoni.”—MAT. 28:19.

1, 2. (a) Koteā ʼaē neʼe hoko ʼi Selusalemi ʼi te ʼaho ʼo te Penikositē taʼu 33 ʼo totatou temi? (b) Koteā ʼaē neʼe tupu ai ia te papitema ʼa te tokolahi ʼi te hahaʼi?

NEʼE gatūtū Selusalemi ʼuhi ko te toe hahaʼi ʼaē neʼe ʼomai mai te ʼu fenua kehekehe. ʼI te ʼaho ʼo te Penikositē taʼu 33 ʼo totatou temi, neʼe hoko ia te toʼotoʼoga lahi pea neʼe ʼomai kiai ia te tokolahi. Kae neʼe hoko ia te meʼa fakaofoofo, pea neʼe fai ai e te ʼapositolo ko Petelo te akonaki fakatalakitupua, ʼaē neʼe malave mālohi ki te hahaʼi. Ko te toko 3 000 hahaʼi Sutea pea mo poloselite neʼe malave kiā nātou ia te akonaki ʼa Petelo, neʼe natou fakahemala, pea neʼe natou papitema ʼi te vai. Neʼe toe kau mo nātou ʼaia ki te kōkelekāsio Fakakilisitiano foʼou ʼaē neʼe kamata fakatuʼu. (Gāue 2:41) ʼI te kaugamālie ʼaupitō ʼo nātou ʼaē neʼe papitemaʼi ʼi te ʼu māʼanuʼaga peʼe ko te ʼu foʼi vai ʼaē ʼi Selusalemi, neʼe toe fakatupu ai ia he gatūtū lahi!

² Koteā ʼaē neʼe tupu ai ia te papitema ʼa te kaugamālie ʼaupitō? ʼI te kei hegihegi ʼo te ʼaho ʼaia, neʼe “logo ifo te logoaʼa mai te lagi ohagē ko te logoaʼa ʼo he tuʼani matagi mālohi.” ʼI te laufata ʼo te ʼapi, ko te ʼu tisipulo ʼa Sesu e toko 120 neʼe natou fonu ʼi te laumālie māʼoniʼoni. Ki muli age, ko te hahaʼi tagata mo fafine aga fakaʼapaʼapa ki te ʼAtua neʼe natou fakatahitahi pea neʼe natou punamaʼuli ʼi tanatou logo ki te ʼu tisipulo ʼe natou “palalau ʼi te ʼu lea kehekehe.” ʼI tanatou logo ki te ʼu palalau ʼaē neʼe fai e Petelo, ʼo kau ai tana talanoa ʼo ʼuhiga mo te mate ʼo Sesu, tokolahi “neʼe mamahi ʼaupitō tonatou loto.” Koteā ʼaē neʼe tonu ke natou fai? Neʼe tali fēnei e Petelo: “Kotou fakahemala, pea ke kotou tahi papitema ʼi te huafa ʼo Sesu Kilisito . . . pea ʼe kotou maʼu anai te meʼa ʼofa ʼo te laumālie māʼoniʼoni.”—Gāue 2:1-4, 36-38.

3. ʼI te ʼaho ʼo te Penikositē, koteā ʼaē neʼe ʼaoga ke fai e te kau Sutea mo te kau poloselite ʼaē neʼe kua fakahemala?

