Te ʼu Faʼahi e Fitu Ke Fua Lelei Ai Kiā Tātou Te Lau ʼo Te Tohi-Tapu

“ ʼO mole gata pē ʼi te ʼui ʼaē ko te Tohi-Tapu ʼe ko te tohi ʼaē neʼe lahi ʼaupitō tona fakatauʼi ʼi te hisitolia kae ʼe ko te tohi ʼe lahi ʼaupitō tona fakatau ʼi te taʼu fuli.”—TE NUSIPEPA TIME.

“ ʼI ʼihi temi ʼe au lau ai te Tohi-Tapu, kae ʼe mole au faʼa leleiʼia.”—KEITH, KO TE TAGATA FAI MĀHOLO ʼILOA MAI PILITĀNIA.

ʼI MEʼA faikehe heʼe nofo te hahaʼi mo tanatou Tohi-Tapu, kae kiā nātou ʼe mole faʼa maʼuhiga kiā nātou hona lau. Kae ko ʼihi, ʼe natou leleiʼia te ʼu manatu ʼaē ʼe natou lau ʼi te Tohi-Tapu. Ohagē lā, ʼe ʼui fēnei e te fafine ʼe higoa ko Nancy: “Talu mai te temi ʼaē neʼe au kamata lau ai te Tohi-Tapu pea mo metitāsioʼi ʼi te ʼuhu fuli, ʼe au maʼu te mālohi ʼaē moʼo tauʼi te ʼu fihifihia kehekehe ʼaē ʼe feala ke hoko mai ʼi te ʼaho. Ko taku agamāhani ʼaia, neʼe lahi age tana tokoni mai ki te fakafīmālieʼi ʼo toku lotovaivai ʼi te ʼu tahi age ʼu meʼa ʼaē neʼe au ʼahiʼahiʼi iā taʼu e 35.”

Tatau aipē mo kapau neʼe mole heʼeki kotou lau ia te Tohi-Tapu, kae ʼe mole kotou feʼekeʼaki koa ki te tokoni ʼaē neʼe maʼu e ʼihi ʼi tanatou lau te Tohi-Tapu? Kapau neʼe kua kotou lau te Tohi-Tapu, ʼe mole kotou loto koa ke lahi age te ʼu fua lelei ʼaē ʼe kotou maʼu ʼi takotou lau te Tohi-Tapu? Kapau koia, kotou ʼahiʼahi muʼa te ʼu faʼahi e fitu ʼaē ʼe talanoa kiai te ʼalatike ʼaenī.

1 Faʼahi​—Kotou Maʼu Te Manatu ʼAē ʼe Lelei Mokā Kotou Lau Te Tohi-Tapu

◼ ʼE feala ke kotou lau te Tohi-Tapu ohagē pē ko he tohi ʼe fakamatala ai he ʼu hisitolia matalelei peʼe ohagē ko hokotou maʼua, peʼe ʼaki te manatu ʼaē ʼe kotou lagi maʼu ai anai hokotou takitakiʼaga ʼi te mālama maveuveu ʼaenī. Kae ʼe lahi age anai tona ʼu fua lelei kiā koutou, mo kapau ʼe kotou fakatuʼutuʼu tāfito ke kotou ako te moʼoni ʼo ʼuhiga mo te ʼAtua. Tahi ʼaē, ʼe kotou utu anai te ʼu fakapale lahi mo kapau ʼe kotou lau te Tohi-Tapu heʼe kotou loto ke kotou mahino peʼe malave feafeaʼi te logo ʼo te Tohi-Tapu ki tokotou maʼuli.

ʼE fakahā lelei ʼi te Tohi-Tapu te maʼuhiga ʼaē ke tou lau te Tohi-Tapu ʼaki he ʼu manatu ʼe lelei, ʼo ina fakatatau te Tohi-Tapu ki he sioʼata: “Kapau ʼe fagono he tahi ki te folafola kae mole ko he tahi ʼe ina maʼuliʼi, ʼe hagē ia ko he tagata ʼe ina fakasiosio tona fofoga ʼi he sioʼata. Heʼe fakasiosio pē ia, pea ʼalu pea galo atu aipē tona faʼahiga tagata. Kae ko ia ʼaē ʼe sio loloto ki te lao haohaoa ʼo te ʼāteaina, pea mo haga nofo ai, ko te tagata ʼaia ʼe fiafia anai ʼi tona maʼuliʼi, koteʼuhi ʼe mole ko he tagata fagono ʼe loto galogalo, kae ko he tahi ʼe ina fai te gāue.”—Sake 1:23-25.

