“Ako Mai Kia Au Te Fai o Tou Finegalo”

“Ako mai kia au te fai o tou finegalo, koteuhi ko koe ko toku Atua.”—PES. 143:10.

TE ʼU PUANI MAʼUHIGA ʼAĒ ʼE TONU KE TOU MANATUʼI

Koteā ʼaē neʼe fai e Tavite ʼe hā ai neʼe ina maʼu ia te faʼahiga manatu ʼa Sehova?

Koteā ʼaē neʼe tokoni kiā Tavite ke ina maʼu ia te faʼahiga manatu ʼa te ʼAtua?

ʼE tou haga maʼu feafeaʼi ia te ʼofa ʼo te ʼAtua?

1, 2. He koʼē ʼe lelei ke tou ʼiloʼi peʼe koteā te finegalo ʼo te ʼAtua? Koteā te ʼu ako ʼe feala ke tou tāʼofi mai te faʼifaʼitaki ʼo te Hau ko Tavite?

ʼI TAKOTOU fai folau, neʼe kotou fakaʼaogaʼi koa he mape? ʼE feala ke kotou mahino kātoa ki te fenua pea mo kotou maʼu ai te ala ʼaē ʼe tonu ke kotou ʼolo ai. ʼO toe fēia aipē, mokā tou fai he ʼu tonu, ʼe lelei ke tou mahino kātoa ki he ʼaluʼaga peʼe ki te manatu ʼa te ʼAtua ʼo ʼuhiga mo te ʼaluʼaga ʼaia. ʼE tokoni mai anai ia te faʼahiga fai ʼaia ke tou ʼiloʼi ia te finegalo ʼo te ʼAtua. ʼE feala ai leva ke tou fai ia tona finegalo, ohagē pē ʼe tou haʼele ʼi “te ala” ʼaē ʼe leleiʼia e Sehova.—Esa. 30:21.

² Lolotoga te maʼuli ʼo Tavite, te Hau ʼo Iselaele ʼi te temi muʼa, neʼe ina faigaʼi ke ina maʼu ia te faʼahiga manatu ʼa te ʼAtua. ʼI tana fai ia te faʼahi ʼaia, neʼe faigaʼi e Tavite ke ina fai ia te finegalo ʼo te ʼAtua. Neʼe ʼofa ia kiā Sehova ʼAtua ʼaki tona loto kātoa. ʼE tokoni mai anai ia te ʼalatike ʼaenī ke tou tāʼofi he ʼu ako mai te faʼifaʼitaki ʼo Tavite ʼi te ʼu temi ʼaē neʼe tau ai mo te ʼu faigataʼaʼia.—1 Hau 11:4.

NEʼE FAKAʼAPAʼAPA IA TAVITE KI TE HUAFA ʼO SEHOVA

3, 4. (1) He koʼē neʼe manatu ia Tavite ʼe ina lava tauʼi anai ia Koliate? (2) Koteā te faʼahiga manatu neʼe maʼu e Tavite ʼo ʼuhiga mo te huafa ʼo te ʼAtua?

³ ʼI tana kei tūpulaga, neʼe ʼalu ia Tavite ʼo tauʼi ia te tagata Filisitini, ko Koliate. He koʼē neʼe manatu ia Tavite ʼe ina lava tauʼi anai ia te toe tagata lahi ʼaia, neʼe teitei meta tolu pea neʼe ʼi ai mo ʼana mahafu tau fakamataku? (1 Sam. 17:4) Neʼe fai koa e Tavite ia te faʼahi ʼaia ʼuhi pē he neʼe lototoʼa peʼe neʼe falala ki te ʼAtua? ʼE moʼoni neʼe lototoʼa pea mo falala ki te ʼAtua, kae ko te tupuʼaga tāfito ʼo tana tauʼi ia Koliate heʼe neʼe fakaʼapaʼapa kiā Sehova pea mo Tona huafa lahi. Pea neʼe ʼita ia Tavite he neʼe ina fai he ʼu palalau ʼe heʼe fakaʼapaʼapa ki te hahaʼi ʼa te ʼAtua. Neʼe ʼui fēnei e Tavite: “Ko ai te Filisitini aena, te pagani aena, ke ina tauvelei te kau solia a te Atua mauli?”—1 Sam. 17:26.