³ Kotou fakakaukauʼi age muʼa te ʼaluʼaga fakalotu ʼo te kau Sutea ʼaia pea mo te kau poloselite ʼaia, ʼi tanatou logo ki te akonaki ʼa Petelo. Neʼe kua natou tali ia Sehova ko tonatou ʼAtua. Pea ʼaki te ʼu Tohi Fakahepeleo, neʼe kua natou mahino ki te laumālie māʼoniʼoni, te mālohi gāue ʼo te ʼAtua ʼaē neʼe ina fakaʼaogaʼi ʼi te temi ʼaē neʼe ina fakatupu ai ia meʼa fuli peʼe ki muli age. (Sen. 1:2; Ktf. 14:5, 6; 1 Sam. 10:6; Pes. 33:6) Kae neʼe ʼi ai te tahi age meʼa maʼuhiga neʼe ʼaoga kiā nātou. Neʼe maʼuhiga ʼaupitō kiā nātou ke natou mahino pea mo tali te fakatuʼutuʼu ʼaē neʼe fai e te ʼAtua moʼo haofaki ia te hahaʼi—te Mēsia, ko Sesu. Koia, neʼe fakahā ai e Petelo kiā nātou ia te maʼuhiga ʼaē ke ‘papitemaʼi nātou ʼi te huafa ʼo Sesu Kilisito.’ ʼI te ʼu kiʼi ʼaho ki muʼa atu, ko Sesu ʼaē neʼe kua fakatuʼuake, neʼe ina fakatotonu kiā Petelo pea mo ʼihi ke natou papitemaʼi te hahaʼi “ ʼi te huafa ʼo te Tamai pea mo te ʼAlo pea mo te laumālie māʼoniʼoni.” (Mat. 28:19, 20) Ko te papitema ʼaia, neʼe ʼi ai tona fakaʼuhiga lahi ʼi te ʼuluaki sēkulō, pea kei fēia pē mo totatou temi. Koteā tona fakaʼuhiga?

Papitema ʼi Te Huafa ʼo Te Tamai

4. Mai tona ʼaluʼaga ʼaē neʼe ko nātou ko te hahaʼi neʼe felōgoi mo Sehova, koteā ia te fetogi ʼaē neʼe tonu ke hoko?

⁴ Ohagē pē ko te faʼahi ʼaē neʼe kua tou vakaʼi, ko nātou ʼaē neʼe natou tali ia te akonaki ʼa Petelo neʼe kua natou tauhi kiā Sehova pea neʼe kua natou felōgoi mo te ʼAtua. Neʼe natou faiga ke natou muliʼi ia tana Lao, ko te tupuʼaga lā ʼaia ʼo te ʼomai ʼa ʼihi mai te tahi ʼu kolo ki Selusalemi. (Gāue 2:5-11) Kae neʼe fai e te ʼAtua ia te fetogi maʼuhiga ʼo ʼuhiga mo tana ʼu felōgoi ʼaē mo te hahaʼi. Neʼe situʼa ia ki te kau Sutea ʼaē neʼe ko tona puleʼaga makehe; ko tanatou fakaʼaogaʼi ʼaē ia te Lao ke tupu ʼaki hanatou maʼu ia tona ʼofa, neʼe mole kei ʼi ai hona ʼaoga. (Mat. 21:43; Kol. 2:14) Kapau ko nātou ʼaē neʼe fakalogo ki te akonaki ʼa Petelo neʼe natou loto ke hoko atu tanatou ʼu felōgoi ʼaē mo Sehova, pea neʼe ʼaoga ke natou maʼu ia te tahi age meʼa.

5, 6. Koteā ʼaē neʼe fai e te kau Sutea mo te kau poloselite e tokolahi ʼo te ʼuluaki sēkulō ke tupu ʼaki ai hanatou felōgoi mo te ʼAtua?

⁵ ʼE mahino ia, neʼe mole tonu ke natou situʼa mai iā Sehova, te Tupuʼaga ʼo Te Maʼuli. (Gāue 4:24) Ko nātou ʼaē neʼe natou tali ia te fakamahino ʼa Petelo, neʼe kua feala ʼi te temi ʼaia ke natou mahino lahi age, ko Sehova neʼe ko he Tamai lotoʼofa. Neʼe ina fekauʼi mai te Mēsia moʼo haofaki nātou pea neʼe loto fakamolemole, māʼia mo nātou ʼaē neʼe ʼui fēnei e Petelo kiā nātou: “Ke ʼiloʼi papau e te ʼapi kātoa ʼo Iselaele neʼe fakanofo ia ia e te ʼAtua ke ʼAliki pea mo Kilisito, ia te Sesu ʼaē neʼe kotou tutuki ki te pou.” ʼE mahino ia, ko nātou ʼaē neʼe fakalogo ki te ʼu palalau ʼa Petelo neʼe kua natou maʼu ʼi te temi ʼaia, ia he tupuʼaga lahi age ke natou loto fakafetaʼi ki te fakatuʼutuʼu ʼaē neʼe fai e te Tamai maʼa nātou fuli ʼaē neʼe natou fia felōgoi mo te ʼAtua!—Lau ia Gāue 2:30-36.

