He Koʼē ʼe ʼAoga Ki Tokotou Maʼuli Ia Te Fakamatala ʼAē Ki Te ’Ōloto ʼo Eteni

ʼE KAU ʼi te ʼu palalau fakafeagai ʼaē neʼe lagaʼi e ʼihi hahaʼi sivi Tohi-Tapu, te palalau fakafeagai maʼuhiga ʼo ʼuhiga mo te fakamatala ʼo te ʼōloto ʼo Eteni, ʼo natou ʼui ʼe mole lagolago ʼihi vaega Tohi-Tapu kiai. Ohagē lā ʼe ʼui fēnei e Paul Morris te tagata polofesea ʼo te ʼu sivi fakalotu: ʼE mole ʼi ai he tahi age ʼu vaega Fakatohi-tapu ʼe talanoa ai ki te hisitolia ʼo Eteni.” Ko tana ʼu palalau ʼaia ʼe lagi iō kiai te ʼu hahaʼi ʼe ʼui ʼe natou popoto kae mole ʼalutahi te ʼu palalau ʼaia mo te moʼoni.

ʼI tona fakahagatonu, ʼe lahi te ʼu vaega ʼi te Tohi-Tapu ʼe palalau ʼo ʼuhiga mo te ʼōloto ʼo Eteni, mo Atama, mo Eva pea mo te gata.a Kae ko te faihala ʼa ʼihi hahaʼi sivi Tohi-Tapu ʼe hagē ʼe mole faʼa maʼuhiga faʼu mokā fakatatau ki he tahi age hala ʼe lahi age pea mo mafola lahi age. Ko te ʼu tukugākovi ʼa te kau takitaki lotu pea mo te ʼu hahaʼi valoki ʼo te Tohi-Tapu ʼo ʼuhiga mo te hisitolia ʼo Senesi ʼo te ʼōloto ʼo Eteni, ʼi tona fakahagatonu ʼe ko tanatou faiga fakamālotoloto ʼaia ke natou laukovi ki te Tohi-Tapu. ʼO feafeaʼi?

Ko tatatou mahino ki te meʼa ʼaē neʼe hoko ʼi Eteni ʼe maʼuhiga ke tou mahino ai ki te Tohi-Tapu kātoa. Ohagē lā ko te folafola ʼa te ʼAtua ʼe feala ke tokoni mai kiā tātou ke tou maʼu he ʼu tali ki te ʼu fehuʼi ʼe loloto mo maʼuhiga ʼe fai e te tagata. Ko te ʼu tali ʼa te Tohi-Tapu ki te ʼu fehuʼi ʼaia ʼe fakamatala liuliuga ai te ʼu meʼa ʼaē neʼe hoko ʼi te ʼōloto ʼo Eteni. Tou vakaʼi he ʼu faʼifaʼitaki.

● He koʼē koa ʼe tou mātutuʼa pea mo tou mamate? Ko Atama mo Eva neʼe feala ke nā māʼuʼuli ʼo heʼegata mo kapau neʼe nā haga fakalogo kiā Sehova.ʼE nā mamate pē anai mo kapau e nā talagataʼa. ʼI te ʼaho ʼaē neʼe nā talagataʼa ai neʼe nā mamate ki muli age. (Senesi 2:16, 17; 3:19) Neʼe mole kei nā haohaoa pea neʼe nā tuku holo ki tonā hōloga te agahala pea mo te ʼuhiga heʼe haohaoa. Koia ʼe fakamahino mai fēnei ʼi te Tohi-Tapu: “ ʼAki pē te tagata e tahi neʼe hū te agahala ki te mālamanei, pea ʼaki te agahala te mate, pea koia kua mafola ai te mate ki te tagata fuli pē koteʼuhi kua natou agahala fuli.”—Loma 5:12.

