Kua Kotou Fetogi Koa?

1, 2. ʼE malave feafeaʼi ki totatou maʼuli te ako ʼae neʼe tou maʼu mo te agaaga maʼuli ʼo totatou fenua?

KO TE ako ʼae neʼe tou maʼu pea mo te agaaga maʼuli ʼo totatou fenua, ohage ko ʼotatou kaumeʼa, mo tatatou aga ʼi fenua pea mo te hahaʼi ʼae neʼe tou maʼuʼuli mo ia, neʼe malave kia tatou fuli. Koia la ʼae ʼe tou leleiʼia ai he faʼahiga meʼa kai mo he faʼahiga teuteu pea mo tou maʼu he faʼahiga aga.

² Kaʼe ko ʼihi faʼahi ʼe maʼuhiga age ʼi te faʼahiga teuteu peʼe ko te meʼa kai. Ohage la ʼi tatatou lahilahi ake neʼe akoʼi mai ʼe ʼi ai te ʼu meʼa ʼe lelei pea mo kovi. Kaʼe ʼe kehekehe te hahaʼi ʼo feia mo ʼanatou manatu ʼo ʼuhiga mo te meʼa ʼae ʼe lelei pea mo ʼae ʼe kovi. Ko te ʼu tonu ʼae ʼe tou fai ʼe toe mulimuli ki totatou leʼo ʼo loto. ʼE ui ʼi te Tohi-Tapu, tuʼumaʼu pe “ko te kau pagani, ae e mole natou mau te lao, e natou fai mahani te mea e fakaha e te lao.” (Loma 2:14) Kaʼe moka ʼe mole tou maʼu he lao ʼe haʼu tonu mai te ʼAtua, pea ʼe feala pe koa hatatou mulimuli ki te ʼu fakatuʼutuʼu fakafamili peʼe ko ʼae kua faimahani ʼi te potu ʼae ʼe tou maʼuʼuli ai?

3. Kotou tuku mai ni tupuʼaga ʼe lua ʼo te mole mulimuli ʼa te kau Kilisitiano ki te faʼahiga manatu ʼa te malama.

³ ʼE ʼi ai tupuʼaga maʼuhiga ʼe lua ke mole fai ai e te kau Kilisitiano te faʼahi ʼaia. ʼUluaki, ʼe ui fenei ʼi te Tohi-Tapu: “E i ai he ala e matalelei ki te tagata, kae ko tona fakaosi ko te ala o te mate.” (Taag. 16:25) ʼE tou heʼe haohaoa, koia ʼae ʼe mole feala ai ke tou takitaki lelei tatatou haʼele. (Taag. 28:26; Sel. 10:23) Lua, ʼe ui ʼi te Tohi-Tapu, ko Satana ʼe ko “te atua o te sekulo [“te tuʼu,” MN] aeni.” ʼE ina puleʼi te ʼu faʼahiga manatu ʼa te malama ʼo ʼuhiga mo te ʼu meʼa ʼae ʼe lelei peʼe kovi pea mo te ʼu meʼa ʼae kua leleiʼia e te tokolahi. (2 Ko. 4:4; 1 Soa. 5:19) Kapau ʼe tou loto ke tou fakafiafia ia Sehova pea ke ina tapuakinaʼi tatou, pea ʼe tonu ke tou fakalogo ki te tokoni ʼaeni ia Loma 12:2, Tauhi Foou: “Pea aua tautou fakatatau ki te taitupu aeni, kae koutou fetogi aki te fakafoou o toutou atamai, ke koutou iloi, pe kotea te finegalo o te Atua, te mea e lelei mo taau mo ia pea mo te mea ae e katoa.”

4. Kotea ʼae ka tou talanoa anai ki ai ʼi te alatike ʼaeni?

⁴ ʼE talanoa anai ʼi te alatike ʼaeni kia faʼahi maʼuhiga ʼe tolu ia Loma 12:2. (1) He ko ʼe ʼe ʼaoga ke tou “fetogi”? (2) Kotea ʼae ʼe ʼaoga ke tou fetogi? pea (3) ʼE feafeaʼi hatatou lava fetogi?

HE KO ʼE ʼE ʼAOGA KE TOU FETOGI?

