Te ʼu Fehuʼi ʼa Te Kau Lautohi
ʼE ʼui fēnei e te ʼAtua iā Senesi 6:3: “ ʼE mole fēia anai toku laumālie ki te tagata ʼo talu ai, heʼe toe kakano foki ia. Pea ko tona ʼu ʼaho ʼe aʼu anai kiā taʼu e teau ʼuafulu.” Neʼe fakatuʼakoi koa e Sehova ia te maʼuli ʼo te tagata kiā taʼu pē e 120, pea neʼe fagonogono koa ia Noe ʼi he temi loaloaga fēia ʼo ʼuhiga mo te hoko mai ʼo he Tulivio?
Kailoa ia, neʼe mole hoko he meʼa fēia.
ʼI muʼa ʼo te Tulivio, neʼe kaugamālie ia nātou ʼaē neʼe māʼuʼuli fualoa, lolotoga he ʼu sēkulō. ʼI te temi ʼaē neʼe tō ai te Tulivio, neʼe ko te taʼu 600 ʼo Noe, pea neʼe maʼuli ia taʼu e 950. (Sen. 7:6; 9:29) Ko ʼihi ʼaē neʼe tutupu ʼi te kua ʼosi tō ʼo te Tulivio neʼe fakalaka ia tonatou temi maʼuli ʼi te taʼu e 120. Ko Alepakesate neʼe mate ʼi tona taʼu 438, pea ko Sela ʼi tona taʼu 433. (Sen. 11:10-15) Kae ʼi te temi ʼo Moisese, neʼe kua hifo kiā taʼu e 70 peʼe 80 ia te temi maʼuli ʼo te tagata. (Pes. 90:10) Koia iā Senesi 6:3, neʼe mole fakatuʼakoi te temi maʼuli ʼo te tagata peʼe ʼui ko te loaloaga ʼo te maʼuli ʼe ko taʼu e 120.
ʼE ʼui koa ʼi te vaega ʼaia, ko he ʼu palalau ʼa te ʼAtua neʼe fai kiā Noe moʼo fakatokaga ki niʼihi ʼo ʼuhiga mo te fakaʼauha kā ʼamanaki hoko mai iā taʼu e 120? Kailoa ia. Neʼe tuʼa lahi te palalau ʼa te ʼAtua kiā Noe. ʼI te ʼu vaega e hogofulu ki muli age, ʼe tou lau fēnei ai: “Neʼe ʼui maʼa te ʼAtua kiā Noe: ‘Ko te fakaʼosi ʼo te kakano fuli kua aʼu mai ki ʼoku muʼa, heʼe ko te kele kua fonu ʼi te agakovi ʼuhi ko nātou.’ ” ʼI te ʼu taʼu ki muli age, neʼe fakaʼosiʼosi e Noe te toe gāue lahi ʼaē ko te faʼu ʼo te ʼaleka, pea ʼi te lakaga ʼaia: “Neʼe ʼui maʼa Sehova kiā Noe: ‘Hū ki te ʼaleka, ia koe pea mo tou loto fale kātoa.’ ” (Sen. 6:13; 7:1) Pea ʼi ʼihi temi neʼe fakahā ai e Sehova kiā Noe te ʼu logo.—Sen. 8:15; 9:1, 8, 17.
Kae ko te manatu ʼaē ʼe tuʼu iā Senesi 6:3; ʼe mole talanoa ai ʼo ʼuhiga mo Noe peʼe ʼui ai neʼe palalau age kiā Noe. ʼE fakaʼuhiga pē ia ohagē ko he faʼahiga fakatuʼutuʼu ʼa te ʼAtua peʼe ko he meʼa ʼe loto ke ina fai. (Vakaʼi ia Senesi 8:21.) Ko te faʼahi ʼaē ʼe lelei ke tokagaʼi, ʼi te fakamatala ʼo ʼuhiga mo te ʼu meʼa neʼe hoko ʼi muʼa mamaʼo atu ʼo te temi ʼo Atama, ʼe tou maʼu te ʼu palalau ʼaenī: “Neʼe toe ʼui fēnei e te ʼAtua.” (Sen. 1:6, 9, 14, 20, 24) ʼE mahino mai, neʼe mole palalau ia Sehova ki he tagata ʼi te kele, koteʼuhi neʼe mole heʼeki he tagata kua fakatupu.