⁴ Neʼe ʼui fēnei e Tavite kiā Koliate: “E ke haele mai kia au mo te heleta, mo te tao, mo te savelo; kae ko au, e au haele atu kia koe i te huafa o [Sehova] o te kau tau, o te Atua o te kau solia o Iselaele, ae nee ke lau kovi ki ai.” (1 Sam. 17:45) Neʼe falala ia Tavite ʼe tokoni age anai ia te ʼAtua moʼoni kiā te ia. Neʼe ina matehi ia Koliate ʼo ina makamakaʼi ʼaki he foʼi maka pē e tahi. Talu mai ai, neʼe falala ia Tavite kiā Sehova pea mo fakaʼapaʼapa ki Tona huafa māʼoniʼoni ʼi tona maʼuli kātoa. Pea neʼe ʼui age e Tavite ki te kau Iselaele ke natou fiameʼameʼa ʼuhi ko te huafa ʼo Sehova.—Lau ia 1 Koloniko 16:8-10.

5. Koteā ʼaē kā kotou fai anai mo kapau ʼe heʼe fakaʼapaʼapa ia te hahaʼi ʼo te temi nei kiā Sehova ohagē ko Koliate?

⁵ ʼE kotou fiameʼameʼa koa ʼi te liliu ʼa Sehova ko tokotou ʼAtua? (Sel. 9:24) Koteā ʼaē ʼe kotou fai mokā laukoviʼi ia Sehova peʼe vāʼi tana hahaʼi e ʼokotou vahaʼa fale, mo ʼokotou kaugā gāue, mo ʼokotou kaugā ako peʼe ko tokotou fāmili? Mokā aga heʼe fakaʼapaʼapa ia te hahaʼi ki te ʼAtua ohagē ko Koliate, ʼe kotou tauʼi koa te huafa ʼo Sehova pea mo falala ʼe tokoni atu anai kiā koutou? ʼE moʼoni, ʼi ʼihi temi ʼe tonu ke tou fakalogologo, kae ʼe mole tonu ke tou ufiufi ʼi totatou ʼuhiga Fakamoʼoni ʼa Sehova pea mo tisipulo ʼa Sesu. (Ekl. 3:1, 7; Mko. 8:38) ʼE tonu ke tou aga fakaʼeteʼete pea mo aga fakaʼapaʼapa mokā tou palalau mo nātou ʼaē ʼe mole fakaʼapaʼapa kiā Sehova pea mo te logo ʼaē ʼe tou tala. Kae ʼe mole tonu ke tou hagē ko te kau Iselaele ʼaē “nee natou lumaea mo matataku lahi osi” ʼi tanatou logo ki te ʼu palalau ʼa Koliate. (1 Sam. 17:11) Kae kā tou logo ki he ʼu palalau, ʼe tonu ke tou foimo tauʼi ia te huafa māʼoniʼoni ʼo Sehova. ʼE tou fia tokoni ki te hahaʼi ke natou ʼiloʼi ia te ʼuhiga totonu ʼo Sehova ʼAtua. ʼE tou fakaʼaogaʼi ia te Tohi-Tapu moʼo tokoni ki te hahaʼi ke natou mahino pe koʼē ʼe tonu ke natou ʼiloʼi ia te ʼAtua.—Sakp. 4:8.