⁶ ʼIo, ko te kau Sutea ʼaia pea mo te kau poloselite neʼe feala ke natou mahino ʼi te temi ʼaia, ke natou felōgoi mo Sehova, neʼe tonu ke natou fakamoʼoni ko Ia te ʼAtua ʼAē ʼe Ina Foaki te haofaki ʼaki ia Sesu. Koia ʼe kotou mahino ai pe koʼē neʼe tonu ke natou fakahemala mai tanatou ʼu agahala, ʼo kau kiai tanatou fakamoʼoni ki tanatou kau ki te matehi ʼo Sesu peʼe kailoa. Koia ʼe tou mahino ʼi te ʼu ʼaho ʼaē neʼe hoa mai kiai, ia tanatou “haga mulimuli aipē ki te akonaki ʼa te kau ʼapositolo.” (Gāue 2:42) Neʼe kua feala hanatou ‘fakaovi fakahagatonu ki te ʼafioʼaga ʼo te ʼofa makehe’ pea neʼe natou loto kiai.—Hep. 4:16.

7. Iā ʼaho nei, koteā ʼaē neʼe fetogi ai e te tokolahi tanatou manatu ʼo ʼuhiga mo te ʼAtua pea mo natou papitema ʼi te huafa ʼo te Tamai?

⁷ Iā ʼaho nei, ko te ʼu toko lauʼi miliona hahaʼi mai te ʼu fenua kehekehe neʼe natou ako ʼi te Tohi-Tapu ia te moʼoni ʼo ʼuhiga mo Sehova. (Isa. 2:2, 3) Ko ʼihi neʼe mole natou tui ki he ʼatua, pea ko ʼihi neʼe natou tui ʼe ʼi ai te ʼAtua kae ʼi tanatou manatu neʼe mole tokaga mai ia ki te ʼu meʼa ʼaē neʼe ina fakatupu, kae ki muli age neʼe natou tui papau leva ʼe ʼi ai te Tupuʼaga ʼe feala kiā nātou ke natou felōgoi mo ia. Ko ʼihi neʼe natou tauhi he ʼatua e tahitolu peʼe ko he ʼu tuʼuga tamapua. Kua natou mahino, ko Sehova tokotahi pē ʼe ko te ʼAtua Māfimāfi, pea kua natou fetapa ki ai ʼi te temi nei, ʼo fakaʼaogaʼi tona huafa. ʼE ʼalutahi mo te manatu ʼaē neʼe ʼui e Sesu ki tana ʼu tisipulo, ʼe tonu ke natou papitema ʼi te huafa ʼo te Tamai.

8. Koteā ʼaē neʼe tonu ke mahino kiai ʼo ʼuhiga mo te Tamai ia te hahaʼi ʼaē neʼe mole natou ʼiloʼi te akonaki ʼo ʼuhiga mo te agahala ʼa Atama?