Ko te tagata ʼaē ʼi te lea fakatā ʼe sio ki tona fofoga ʼi te sioʼata kae ʼe mole ina fakatokatoka te meʼa ʼaē ʼe maveuveu iā te ia. Lagi neʼe sioʼata fakavilivili pē ia, peʼe lagi mole ina fia fakatonutonuʼi te meʼa ʼaē ʼe kovi iā te ia. ʼO toe fēia pē, ʼe mole lahi anai te ʼu fua lelei ʼaē kā tou maʼu mo kapau ʼe tahitahiga tatatou lau te Tohi-Tapu peʼe mole tou maʼuliʼi te ʼu manatu ʼaē ʼe tou lau. Kae ʼe tou lava maʼu te fiafia moʼoni mo kapau ʼe tou vakaʼi fakalelei te Tohi-Tapu ʼaki te manatu ʼaē ke tou liliu “ko he tahi ʼe ina maʼuliʼi” te folafola, ʼo tou fakafealagia ki te manatu ʼa te ʼAtua ke ina gāueʼi tatatou fakakaukau pea mo tatatou aga.

2 Faʼahi​—Kotou Filifili He Tohi-Tapu ʼe Tāu Ke Kotou Falala Kiai

◼ ʼE lagi lahi te ʼu Tohi-Tapu ʼe kotou lava filifili ʼi takotou lea. Logolā ʼe feala pē ke ʼaoga kiā koutou ia te ʼu fakaliliu kehekehe ʼo te Folafola ʼa te ʼAtua, kae ko ʼihi Tohi-Tapu ʼe natou fakaʼaogaʼi te ʼu kupu kua ʼāfea peʼe ko he ʼu kupu ʼe faigataʼa hakotou mahino kiai. (Gāue 4:13) Ko ʼihi fakaliliu Tohi-Tapu ʼe natou fetogi te logo maʼa ʼo te Tohi-Tapu ʼo natou mulimuli ki te ʼu talatisio. Ohagē lā, tou fakatokagaʼi ʼi te ʼu ʼalatike ʼaē ʼi te kamataʼaga ʼo te nusipepa ʼaenī, ko ʼihi Tohi-Tapu neʼe natou fetogi te huafa ʼo te ʼAtua ko Sehova, ʼaki he ʼu higoa fakatuʼulaga, ohagē ko “ ʼAtua” peʼe ko “ ʼAliki.” Koia kā kotou filifili he Tohi-Tapu ke kotou lau, kotou kumi he Tohi-Tapu ʼe ina fakaliliu fakalelei te Tohi-Tapu ʼaki he ʼu kupu ʼe faigafua hakotou mahino kiai pea mo fakalotomālohiʼi koutou ke hoko atu takotou lautohi.

Ko te toko lauʼi miliona kau lautohi ʼi te mālamanei neʼe natou leleiʼia te Tohi-Tapu Traduction du monde nouveau.a Kotou tokagaʼi te meʼa ʼaenī neʼe hoko ki te matuʼa ʼi Pulukalia. Neʼe kau ki te fono ʼa te kau Fakamoʼoni ʼa Sehova pea neʼe foaki age ki ai te Tohi-Tapu Traduction du monde nouveau. Ki muli age, neʼe ina ʼui fēnei: “Neʼe au lau te Tohi-Tapu lolotoga te ʼu taʼu, kae neʼe mole heʼeki au lau he Tohi-Tapu fēia, ʼe faigafua hakita mahino kiai pea mo malave ki toku loto.”

3 Faʼahi​—Kotou Faikole

◼ ʼE feala ke lahi age takotou mahino ki te Tohi-Tapu ʼaki hakotou kole ki te Tupuʼaga ke tokoni atu, ohagē ko tona fai e te tagata fai pesalemo ʼaē neʼe ina ʼui fēnei: “ ʼAvahi toku ʼu mata ke au sio ki te ʼu meʼa taulekaleka ʼo tau lao.” (Pesalemo 119:18) Kotou faikole ki te ʼAtua ʼi te ʼu temi fuli ʼaē ʼe kotou lau ai te Tohi-Tapu, ʼo kotou kole kiā te ia ke tokoni atu ke kotou mahino ki tana Folafola. ʼE toe feala foki ke kotou fakamālo kiā te ia ki takotou lava lau ʼaē ia te Tohi-Tapu, he kanaʼaua lā neʼe mole feala hakotou ʼiloʼi ia te ʼAtua.—Pesalemo 119:62.