6. Koteā te tupuʼaga tāfito ʼo te tauʼi e Tavite ia Koliate? Koteā ʼaē ʼe tonu ke maʼuhiga tāfito kiā tātou?

⁶ ʼE ʼi ai te tahi ako ʼe tou maʼu mai te hisitolia ʼo Tavite pea mo Koliate. ʼI te lele ʼa Tavite ki te koga meʼa ʼaē ʼe fai ai te tau, neʼe ina fai ia te fehuʼi ʼaenī: “Kotea e fai anai kia ia ae e ina tamatei anai te Filisitini aena, pea mo ina pulihi te matagafua i Iselaele?” Neʼe tali fēnei e te hahaʼi ʼo ʼuhiga mo ia ʼaē kā ina matehi anai ia Koliate: “E fakafonu anai ia ia aki ni koloa e te hau, pea e ina foaki anai ki te tagata aena tona ofafine.” (1 Sam. 17:25-27) Kae neʼe mole fia maʼu pē e Tavite ia te fakapale. Neʼe ʼi ai te faʼahi neʼe maʼuhiga age ki ai. Neʼe ina fia fakavikiviki ia te ʼAtua moʼoni. (Lau ia 1 Samuele 17:46, 47.) Koteā ʼaē ʼe maʼuhiga tāfito kiā tātou? ʼE tou fakamaʼuhigaʼi pē koa totatou ʼuhiga peʼe ko totatou matagafua? ʼE tou manatu pē koa ke tou maʼu koloa peʼe ke tou liliu ʼo ʼiloa ʼi te tuʼu ʼaenī? ʼE lagi tou fia hagē ko Tavite ʼi tana hiva fēnei: “Ke koutou hiki mo au [ia Sehova]! Ke tou vikiviki fakatahi ki tona huafa!” (Pes. 34:4) ʼE tonu ke tou falala ki te ʼAtua pea mo fakamaʼuhigaʼi tona huafa, mo tona matagafua ʼi hatatou fakamaʼuhigaʼi iā tātou totonu.—Mat. 6:9.

7. ʼE tou fakamalohiʼi feafeaʼi ia tatatou tui moʼo hoko atu ia tatatou minisitelio logolā te mole fia logo ʼa te hahaʼi ki te logo lelei?

⁷ Neʼe ʼaoga ke falala mālohi ia te tūpulaga ko Tavite kiā Sehova ke feala ai hana maʼu ia te lototoʼa moʼo tauʼi ia Koliate. ʼI tana kei tauhi ovi, neʼe akoako ai e Tavite ia tana tuku ʼaē tana falala kiā Sehova ʼi te ʼaho fuli. Neʼe ina maʼu mai ai ia te tui ʼaē neʼe ʼaoga ki ai. (1 Sam. 17:34-37) ʼE tonu ke mālohi tatatou tui moʼo hoko atu ia tatatou minisitelio, tāfito lā mokā mole fia logo ia te hahaʼi ki te logo lelei. ʼE feala ke tuputupu tatatou tui mo kapau ʼe tou falala ki te ʼAtua iā meʼa fuli ʼe tou fai ʼi te ʼaho fuli. Ohagē lā, ʼe feala ke tou palalau ʼo ʼuhiga mo te Tohi-Tapu kiā nātou ʼaē ʼe heka tahi mo tātou ʼi te ʼu kā. ʼE tonu ke tou toe fai palalau mo te hahaʼi ʼaē ʼe tou felāveʼi mo nātou ʼi te ala mokā tou fai fakamafola ʼi te ʼu ʼapi.—Gaue 20:20, 21.

NEʼE MAʼUHIGA TĀFITO IA TE FINEGALO ʼO TE ʼATUA KIĀ TAVITE

8, 9. ʼI te temi ʼaē neʼe faigaʼi ai e Saulo ke ina matehi ia Tavite, neʼe fakahā feafeaʼi e Tavite neʼe maʼuhiga tāfito kiā te ia ia te finegalo ʼo Sehova?

