Ke Hagē Takotou Aga Ko He Hahaʼi ʼo Te Puleʼaga ʼo Te ʼAtua!

“Koutou haele i he haele e tuha mo te Evaselio.”—FILP. 1:27.

KOTEĀ TAKOTOU TALI?

Ko ai ʼaē ʼe feala ke liliu ko he ʼu hahaʼi ʼo te Puleʼaga ʼo te ʼAtua?

Koteā tona fakaʼuhiga tatatou ako te lea ʼo te Puleʼaga ʼo te ʼAtua, mo tona hisitolia pea mo ʼana lao?

ʼE fakahā feafeaʼi e te hahaʼi ʼo te Puleʼaga ʼo te ʼAtua ʼe natou ʼofa ki te ʼu lao ʼa te ʼAtua?

1, 2. He koʼē neʼe malave ki te kau Kilisitiano ʼo te kōkelekāsio ʼi Filipe te ʼu palalau ʼaē ke natou “haele i he haele e tuha mo te Evaselio”?

NEʼE fakalotomālohiʼi e Paulo te kau Kilisitiano ʼi te kōkelekāsio ʼo Filipe ke natou “haele i he haele e tuha mo te Evaselio.” (Lau ia Filipe 1:27.) ʼI te lea Fakakeleka, ko te ʼui ʼaē “ke koutou haele” ʼe feala hona toe fakaliliu “ke hagē takotou aga ko he hahaʼi ʼe kau ki he puleʼaga.” Neʼe malave te ʼu palalau ʼaia ki te kau Kilisitiano ʼi te kōkelekāsio ʼo Filipe. Koteā tona tupuʼaga? He neʼe lagi fakagafua e te Puleʼaga ʼo Loma ke liliu te hahaʼi ʼo Filipe ʼo fakalogo ki te pule ʼo Loma pea mo puipui nātou e te lao ʼo Loma. Neʼe fiameʼameʼa te kau Filipe ʼi tanatou liliu ʼo Puleʼaga Loma, he neʼe natou maʼu mai ai ni lelei neʼe tokosiʼi ia nātou neʼe natou maʼu ʼi te temi ʼaia.

² Kae ki te kau Kilisitiano ʼo Filipe, neʼe ʼi ai te tupuʼaga neʼe lelei age ke natou fiameʼameʼa ai. Neʼe fakamanatuʼi fēnei e Paulo ki te kau Kilisitiano fakanofo ʼaia: “Kae kia tatou, e tuu totatou kolo i lagi.” (Filp. 3:20) Neʼe natou kau ki te Puleʼaga ʼo te ʼAtua, ʼaē neʼe lahi age ia ʼi he puleʼaga fakatagata. Neʼe natou maʼu te puipui pea mo te ʼu lelei mai te Puleʼaga ʼaia ʼo te ʼAtua, ʼaē neʼe mole feala ke foaki e he tahi age puleʼaga.—Efe. 2:19-22.

3. (1) Ko ai ʼaē ʼe feala ke liliu ko he ʼu hahaʼi ʼo te Puleʼaga ʼo te ʼAtua? (2) Koteā ʼaē kā tou vakaʼi anai ʼi te ʼalatike ʼaenī?

³ Neʼe palalau tāfito Paulo kiā nātou ʼaē kā natou kaugā hau mo Kilisito ʼi selō, ʼi tana fai tana tokoni ʼaē ke hagē tanatou aga ko he hahaʼi ʼo te Puleʼaga ʼo te ʼAtua. (Filp. 3:20) Kae ʼe feala ke toe fakaʼuhiga ʼana palalau kiā nātou ʼaē kā māʼuʼuli ʼi te kele pea mo fakalogo ki te Puleʼaga ʼo te ʼAtua. Koteā tona tupuʼaga? Koteʼuhi ʼe tou tauhi fuli ki te Hau e tahi, ʼaē ko Sehova, pea ʼe tatau ʼana fakamaʼua ki ʼana kaugana fuli. (Efe. 4:4-6) Iā ʼaho nei, ʼe faiga mālohi e te tokolahi ke natou kau ki te puleʼaga ʼo he fenua maʼu koloa. Kae ʼe maʼuhiga ʼaupitō age ia te faigamālie ʼaē ʼe tuku mai ke tou liliu ko he ʼu hahaʼi ʼo te Puleʼaga ʼo te ʼAtua. Ke tou mahino lelei age ki te faigamālie lahi ʼaia, tou fakatatau te ʼu fakamaʼua ʼaē ʼe tonu ke tou mulimuli kiai ke tou kau ki he puleʼaga fakatagata pea mo ʼaē ke tou liliu ʼo fakalogo ki te Puleʼaga ʼo te ʼAtua. ʼE tou vakaʼi anai te ʼu fakamaʼua e tolu ʼe tonu ke tou mulimuli kiai ke tou haga fakalogo ki te Puleʼaga ʼo te ʼAtua.