5. Ko ai ʼae neʼe tohi ki ai e Paulo te tokoni ia Loma 12:2?

⁵ ʼI te faitohi ʼae ʼa Paulo ki te kau Loma ʼi te taʼu 56, neʼe mole faitohi ia ki te hahaʼi fuli ʼo Loma. Kaʼe neʼe faitohi ia ki te kau Kilisitiano fakanofo ʼae neʼe maʼuʼuli ʼi ai. (Loma 1:7) Neʼe ina ʼekenaki natou ke natou fetogi pea ke “aua [tanatou] fakatatau ki te taitupu aeni.” ʼE kau ki te “taitupu” ʼaia te ʼu meʼa ʼae neʼe manatu e te kau Loma ʼe lelei mo kovi ʼo feia mo ʼanatou aga ʼi fenua, mo tanatou aga, pea mo tanatou faiteuteu. Neʼe ui e Paulo ke “aua [tanatou] fakatatau ki te taitupu aeni,” koteʼuhi neʼe ʼi ai te ʼu tehina mo tuagaʼane neʼe kei natou maʼu te faʼahiga aga mo te faʼahiga manatu ʼo tonatou fenua. Kotea ʼae neʼe tupu ai tanatou kei feia?

6, 7. ʼI te temi ʼo Paulo, he ko ʼe neʼe faigataʼa ki te kau Kilisitiano tanatou maʼuʼuli ʼi Loma?

⁶ Ia ʼaho nei, moka olo te kau tulisi ki Loma, pea ʼe natou mamata ai ki te ʼu toega ʼo te ʼu fale lotu mo te ʼu fale maka pea mo te ʼu fale lalahi ʼae neʼe laga, kua hili ki ai ni taʼu ʼe lau ʼi afe. ʼAki te ʼu mataga ʼaia, ʼe lahi te ʼu faʼahi ʼe tou ako ʼo ʼuhiga mo te faʼahiga maʼuli mo te tauhi ʼa te hahaʼi ʼi Loma ʼi te temi muʼa. ʼI te ʼu tohi fakahisitolia, ʼe tou lau ai neʼe ʼi ai te ʼu fetauʼaki ʼa te ʼu tagata agamalohi moʼo fakafiafia te hahaʼi, mo te ʼu lele saliote neʼe toho e te ʼu hosi pea mo te ʼu kiʼi gaoʼi neʼe tau maʼu ai ni aga heʼe ʼaoga. Ko Loma neʼe ko he kolo koloaʼia pea neʼe lahi te ʼu faigamalie ʼa te hahaʼi ke natou maʼu koloa ai.—Loma 6:21; 1 Pet. 4:3, 4.

⁷ Neʼe lahi te ʼu fale lotu ʼa te kau Loma pea neʼe natou tauhi ki te tuʼuga ʼatua, kaʼe tokolahi te hahaʼi neʼe mole natou faiga moʼoni ke natou maʼu ni felogoʼi lelei mo ʼonatou ʼatua. Neʼe fakamaʼua tafitō ʼi te lotu ʼa te kau Loma ke natou kau ki te ʼu toʼotoʼoga ohage ko te ʼu ʼahotupu, te ʼu faiʼohoana, peʼe ko te ʼu faiʼavaifo. Pea neʼe kau te ʼu toʼotoʼoga ʼaia ʼi tonatou maʼuli ʼo te ʼaho fuli. Neʼe lagi faigataʼa ʼaupito ki te kau Kilisitiano ʼo Loma. Tokolahi ia natou neʼe lahilahi ake ʼi te tauhi ki te ʼu taula ʼatuā, koia ʼae neʼe tonu ai ke natou fai ni fetogi ke feala hanatou liliu ko ni kau Kilisitiano. Pea maʼia ʼi tanatou ʼosi papitema, neʼe kei tonu ke natou fai ni fetogi.

