Ko Ai ʼAē ʼe Fakalogo Ki Te ʼu Faikole?

ʼE MAHINO ia ʼe ko ia ʼaē neʼe ina faʼu ia meʼa fuli ʼaē ʼe tonu ke fakalogo ki te ʼu faikole. Heʼe ko ai ʼaē ʼe feala ke ina ʼiloʼi lelei age ʼakotou manatu iā ia ʼaē neʼe ina faʼu te ʼuto? ʼE ʼi ai koa he tahi age ʼe feala ke ina tali te ʼu faikole pea mo foaki te tokoni ʼaē ʼe ʼaoga ki te mālamanei? Kae ʼe lagi kotou feʼekeʼaki peʼe fakapotopoto koa takotou tui ʼaē ʼe ʼi ai he Tupuʼaga.

Maʼa te tokolahi, kapau ʼe kita tui ʼe ʼi ai he Tupuʼaga pea ʼe tonu ia ke kita fakafisi ki te ʼu fakamoʼoni ʼaē neʼe maʼu e te kau poto lalahi, ohagē lā ʼi te faʼahi ʼo te nātulā. Kae ʼe mole moʼoni te ʼu palalau ʼaia. Heʼe ko nātou ʼaē ʼe natou ako te ʼu faʼahi ʼaia ʼe feala pē ke natou tui ki te ʼAtua, ohagē ko tona fakahā ʼaenī:

◼ Mole heʼeki faʼa fualoa, neʼe fai te sivi ki te toko 1 646 kau poto lalahi ʼe natou faiako ʼi te ʼu univelesitē e 21 ʼi Amelika, pea neʼe teitei pē ko te toko 550 pē ʼaē neʼe natou filifili te manatu ʼaē “ ʼE mole au tui ki te ʼAtua.”

ʼI tona fakahagatonu, tokolahi te kau poto lalahi ʼe natou tui ʼe ʼi ai moʼoni te ʼAtua.

Ko Te ʼu Fakamoʼoni ʼe ʼi Ai Te Tupuʼaga

ʼE tonu koa ke tou hoko tui ʼe fakalogo he tahi ki te ʼu faikole kae mole ʼi ai hona fakamoʼoni? Kailoa ia. ʼE mole moʼoni te ʼui ʼaē ʼe mole ʼaoga he ʼu fakamoʼoni ke feala ai hatatou tui. ʼI te Tohi-Tapu, ʼe fakamahino ai ko te tui ʼe “ko he fakamooni o te u mea e mole sio ki ai.” (Hepeleo 11:1) Ohagē lā, ʼe mole kotou sio ki te matagi kae ʼe kotou tokagaʼi te gaugaue ʼo te ʼu ʼulu ʼakau, pea ʼe kotou tui ai ʼe ʼi ai te matagi. ʼO toe fēia pē, logolā tatatou mole sio kiā ia ʼaē ʼe fakalogo ki te ʼu faikole, kae ʼe feala ke tou vakaʼi te ʼu fakamoʼoni ʼaē ʼe tou maʼu ke tou tui papau ai ʼe ʼi ai moʼoni te ʼAtua.

ʼE tou lava maʼu ʼifea he ʼu fakamoʼoni? Tou vakaʼi pē ʼi ʼotatou tafaʼaki. ʼE ʼui fēnei ʼi te Tohi-Tapu: “Koteuhi nee fau te u fale fuli e he tahi, kae ko ae nee ina fau te u mea fuli ko te Atua.” (Hepeleo 3:4) ʼE kotou manatu tahi koa mo te manatu fakapotopoto ʼaia? Lagi mokā kotou fakakaukau ki te fakaʼaluʼalu lelei ʼo te ʼu fetuʼu ʼi te ʼatulaulau, peʼe ko te kamataʼaga ʼo te maʼuli, peʼe ko te ʼuto ʼa te tagata ʼaē ʼe ko he faʼahi faigataʼa age ʼi te ʼu meʼa ʼaē ʼe maʼu ʼi te kele, pea ʼe kotou mahino ai ʼe ʼi ai moʼoni he faʼahi ʼe māʼoluga age ʼi te tagata.