TE ʼU FAKAMAʼUA KIĀ NĀTOU ʼE FIA KAU KI HE PULEʼAGA

4. Koteā te lea maʼa? Koteā te fakaʼuhiga ʼo te palalau ʼi te lea maʼa?

⁴ Ke ako te lea. ʼE fakamaʼua e ʼihi puleʼaga kiā nātou ʼaē ʼe fia kau kiai, ke natou ako te lea ʼo te fenua. ʼE lagi faiga lahi ʼihi ke natou palalau ʼi te lea foʼou ʼaia lolotoga ni taʼu, tatau aipē peʼe kua fakamoʼoni tanatou kau ki he puleʼaga. ʼE lagi natou mahino vave ki te ʼu lēkula ʼo te lea ʼaē ʼe natou ako, kae ʼe lagi ʼaoga he temi loaloaga ke feala hanatou palalau lelei ʼi te lea ʼaia. ʼE toe fakamaʼua e te Puleʼaga ʼo te ʼAtua ki ʼana hahaʼi ke natou ako he lea foʼou. ʼE fakahigoa ʼi te Tohi-Tapu te lea ʼaia ko te “laugutu [peʼe ko te lea] maa.” (Lau ia Sofoni 3:9.) Koteā te lea ʼaia? ʼE ko te moʼoni ʼaē ʼe akoʼi mai ʼi te Tohi-Tapu ʼo ʼuhiga mo te ʼAtua pea mo ʼana fakatuʼutuʼu. Ko he tahi ʼe palalau ʼi te lea maʼa ko tona fakaʼuhiga ʼe fakalogo ki te ʼu lao pea mo te ʼu pelesepeto ʼa te ʼAtua. Ko tātou ko te hahaʼi ʼo te Puleʼaga ʼo te ʼAtua, pea ʼe lagi tou mahino vave ki te ʼu akonaki tāfito ʼo te Tohi-Tapu pea mo tou papitema. Kae ʼi tatatou ʼosi papitema, ʼe lagi tonu ke tou faiga mālohi ke tou palalau lelei age te lea maʼa. ʼO feafeaʼi? Ko tātou takitokotahi ʼe tonu ke tou haga faiga ʼo maʼuliʼi te ʼu meʼa ʼaē ʼe tou ako ʼi te Tohi-Tapu.