● He koʼē ʼe fakagafua e te ʼAtua ia te agakovi? ʼI te ʼōloto ʼo Eteni, neʼe ʼui ʼe Satana ʼe gutuloi ia Sehova, ʼo mole ina fia foaki te meʼa ʼaē ʼe lelei ki tana hahaʼi. (Senesi 3:3-5) Neʼe fakafihiʼi ai e Satana ia te faitotonu ʼo te faʼahiga pule ʼa Sehova. Neʼe filifili e Atama mo Eva ke nā mulimuli kiā Satana, koia neʼe nā fakafisi ki te pule faʼifaʼitaliha ʼa Sehova pea mo nā ʼui ko te tagata ʼe feala ke ina ʼiloʼi te meʼa ʼaē ʼe lelei pea mo te meʼa ʼaē ʼe kovi. ʼI tana faitotonu mo tona poto haohaoa, neʼe ʼiloʼi e Sehova neʼe i ʼai te puleʼaki pē e tahi moʼo tali ki te fakafihi ʼaia: ke ina tuku he temi ke feala ai ki te tagata ke pule faʼifaʼitaliha. Ko te agakovi ʼaē neʼe hoko, tupu mai te haga a Satana ʼo fakaneke ia te hahaʼi, pea neʼe ina fakahā māmālie ai te moʼoni ʼaenī: ko te tagata ʼe mole feala ke ina takitaki lelei ia ia totonu mo kapau ʼe mole tokoni age te ʼAtua.—Selemia 10:23.

● Koteā te fakatuʼutuʼu ʼa te ʼAtua ki te kele? ʼI te ʼōloto ʼo Eteni, neʼe fakahā e Sehova peʼe feafeaʼi ia te matalelei ʼo te kele. Neʼe ina fakatotonu kiā Atama mo Eva ke nā fakafonu te kele ʼaki tonā hōloga pea ke nā “puleʼi” ke fakaliliu te kele kātoa ʼo matalelei pea mo tokalelei. (Senesi 1:28) Koia neʼe fakatuʼutuʼu e te ʼAtua ke liliu te kele ko he palatiso ʼe nofoʼi e he fāmili haohaoa mo logotahi, ʼo te hōloga ʼo Atama mo Eva. ʼE lahi te ʼu vaega ʼo te Tohi-Tapu ʼe talanoa ʼo ʼuhiga mo te ʼu gāue ʼaē neʼe fai e te ʼAtua moʼo fakahoko te fakatuʼutuʼu ʼaia ʼi te kamata.

● He koʼē neʼe haʼu ia Sesu Kilisito ki te kele? ʼAki te agatuʼu ʼaē neʼe hoko ʼi te ʼōloto ʼo Eteni, neʼe tupu ai te mamate ki muli age ʼo Atama mo Eva pea mo tonā hōloga fuli, kae ʼi tona ʼofa neʼe foaki e te ʼAtua te ʼamanaki. Neʼe ina fekauʼi mai tona ʼAlo ki te kele moʼo foaki mai te meʼa ʼofa ʼaē ʼe fakahigoaʼi ʼi te Tohi-Tapu ko te totogi. (Mateo 20:28) Koteā tona fakaʼuhiga? Ko Sesu neʼe “ko te Atama fakamuli” neʼe ina taupau tana agatonu ʼo mole hagē ko Atama. ʼI te nofo fakalogo a Sesu kiā Sehova neʼe ina taupau tona maʼuli haohaoa. Koia, neʼe ina tali lelei ke ina foaki tona maʼuli ko he sākilifisio, peʼe ko he totogi, neʼe ina foaki mai te puleʼaki maʼa te hahaʼi faitotonu fuli, ke natou maʼu te fakamolemole ki tanatou ʼu agahala, pea mo maʼu ki muli age ia te faʼahiga maʼuli haohaoa ʼaē neʼe maʼu e Atama mo Eva ʼi Eteni ʼi muʼa ʼo tanā agahala. (1 Kolonito 15:22, 45; Soane 3:16) Koia neʼe foaki ai e Sesu he fakamoʼoni, ki te fakatuʼutuʼu ʼa Sehova ke liliu te kele ko he palatiso ohagē ko Eteni ʼe hoko moʼoni anai.b

Ko te fakatuʼutuʼu ʼa te ʼAtua ʼe mole ko he manatu fakateolosia ʼe faigataʼa hatatou mahino kiai. Ko he faʼahi ʼe hoko moʼoni anai ia. Neʼe tuʼu moʼoni te ʼōloto ʼo Eteni ʼi te kele neʼe maʼuli ai te faga manu pea mo te ʼu hahaʼi. Koia ʼe feala ai ke tou falala ko te fakapapau ʼa te ʼAtua ʼaē ki te kā haʼu ʼe hoko moʼoni anai ia. ʼE ko tokotou kā haʼu koa lā ʼaia? ʼE fakalogo tāfito te faʼahi ʼaia kiā koutou. ʼE loto e te ʼAtua ke maʼu e te hahaʼi tokolahi ia te kā haʼu ʼaia, māʼiapē lā mo nātou ʼaē neʼe natou fai he ʼu agahala mamafa.—1 Timoteo 2:3, 4.