⁸ Ko te tahi ʼaluʼaga neʼe hā ai te falala ʼa Tavite kiā Sehova, neʼe ko tana maʼu ia te faʼahiga manatu ʼa Sehova ʼo ʼuhiga mo te ʼuluaki hau ʼo Iselaele, ia Saulo. Neʼe maheka ia Saulo kiā Tavite. Neʼe tuʼa tolu ia tana faigaʼi ʼaē ke ina hokaʼi ia Tavite ʼaki he tao, kae neʼe kalo ia Tavite ʼo mole fakatautau ki ai. Ki muli age, neʼe tonu ke hola ia Tavite. (1 Sam. 18:7-11; 19:10) Neʼe fili e Saulo ia te toko 3 000 ʼi te kau Iselaele pea natou ʼolo ʼo kumi ia Tavite ʼi te toafa. (1 Sam. 24:2) ʼI te tahi ʼaho, neʼe hū ia Saulo ki he ʼana neʼe fēnonoʼi ai ia Tavite pea mo tana kau sōlia. Neʼe feala pē ke fakaʼuhiga e Tavite ia te faʼahi ʼaia ko he faigamālie ke ina matehi ia Saulo, koteʼuhi neʼe kua fakahā e Sehova kiā Tavite ʼe ko ia ʼaē kā liliu anai ko te hau. (1 Sam. 16:1, 13) Neʼe uga ia Tavite e tana kau sōlia ke ina matehi ia Saulo. Kae neʼe ʼui fēnei e Tavite: “Ke taofi au e [Sehova] ke aua naa au fai he mea ki toku aliki, te filifiliia a [Sehova].” (Lau ia 1 Samuele 24:4-7.) Neʼe kei nofo ʼaki pē ia Saulo ko te hau ʼaē neʼe fakanofo e te ʼAtua. Neʼe mole heʼeki fakahifo e Sehova ia Saulo, pea neʼe mole loto e Tavite ke ina fakahoko ia te faʼahi ʼaia. Koia, neʼe ina haga pē ʼo tuʼusi ia te tapaʼi kofu ʼo Saulo. ʼE hā mai ai neʼe mole fakatuʼutuʼu e Tavite ke ina fai he meʼa ʼe kovi kiā Saulo, logolā ia te fealagia ʼaē neʼe ina maʼu ke ina matehi ia ia.—1 Sam. 24:11.

⁹ ʼI tana toe felāveʼi fakamuli mo Saulo, neʼe ina toe fakahā aipē ia tana fakaʼapaʼapa ki tona ʼuhiga ʼaē ko te fakanofo ʼa Sehova. Neʼe haʼu ia Tavite mo Apisai ki te koga meʼa ʼaē neʼe nofo ai ia Saulo, o nā maʼu mai ʼe lolotoga moe ia Saulo. Pea ki te manatu ʼa Apisai, neʼe fakafealagia e te ʼAtua kiā Tavite ke ina matehi ia Saulo. Neʼe kole age e Apisai kiā Tavite ke tuku ke ina matehi ʼaki te tao ia Saulo. Kae neʼe mole fakagafua age e Tavite ke ina fakahoko ia te faʼahi ʼaia. (1 Sam. 26:8-11) Neʼe tuku e Tavite ke fakatokatoka e Sehova ia te ʼaluʼaga ʼaia, pea mo ina kumi tana takitaki, koia neʼe mole fia mulimuli ia Tavite ki te ʼu palalau ʼa Apisai ʼo ina fai he meʼa ʼe kovi ki te hau ʼaē neʼe fakanofo e Sehova.

10. Koteā ia te ʼu ʼaluʼaga faigataʼa ʼaē ʼe feala ke hoko kiā tātou? Koteā ʼaē kā tokoni mai anai ke tou fai ia te finegalo ʼo Sehova?

¹⁰ ʼI ʼihi ʼaluʼaga, ʼe loto e ʼihi ke tou fai ia te meʼa ʼaē ki tanatou manatu ʼe lelei kae ʼe mole natou faka lotomalohiʼi tātou ke tou fai ia te finegalo ʼo Sehova peʼe natou loto ke tou toʼo he ʼu tonu ʼi muʼa ʼo tatatou kumi ia te manatu ʼa Sehova. Ko te ʼaluʼaga lā ʼaia neʼe fai e Apisai kiā Tavite. Moʼo tekeʼi ia te faʼahi ʼaia, ʼe tonu ke tou mahino lelei ki te faʼahiga manatu ʼa Sehova pea mo tou fakatotonu ke tou fakahoko ia te meʼa ʼaē ʼe ina loto ke tou fai.

11. Neʼe haga fakahā feafeaʼi e Tavite ʼi tona maʼuli ia te maʼuhiga tāfito ʼo te finegalo ʼo te ʼAtua? ʼE tou lava faʼifaʼitakiʼi feafeaʼi ia Tavite?