5. He koʼē ʼe tonu ke tou ako ia te hisitolia ʼo te hahaʼi ʼa Sehova ʼi totatou temi?

⁵ Ke ako te hisitolia. Ko he tahi ʼe fia kau ki te puleʼaga ʼo he fenua, ʼe lagi tonu ke ina ako tona hisitolia. Mai tona ʼaluʼaga ʼaē ʼe tou fia fakalogo ki te Puleʼaga ʼo te ʼAtua, pea ʼe tonu ke tou faiga ʼo ako ia meʼa fuli ʼo ʼuhiga mo te Puleʼaga ʼaia. ʼE tonu ke tou faifaitakiʼi te ʼu foha ʼo Kole ʼaē ʼi te temi ʼo te Iselaele ʼāfea. Neʼe natou ʼoʼofa ki te kolo ʼo Selusalemi mo tona fale lotu, pea mo natou leleiʼia te palalau ki te hisitolia ʼo te kolo ʼaia, mole ʼuhi ko tona matalelei kae ʼuhi ko “te kolo aia o te hau lahi” ʼaē ko Sehova. Neʼe akoʼi ai ki te hahaʼi te ʼu Lao ʼa Sehova pea mo natou tauhi ai kiā te ia. Ko te hahaʼi ʼaē neʼe puleʼi e “te hau lahi” neʼe ko te hahaʼi ʼaē neʼe ʼofainaʼi e Sehova. (Lau ia Pesalemo 48:2, 3, 10, 13, 14.) ʼI totatou temi, ʼe toe maʼu e te ʼAtua ʼi te kele tana hahaʼi kua ina fakatuʼutuʼu. Ohagē ko te ʼu foha ʼo Kole, ʼe tonu ke tou fia ako te hisitolia ʼo te hahaʼi ʼa te ʼAtua pea mo palalau kiai. Kapau ʼe lahi te ʼu meʼa ʼaē ʼe tou ako ʼo ʼuhiga mo te hahaʼi ʼa Sehova pea mo feafeaʼi tana tokoni kiā nātou, pea ʼe toe moʼoni lahi age kiā tātou te Puleʼaga ʼo te ʼAtua. ʼE mālohi ai anai tatatou fia fakamafola te logo lelei ʼo te Puleʼaga.—Sel. 9:24; Luka 4:43.

6. He koʼē ʼe feala hatatou ʼui ʼe fakamaʼua e Sehova ke tou ʼiloʼi pea mo mulimuli ki ʼana lao pea mo ʼana pelesepeto?

⁶ Ke ʼiloʼi te ʼu lao. ʼE fakamaʼua e te ʼu puleʼaga fakatagata ke ʼiloʼi pea mo mulimuli tanatou hahaʼi ki te ʼu lao ʼo te fenua. Koia ʼe feala hatatou ʼui ʼe toe fakamaʼua e Sehova ke ako pea mo mulimuli te hahaʼi fuli ʼo tona Puleʼaga ki ʼana lao pea mo ʼana pelesepeto. (Esa. 2:3; Soa. 15:10; 1 Soa. 5:3) ʼE mole fakahoko tuʼumaʼu e te ʼu lao fakatagata ia te faitotonu. Kae “e haohaoa te lao a [Sehova].” (Pes. 19:8) ʼE kotou leleiʼia koa te lau ʼi te ʼaho fuli te Tohi-Tapu pea mo ako te ʼu lao pea mo te ʼu pelesepeto ʼa te ʼAtua? (Pes. 1:1, 2) ʼE tonu ke tou tahi faiga lahi ke tou ako te ʼu lao ʼa te ʼAtua. ʼE mole feala ki he tahi age ke ina fai te faʼahi ʼaia maʼa tātou.

KO TE HAHAʼI ʼO TE PULEʼAGA ʼO TE ʼATUA ʼE NATOU ʼOFA KI ʼANA LAO

7. He koʼē ko te hahaʼi ʼo te Puleʼaga ʼo te ʼAtua ʼe natou fakalogo ki ʼana lao?

⁷ Ke hoko atu tatatou fakalogo ki te Puleʼaga ʼo te ʼAtua, ʼe tonu ke tou ʼiloʼi ʼana lao pea mo ʼofa kiai. Tokolahi te hahaʼi ʼo te ʼu puleʼaga fakatagata ʼe natou ʼui ʼe natou leleiʼia te ʼu lao ʼo te fenua. Kae kapau ʼe mole natou leleiʼia he lao mo manatu ʼe mole sio age he tahi, pea ʼe natou talagataʼa kiai. ʼI te agamāhani, ʼe natou fakalogo ki te ʼu lao moʼo fakamatalelei pē ki te tagata. (Kol. 3:22) Kae ʼe mole fēia te hahaʼi ʼo te Puleʼaga ʼo te ʼAtua. ʼE tou ʼofa kiā Sehova. Koia lā ʼaē ʼe tou fiafia ʼi te fakalogo ki ʼana lao tatau aipē peʼe mole sio mai he tahi.—Esa. 33:22; lau ia Luka 10:27.

8, 9. ʼE feafeaʼi hakotou ʼiloʼi peʼe kotou ʼofa moʼoni ki te ʼu lao ʼa te ʼAtua?