⁸ Neʼe natou toe ako neʼe natou maʼu te agahala he neʼe natou hihifo mai iā Atama. (Loma 5:12) Neʼe tonu ke natou tali ia te manatu foʼou ʼaia he neʼe ko te moʼoni. Neʼe feala kiā nātou ʼaia ke fakatatau ki he tagata mahaki neʼe mole ina ʼiloʼi tona mahaki. Neʼe lagi ʼi ai hona ʼu fakaʼiloga, ohagē lā neʼe feala ke mamahi tona sino ʼi ʼihi temi. Kae ʼi tana mole heʼeki ʼiloʼi papau mai he tōketā pe koteā te mahaki, ʼe lagi ʼi tana pē ia manatu ʼe mole mahaki ia. Kae ʼi tona fakahagatonu ʼe mahaki ia. (Vakaʼi ia 1 Kolonito 4:4.) ʼE feafeaʼi age mo kanapau lā neʼe kua fakahā age e he tōketā tona mahaki? ʼE lagi lelei anai ke ina kumi hona faitoʼo. ʼO toe fēia pē, ko te ʼiloʼi ʼaē ia te moʼoni ʼo ʼuhiga mo te agahala, tokolahi neʼe natou tali te ʼu fakamahino Fakatohi-tapu pea neʼe mahino ai kiā nātou ko te ʼAtua ʼe ina foaki te “faitoʼo.” ʼEī, ko nātou fuli ʼaē ʼe natou mamaʼo mai te Tamai ʼe ʼaoga ke natou haga kiā Ia ʼaē ʼe feala ke ina “faitoʼo” ia nātou.—Efe. 4:17-19.

9. Koteā ʼaē neʼe fai e Sehova ke feala ai hakotou felōgoi mo ia?

⁹ Kapau kua kotou foaki tokotou maʼuli kiā Sehova ʼAtua pea kua kotou liliu ko he Kilisitiano kua papitema, ʼe kotou ʼiloʼi ʼe ko he meʼa taulekaleka he felōgoi lelei mo ia. Kua feala ʼi te temi nei ke kotou leleiʼia ia te ʼofa ʼo takotou Tamai ko Sehova. (Lau ia Loma 5:8.) Logolā te agahala ʼa Atama mo Eva kiā te ia, kae neʼe fai e te ʼAtua ia te puleʼaki ke feala ki tonā hōloga—ʼo kau ai mo tātou—ke tou maʼu he ʼu felōgoi lelei mo ia. Ke hoko te faʼahi ʼaia, neʼe tonu ki te ʼAtua ke ina ʼūtakiʼi ia tona mamahi ʼi tana sio ifo ki te mamahi ʼo tona ʼAlo ʼofaina pea mo tona matehi. ʼI tatatou ʼiloʼi ia te faʼahi ʼaia, ʼe mole tokoni mai koa lā kiā tātou ke tou tali ia te pule ʼa te ʼAtua pea mo fakalogo ki tana ʼu fakatotonu ʼofa? Kapau ʼe mole heʼeki kotou fai te faʼahi ʼaia, pea kua kotou maʼu ia te ʼu tupuʼaga ke kotou foaki ai tokotou maʼuli ki te ʼAtua pea mo kotou papitema.

Papitema ʼi Te Huafa ʼo Te ʼAlo

10, 11. (a) ʼE feafeaʼi hakotou liufaki kiā Sesu ia tona ʼofa? (b) Koteā ʼaē ʼe kotou logoʼi ʼi tokotou loto ʼo ʼuhiga mo te mate ʼa Sesu ke liliu ko he totogi?