Kae ʼe mole feala ke tou ako ia meʼa fuli ʼo ʼuhiga mo te ʼAtua ʼaki pē te nātulā. Ko te vakaʼi ʼi te nātulā te ʼu fakamoʼoni ʼe ʼi ai moʼoni te ʼAtua, ʼe hagē pē ko hatatou logo ki he tahi ʼe haʼele ʼi te tuʼa matapā. ʼE kotou ʼiloʼi ʼe ʼi ai te tahi kae ʼe mole kotou ʼiloʼi pe ko ai. Pea ke feala hakotou ʼiloʼi pe ko ai, ʼe tonu ke kotou ʼavahi te matapā. ʼE tonu ke tou toe fai fēia ke tou ʼiloʼi ia ia ʼaē neʼe ina fakatupu ia meʼa fuli.

ʼE feala ke kotou ʼiloʼi te ʼAtua mokā kotou ʼavahi te Tohi-Tapu. Kā kotou ʼavahi te Tohi-Tapu pea mo vakaʼi pe neʼe hoko feafeaʼi te ʼu lea fakapolofetā, ʼe kotou maʼu anai he ʼu fakamoʼoni ʼe ʼi ai te ʼAtua.a Kae ʼo mole gata ai, ʼe kotou toe maʼu ai pe neʼe fakahā feafeaʼi e te ʼAtua tana aga ki te hahaʼi, pea ʼe kotou mahino ai ki te ʼuluagaaga ʼo ia ʼaē ʼe fakalogo ki te ʼu faikole.

ʼE Feafeaʼi Ia Ia ʼAē ʼe Fakalogo Ki Te ʼu Faikole?

ʼE tou ʼiloʼi fuli ʼe feala pē hatatou felōgoi mo he tahi ʼe fagono mai ʼaki he lotomahino. Koia ʼe fakahā mai ʼi te Tohi-Tapu ʼe feala ke kotou felōgoi mo ia ʼaē ʼe fakalogo ki te ʼu faikole, pea mo kotou ʼiloʼi ia ia. Pea ʼe fakalotofīmālie tatatou lau fēnei: “Sii koe, ae e fakalogo ki te kole, e omai anai te tagata fuli kia koe.” (Pesalemo 65:3) ʼE fakalogo ia ki te ʼu kole ʼaē ʼe fai age e nātou ʼaē ʼe tui. Pea ʼe ʼi ai tona huafa. ʼE ʼui fēnei ʼi te Tohi-Tapu: “ ʼE mamaʼo Sehova ʼi te kau agakovi, kae ʼe fakalogo ia ki te faikole ʼa te kau agatonu.”—Tāʼaga Lea 15:29, MN.

ʼE logoʼi e Sehova te ʼu meʼa ʼi tona loto. “Ko te Atua o te ofa” pea ʼe toe ʼui ʼe ko “te Atua manuia,” peʼe fiafia. (2 Kolinito 13:11; 1 Timoteo 1:11) ʼE fakahā ʼi te Tohi-Tapu pe neʼe feafeaʼi tona loto ʼi te temi ʼaē neʼe mafola lahi ai te agamālohi. ʼE ʼui fēnei: “Nee mamahi osi tona loto.” (Senesi 6:5, 6) ʼE mole moʼoni te ʼui ʼaē ʼe fakamamahiʼi e te ʼAtua te hahaʼi moʼo ʼahiʼahiʼi nātou, heʼe ʼui fēnei ʼi te Tohi-Tapu: “E mamao osi i te Mafimafi te agakovi!” (Sopo 34:10) Kae ʼe lagi kotou feʼekeʼaki kapau ko te ʼAtua ʼe ko te Tupuʼaga māfimāfi, pea he koʼē koa ʼe ina tuku ke hoholo atu te mamahi?