⁸ ʼE feafeaʼi hakotou ʼiloʼi peʼe kotou ʼofa moʼoni ki te ʼu lao ʼa te ʼAtua? ʼE feala hakotou ʼiloʼi mo kapau ʼe kotou fakakaukau peʼe feafeaʼi takotou aga, ohagē lā mokā tokoniʼi koutou. ʼE lagi feala ke tokoniʼi koutou ʼo ʼuhiga mo he faʼahi ʼe kotou manatu ʼe fakalogo pē ia kiā koutou, ohagē lā ko takotou faʼahiga teuteu. ʼI muʼa ʼo takotou ʼiloʼi ia te moʼoni, neʼe mole lagi maʼuhiga kiā koutou takotou faʼahiga teuteu pe neʼe lagi kotou tui he ʼu teu ke hake ai ʼi ʼihi he ʼu fakakaukau kovi. Kae ʼi te tuputupu ʼo takotou ʼofa ki te ʼAtua, neʼe kotou ʼiloʼi ai peʼe feafeaʼi hakotou teuteu ke fakakolōlia ai kiā Sehova. (1 Tim. 2:9, 10; 1 Pet. 3:3, 4) ʼE lagi kotou manatu kua lelei takotou faʼahiga teuteu ʼi te temi nei. Kae kapau ʼe fakahā atu e he tagata ʼāfea, ʼe tokolahi ia nātou ʼi te kōkelekāsio ʼe mole natou leleiʼia takotou faʼahiga teuteu, pea ʼe feafeaʼi anai takotou aga? ʼE kotou maʼu anai koa he ʼu takuʼaki, peʼe kotou ʼiʼita, peʼe mole pē kotou fia fai he ʼu fetogi? ʼE tonu ke fakalogo te hahaʼi ʼo te Puleʼaga ʼo te ʼAtua ki te lao maʼuhiga ʼaē ko te faifaitakiʼi ʼo Kilisito. (1 Pet. 2:21) Neʼe ʼui e Paulo “nee mole kumi e Kilisito ia te mea nee lelei kia ia,” pea ʼo toe fēia mo tātou, ʼe tonu ke tou “tahi kumi . . . te mea ae e lelei ki tona kaiga o uhiga mo tona lelei” pea mo tona tuputupu ʼi te tui. (Loma 15:2, 3) Moʼo taupau te tokalelei ʼi te kōkelekāsio, ʼe tonu ki he Kilisitiano kua fotufotuʼa ke mole ina fai he meʼa ke tūkia ai te leʼo ʼo loto ʼo ʼihi.—Loma 14:19-21.

⁹ Pea kotou toe fakakaukauʼi takotou aga ʼo ʼuhiga mo te ʼu felāveʼi fakasino pea mo te nofo ʼohoana. Ko nātou ʼaē ʼe mole ko he ʼu hahaʼi ʼo te Puleʼaga ʼo te ʼAtua, ʼe lagi mole natou koviʼia te fai tagata pea mo te fai fafine, te sioʼi ʼo te ʼu pāki pea mo te ʼu ʼata ʼe hā ai ia te ʼu felāveʼi fakasino heʼeʼaoga, te tono, peʼe ko te māvete. Kae ko te hahaʼi ʼo te Puleʼaga ʼo te ʼAtua neʼe natou ako ke natou fakakaukauʼi te ʼu fua ʼo tanatou aga pea mo tona malave ki ʼihi. ʼI muʼa ʼo tanatou ʼiloʼi ia te moʼoni, tokolahi neʼe natou fai te ʼu aga heʼeʼaoga ʼi tonatou maʼuli. Kae kua natou ʼiloʼi ʼi te temi nei, ko te ʼu felāveʼi fakasino pea mo te nofo ʼohoana ʼe ko he ʼu meʼa ʼofa ia mai te ʼAtua. ʼE natou ʼofa ki te ʼu lao ʼa te ʼAtua pea mo natou ʼiloʼi, ko nātou ʼaē ʼe talagataʼa ki te ʼu lao ʼa te ʼAtua ʼo ʼuhiga mo te ʼu felāveʼi fakasino pea mo te nofo ʼohoana, ʼe mole feala hanatou liliu ko he ʼu hahaʼi ʼo te Puleʼaga ʼo te ʼAtua. (1 Ko. 6:9-11) Kae ʼe natou toe mahino ʼe feala ke uga nātou e tonatou loto ke natou fai he ʼu aga ʼe kovi. (Sel. 17:9) Koia ʼe natou loto fakafetaʼi ai ki te ʼu fakatokaga ʼaē ʼe tuku age moʼo tokoni kiā nātou ke natou haga fakalogo ki te ʼu lao ʼa te ʼAtua.