¹⁰ Kae kotou toe fakakaukauʼi age muʼa ia te ʼu palalau ʼaē neʼe fai e Petelo ki te tokolahi. Neʼe ina fakahā tāfito te maʼuhiga ʼaē ke tali ia Sesu, ʼaē ko he faʼahi ʼe pipiki tāfito ki te papitema “ ʼi te huafa . . . ʼo te ʼAlo.” He koʼē neʼe maʼuhiga te faʼahi ʼaia ʼi te temi ʼaia, pea he koʼē ʼe maʼuhiga ʼi te temi nei? Ko te tali ʼo Sesu pea mo papitema ʼi tona huafa, ko tona fakaʼuhiga ke fakamoʼoni ki tona tuʼulaga ʼi tatatou ʼu felōgoi ʼaē mo te Tupuʼaga. Neʼe tonu ke tautau Sesu ki te pou fakamamahi ke feala ai he toʼo ʼo te malaʼia ʼo te Lao ʼaē mai te kau Sutea; kae ʼaki tona mate neʼe ʼi ai tona fua ʼe lahi age. (Kal. 3:13) Neʼe ina foaki te sākilifisio faitotogi ʼaē neʼe ʼaoga maʼa te mālamanei kātoa. (Efe. 2:15, 16; Kol. 1:20; 1 Soa. 2:1, 2) Moʼo fakahoko te faʼahi ʼaia, neʼe ʼūtakiʼi e Sesu ia te heʼe faitotonu, te laukovi, te mamahi, pea ki muli age ia te mate. ʼE kotou fakafetaʼi koa ki tana sākilifisio ʼaia? Kotou fakakaukauʼi age muʼa ko koutou ko he kiʼi tama ʼe taʼu 12 neʼe folau ʼi te vaka Titanic, pea neʼe ʼī te vaka ki te foʼi ʼaisi pea neʼe mou ʼi te taʼu 1912. ʼE kotou faiga ke kotou hopo ki he vaka haofaki, kae kua fonu ia. Pea ko te tagata ʼi te vaka haofaki ʼe ʼuma ki tona ʼohoana, pea hopo ki te vaka, kae ina hiki mai koutou ki te vaka haofaki. ʼE kotou feafeaʼi anai ʼi te temi ʼaia? ʼE mahino ia, ʼe kotou loto fakafetaʼi ki ai! ʼE kotou lava mahino pe neʼe koteā ʼaē neʼe logoʼi ʼi te temi ʼaia e te kiʼi tama ʼaē neʼe hoko moʼoni kiā ia ia te faʼahi ʼaia.a Kae neʼe lahi age ia te sākilifisio ʼaē neʼe fai e Sesu maʼa koutou. Neʼe mate ke feala ai hakotou maʼu ia te maʼuli heʼegata.

¹¹ Koteā ʼaē neʼe kotou logoʼi ʼi tokotou loto ʼi takotou ʼiloʼi ia te meʼa ʼaē neʼe fai e te ʼAlo ʼo te ʼAtua maʼa koutou? (Lau ia 2 Kolonito 5:14, 15.) ʼE mahino ia ʼe kotou maʼu ia he loto fakafetaʼi lahi. ʼE tokoni atu ke kotou foaki ia tokotou maʼuli ki te ʼAtua pea ke ‘mole kei kotou māʼuʼuli maʼa koutou, kae maʼa ia ʼaē neʼe mate maʼa koutou.’ Ko te papitema ʼi te huafa ʼo te ʼAlo, ko tona fakaʼuhiga ʼe kotou fakamoʼoni ki te meʼa ʼaē neʼe fai e Sesu maʼa koutou pea ʼe kotou tali tana pule heʼe ko ia “te Fakafealagia Tāfito ʼo te maʼuli.” (Gāue 3:15; 5:31) ʼI muʼa ʼo takotou papitema, neʼe mole kotou felōgoi mo te Tupuʼaga, pea neʼe mole ʼi ai mo hokotou ʼamanaki. Kae ʼaki te tui ki te taʼataʼa ʼo Sesu Kilisito pea mo takotou kua papitema, kua kotou felōgoi leva mo te Tamai. (Efe. 2:12, 13) Neʼe tohi fēnei e te ʼapositolo ko Paulo: “Ko koutou ʼaē, ʼi te temi muʼa, neʼe kotou mamaʼo pea neʼe ko te ʼu fili ʼuhi he neʼe haga takotou ʼu manatu ki te ʼu gāue ʼaē neʼe kovi, [ko te ʼAtua] ʼi te temi nei kua ina toe fakafelōgoi lelei koutou, ʼaki te sino ʼo [Sesu], ʼaki tana mate, ke feala hakotou tutuʼu ʼi ʼona muʼa [kua kotou] māʼoniʼoni pea mo heʼe mele.”—Kol. 1:21, 22.