Neʼe fakafealagia e te ʼAtua ki te tagata ke ina filifili faʼifaʼitaliha te meʼa ʼaē ʼe loto kiai, ʼo hā ai tana fakamaʼuhigaʼi ia te tagata. ʼE mole tonu koa lā ke tou fakaʼaogaʼi lelei totatou loto faʼitaliha ʼaia moʼo filifili totatou faʼahiga maʼuli? Kae ʼe fakaʼofaʼofa heʼe fakaʼaogaʼi koviʼi e te tokolahi tonatou loto faʼitaliha, ʼo natou mamahi ai pea mo toe mamahi ai mo ʼihi atu. Koia ʼe ko te fehuʼi maʼuhiga leva ʼaenī ʼaē ʼe tonu ke tou fakakaukau lelei kiai: ʼE pulihi feafeaʼi anai koa e te ʼAtua te mamahi kae ina tuku te loto faʼitaliha ʼa te hahaʼi? ʼE tou vakaʼi anai te fehuʼi ʼaia ʼi te ʼalatike ʼaē kā hoa mai.

[Nota]

[Talanoa ʼo te pāsina 5]

ʼE Kotou Lotolotolua Koa Tupu Ko Te ʼu Gāue ʼa Te ʼu Lotu?

Meʼa fakaʼofaʼofa foki heʼe tupu lā te mole tui ʼa te tokolahi ʼe ʼi ai he tahi ʼe manavaʼofa ʼe fakalogo ki te ʼu faikole, ʼuhi ko te ʼu lotu. Māʼiapē lā mo te hahaʼi ʼaē ʼe faikole, ʼe mole kei natou tui ki te ʼAtua ʼuhi ko te kau ʼa te ʼu lotu ki te tau, mo te ʼu fakahoko agatuʼu, pea mo tanatou tuku ke hoholo ia te fakaʼalikiʼi ʼo te tamaliki ʼi te ʼu lotu.

He koʼē ʼe tupu te ʼu mamahi mai te ʼu lotu? Koteʼuhi neʼe fai e te hahaʼi he ʼu aga ʼe kovi ʼi te higoa ʼo te lotu. Neʼe fakakikite ʼi te Tohi-Tapu ʼe faʼao anai e he hahaʼi te takitaki ʼo te Lotu Fakakilisitiano pea mo natou fakaʼaogaʼi kovi. Neʼe ʼui e te ʼapositolo ko Paulo ki te ʼu tehina taupau Kilisitiano “e malaga ake anai i te lotolotoga o koutou he u tagata e natou akonaki anai ni mea fakatupu tuutamaki” pea ʼe natou toho anai te kau tisipulo ke mulimuli iā nātou.—Gaue 20:29, 30.

Ko te ʼu lotu hala ʼe ko he meʼa fakalialia ia ki te ʼAtua. ʼI tona fakahagatonu, ʼe tala ʼi te Folafola ʼa te ʼAtua, ia te Tohi-Tapu, ko te ʼu lotu hala neʼe natou liligi “te toto o . . . natou fuli ae nee tamatei i te kele.” (Apokalipisi 18:24) Kiā mata ʼo te ʼAtua ʼe lahi te ligitoto ʼo te ʼu lotu hala koteʼuhi neʼe mole natou akoʼi age ki te hahaʼi ʼo ʼuhiga mo te ʼAtua moʼoni, ʼaē ʼe ʼofa.—1 Soane 4:8.

ʼE toe mamahi ia ia ʼaē ʼe fakalogo ki te ʼu faikole mokā mamahi te hahaʼi ʼuhi ko te ʼu lotu aga fefeka. Mole tuai, pea ko te ʼofa ʼo te ʼAtua ki te hahaʼi ʼe ina uga anai ia ia ke ina fakaʼauha te ʼu lotu mālualoi fuli ʼaia ʼaki ia Sesu. Neʼe ʼui fēnei e Sesu: “E ui mai anai e he kaugamalie kia au i te aho aia: Aliki, Aliki, pe nee mole matou kikite i tou huafa? . . . Pea e au palalau fakahaha atu anai kia natou: Nee mole pe au iloi koutou i he temi, kotou fakamamao atu ia au, koutou ae e kotou fai te agakovi.”—Mateo 7:22, 23.