ʼE FAKAFETAʼI TE HAHAʼI ʼO TE PULEʼAGA ʼO TE ʼATUA KI TE ʼU FAKATOKAGA

10, 11. Koteā te ʼu fakatokaga maʼuhiga ʼe foaki mai e te Puleʼaga ʼo te ʼAtua? Koteā te faʼahi ʼe kotou logoʼi ʼo ʼuhiga mo te ʼu fakatokaga ʼaia?

¹⁰ ʼE lagi fakatokaga e te ʼu puleʼaga fakatagata tanatou hahaʼi ʼo ʼuhiga mo he meʼa kai peʼe ko he faitoʼo. ʼE moʼoni ʼe mole ko te ʼu meʼa kai peʼe ko te ʼu faitoʼo fuli ʼaē ʼe kovi. Kae kapau ʼe feala ke tuʼutāmaki ai tanatou hahaʼi, pea ʼe fai leva e te puleʼaga he ʼu fakatokaga, heʼe ko tonatou ia maʼua. ʼE toe fēia mo te Puleʼaga ʼo te ʼAtua, ʼe ina fai he ʼu fakatokaga ki tana hahaʼi. ʼE ina fakatokaga mai he ʼu faʼahi ke mole tou talagataʼa ai ki te ʼu lao ʼa te ʼAtua pea mo fua kovi ai ki ʼatatou felōgoi mo ia. Ohagē lā, tokolahi ʼe natou fakaʼaogaʼi te Neti ke natou felōgoi ai mo ʼihi, mo ako he ʼu meʼa pea moʼo fakalaka te temi, ohagē lā ko te fakalogo musika. ʼE fakaʼaogaʼi e te kautahi ʼa te ʼAtua te Neti moʼo fai he ʼu gāue lelei. Kae ʼe ʼi ai te ʼu faʼahi ʼi te Neti ʼe feala ke fakatupu tuʼutāmaki kiā nātou ʼaē ʼe natou fia taupau tanatou agatonu. ʼE moʼoni ʼe fakatupu tuʼutāmaki te ʼu faʼahi ʼi te Neti ʼaē ʼe maʼu ai te ʼu pāki pea mo te ʼu ʼata ʼe hā ai ia te ʼu felāveʼi fakasino heʼeʼaoga. Talu mai fualoa te fakatokaga mai ʼa te tagata kaugana agatonu ʼo ʼuhiga mo te ʼu faʼahi ʼaia ʼo te Neti, pea ʼe tou fakafetaʼi lahi ai ki te ʼu fakatokaga ʼaia!

¹¹ Mole heʼeki faʼa fualoa, tokolahi ʼe natou fakaʼaogaʼi te tahi age faʼahi, ʼaē ko te ʼu fakatahiʼaga ʼi te Neti. Lagi ʼe ʼi ai hona ʼaoga kae ʼe toe feala foki ke fakatupu tuʼutāmaki. Koia ʼe tonu ke tou tokaga fakalelei mokā tou filifili ke tou fakaʼaogaʼi te faʼahi ʼaia, heʼe feala hatatou felōgoi mo he ʼu kaumeʼa kovi. (1 Ko. 15:33) Neʼe tuku mai ai e te tagata kaugana agatonu te ʼu fakatokaga moʼo tokoni mai ke tou maʼu te manatu fakapotopoto ʼo ʼuhiga mo te faʼahi ʼaia. Neʼe kotou lau koa te ʼu ʼalatike fuli ʼaē neʼe tā e te tagata kaugana agatonu ʼo ʼuhiga mo te ʼu fakatahiʼaga ʼi te Neti? ʼE feala ke hoko he tuʼutāmaki mokā tou ʼolo ki te ʼu fakatahiʼaga ʼaia kae neʼe heʼeki tou lau te ʼu ʼalatike ʼaia.a ʼE hagē pē ko hatatou toʼo he faitoʼo ʼe mālohi kae neʼe heʼeki tou lau te ʼu fakatokaga ʼaē ʼe tohi ʼi te tāsini.