ʼI te ʼamanaki mate ʼa Sesu, neʼe palalau ki te tagata neʼe aga kovi. Ko te tagata neʼe fai fakapō, neʼe mahino kiā ia ʼe tonu ke matehi. Kae neʼe haga kiā Sesu ke ina maʼu he fakalotofīmālie, he ʼamanaki. Koteā te tali ʼa Sesu? “ ʼE ke ʼi te Palatiso anai mo au.” (Luka 23:43) Kapau ʼe loto ia Sesu ke sio ki te tagata fai fakapō ʼaia ʼi te palatiso, kua fakatuʼuake pea mo tapuakinaʼi ʼaki te fealagia ʼaē ke ina maʼu te maʼuli heʼegata ʼi te palatiso ohagē ko Eteni, ʼe mole ina loto koa lā ke kotou maʼu mo koutou ia te tapuakina ʼaia? ʼE loto ki ai ia Sesu mo tana Tamai! Kapau ʼe kotou fia maʼu te ʼamanaki ʼaia, kotou faiga ke kotou ako ʼo ʼuhiga mo te ʼAtua ʼaē neʼe ina fakatuʼu ia te ʼōloto ʼo Eteni.

[ʼU nota]

[Talanoa ʼo te pasina 10]

KO HE LEA FAKAPOLOFETĀ ʼE INA FAKAFĒLOGOI TAHI TE TOHI-TAPU

“ ʼE au tuku anai he fehiʼa iā te koe pea mo te fafine, ʼi tou hako pea mo tona hako. ʼE ina maumauʼi anai koe ʼi tou ʼulu pea ʼe ke maumauʼi anai ia ia ʼi tona muliʼi vaʼe.”—Senesi 3:15.

Neʼe fai e te ʼAtua ʼi Eteni ia te ʼuluaki lea fakapolofetā ʼaia ʼi te Tohi-Tapu. Ko ai koa te ʼu hahaʼi toko fā ʼaia: ia te fafine, mo tona hako, mo te gata pea mo tona hako? ʼE feafeaʼi te fefakafeagaiʼaki ʼa te ʼu hahaʼi ʼaia?

TE GATA

Ko Satana ia te Tēvolo.—Fakahā 12:9.

TE FAFINE

Ko te kautahi ʼo te kau ʼāselo ʼa Sehova ʼaē ʼi selō. (Kalate 4:26, 27) Neʼe talanoa ia Isaia ki te “fafine,” ʼo ina fakakikite ʼe ina fānauʼi anai he puleʼaga fakalaumālie, foʼou.—Isaia 54:1; 66:8.

TE HAKO ʼO TE GATA

Ko te hahaʼi ʼaē neʼe natou filifili ke natou fai te finegalo ʼo Satana.—Soane 8:44.

TE HAKO ʼO TE FAFINE

ʼUluaki ko Sesu Kilisito, ʼaē neʼe haʼu mai te koga ʼo te kautahi ʼa Sehova ʼaē ʼi selō. ʼE toe kau ki te “hako” ʼaia ia te ʼu tehina fakalaumālie ʼo Kilisito, ʼaē kā kaugā hau mo ia ʼi selō. Ko te ʼu Kilisitiano fakanofo ʼaia ʼe natou faʼufaʼu te puleʼaga fakalaumālie, ia te “Iselaele ʼa te ʼAtua.”—Kalate 3:16, 29; 6:16; Senesi 22:18.

TE LAVEA ʼO TE MULIʼI VAʼE

Neʼe fakatemi te mamahi ʼo te Mēsia. Neʼe iku te ʼu faiga ʼa Satana ʼi tana matehi ia Sesu ʼi te kele. Kae neʼe fakatuʼuake ia Sesu.

TE MALAKI ʼO TE ʼULU

ʼE matehi anai Satana. ʼE fakaʼauha anai ʼo heʼegata e Sesu ia Satana. Kae ʼi muʼa atu, ʼe pulihi anai e Sesu te agakovi ʼa Satana ʼaē neʼe ina kamata ʼi Eteni.—1 Soane 3:8; Fakahā 20:10.

Kapau ʼe kotou fia maʼu he manatu fakanounou ʼo ʼuhiga mo te kupu tāfito ʼo te Tohi-Tapu, kotou vakaʼi te kaupepa lahi La Bible — Quel est son message ? neʼe tā e te kau Fakamoʼoni ʼa Sehova.

[Paki ʼo te pasina 11]

Neʼe māʼuʼuli mamahi ia Atama mo Eva ʼi te ʼu fua kovi ʼo te agahala