8. He ko ʼe ko te malama ia ʼaho nei ʼe ko he koga meʼa fakatupu tuʼutamaki maʼa te kau Kilisitiano?

⁸ ʼO toe feia pe, ko te malama ia ʼaho nei ʼe ko he koga meʼa fakatupu tuʼutamaki maʼa te kau Kilisitiano. Kotea tona tupuʼaga? Koteʼuhi ko te laumalie ʼo te malama ʼe maʼu ʼi te potu fuli pe. (Lau ia Efeso 2:2, 3; 1 Soane 2:16.) ʼE faigaʼi e te malama ke ina fakahalaʼi tatou ʼaki ʼona holi, mo tana faʼahiga manatu, mo ʼana lekula, mo ʼana pelesepeto ʼo ʼuhiga mo te aga, pea tuʼumaʼu pe ʼe feala ai ke tou tuʼutamaki pea ke tou to ki te malama. Koia ʼe ʼaoga moʼoni ai ke tou fakalogo ki te tokoni ʼae ke “aua [tatatou] fakatatau ki te taitupu aeni,” kaʼe ke tou “fetogi.” Kotea ʼae ʼe tonu ke tou fetogi?

KOTEA ʼAE ʼE ʼAOGA KE TOU FETOGI?

9. Kotea te ʼu fetogi ʼe fai e te tokolahi ke feala ai hanatou papitema?

⁹ Kapau ʼe ako e he tahi te Tohi-Tapu pea mo ina maʼuliʼi te ʼu manatu ʼae ʼe ina ako, pea ʼe kamata fakaovi ai kia Sehova. ʼE mavae mai te lotu hala pea mo ina fai ni fetogi ʼi tona maʼuli. ʼE gaue malohi ke ina maʼu te ʼuluagaaga foʼou pea mo faʼifaʼitakiʼi ia Sesu. (Efe. 4:22-24) ʼE tou fiafia ʼi tatatou sio ʼae ki te toko lau ʼi teau afe hahaʼi ʼe natou tuputupu feia ʼi te taʼu fuli, mo natou foaki tonatou maʼuli kia Sehova ʼAtua pea mo papitema. ʼE mahino papau ia ʼe fiafia ai Sehova. (Taag. 27:11) Kaʼe ʼe ko te ʼu fetogi pe koa ʼaia ʼe tonu ke fai e he tahi?

10. He ko ʼe ko tatatou fetogi ʼe mole gata ʼaki pe te hikihiki age ʼo totatou ʼuluagaaga?

¹⁰ Ko tatatou fetogi ʼe mole gata ʼaki pe tatatou tuputupu peʼe ko te hikihiki age ʼo totatou ʼuluagaaga. Ohage la, neʼe lagi fetogi te lanu ʼo te pake laisi ke matalelei age, peʼe neʼe toe hilifaki ki ai he meʼa moʼo fakamagoni ʼaki, kaʼe ko te laisi ʼe heʼeki fetogi ia. ʼE ui ʼi te tikisionalio Fakatohi-tapu, ko te kupu “fetogi” ia Loma 12:2, ʼe fakaʼuhiga ki te fakafoʼou peʼe ko te fetogi ʼo tatatou faʼahiga manatu ʼaki te malohi ʼo te laumalie maʼoniʼoni. Koia ko he Kilisitiano ʼe mole fetogi ʼaki pe tana fakagata ʼana agamahani ʼae ʼe kovi, tana lea kovi, peʼe ko tana aga heʼe ʼaoga. Ko ʼihi hahaʼi ʼe mole natou iloʼi pe la pe kotea ʼae ʼe ui ʼi te Tohi-Tapu, kaʼe ʼe natou faigaʼi ke natou tekeʼi te ʼu meʼa kovi ʼaia. Koia, kotea ʼe tonu ke tou fai e tatou Kilisitiano ke tou fetogi tatatou faʼahiga manatu pea mo te ʼu meʼa ʼe tou logoʼi?