ʼE logo koa te ʼAtua ki te ʼu taʼi faikole kumi tokoni ʼaia? Kotou vakaʼi age muʼa te meʼa ʼaē neʼe hoko ki te tautēhina kei finemui ʼi Uruguay. Neʼe mole nā mahino ki te manatu Fakatohi-tapu ʼaē ʼe tuʼu iā Taniela 2:44, pea neʼe nā faikole ke fekauʼi mai e te ʼAtua ia he tahi moʼo tokoni kiā nāua ke nā mahino kiai. Neʼe kei ava te Tohi-Tapu ʼa te ʼu kiʼi finemui, kae neʼe tutuʼu te ʼu Fakamoʼoni ʼa Sehova e toko lua ʼi tonā muʼa matapā, pea neʼe nā lau age te vaega tonu ʼaē neʼe faikole kiai te ʼu kiʼi finemui, pea neʼe fakamahino age kiā nāua , ko te ʼu puleʼaga fakatagata ʼe fetogi anai e te Puleʼaga ʼo te ʼAtua.b Neʼe tui papau ai e te ʼu kiʼi finemui ʼaia neʼe tali e te ʼAtua ki tana kumi tokoni ʼi te faikole.

4 Faʼahi​—Kotou Lau ʼi Te ʼAho Fuli

◼ Neʼe fakatokagaʼi e te tagata faitohi, neʼe “lahi te ʼu Tohi-Tapu neʼe kamata toʼo e te hahaʼi” ʼi te ʼosi ʼohofi ʼo Amelika ʼi te ʼaho 11 ʼo Sepetepeli 2001. Tokolahi ʼe hoki natou vakaʼi te Folafola ʼa te ʼAtua ʼi te ʼu temi mamahi. Kae ʼe fakalotomālohiʼi tātou ʼi te Tohi-Tapu ke tou lau ʼi te ʼaho fuli, heʼe ina ʼui fēnei: “Ko te tohi ʼaenī ʼo te lao ʼe mole tonu anai ke mamaʼo mai tou gutu, pea ʼe tonu anai ke ke lau leʼo veliveli ʼi te ʼaho mo te pō, ke feala hau tokaga ʼo fai ʼo mulimuli kiā meʼa fuli ʼaē ʼe tohi ai; heʼe feala ai leva ke ke fakatupu manūʼia anai ki tou ala pea mo feala ke ke aga fakapotopoto.”—Sosue 1:8.

ʼE feala ke fakatā ia te maʼuhiga ʼaē ʼo te lau tuʼumaʼu ʼo te Tohi-Tapu ʼaki he tagata neʼe mahaki mafu pea ʼe ina fakatotonu ke kai pē ki te ʼu meʼa ʼaē ʼe ʼaoga kiā te ia. ʼE tokoni anai koa kiā te ia tana faʼahiga kai ʼaia mo kapau ʼe hoki ina fai pē ia te faʼahi ʼaia mokā ʼe mamahi tona mafu? Kailoa. ʼE tonu ʼi te ʼaho fuli ke mulimuli ki tana faʼahiga kai ʼaia ke ʼi ai hona fua lelei kiā te ia. ʼO toe fēia pē, ko te lau ʼo te Tohi-Tapu ʼi te ʼaho fuli ʼe tokoni atu anai ke ‘manūʼia tokotou ala.’

5 Faʼahi​—Ke Fetofetogi Takotou Faʼahiga Lau Te Tohi-Tapu

◼ ʼE lelei hakotou lau te Tohi-Tapu mai te tohi ʼo Senesi ki te tohi ʼo Fakahā, kae ʼe feala pē ke kehe age takotou faʼahiga fakatuʼutuʼu lautohi pea ke fakalotomālohiʼi ai koutou. Koʼenī he ʼu faʼahiga tokoni kiai.

Kotou lau te hisitolia ʼo he tagata peʼe ko he fafine ʼi te Tohi-Tapu. Kotou lau te kāpite kātoa peʼe ko te ʼu tohi ʼaē ʼe talanoa ai ki te kau ʼatolasio ʼa te ʼAtua ohagē ko nātou ʼaenī:

• Sosefo: Senesi 37-50.

• Lute: Lute 1-3.