12. He koʼē ʼe ko he aga vale hatatou mole fia tokaga ki te ʼu fakatokaga?

¹² Ko nātou ʼaē ʼe mole fia tokaga ki te ʼu fakatokaga ʼaē ʼe fai mai e te tagata kaugana agatonu, ʼe fua kovi anai kiā nātou pea mo nātou ʼaē ʼe ʼoʼofa ai. Ko ʼihi neʼe natou sioʼi tuʼumaʼu pē te ʼu pāki pea mo te ʼu ʼata ʼe hā ai ia te ʼu felāveʼi fakasino heʼeʼaoga pe neʼe natou fai he ʼu aga heʼeʼaoga, pea mo manatu ʼe mole sio Sehova ki ʼanatou aga. ʼE ko he toe aga vale ia hatatou manatu ʼe feala ke tou fufū ʼatatou aga kiā Sehova! (Taag. 15:3; lau ia Hepeleo 4:13.) ʼI he puleʼaga fakatagata, ʼe mole fakagafua ki te hahaʼi ʼaē ʼe talagataʼa ki te ʼu lao ke natou kau ki te puleʼaga ʼaia. Pea ʼo toe fēia pē, ʼe mole fakagafua anai e Sehova ia nātou ʼaē ʼe talagataʼa ki ʼana fakatokaga, ke natou liliu ko he hahaʼi ʼo tona Puleʼaga.b (1 Ko. 5:11-13) Kae ko Sehova ʼe loto manavaʼofa pea ʼe ina fakaʼaogaʼi te ʼu tagata ʼāfea moʼo tokoni kiā nātou ʼaē neʼe agahala. (Kal. 6:1) Ko nātou ʼaē ʼe fakahemala pea mo liʼaki te aga ʼaē ʼe kovi, ʼe feala ke natou toe kaumeʼa mo Sehova pea mo toe hoko atu tanatou fakalogo ki te Puleʼaga ʼo te ʼAtua. (2 Ko. 2:5-8) ʼE ko he toe pilivilēsio lahi hatatou tauhi ki te Hau ʼofa ʼaia!

ʼE MAʼUHIGA TE AKO KI TE HAHAʼI ʼO TE PULEʼAGA ʼO TE ʼATUA

13. ʼE fakahā feafeaʼi e te hahaʼi ʼo te Puleʼaga ʼo te ʼAtua ʼe maʼuhiga kiā nātou te ako?

¹³ ʼE lahi te ʼu puleʼaga fakatagata ʼe natou faigaʼi ke natou akoʼi ʼanatou hahaʼi. ʼE natou laga he ʼu faleako ʼe feala ke ako ai te ʼu faʼahi tāfito ʼaē ʼe tonu ke natou ʼiloʼi. Ko te hahaʼi ʼo te Puleʼaga ʼo te ʼAtua ʼe natou loto fakafetaʼi ki te ʼu fakatuʼutuʼu ʼaia, heʼe feala ai ke natou ako te lautohi, mo te faitohi pea mo popoto ʼi te fai ʼo he gāue. ʼE natou faiga lahi ke natou maʼu te ʼu lelei mai te ako ʼaia. Kae ʼe natou loto fakafetaʼi lahi age ki te ako ʼaē ʼe foaki e te ʼAtua kiā nātou ʼaki tana kautahi. Ohagē lā, ʼe fakalotomālohiʼi tātou e tana kautahi ke tou lautohi. ʼE ina fakalotomālohiʼi te ʼu mātuʼa ke natou lau Te Tohi ʼo Te ʼu Hisitolia Faka Tohi-Tapu mo ʼanatou fānau. ʼI te māhina fuli ʼe tā e te tagata kaugana agatonu Te Tule Leʼo iā pāsina e 32. Koia kapau ʼe kotou lau he pāsina e tahi peʼe lua ʼi te ʼaho fuli, pea ʼe feala anai hakotou lau Te Tule Leʼo ʼi te māhina kātoa. ʼI tatatou fai fēia, ʼe hoko atu pē anai te akoʼi ʼo tātou e Sehova.

