Ko Halamaketone—Koteā ʼAē ʼe ʼUi e ʼIhi ʼo ʼUhiga Mo Te Faʼahi ʼAia?

“Pea nee natou fakatahii leva natou i te kogamea ae e higoa i te fakahepeleo ko Alemaketone, peʼe Halamaketone.”—APOKALIPISI 16:16.

KOTEĀ ia takotou manatu mokā kotou logo ki te kupu “Halamaketone”? ʼE lagi kotou manatuʼi anai ia he ʼu pāki ʼo he ʼu tuʼutāmaki fakamataku. Logolā ʼe hā tuʼa tahi pē ia te kupu ʼaia ʼi te Tohi-Tapu, kae ʼe palalauʼi tuʼumaʼu ia te kupu ʼaia e te kau takitaki lotu peʼe ʼi te ʼu talalogo.

ʼE ʼalutahi koa ia te ʼu manatu ʼa te hahaʼi ʼo ʼuhiga mo Halamaketone mo ʼaē ʼe akoʼi mai ʼi te Tohi-Tapu? Ko te tali ki te fehuʼi ʼaenī, ʼe ʼaoga ke tou ʼiloʼi. Koteā ia tona tupuʼaga? Koteʼuhi ʼe feala ki te moʼoni ʼo ʼuhiga mo Halamaketone ke ina fakaʼāteaina ia koutou mai te tuʼania ki te faʼahi ʼaia, ke ina fakamālamaʼi ia takotou sio ki te kā haʼu pea mo fetogi ia takotou manatu ʼo ʼuhiga mo te ʼAtua.

Tou vakaʼi ia te ʼu fehuʼi e tolu ʼaenī kā hoa mai, pea mo tou fakatatau ia te ʼu manatu ʼa te hahaʼi ʼo ʼuhiga mo Halamaketone pea mo ʼaē ʼe akoʼi moʼoni mai ʼi te Tohi-Tapu.

1. KO HALAMAKETONE ʼE KO HE TUʼUTĀMAKI KOA NEʼE TUPU MAI TE TAGATA?

ʼE fakaʼaogaʼi tuʼumaʼu e te hahaʼi talalogo pea mo te hahaʼi fekumi ia te kupu “Halamaketone” moʼo fakaʼuhiga ki te ʼu tuʼutāmaki ʼaē ʼe tupu mai te tagata. Ohagē lā, neʼe fakaʼuhiga ia te ʼUluaki pea mo te Lua Tau Fakamālamanei ko te Halamaketone. ʼI te hili ʼo te ʼu tau ʼaia, neʼe tuʼania ia te mālamanei naʼa fokifā kua lī e Amelika pea mo Lusia ia te ʼu mahafu fakanukeleʼea ki te ʼu fenua takitahi. ʼE higoaʼi ʼi te ʼu talalogo ia te ʼu tau ʼaia “ko te Halamaketone fakanukeleʼea.” Iā ʼaho nei, ʼe tuʼania ia te hahaʼi fekumi ki te ʼulihi ʼo te kele ʼaē kā ina fakahoko anai ia he ʼu fetogi fakamataku ki te ʼu fasigā taʼu ʼi te kele ʼe tupu mai “te ʼaluʼaga ʼo Halamaketone.”

Koteā ia te fakaʼuhiga ʼo ʼanatou fakamahino? ʼE fakalogo ia te kā haʼu ʼo te kele pea mo meʼa fuli ʼe maʼuli ai ki te tagata. Kae kapau ʼe mole gāue fakapotopoto ia te ʼu puleʼaga, ʼe fua kovi anai ki te kele.

Koteā ʼaē ʼe akoʼi mai ʼi te Tohi-Tapu? Neʼe mole fakagafua e te ʼAtua ki te tagata ke ina maumauʼi ia te kele. ʼE fakapapau mai ʼi te Tohi-Tapu ko Sehovaa “neʼe mole ina fakatupu noa” ia te kele, kae neʼe ina fakatupu “ke nofoʼi.” (Esaia 45:18, MN) Koteʼuhi ʼaē neʼe mole fakafealagia e te ʼAtua ke maumauʼi kātoa e te tagata ia te kele, kae ʼe ‘maumauʼi anai e te ʼAtua ia nātou ʼaē ʼe natou maumauʼi ia te kele.’—Apokalipisi 11:18.