12, 13. (a) ʼE malave feafeaʼi kiā koutou takotou papitema ʼaē ʼi te huafa ʼo te ʼAlo mokā fakamamahiʼi koutou e he tahi? (b) ʼI takotou kua papitema ʼi te huafa ʼo Sesu, koteā ʼaē kua fakamaʼua kiā koutou?

¹² Tatau aipē peʼe kua kotou papitema ʼi te huafa ʼo te ʼAlo, kae ʼe mahino lelei kiā koutou tokotou ʼuhiga agahala. ʼE ʼaoga ke kotou manatuʼi ia te faʼahi ʼaia ʼi te ʼaho fuli. Ohagē lā, kapau ʼe fakamamahiʼi koutou e he tahi, ʼe kotou manatuʼi koa ʼe kolua agahala toko lua? ʼE tonu ke kolua maʼu ia te loto fakamolemole ʼa te ʼAtua, pea ʼe tonu ke kolua loto fakamolemole. (Mko. 11:25) Moʼo fakahā lelei te faʼahi ʼaia, neʼe fai e Sesu ia te lea fakatā: Ko te pule ʼa te tagata kaugana neʼe ina molehi tona maʼua ʼaē neʼe ko taleta e hogofulu afe (ko tenalio e onogofulu miliona). Ki muli age, ko te tagata kaugana ʼaia neʼe mole ina molehi te maʼua ʼo tona kaugā kaugana ʼaē neʼe ko tenalio pē e 100. Koia neʼe foaki mai ai e Sesu ia te ako mai te puani ʼaia: ʼE mole fakamolemole anai e Sehova ia ia ʼaē ʼe mole fakamolemole ki tona tehina. (Mat. 18:23-35) ʼEī, ko te papitema ʼi te huafa ʼo te ʼAlo, ko tona fakaʼuhiga ke tou fakamoʼoni ki te pule ʼa Sesu pea ke tou faiga ke tou muliʼi tana faʼifaʼitaki pea mo tana ʼu faiakonaki, ʼaē ʼe kau kiai ia te fakamolemole ʼaki he lotolelei ki ʼihi.—1 Pet. 2:2; 1 Soa. 2:6.

¹³ Mai tona ʼaluʼaga ʼaē ʼe kotou agahala, ʼe mole feala hakotou faʼifaʼitakiʼi kātoa ia te ʼu ala ʼo Sesu. Tahi ʼaē, ʼo mulimuli ki takotou foaki ia tokotou maʼuli ki te ʼAtua ʼaki he loto kātoa, ʼe kotou fia faʼifaʼitakiʼi Sesu ʼo mulimuli pē ki tokotou ʼu fealagia. Ko tona fakaʼuhiga ke hoko atu takotou gāue ʼaē ke kotou liʼaki te ʼulugaaga ʼāfea kae ke kotou kofuʼi te ʼulugaaga foʼou. (Lau ia Efesi 4:20-24.) Kā kotou fakaʼapaʼapa ki hokotou kaumeʼa, ʼe lagi kotou faiga ke kotou ako mai tana faʼifaʼitaki pea mo tona ʼu kalitātē. Pea ʼe toe fēia, ʼe kotou fia ako mai iā Kilisito pea mo muliʼi tana faʼifaʼitaki.

14. ʼE feafeaʼi hakotou fakahā ʼe kotou fakamoʼoni ki te pule ʼa Sesu ʼi tona ʼuhiga Hau ʼaē ʼi selō?