• Sesu: Mateo 1-28; Maleko 1-16; Luka 1-24; Soane 1-21.c

Kotou metitāsioʼi he kupu tāfito pē e tahi. Kotou lau te ʼu vaega ʼaē ʼe pipiki kiai. Ohagē lā, kotou kumi te kupu tāfito ʼaē ko te faikole, pea kotou lau te tokoni Fakatohi-tapu ʼo ʼuhiga mo te faikole, ʼo fēia mo he ʼu faikole ʼe tuʼu ʼi te Tohi-Tapu.d

Kotou lau leʼo lahi. ʼE lava fua lelei ʼaupitō kiā koutou ia takotou lau leʼo lahi ia te Tohi-Tapu. (Fakahā 1:3) ʼE toe feala pē foki ke kotou lau leʼo lahi fakafāmili, ʼo kotou fesuisuiʼaki te lau ʼo te ʼu palakalafe peʼe hinoʼi kiā nātou ʼo te fāmili he ʼu tagata peʼe ko he ʼu fafine ʼe talanoa kiai ʼi te Tohi-Tapu. Ko ʼihi ʼe natou fia fakalogo ki te puke ʼo te Tohi-Tapu. ʼE ʼui fēnei e te fafine: “Neʼe faigataʼa haku kamata lau ia te Tohi-Tapu, koia neʼe au kamata fakalogo ai ki te puke ʼo te Tohi-Tapu. ʼI te temi nei kua au leleiʼia ʼaupitō te Tohi-Tapu, ʼe mole au fakaʼuhiga ohagē pē ko he tohi ʼe fakamatala ai he ʼu hisitolia lelei.”

6 Faʼahi​—Kotou Metitāsio

◼ ʼE mole kei faigafua te metitāsio ʼuhi ko te faʼahiga maʼuli ʼo te hahaʼi ʼi te temi nei pea mo tanatou ʼu fakafiafia. Ohagē pē ko te mama ʼo tatatou meʼa kai ʼaē ke fakahifo lelei ki totatou kete, ʼe tonu ke tou metitāsioʼi te ʼu manatu ʼaē ʼe tou lau ʼi te Tohi-Tapu ke ʼi ai hona fua kiā tātou. ʼE tou fai te faʼahi ʼaia ʼaki hatatou fakakaukauʼi te ʼu manatu ʼaē neʼe tou lau pea mo fai he ʼu fehuʼi kiā kita totonu pē, ohagē lā ko te ʼu fehuʼi ʼaenī: ‘Koteā ʼaē neʼe au ako ʼo ʼuhiga mo Sehova ʼAtua? Koteā tona ʼaoga mai kiā au? ʼE au lava fakaʼaogaʼi feafeaʼi moʼo tokoni ki niʼihi?’

Ko te ʼu taʼi fakakaukau ʼaia, ʼe feala ai ki te logo ʼo te Tohi-Tapu ke malave ki totatou loto pea mo fakatuputupu te fiafia ʼi tatatou lau ia te Folafola ʼa te ʼAtua. ʼE ʼui fēnei iā Pesalemo 119:97: “ ʼE au manako ki tau lao! ʼI te ʼaho fuli pē ʼe au manatu kiai.” ʼAki te metitāsio, neʼe liliu maʼa te tagata fai pesalemo te Tohi-Tapu ko te meʼa ʼe manatu kiai ʼi te ʼaho fuli. Neʼe tokoni ai ki ai, ke ina fakatuputupu ia he ʼofa ʼe lahi ki te ʼu meʼa ʼaē neʼe ina ako.

7 Faʼahi​—ʼE Tonu Ke Tokoni Atu He Tahi Ke Kotou Mahino

◼ ʼE mole fakamaʼua mai e te ʼAtua ke tou faiga tokotahi ke tou mahino ki tana Folafola kātoa. ʼE toe fakahā mai pē foki ʼi te Tohi-Tapu, ko ‘ ʼihi puani ʼe faigataʼa tatatou mahino kiai.’ (2 Petelo 3:16) ʼE talanoa te tohi ʼo Gāue ki te tagata Etiopea neʼe mole mahino ki te koga tohi ʼi te Tohi-Tapu ʼaē neʼe ina lau. Neʼe fekauʼi e te ʼAtua Tana kaugana ke ʼalu ʼo tokoni ki te tagata ʼaia, pea “neʼe hoko atu [e te tagata Etiopea ʼaia] tona fagona ʼi te fakafiafia.”—Gāue 8:26-39.

ʼE feala mo koutou ke fua lelei ʼaupitō age takotou lau ia te Tohi-Tapu ʼaki hakotou maʼu he tokoni ke kotou mahino ki te ʼu manatu ʼaē ʼe kotou lau. Kotou fakafelōgoi mo he kau Fakamoʼoni ʼa Sehova ʼi tokotou telituale, peʼe kotou faitohi ki te tuʼasila ʼaē ʼe tuʼu ʼi te pāsina 4 ʼo te nusipepa ʼaenī ke fai hakotou ako Tohi-Tapu ʼe mole totogi.

[ʼU nota]