2. KO HALAMAKETONE ʼE KO HE TUʼUTĀMAKI FAKANĀTULĀ KOA?

ʼI ʼihi temi, ʼe fakaʼaogaʼi e te hahaʼi talalogo ia te kupu “Halamaketone” ko he fakatafitoʼaga ʼo te ʼu tuʼutāmaki fakanātulā. Ohagē lā, ʼi te taʼu 2010, neʼe ʼui ai ʼe ko te “ ‘Halamaketone’ ʼaē neʼe hoko ʼi Haïti.” Neʼe maʼu ai ia te ʼu mamahi, mo te ʼu maumau pea ko ʼihi neʼe mamate ʼi te tō ʼo te toe mafuike ʼo ina maumauʼi ia te kolo. Neʼe mole fakaʼaogaʼi pē e te hahaʼi kumi logo pea mo fai ʼata ia te kupu ʼaia ki te ʼu ʼaluʼaga ʼaē neʼe kua hoko kae neʼe natou fakaʼaogaʼi kiā nātou ʼaē neʼe natou tuʼania naʼa fokifā kua hoko ia te faʼahi ʼaia. Ohagē lā, neʼe natou fakaʼaogaʼi ia te kupu “Halamaketone” moʼo fakamatala ia te ikuʼaga ʼo te foʼi fetuʼu ʼaē neʼe tō ifo ki te kele.

Koteā ia te fakaʼuhiga ʼo ʼanatou fakamahino? Ko Halamaketone ʼe ko he ʼaluʼaga fakafokifā ʼe matematehi ai ia te hahaʼi agalelei. ʼE tokosiʼi ia nātou ʼe feala ke natou puipui ia nātou totonu mai te faʼahi ʼaia.

Koteā ʼaē ʼe akoʼi mai ʼi te Tohi-Tapu? Ko Halamaketone ʼe mole ko he ʼaluʼaga ʼe matematehi ai te hahaʼi agalelei. Kae ʼi te lolotoga ʼo Halamaketone, ʼe gata pē anai ki te kau agakovi ʼaē kā fakaʼauha anai. ʼE fakapapau mai ʼi te Tohi-Tapu kua vave pē ia te “pulihi anai ia te tagata agakovi; pea ʼe mahino papau ia ʼe ke tokaga anai ki tona potu, kā kua puli anai ia.”—Pesalemo 37:10, MN.

3. ʼE MAUMAUʼI ANAI KOA E TE ʼATUA IA TE KELE ʼI HALAMAKETONE?

Tokolahi te hahaʼi lotu ʼe natou tui ʼe ʼi ai anai he fetauʼaki fakaʼosi ʼo te lelei pea mo te kovi ʼe iku anai ki te fakaʼauha ʼo totatou kele. Neʼe fai ia te tānaki e te kautahi fekumi ʼi Amelika ʼo te faleako ʼo Princeton ʼo natou maʼu ia te toko 40 ki te teau ʼo te hahaʼi ʼe natou tui ko te mālamanei ʼe pulihi anai “ ʼi te tau ʼaē kā hoko anai ʼi Halamaketone.”

Koteā ia te fakaʼuhiga ʼo ʼanatou akonaki?: Neʼe mole fakatupu ia te tagata ke maʼuli ʼo heʼegata ʼi te kele, ʼo toe fēia aipē mo te kele ke tuʼu ʼo talu ai. Neʼe fakatupu e te ʼAtua ia te tagata ʼaki ia te fakatuʼutuʼu ʼaē ke natou mamate fuli ʼi he temi pē.

Koteā ʼaē ʼe akoʼi mai ʼi te Tohi-Tapu? ʼE fakahā lelei mai ʼi te Tohi-Tapu ko te ʼAtua “nee ina fakatuu ia te kele i ona fakatafito, e mole gaugaue anai ia ia i he aho.” (Pesalemo 104:5) Kiā nātou ʼaē ʼe māʼuʼuli ʼi te kele, ʼe ʼui fēnei ʼi te Tohi-Tapu: “E mau anai e te kau agatonu te fenua, pea e natou nonofo anai i ai o heegata.”—Pesalemo 37:29.

ʼE mahino mai, ʼe mole ʼalutahi ia te manatu ʼa te Tohi-Tapu mo te ʼu tuʼuga manatu hala ʼa te hahaʼi ʼo ʼuhiga mo Halamaketone. Koia, koteā ia te moʼoni?

[Nota]