11. Ohage ko tona ui e Paulo, kotea ʼae neʼe ʼaoga ke fetogi e he tahi?

¹¹ Neʼe tohi fenei e Paulo: “Koutou fetogi aki te fakafoou o toutou atamai.” Ko te “atamai” ʼe fakaʼuhiga ki tatatou fealagia ʼae ke tou fakakaukau. Kaʼe ohage ko tona fakaʼaogaʼi ʼi te Tohi-Tapu, ʼe toe kau ki ai te ʼu meʼa ʼae ʼe tou manatu ki ai ʼo toe feia mo tatatou aga pea mo tatatou fealagia ʼae ke tou fakakaukauʼi ni meʼa. ʼI te kamata ʼa Paulo tana tohi ki te kau Loma, neʼe talanoa ʼo ʼuhiga mo ni hahaʼi neʼe natou maʼu he “atamai fakavale” ʼuhi ko tanatou heʼe faitotonu, agakovi, manumanū pea mo agakakā. Neʼe natou “fonu i te maheka, mo te fakapo, mo te ke, mo te kaka,” pea mo ʼihi atu ʼu aga ʼe kovi. (Loma 1:28-31, Tauhi Foou) ʼE feala ai ke tou mahino pe ko ʼe neʼe tokoniʼi e Paulo te kau Kilisitiano ʼae neʼe maʼuʼuli ʼi te ʼu tafaʼaki ʼo ni hahaʼi feia, ke natou “fetogi aki te fakafoou o [tonatou] atamai.”

12. Kotea te manatu ʼa te tokolahi ia ʼaho nei? Pea he ko ʼe ʼe feala ke tuʼutamakiʼia te kau Kilisitiano mo kapau ʼe natou maʼu te manatu ʼaia?

¹² Meʼa fakaʼofaʼofa foki, heʼe tokolahi ʼi te malama ʼe natou maʼu te faʼahiga manatu ʼae neʼe talanoa ki ai Paulo. ʼE natou manatu ʼe mole kei he ʼaoga te mulimuli ki ni lekula mo ni pelesepeto, pea ʼe mole tonu ke fakakinauʼi ʼihi ke natou mulimuli ki ai. Tokolahi te kau faiako pea mo matuʼā, ʼe natou tuku te tamaliki ke natou fai te meʼa pe ʼae ʼe natou loto ki ai. ʼE natou toe akoʼi age kia natou ʼe tahi maʼu e te hahaʼi te loto faʼitaliha moʼo filifili te meʼa ʼae ʼe lelei peʼe kovi. Kia natou ʼaia ʼe mole he tahi ʼe feala ke ina ui mai ko te meʼa ʼae ʼe lelei pea ko ʼae ʼe kovi. Ko te tokolahi pe la ʼe natou lau ʼe natou tui ki te ʼAtua, kaʼe kia natou ʼe mole ʼaoga ke natou fai te ʼu meʼa ʼae ʼe leleiʼia e te ʼAtua. (Pes. 14:1) ʼE feala ke tuʼutamakiʼia te kau Kilisitiano mo kapau ʼe natou maʼu te manatu ʼaia. Kapau ʼe mole tou tokakaga, pea ʼe feala ke mole kei tou mulimuli ki te ʼu fakatotonu ʼae mai te kautahi ʼa te ʼAtua, pea ʼe toe feala ai ke tou muhumuhu ʼo ʼuhiga mo he meʼa ʼe mole tou leleiʼia. Peʼe lagi mole tou manatu tahi mo he tokoni Fakatohi-tapu ʼe foaki mai ʼo ʼuhiga mo te ʼu fakafiafia, te fakaʼaogaʼi ʼo te Neti pea mo te ʼu ako lalahi.

13. He ko ʼe ʼe tonu ke tou vakavakaʼi fakalelei totatou ʼuhiga moʼoni ʼo loto?

¹³ Kapau ʼe tou loto ke tou tuku tatatou “fakatatau ki te taitupu aeni,” ko tona fakaʼuhiga, ke mole tou tuku ke faʼufaʼu e te malama tatatou faʼahiga manatu pea mo te ʼu meʼa ʼae ʼe tou logoʼi, pea ʼe ʼaoga ke tou vakavakaʼi fakalelei ia totatou ʼuhiga moʼoni. ʼE ʼaoga ke tou vakavakaʼi fakalelei ʼatatou manatu mo te ʼu meʼa ʼae ʼe tou logoʼi, ʼatatou fakatuʼutuʼu pea mo te ʼu meʼa ʼae ʼe maʼuhiga kia tatou. ʼE lagi mole iloʼi e ʼihi totatou ʼuhiga moʼoni ʼo loto, pea ʼe feala ke natou ui mai ʼe tou fai te meʼa ʼe lelei. Kaʼe ʼe ko tatou pe ʼae ʼe tou iloʼi pe tou tuku ke fetogi tatou e te ʼu tokoni ʼae ʼe tou ako ʼi te Tohi-Tapu pea mo tou haga fai te faʼahi ʼaia.—Lau ia Sakopo 1:23-25.