¹¹ Neʼe faikole fēnei ia Tavite kiā Sehova ʼAtua: “Ako mai kia au te fai o tou finegalo.” (Lau ia Pesalemo 143:5, 8, 10.) Neʼe mole falala pē ia Tavite ki tona ʼatamai, pea neʼe mole ina fai ia te meʼa ʼaē neʼe ʼui age e te hahaʼi. Kae, neʼe loto ia ke akoʼi ia ia e te ʼAtua. Neʼe ina ʼui fēnei: “E au metitasio ki au gaue fuli, e au fakakaukau ki te gaueaga o ou nima.” Ohagē ko Tavite, ʼe feala ke tou mahino ki te finegalo ʼo te ʼAtua ʼaki tatatou ako fakalelei tana Folafola pea mo metitāsio ki tana faʼahiga takitaki ʼihi atu hahaʼi ʼi te temi muʼa.

NEʼE POTO IA TAVITE ʼI TE FAKAʼAOGAʼI ʼO TE ʼU PELESEPETO ʼA TE ʼATUA

12, 13. He koʼē neʼe huaʼi e Tavite ia te moʼi vai ʼaē neʼe ʼohu mai e te ʼu tagata sōlia e toko tolu maʼa ia?

¹² ʼE ʼi ai te tahi ako ʼe feala ke tou tāʼofi mai te ʼu faʼahiga fai ʼa Tavite. Neʼe poto ia Tavite ʼi te fakaʼaogaʼi ʼo te ʼu pelesepeto pea neʼe ina fia maʼuliʼi. Ko te pelesepeto ʼe ko he moʼoni ʼe tokoni mai ke tou fai he ʼu tonu ʼe lelei pea mo tou mahino ki te faʼahiga manatu ʼa Sehova. Ohagē pē ko tona fai e Tavite, ʼe feala ke tou mahino ki he pelesepeto mokā tou vakavakaʼi te ʼu lao ʼa Sehova. Ohagē lā, neʼe ʼui e Tavite ʼe ina fia ʼinu “he vai mai te foi tane ae e tuu i te matapa o Petelehemi.” Kae neʼe puleʼi e te kau Filisitini ia Petelehemi. Kae logolā tona fakatupu tuʼutāmaki, neʼe ʼolo ia te ʼu tagata sōlia e toko tolu ʼa Tavite ki te kolo ʼaia ʼo ʼohu mai te moʼi vai. Kae neʼe mole fia ʼinu e Tavite ia te moʼi vai ʼaia. “Nee ina huai leva ia ia mua o [Sehova].” Koteā tona tupuʼaga? Neʼe ʼui fēnei e Tavite: “Ke taupau au e toku Atua, ke aua naa au fai te mea aena! Pe e au inu anai te toto o te kau tagata aeni, ae nee olo o tetehii ai onatou mauli? Koteuhi nee natou aumai te vai aeni o totogi aki onatou mauli.”—1 Klk. 11:15-19.

¹³ Neʼe ʼiloʼi e Tavite, ʼe fakatotonu ʼi te Lao, ke liligi ia te toto iā muʼa ʼo Sehova kae ʼe mole tonu ke kai. Neʼe toe mahino ia Tavite ki te fakaʼuhiga totonu ʼo te Lao ʼaia. Neʼe ʼiloʼi e Tavite “ko te mauli o te sino e nofo i te toto.” Kae ʼi te ʼaluʼaga ʼaia, neʼe mole ko te toto, neʼe ko te moʼi vai. He koʼē neʼe mole fia ʼinu e Tavite ia te moʼi vai ʼaia? Neʼe ina fai ia te faʼahi ʼaia, he neʼe mahino ki te pelesepeto ʼaē neʼe fakatafito kiai ia te lao ʼo ʼuhiga mo te toto. Neʼe hā mai ai ia te maʼuhiga ʼo te toto kiā mata ʼo Sehova. Koia, mai tona ʼaluʼaga ʼaē neʼe feala pē ke natou mamate ʼi tanatou ʼolo ʼo ʼohu mai te moʼi vai, neʼe mahino ai kiā Tavite kapau ʼe ina ʼinu ia te moʼi vai, ʼe ina fakahā ai ia tana mole fakaʼapaʼapa ki te maʼuhiga ʼo tonatou toto. ʼO mole ʼui ke ina ʼinu ia te moʼi vai, neʼe ina haga ʼo huaʼi ki te kele.—Lev. 17:11; Tet. 12:23, 24.