Koia ʼaē ʼe matatonu ai te ʼui ʼo ʼuhiga mo te koga tohi ʼo Senesi 6:3, ʼe fakaʼuhiga ki te fakatotonu ʼa te ʼAtua ke ina fakaʼauha te tuʼu ʼo te ʼu faʼahiga meʼa agakovi ʼaenī ʼi te kele. Neʼe fai e Sehova ia te tonu fakamāu ke ina fai te tautea ʼaia ʼi te ʼu taʼu e 120 kā hoa mai, kae neʼe mole heʼeki mālama kiai ia Noe. Kae he koʼē neʼe fakatuʼakoi te temi ʼaia? Pea he koʼē neʼe tonu ke fakatalitali ki te temi ʼaia?
ʼE fakahā e te ʼapositolo ko Petelo ia te ʼu tupuʼaga: “Neʼe talitali te faʼa kātaki ʼa te ʼAtua iā ʼaho ʼo Noe, ʼi te lolotoga faʼu ʼo te ʼaleka, ʼaē ko te tokosiʼi, ko te toko valu, neʼe natou heheka ai, ʼo natou haohaoa ai ʼi te vai.” (1 Pet. 3:20) ʼEī, ʼi te temi ʼaē neʼe fai ai e te ʼAtua ia tana tonu ʼo ʼuhiga mo te ʼu taʼu e 120, neʼe kei toe te ʼu meʼa ke fai. Hili kiai taʼu e 20, neʼe maʼu e Noe mo tona ʼohoana tanā fānau. (Sen. 5:32; 7:6) Neʼe lalahi ake ʼanā tama e toko tolu pea neʼe natou ʼohoana, ʼo natou fakalahi ai tonā fāmili, “ko te toko valu.” Pea neʼe natou laga ai te ʼaleka, ʼaē neʼe mole ko he gāue neʼe vave tona fai heʼe neʼe lahi te gāue ʼaia kae neʼe tokosiʼi te fāmili ʼo Noe. ʼEī neʼe fakafealagia e te faʼa kātaki ʼa te ʼAtua ʼaē iā taʼu e 120, ke hoko te ʼu gāue ʼaia pea ke fai te fakatuʼutuʼu moʼo haofaki te maʼuli ʼo te hahaʼi, ʼo feala ai ki te toko valu agatonu ʼaia ke ‘haofaki nātou ʼi te vai.’
ʼE mole fakahā mai ʼi te Tohi-Tapu pe ko te taʼu fea ʼaē neʼe fakahā ai e Sehova kiā Noe te temi ʼaē kā hoko ai te Tulivio. Mai tona ʼaluʼaga ʼaē kua tutupu ake tona ʼu foha, mo lalahi ake pea mo natou ʼohoana, ʼe mahalo pē neʼe kei toe te ʼu taʼu e 40 peʼe 50 ʼi muʼa ʼo te hoko mai ʼo te Tulivio. Neʼe ʼui fēnei ai leva e Sehova kiā Noe: “Ko te fakaʼosi ʼo te kakano fuli kua aʼu mai ki ʼoku muʼa.” Neʼe ina toe ʼui neʼe tonu ke faʼu e Noe ia he toe ʼaleka pea ke hū ki loto mo tona fāmili. (Sen. 6:13-18) Lolotoga te ʼu taʼu e hogofulu ʼaē neʼe kei toe, neʼe tuku e Noe ia he toe faʼifaʼitaki lelei ʼo ʼuhiga mo tana faitotonu ʼi tona faʼahiga maʼuli ʼaē neʼe ina fai. Neʼe liliu ia ko he “tagata fai fakamafola faitotonu,” neʼe tonu ke ina tala fakahagatonu te logo fakatokaga—ko te logo ʼo ʼuhiga mo te fakatotonu ʼa te ʼAtua kā ina ʼamanaki fakaʼauhga ia nātou ʼaē neʼe māʼuʼuli ʼi te temi ʼaia kae mole natou fakalogo ki te ʼu lēkula ʼa te ʼAtua. Neʼe mole ʼiloʼi fakatomuʼa e Noe peʼe ko te temi fea ʼaē kā hoko ai te tautea ʼaia, kae neʼe ina ʼiloʼi ʼe hoko moʼoni anai ia. Pea ʼe kotou ʼiloʼi neʼe hoko moʼoni te faʼahi ʼaia.—2 Pet. 2:5.