Ko Apalahamo—Ko He Tagata Tui

ʼI te tuʼu ʼa Apalahamo ʼi tuʼa ʼi he pō ʼe lao lelei, neʼe hiki ake ʼona mata ʼo sio ki te gigila ʼo te ʼu fetuʼu ʼo te lagi, pea ina manatuʼi ai ia te fakapapau ʼa te ʼAtua ki tona hōloga, ʼe liliu anai ʼo kaugamālie ohagē ko te ʼu fetuʼu ʼaia. (Senesi 15:5) Kiā Apalahamo, ko te hā ʼo te ʼu fetuʼu ʼe ina fakamanatuʼi age ia te fakapapau ʼa Sehova. Neʼe ko he fakamoʼoni maʼa nātou. Pea tahi ʼaē, kapau ʼe maʼu e Sehova ia te mālohi ʼaē ke ina fakatupu ia he toe ʼatulaulau pea mo meʼa fuli ʼe maʼu ai, ʼe mole feala koa lā ke ina foaki kiā Apalahamo mo Sala ia hanā fānau? Ko te faʼahi lā ʼaia neʼe tui kiai ia Apalahamo.

KOTEĀ IA TE FAKAʼUHIGA ʼO TE TUI? Ohagē ko tona fakaʼaogaʼi ʼi te Tohi-Tapu, ko “te tui” ʼe ko te tui papau ki he meʼa ʼe mole tou sisio kiai. Ko te taʼi tui ʼaia, ʼe ʼi ai tona fakatafitoʼaga mālohi. Ko he tahi ʼe tui ki te ʼAtua, ʼe tokaga tāfito ki te fakahoko ʼo te ʼu fakapapau ʼa Sehova, pea mo falala ʼe ina fakahoko moʼoni anai.

NEʼE FAKAHĀ FEAFEAʼI E APALAHAMO IA TANA TUI? Neʼe fakahā e Apalahamo ʼe tui ki te ʼu fakapapau ʼa te ʼAtua. ʼI te mālohi ʼo tana tui, neʼe mavae ia Apalahamo mai te fenua ʼaē neʼe tupu ai, ʼo falala ʼe manatuʼi anai e Sehova ia Tana fakapapau ʼaē ke ina foaki age ia he tahi age fenua. ʼAki tana tui, neʼe fefoliʼaki ia Apalahamo ʼi Kanaane, ʼo tui papau ʼe maʼu anai e tona hōloga ia te fenua ʼaia. Pea ʼaki tana tui, ko Apalahamo neʼe fakalogo he neʼe teitei pē ke ina momoli ia Isaake ko he sākilifisio, ʼo tui papau, kapau ʼe ʼaoga, ʼe toe fakatuʼuake anai e Sehova ia Isaake.—Hepeleo 11:8, 9, 17-19.

Neʼe fakahagahaga tana sio ki te kā haʼu kae mole ki te ʼu meʼa ʼaē kua hili. Logolā neʼe fiafia ia Apalahamo mo Sala ʼi te fīmālie ʼo tona maʼuli ʼi Ulu ʼi ʼaē ʼi Kanaane, kae “neʼe [mole] natou manatu ki te fenua ʼaē neʼe natou mavae mai ai.” (Hepeleo 11:15, La Sainte Bible Segond révisée) Koia, neʼe fakahagahaga tanatou sio ki te ʼu tapuakina ʼaē kā foaki anai e te ʼAtua maʼa nātou pea mo tonatou hōloga ʼi te kā haʼu.—Hepeleo 11:16.

ʼE ʼi ai koa he fakatafitoʼaga lelei ʼo te tui ʼa Apalahamo? ʼEī, neʼe fakahoko e Sehova ia tana ʼu fakapapau takitahi. ʼI te kaugamālie ʼo te hōloga ʼo Apalahamo, neʼe liliu leva ko te puleʼaga ʼaē neʼe fakahigoaʼi ko Iselaele. Koia, neʼe ʼomai ia te kau Iselaele ʼo nonofo ʼi Kanaane, ʼi te fenua ʼaē neʼe fakapapauʼi e Sehova kiā Apalahamo.—Sosue 11:23.

KOTEĀ HE ʼU AKO MAʼA TĀTOU? ʼE tou tui papau ʼe fakahoko anai e Sehova ia tana ʼu fakapapau. Tatau aipē peʼe mata faigataʼa ki te sio fakatagata, kae ʼe tou tui papau “ki te Atua e feala te mea fuli.”—Mateo 19:26.

Ko te tahi ako ʼe feala ke tou tāʼofi mai te faʼifaʼitaki ʼo Apalahamo, ke ʼaua naʼa tuʼu tatatou sio ʼi te ʼu meʼa ʼaē kua hili kae ki te fiafia ʼaē ʼe tou maʼu anai ʼi te temi kā haʼu. Ko te ʼaluʼaga lā ʼaia, ʼe tou tāʼofi mai te tagata ʼe higoa ko Jason. Neʼe tau ia Jason mo te mahaki kovi ʼo palalisia ai ia te faʼahi hema ʼo tona sino. ʼE ʼui fēnei e Jason: “ ʼE tonu ke au tali ʼi te temi nei ʼe mole kei feala ke au fai ohagē ko te temi muʼa.” Pea ina toe ʼui: “ ʼE ʼi ai te faʼahi pē ʼe mole feala ke au galoʼi, ʼe ko taku fāʼufua ki toku ʼohoana ia Amanda.”

Kae, ʼe tui papau ia Jason ʼe fakahoko anai e Sehova ia tana ʼu fakapapau, ʼo kau ai ia te fakapapau ʼaē ʼe liliu anai ia totatou kele ko he palatiso pea ʼe foaki anai ki te hahaʼi agatonu ia he maʼuli haohaoa ʼo heʼegata.a (Pesalemo 37:10, 11, 29; Esaia 35:5, 6; Apokalipisi 21:3, 4) ʼE ʼui fēnei e Jason: “ ʼE au manatuʼi ia toku maʼuli ʼi te ʼu temi ki muʼa atu,” ʼe ina fakamahino fēnei: “ ʼI he temi kua ovi mai, ʼe mole toe maʼu anai ʼi te ʼu faʼahi fuli ia te hoha, mo te tuʼania, mo te lotomamahi pea mo te tautea ʼo te loto.” Mole koa lā ko he faʼifaʼitakiʼaga lelei ʼo te tui ohagē ko Apalahamo!

[Nota]