14. (1) Ko te ako fea ʼaē ʼe tou maʼu? (2) Ko te ʼu tokoni fea ʼaē kua kotou mulimuli kiai ʼo ʼuhiga mo te Ako Fakafāmili?

¹⁴ ʼI te vāhaʼa fuli, ʼe akoʼi te hahaʼi ʼo te Puleʼaga ʼo te ʼAtua ʼi ʼanatou fono. Ohagē lā, talu mai taʼu e 60 tupu, ʼe tokoni ia te Ako Fakateokalatike ki te kau ako ke natou liliu ko he kau faiako lelei ʼo te Folafola ʼa te ʼAtua. ʼE kotou kau koa ki te ako ʼaia? Pea ʼe toe fakahā mai e te tagata kaugana agatonu te maʼuhiga ʼaē ke fai ʼi te vāhaʼa fuli te Ako Fakafāmili. ʼE tokoni te ako ʼaia ke mālohi age te noʼo fakafāmili. Neʼe kua kotou mulimuli koa ki te ʼu tokoni ʼaē ʼe tuku mai ʼi ʼatatou tohi ʼo ʼuhiga mo te Ako Fakafāmili?c

15. Koteā te pilivilēsio lahi ʼaē ʼe tou maʼu?

¹⁵ Tokolahi te hahaʼi ʼo te ʼu puleʼaga fakatagata ʼe natou faiga ke lagolago he tahi age hahaʼi ki he faʼahi fakapolitike. Pea ʼe toe ʼolo ʼihi ki te ʼu ʼapi moʼo maʼu he hahaʼi. ʼI te mālamanei kātoa, ʼe fakahā e te hahaʼi ʼo te Puleʼaga ʼo te ʼAtua ʼe natou lagolago kiai ʼaki tanatou fai fakamafola ʼi te ʼu ala mo te ʼu ʼapi. Ohagē lā, ko te fakatuʼutuʼu ʼo Te Tule Leʼo ʼe ko te kalagaʼi ʼo te Puleʼaga ʼo Sehova. Pea ohagē ko tona fakahā ʼi te ʼuluaki ʼalatike ako, ko Te Tule Leʼo ʼe ko te nusipepa ʼaē ʼe lahi tokotahi tona tufa ʼi te kele kātoa. ʼE ko he toe pilivilēsio lahi hatatou tala te Puleʼaga ʼo te ʼAtua ki te hahaʼi. ʼE lahi koa takotou fakamafola ia te logo lelei ʼo te Puleʼaga?—Mat. 28:19, 20.

16. ʼE feafeaʼi hakotou fakahā ʼi te temi nei ʼe kotou fakalogo lelei ki te Puleʼaga ʼo te ʼAtua?

¹⁶ Kua ovi mai te temi ʼaē kā puleʼi tokotahi anai e te Puleʼaga ʼo te ʼAtua ia te kele. ʼE ko te ʼu lao pē ʼo te Puleʼaga ʼo te ʼAtua ʼaē kā fakalogo kiai te hahaʼi. ʼI te temi ʼaia, ʼe kotou fakalogo lelei anai koa ki te Puleʼaga ʼo te ʼAtua? ʼE ko te temi ʼaenī ke kotou fakahā ai ʼe kotou fakalogo lelei anai. ʼI te ʼu tonu ʼaē ʼe kotou fai ʼi te ʼaho fuli, kotou fai ki te kolōlia ʼo Sehova pea mo fakamoʼoni ʼe hagē takotou aga ko he hahaʼi ʼo te Puleʼaga ʼo te ʼAtua.—1 Ko. 10:31.

[ʼU nota]

[Paki ʼo te pāsina 21]

ʼE kotou tokagaʼi koa te ʼu fakatokaga ʼaē ʼe fai mai e te tagata kaugana agatonu ʼo ʼuhiga mo te Neti?

[Paki ʼo te pāsina 19]

Ohagē ko te ʼu foha ʼo Kole, ʼe kotou ʼofa koa ki te tauhi maʼa pea mo tona hisitolia?

[Paki ʼo te pāsina 22]

Ko takotou Ako Fakafāmili ʼe tokoni atu ke kotou fakalogo lelei ki te Puleʼaga ʼo te ʼAtua