ʼE FEAFEAʼI HATATOU LAVA FETOGI?

14. Kotea ʼae ʼe lava tokoni mai ke tou iloʼi te ʼu fetogi ʼae ʼe ʼaoga ke tou fai?

¹⁴ Ke feala hatatou fetogi, ʼe ʼaoga ke tou fetogi te ʼu meʼa ʼi totatou loto, ʼae ko totatou ʼuhiga moʼoni. Kotea ʼae ʼe lava tokoni mai ke tou fai te ʼu fetogi ʼaia? Moka tou ako te Tohi-Tapu, pea ʼe tou iloʼi ai te faʼahiga tagata ʼae ʼe loto e Sehova ke tou hoko ki ai. Ko tatatou faʼahiga tali te ʼu meʼa ʼae ʼe tou lau ʼi te Tohi-Tapu, ʼe tokoni mai anai ke tou iloʼi moʼoni pe kotea ʼae ʼi totatou loto. ʼE tokoni mai anai ke tou iloʼi pe ko te ʼu fetogi fea ʼae ʼe ʼaoga ke tou fai ke alu tahi mo “te finegalo o te Atua.”—Loma 12:2; Hep. 4:12.

15. Kotea ʼae ʼe fetogi ia tatou moka faʼufaʼu tatou e Sehova?

¹⁵ Lau ia Esaia 64:7. Ko he ako maʼuhiga ʼe tou taʼofi mai te fakata ʼae neʼe fakaʼaogaʼi e te polofeta ko Esaia. ʼE fakatatau ia tatou ki te kele, pea ko Sehova ʼe fakatatau ki he tagata tufuga ipu. Moka ina faʼufaʼu tatou ohage ko te faʼufaʼu e he tagata tufuga ipu ia te kele, pea ʼe mole ko te agaaga ʼo totatou sino ʼae ʼe ina fetogi. Kaʼe ʼe ina fetogi totatou ʼuhiga tagata ʼo loto. Moka tou tali tana faʼufaʼu ʼaia ʼo tatou, pea ʼe tou tuku ai ke ina fetogi totatou ʼuhiga ʼo loto, ko tona fakaʼuhiga, ʼe tokoni mai ke tou fetogi te ʼu meʼa ʼae ʼe tou logoʼi pea mo tatatou faʼahiga manatu. Pea ʼe ko te meʼa la ʼaia ʼae ʼe ʼaoga kia tatou ke feala ai hatatou tauʼi te ʼu fakaneke ʼa te malama. Kaʼe ʼe faʼufaʼu feafeaʼi tatou e Sehova?

16, 17. (1) Kotou fakamahino pe kotea ʼae ʼe fai e te tagata tufuga ipu ki te kele ʼae ʼe ina fakaʼaogaʼi moʼo faʼu he ipu ʼe maʼuhiga. (2) ʼE tokoni feafeaʼi mai te Folafola ʼa te ʼAtua ke tou fetogi ke tou liliu ko he ipu maʼuhiga ʼe lava fakaʼaogaʼi e Sehova?

¹⁶ Kapau ʼe loto e te tagata tufuga ipu ke ina faʼu he ipu makehe, pea ʼe ʼaoga ke ina fakaʼaogaʼi he kele ʼe lelei ʼaupito. Kaʼe ʼe ʼi ai faʼahi ʼe lua ʼe ʼaoga ke ina fai ki te kele ʼi muʼa ʼo tona gaueʼi. ʼUluaki, ʼe ʼaoga ke fakamaʼa te kele. Pea ʼe ʼaoga leva ke ina fakafuafua lelei te vai ʼae ka fio mo te kele pea ke ina gaueʼi te kele ke feala ke pipiki maʼu ʼi te temi ʼae ʼe faʼu ai te ipu.