¹⁴ ʼE ʼi ai te tahi ʼaluʼaga ʼe kotou lava fakahā ai ia takotou mahino ʼaē ki te ʼu meʼa ʼe pipiki ki takotou papitema ʼi te huafa ʼo te ʼAlo. Ko te ʼAtua “neʼe ina tuku ia meʼa fuli ki [te] ʼu vae [ʼo Sesu] pea neʼe ina fakanofo ke pule kiā meʼa fuli ʼi te kōkelekāsio.” (Efe. 1:22) Koia, ʼe ʼaoga ke kotou fakaʼapaʼapa ki te takitaki ʼa Sesu ia nātou ʼaē kua foaki ia tonatou maʼuli kiā Sehova. ʼE fakaʼaogaʼi e Kilisito ia te ʼu tagata heʼe haohaoa ʼi te ʼu kōkelekāsio, tāfito lā ia te ʼu tagata kua fotufotuʼa ʼi te faʼahi fakalaumālie, te kau tagata ʼāfea neʼe fakanofo. Neʼe fakatuʼutuʼu ke fakanofo ia he ʼu tagata fēia, “moʼo fakatonutonuʼi te kau māʼoniʼoni, . . . ʼo ʼuhiga mo te fakatuʼu ʼo te sino ʼo Kilisito.” (Efe. 4:11, 12) Tatau aipē peʼe fai e he tagata heʼe haohaoa hana hala, kae ko Sesu te Hau ʼo te Puleʼaga ʼaē ʼi selō, ʼe feala ke ina fakatokatoka te fihifihia ʼaia ʼi tona temi totonu pea mo fakalogo pē ki ai tona faʼahiga fakatokatoka. ʼE kotou fakatui koa kiai?

15. Kapau ʼe mole heʼeki kotou papitema, koteā te ʼu tapuakina ʼaē ʼe feala ke kotou fakaʼamu kiai ʼi te hili ʼo te papitema?

¹⁵ Koia, ko ʼihi mole heʼeki natou foaki tonatou maʼuli kiā Sehova pea mole heʼeki natou papitema. Kapau ʼe mole heʼeki kotou fai te faʼahi ʼaia, ʼe feala koa hakotou mahino ʼaki te ʼu manatu ʼaenī kua tou vakaʼi, ʼe ko he aga fakapotopoto ia te fakamoʼoni ʼaē ki te ʼAlo pea mo kotou fakahā takotou loto fakafetaʼi? Ko te papitema ʼi te huafa ʼo te ʼAlo ʼe ina foaki atu anai ia te ʼu tapuakina lahi.—Lau ia Soane 10:9-11.

Papitema ʼi Te Huafa ʼo Te Laumālie Māʼoniʼoni

16, 17. Kiā koutou, koteā te fakaʼuhiga ʼo te papitema ʼi te huafa ʼo te laumālie māʼoniʼoni?

¹⁶ Koteā te fakaʼuhiga ʼo te papitema ʼi te huafa ʼo te laumālie māʼoniʼoni? Ohagē ko tatatou vakaʼi ʼi te kamataʼaga, ko nātou ʼaē neʼe logo ki te faiakonaki ʼa Petelo ʼi te ʼaho ʼo te Penikositē, neʼe natou mahino ki te gāue ʼa te laumālie māʼoniʼoni. ʼI tona fakahagatonu, neʼe natou sisio fakalelei ki te haga fakaʼaogaʼi aipē e te ʼAtua ʼo te laumālie māʼoniʼoni. Neʼe kau Petelo iā nātou ʼaē neʼe ‘fonu ʼi te laumālie māʼoniʼoni pea neʼe kamata palalau ʼi te ʼu lea kehekehe.’ (Gāue 2:4, 8) Ko te kupusiga palalau “ ʼi te huafa ʼo,” ʼe mole ʼaoga ia ke fakaʼuhiga ki te huafa ʼo he tahi. Iā ʼaho nei, ʼe lahi te ʼu gāue neʼe fai “ ʼi te huafa ʼo te puleʼaga,” ʼaē ko te kautahi kae mole ko he foʼi tokotahi. Neʼe fai te ʼu gāue ʼaia ʼaki te takitaki ʼa te puleʼaga. ʼO toe fēia, ko he tahi neʼe papitema ʼi te huafa ʼo te laumālie māʼoniʼoni, ʼe fakamoʼoni ia ko te laumālie māʼoniʼoni ʼe mole ko he tahi, kae ko te mālohi gāue ʼo Sehova. Pea ko te taʼi papitema ʼaia, ʼe fakaʼuhiga ko he tahi ʼe fakamoʼoni ki te gāue ʼaē ʼe fai e te laumālie māʼoniʼoni ʼi te fakatuʼutuʼu ʼa te ʼAtua.