14. Koteā ʼaē neʼe tokoni kiā Tavite ke ina fai he ʼu tonu ʼe fiafia ai ia Sehova?

¹⁴ Neʼe maʼuhiga kiā Tavite ia te lao ʼa te ʼAtua ʼi tona maʼuli kātoa. Neʼe hiva fēnei: “E au loto ke fai tou finegalo, sioku Atua! Pea e tuu tau lao i . . . toku loto.” (Pes. 40:9) Neʼe ako e Tavite ia te ʼu lao ʼa te ʼAtua pea mo metitāsioʼi. Neʼe tui papau ia Tavite ʼe fua lelei anai ki ai mo kapau ʼe mulimuli ki te ʼu fakatotonu ʼa Sehova. Neʼe mole gata ʼaki pē tana mulimuli ki te ʼu fakatotonu ʼaē ʼe tuʼu ʼi te Lao ʼa Moisese kae neʼe toe fia mulimuli ki te ʼu pelesepeto ʼaē neʼe fakatafito kiai te ʼu lao ʼaia. Kā tou ako te Tohi-Tapu, ʼe tonu ke tou metitāsioʼi te ʼu meʼa ʼaē ʼe tou lau. Kapau ʼe tou fai fēia, ʼe tou tuku ke takitaki tātou e te ʼu pelesepeto ʼi te ʼaho fuli pea ʼe fiafia anai ia Sehova ʼi te ʼu tonu ʼaē ʼe tou fai.

15. Neʼe talagataʼa feafeaʼi ia Salomone ki te Lao ʼa te ʼAtua?

¹⁵ Neʼe tapuakinaʼi e Sehova ia Salomone, te foha ʼo Tavite. Kae ki muli age, neʼe mole kei fakalogo ia Salomone ki te Lao ʼa te ʼAtua. Neʼe talagataʼa ia ki te fakatotonu ʼa Sehova, ʼe mole tonu anai ki he hau Iselaele ke ina ʼohoanaʼi he ʼu tuʼuga fafine. (Tet. 17:17) Neʼe lahi ia te ʼu fafine matāpule neʼe ʼohoanaʼi e Salomone. ʼI tona temi matuʼa, neʼe fakaneke leva e ʼona ʼohoana ke tauhi ki ʼihi age ʼatua. Tatau aipē pe koteā ʼana takuʼaki moʼo talagataʼa ki te Lao ʼa te ʼAtua, “nee fai leva e Salomone te mea ae e kovi kia mata o [Sehova], pea nee mole mulimuli katoa leva ia ia [kiā Sehova] o hage ko Tavite, tana tamai.” (1 Hau 11:1-6) ʼE tonu ke tou mulimuli ki te ʼu lao pea mo te ʼu pelesepeto ʼaē ʼe tou ako mai te Folafola ʼa te ʼAtua. Ohagē lā, mo kapau ʼe tou fakatuʼutuʼu ke tou ʼohoana.

16. Koteā ʼaē ʼe feala ke tou ako mai te lao ʼa Sehova ke tou ʼohoana pē “i te Aliki”?

¹⁶ Kapau ʼe fia fakatahi he tama peʼe ko he taʼahine ʼo te mālama mo kita, koteā ʼaē kā kita fai anai? ʼE tou hagē koa ko Tavite, ʼaē neʼe ina faigaʼi ke ina maʼu ia te manatu ʼa te ʼAtua? Peʼe tou hagē ko Salomone, ʼo tou meʼa noaʼi ia te ʼu fakatotonu ʼa Sehova? ʼE tonu ke ʼohoana pē ia te kau Kilisitiano moʼoni “i te Aliki.” (1 Ko. 7:39) Ko tona fakaʼuhiga ʼaē kapau ʼe fakatuʼutuʼu e he Kilisitiano ke ʼohoana, ʼe tonu anai ke ina ʼohoanaʼi he tahi age pē Kilisitiano. ʼAki te lao ʼaia, ʼe tou mahino ai ʼe mole loto e Sehova ke tou fia fakatahi mo nātou ʼaē ʼe mole tauhi kiā te ia. ʼE mole gata ʼaki pē tatatou fakafisi ki te ʼohoanaʼi ʼo he tahi ʼo te mālama, kae ʼe mole tonu ke tou tuku ke hoko atu tana faiga ʼaē ke fakatahi mo kita.

