Tou Ako Mai Te Folafola ʼa Te ʼAtua

Koteā ʼAē ʼe Feala Ke Fai Mai e Te Kau ʼĀselo Agatonu Pea Mo Te Kau Temonio?

ʼI te ʼalatike ʼaenī, ʼe lagaʼi ai te ʼu fehuʼi ʼe feala ke kotou fai pea ʼe fakahā ai ia te ʼu vaega Tohi-Tapu ʼo kotou maʼu ai tona ʼu tali. ʼE fiafia anai ia te kau Fakamoʼoni ʼa Sehova ʼi te fai palalau mo koutou ʼo tali ki te ʼu fehuʼi ʼaenī.

1. Ko ai te kau ʼāselo?

Ko te kau ʼāselo ʼe ko he ʼu laumālie fakapulipuli ʼe māʼuʼuli ʼi selō. ʼE māʼoluga age tonatou maʼuli ʼi te tagata. Ko te ʼAtua moʼoni, ʼaē ko he tahi ʼaia laumālie fakapulipuli, neʼe ina fakatupu te kau ʼāselo ʼi muʼa ʼo tana fakatupu te kele. (Sopo 38:4, 7; Mateo 18:10) ʼE nofo mo Sehova te toko lauʼi miliona ʼāselo agatonu.—Lau ia Pesalemo 103:20, 21; Apokalipisi 5:11.

2. ʼE tokoni koa te kau ʼāselo ki te hahaʼi?

Neʼe tokoni te kau ʼāselo ki te tagata faitotonu neʼe higoa ko Lote. Neʼe maʼuli ʼi te kolo neʼe ʼamanaki fakaʼauha e te ʼAtua ʼuhi ko te ʼu aga fakalialia ʼa te hahaʼi. Neʼe fakatokaga e te ʼu ʼāselo e toko lua kiā Lote pea mo tona fāmili ke natou feholaki. Maʼa ʼihi ko te fakatokaga ʼaia neʼe ko he fakahuahua pē ia pea neʼe mole natou fakalogo kiai. Kae neʼe hao ia Lote pea mo ʼona ʼofafine he neʼe natou fakalogo ki te fakatokaga ʼaē neʼe fai age e te ʼAtua ʼaki te ʼu ʼāselo.—Lau ia Senesi 19:1, 13-17, 26.

Ohagē ko tona fakahā ʼi te Tohi-Tapu, ʼe tokoni te kau ʼāselo ki te hahaʼi ʼi te temi nei, ʼaki tanatou takitaki te gāue ʼaē ʼe haga fai e nātou ʼaē ʼe natou fakamafola te logo lelei ʼo te Puleʼaga ʼo te ʼAtua. (Mateo 24:14) ʼE maʼu ʼi te logo lelei ʼaia he fakatokaga. Pea ohagē ko te fakatokaga ʼaē neʼe fai kiā Lote, ʼe mole ko he fakahuahua pē ia, heʼe ko te poapoaki ia neʼe fai e te ʼAtua ʼaki te kau ʼāselo.—Lau ia Apokalipisi 1:1; 14:6, 7.

Pea ʼe feala ke toe fekauʼi e te ʼAtua te ʼu ʼāselo moʼo fakalotomālohiʼi tātou mokā tou tau mo he ʼu faigataʼaʼia. Neʼe ina fekauʼi he ʼāselo moʼo fakalotomālohiʼi ia Sesu.—Lau ia Luka 22:41-43.

Kua tau ovi pē te temi ʼaē kā fakaʼaogaʼi anai e te ʼAtua te kau ʼāselo moʼo fakahoko he tahi age gāue, ke natou tautea te hahaʼi agakovi ʼaē ʼe natou fakatupu te ʼu mamahi. ʼE foaki ai anai he fakalotofīmālie lahi ki te mālamanei.—Lau ia 2 Tesalonika 1:6-8.

