Te Fekumi ʼo He ʼu Tali

“ ʼE teitei pē ke takitahi ia te tagata pea mo tana faʼahiga tala manatu ʼo ʼuhiga mo [Sesu]. Peʼe tou tui peʼe tou lotolotolua, kae ʼe lagi tou feʼekeʼaki pe ko ai koa ia te tagata ʼaia?”—TE TAGATA FAITOHI KO STAN GUTHRIE.

TOKOLAHI ʼe natou fia ʼiloʼi peʼe ko ai ia Sesu. Neʼe lahi te ʼu tohi pea mo te ʼu ʼata ʼaē neʼe talanoa kiā Sesu, kae ʼe kei feʼekeʼaki pē te tokolahi ʼo ʼuhiga mo ia. ʼE natou maʼu te faʼahiga manatu kehekehe ʼaē, pe ko ai moʼoni koa ia Sesu.

ʼI te ʼu taʼu kua hili atu, neʼe fakafehuʼi e te tagata pea mo te fafine fai talalogo ia te hahaʼi ke natou tali ʼi te televisio ki te fehuʼi ʼaenī “Ko ai koa ia Sesu?” Pea neʼe natou tali fēnei:

● “ ʼE lagi ko he tagata faiako. Neʼe ina fakahā ia te loto manavaʼofa ʼi tona maʼuli.”

● “Neʼe ko he tagata ʼe hagē pē ko te tagata fuli. Kae ko tona maʼuli neʼe makehe.”

● “Neʼe mole maʼuli moʼoni ia Sesu.”

● “Ko Sesu, ʼe ko te ʼAlo ʼo te ʼAtua ʼaē neʼe tupu, pea mate, pea mo fakatuʼuake moʼo haofaki ʼo tātou mai ʼatatou agahala. ʼE kei lolotoga maʼuli nei, pea ʼe toe haʼu anai ki te kele.”

● “ ʼE au tui, ko Sesu Kilisito ʼe ko te ʼalo ʼulutokotahi ʼo te ʼAtua, ʼe ko he tagata pea ʼe toe ʼatua foki.”

● “Ko te ʼu hisitolia ʼa Sesu ʼe ko he fāgana maʼa te kau tamaliki liliki.”

Koia, ʼe mole feala ke moʼoni ia te ʼu tala manatu kehekehe ʼaenī. ʼE ʼi ai koa he faʼahi ʼe tuha mo te falala ke tou maʼu ai he ʼu tali ki ʼatatou fehuʼi ʼo ʼuhiga mo Sesu? Ko nātou ʼaē ʼe natou fai ia te nusipepa ʼaenī, ʼe natou tui ko te Tohi-Tapu ʼe ko te Folafola ʼa te ʼAtua. Pea ʼe ko te tohi pē ʼaia e tahi ʼe feala ke ina fakahā mai ia te moʼoni kātoa ʼo ʼuhiga mo Sesu.a—2 Timoteo 3:16.

ʼI te ʼalatike ʼaē kā hoa mai, ʼe tou vakaʼi anai ia te ʼu tali Fakatohi-tapu ki te ʼu tuʼuga fehuʼi ʼo ʼuhiga mo Sesu. Neʼe ina ʼui fēnei: “Ko he tahi pe e tui kia ia” ʼe feala ke ina maʼu te haofaki. (Soane 3:16) ʼE matou fakaafe atu koutou ke kotou vakavakaʼi ia te ʼu tali pea mo kotou tahi fakatuʼutuʼu, ke lahi age takotou mahino ʼo ʼuhiga mo Sesu pea ʼe feafeaʼi hakotou tui kiā te ia.

[Nota]