17. Koteā ʼaē ʼe feala ke tokoni mai ke tou fakamamaʼo mai te ʼu pāki mo te ʼu ʼata heʼeʼaoga?

¹⁷ ʼE feala ke tokoni mai ia te faʼifaʼitaki ʼo Tavite, ʼaē neʼe faiga ke ina maʼu ia te faʼahiga manatu ʼa te ʼAtua, ke tou tekeʼi ia te fakahala ʼaē ko te sioʼi ʼo te ʼu pāki mo te ʼu ʼata heʼeʼaoga. Kotou lau ia te ʼu vaega Tohi-Tapu ʼaē ʼe hoa mai, pea mo kotou fakakaukauʼi ia te ʼu pelesepeto ʼaē ʼe tuʼu ai, ʼo kotou faigaʼi ke kotou mahino ki te faʼahiga manatu ʼa Sehova ʼo ʼuhiga mo te ʼu pāki pea mo te ʼu ʼata heʼeʼaoga. (Lau ia Pesalemo 119:37; Mateo 5:28, 29; Kolose 3:5.) ʼE tonu ke tou metitāsioʼi ia te ʼu lēkula māʼoluga ʼa Sehova ke feala ai hatatou fakamamaʼo mai te ʼu pāki mo te ʼu ʼata heʼeʼaoga.

KOTOU FAIGAʼI KE KOTOU MAʼU TUʼUMAʼU IA TE FAʼAHIGA MANATU ʼA TE ʼATUA

18, 19. (1) Logolā te agahala ʼa Tavite, kae neʼe ina haga maʼu feafeaʼi ia te ʼofa ʼo te ʼAtua? (2) Koteā ʼaē ʼe tou fakatotonu ke tou fai?

¹⁸ Logolā ko Tavite neʼe ko he faʼifaʼitaki lelei, kae neʼe ina fakahoko he ʼu agahala mamafa. (2 Sam. 11:2-4, 14, 15, 22-27; 1 Klk. 21:1, 7) Kae neʼe fakahemala tuʼumaʼu ia Tavite ʼi te ʼu temi ʼaē ʼe agahala ai. Neʼe “agatonu” pea mo tauhi kiā Sehova ʼaki he loto kātoa. (1 Hau 9:4) He koʼē ʼe feala ke tou fai ia te ʼu palalau ʼaia? He neʼe faigaʼi e Tavite ke ina maʼu tuʼumaʼu ia te faʼahiga manatu ʼa te ʼAtua pea mo fai ia te meʼa ʼaē ʼe Ina leleiʼia.

¹⁹ Logolā totatou ʼuhiga agahala, kae ʼe feala pē ke tou maʼu ia te ʼofa ʼo Sehova. ʼE tonu ke tou haga ako ia te Folafola ʼa te ʼAtua pea mo metitāsioʼi ia te ʼu ako ʼaē ʼe tou maʼu mai ai pea mo foimo maʼuliʼi. Kapau ʼe tou fai fēia, ʼe tou hagē anai ko te tagata fai pesalemo ʼaē neʼe ina kole fēnei age kiā Sehova ʼaki he lotovaivai: “Ako mai kia au te fai o tou finegalo.”

[Paki ʼo te pāsina 10]

He koʼē neʼe mole matehi e Tavite ia Saulo ʼi te temi ʼaē neʼe faigamālie ai?

[Paki ʼo te pāsina 11]

Koteā te ako ʼe feala ke tou tāʼofi ʼi te temi ʼaē neʼe huaʼi ai e Tavite ia te moʼi vai ʼaē neʼe ʼohu mai e ʼana tagata sōlia e toko tolu?