3. Koteā ʼaē ʼe feala ke fai mai e te kau temonio?

Ohagē pē ko te talagataʼa ʼa te tokolahi ki te ʼAtua ʼo natou fai he ʼu aga ʼe kovi ʼi te kele, neʼe toe fēia ʼi selō, tokolahi te kau ʼāselo neʼe natou agatuʼu ki te ʼAtua. (2 Petelo 2:4) ʼE higoa te kau ʼāselo talagataʼa ʼaia ko te kau temonio pea ko ia ʼaē ʼe ina takitaki iā nātou ʼe ko Satana te Tēvolo. Ko Satana pea mo ʼana kau temonio ʼe natou kākāʼi te mālamanei.—Lau ia Apokalipisi 12:9.

ʼE fakaʼaogaʼi e Satana te ʼu matani gāue ʼaē ʼe mānumānu paʼaga, mo te ʼu puleʼaga fakatagata, pea mo te ʼu lotu hala moʼo fakaneke ia te hahaʼi ke natou fakamamaʼo mai te ʼAtua. Koia, ʼe ko Satana te tupuʼaga ʼo te heʼe faitotonu, mo te agamālohi, pea mo te maʼuli mamahi ʼa te tagata.—Lau ia 1 Soane 5:19.

4. ʼE fakahalaʼi feafeaʼi te hahaʼi e te kau temonio?

ʼE kākāʼi e Satana te hahaʼi tokolahi ʼaki te akonaki ʼaē ko te kau mate ʼe natou liliu ko he ʼu laumālie pea ʼe feala ke natou felōgoi mo te hahaʼi. Kae ʼe ʼui ʼi te Tohi-Tapu ʼe mole ʼiloʼi he meʼa e nātou ʼaē kua mamate. (Ekelesiasi 9:5) Kae ʼe kākāʼi te hahaʼi e te kau temonio ʼaki tanatou faifaitakiʼi te leʼo ʼo nātou ʼaē ʼe natou ʼofa ai kae kua mamate. (Esaia 8:19) ʼE toe fakahalaʼi ʼihi e te kau temonio ʼaki te ʼu hahaʼi ʼe fakafelōgoi mo te kau mate, mo faikikite ohagē lā ko te lau te ʼu fakaʼiloga ʼo te nima, mo nātou ʼaē ʼe ʼui neʼe fakahā age e he ʼu laumālie te ʼu meʼa ʼaē kā hoko, pea mo nātou ʼaē ʼe vakaʼi te ʼu fetuʼu pea mo ʼiloʼi ai te ʼu meʼa kā hoko. ʼE fakatokaga mai ʼi te Folafola ʼa te ʼAtua ke tou tekeʼi te ʼu aga fuli ʼaia. Koia ʼe tonu ai ke tou liʼaki ia meʼa fuli ʼe tou maʼu ʼe pipiki ki te ʼu meʼa fakatemonio pea mo te faifakalauʼakau.—Lau ia Tetelonome 18:10, 11; Gaue 19:19.

Kapau ʼe tou ʼofa kiā Sehova, pea ʼe mole ʼaoga hatatou mātataku ki te kau temonio. Kā tou ako ia te Folafola ʼa te ʼAtua pea mo tou mulimuli kiai, ʼe tou fakafehagai ai ki te Tēvolo pea mo fakaovi ai ki te ʼAtua. Ko Sehova ʼe mālohi age ia ʼi te kau temonio. ʼI te temi ʼaē ʼe ʼaoga ai kiā tātou, ʼe feala ke fakalotomālohiʼi tātou e ʼana kau ʼāselo agatonu.—Lau ia Pesalemo 34:8; Sakopo 4:7, 8.

Kapau ʼe kotou fia maʼu he tahi ʼu fakamahino, vakaʼi te kāpite 10 ʼo te tohi ʼaenī, Koteā ʼAē ʼe Akoʼi Moʼoni Mai ʼi Te Tohi-Tapu? neʼe tā e te kau Fakamoʼoni ʼa Sehova.