¹⁷ ʼE mole heʼeki kotou mahino koa ki te laumālie māʼoniʼoni ʼi takotou ako te Tohi-Tapu? Ohagē lā, kua kotou fakamoʼoni ko te Tohi-Tapu neʼe tohi ʼaki te takitaki ʼa te laumālie māʼoniʼoni. (2 Tim. 3:16) ʼI takotou tuputupu ʼaē ʼi te faʼahi fakalaumālie, ʼe mahino ia ʼe kotou maʼu ia he toe loto fakafetaʼi lahi ki “te foaki e te Tamai ʼaē ʼi selō te laumālie māʼoniʼoni kiā nātou ʼaē ʼe natou kole kiā te ia,” ʼe kau ai mo koutou. (Luka 11:13) Neʼe lagi kotou sio ki te gāue ʼaē ʼa te laumālie māʼoniʼoni ʼi tokotou maʼuli. Tahi ʼaē meʼa, kapau ʼe tonu ke kotou toe papitema ʼi te huafa ʼo te laumālie māʼoniʼoni, ko te fakapapau ʼa Sesu, ʼaē ko te Tamai ʼe ina foaki te laumālie māʼoniʼoni, ko tona fakaʼuhiga ʼe kotou maʼu moʼoni ia te ʼu tapuakina lahi mokā kotou maʼu te laumālie ʼaia.

18. Koteā te ʼu tapuakina ʼaē ʼe maʼu e nātou ʼaē ʼe papitema ʼi te huafa ʼo te laumālie māʼoniʼoni?

¹⁸ Kua toe hā lelei foki te faʼahi ʼaia iā ʼaho nei, ko Sehova ʼe ina taki te kōkelekāsio Fakakilisitiano ʼaki tona laumālie. Ko te laumālie ʼaia ʼe tokoni atu kiā koutou takitokotahi ʼi takotou ʼu gāue ʼaē ʼi te ʼaho fuli. Ko tatatou papitema ʼi te huafa ʼo te laumālie māʼoniʼoni, ko tona fakaʼuhiga ʼe tou fakamoʼoni ki tana gāue ʼaē ʼe ina fai ʼi totatou maʼuli pea ʼe tou loto fakafetaʼi ʼo gāue fakatahi mo te laumālie ʼaia. Kae ko ʼihi ʼe lagi natou punamaʼuli, peʼe feafeaʼi hatatou agatonu ki tatatou foaki ʼaē ʼo totatou maʼuli kiā Sehova pea ʼe ʼaoga feafeaʼi ia te laumālie māʼoniʼoni ʼi te faʼahi ʼaia. ʼE tou vakaʼi anai te faʼahi ʼaia ʼi te ʼalatike kā hoa mai.

[Nota]

ʼE Kei Kotou Manatuʼi Koa?

• Koteā ʼaē ʼe fakamaʼua mokā kotou papitema ʼi te huafa ʼo te Tamai?

• Koteā te fakaʼuhiga ʼo te papitema ʼi te huafa ʼo te ʼAlo?

• ʼE feafeaʼi hakotou lava fakahā ʼe kotou leleiʼia ia te maʼuhiga ʼaē ʼo te papitema ʼi te huafa ʼo te Tamai pea mo te ʼAlo?

• Koteā te fakaʼuhiga ʼo te papitema ʼi te huafa ʼo te laumālie māʼoniʼoni?

[Paki ʼo te pasina 10]

Hili ʼo te Penikositē ʼo te taʼu 33 ʼo totatou temi, ko te ʼu felōgoi fea ʼaē neʼe maʼu ai e te ʼu tisipulo foʼou mo te Tamai?

[Haʼuʼaga ʼo te paki]

By permission of the Israel Museum, Jerusalem