¹⁷ ʼE fakaʼaogaʼi e te tagata tufuga ipu ia te vai moʼo fakamaʼa te kele pea ke faigafua tona gaueʼi. Pea ʼe feala leva hana faʼu ni ipu kehekehe ʼae ʼe loto ki ai, maʼia mo ʼae ʼe maʼuhiga. Ohage pe ko te fetogi e te vai ia te kele, ko te Folafola ʼa te ʼAtua ʼe ina fetogi tatou. ʼI tatatou kamata ako ʼo ʼuhiga mo te ʼAtua, neʼe tokoni mai te Tohi-Tapu ke tou fakagata tatatou manatu ohage ko te malama, kaʼe ke tou kamata maʼu te faʼahiga manatu ʼa te ʼAtua. Pea neʼe feala ai leva ke ina fetogi tatou ke tou liliu ko he ipu maʼuhiga neʼe feala ke ina fakaʼaogaʼi. (Efe. 5:26) ʼE fakamanatuʼi tuʼa lahi mai ke tou lau te Tohi-Tapu ʼi te ʼaho fuli pea ke tou kau tuʼumaʼu ki te ʼu fono. He ko ʼe koa ʼe fakalotomahiʼi tatou ke tou fai te ʼu faʼahi ʼaia? Koteʼuhi ʼaki tatatou fai te ʼu faʼahi ʼaia, ʼe tou tali leleiʼi totatou faʼufaʼu ʼae e Sehova.—Pes. 1:2; Gaue 17:11; Hep. 10:24, 25.

18. (1) He ko ʼe ʼe ʼaoga ke tou metitasio ki te Folafola ʼa te ʼAtua mo kapau ʼe tou loto ke ina fetogi tatou? (2) Ko te ʼu fehuʼi fea ʼe lava tokoni mai ke tou fai te faʼahi ʼaia?

¹⁸ Kapau ʼe tou loto ke fetogi tatou e te Folafola ʼa te ʼAtua, pea ʼe mole gata pe ʼi tona lau pea mo tona ako. Tokolahi te hahaʼi ʼe natou lau te Tohi-Tapu pea mo natou iloʼi te atu manatu ʼe tuʼu ai. Lagi kua kotou felaveʼi mo ni hahaʼi feia ʼi te minisitelio. Ko ʼihi pe la ʼe feala ke natou lau fakaʼatamai ni vaega Fakatohi-tapu.a Kaʼe ʼi te agamahani ʼe mole fetogi ai tanatou faʼahiga manatu pea mo tonatou maʼuli. Kotea tona tupuʼaga? Koteʼuhi ʼe fetogi e te Folafola ʼa te ʼAtua te hahaʼi mo kapau pe ʼe natou tuku ke hu te ʼu manatu ʼae ʼe tuʼu ai ki tonatou loto. ʼE ʼaoga ke tou metitasio ki te ʼu meʼa ʼae ʼe tou ako mai te Tohi-Tapu. Koia ʼe tonu ai ke tou fai te ʼu fehuʼi ʼaeni kia tatou totonu: “ ʼE au tui papau koa ko te manatu ʼaeni ʼe mole ko he akonaki fakalotu pe? Kua au sio koa ki ni fakamoʼoni ʼi toku maʼuli ko te faʼahi ʼaeni ʼe ko te moʼoni? ʼO mole gata ʼaki pe taku akoʼi ʼae ki ʼihi, kaʼe ʼe au maʼuliʼi koa ʼi toku maʼuli te ʼu meʼa neʼe au ako? ʼE au tui koa ko te ʼu meʼa ʼae ʼe au ako ʼe haʼu mai ia Sehova, ohage pe ʼe palalau totonu mai?” Kapau ʼe tou metitasio ki ni faʼahiga fehuʼi feia, pea ʼe tou fakaovi anai kia Sehova. ʼI te temi ʼae ʼe malave ai ki totatou loto te ʼu meʼa ʼae ʼe tou ako, pea ʼe uga ai anai tatou ke tou fai ni fetogi ʼi totatou maʼuli ke fiafia ai te ʼAtua.—Taag. 4:23; Luka 6:45.

19, 20. ʼE fua lelei feafeaʼi anai kia tatou tatatou maʼuliʼi te ʼu tokoni ʼo te Tohi-Tapu?

¹⁹ Kapau ʼe tou lau tuʼumaʼu te Tohi-Tapu pea mo metitasio ki ai, pea ʼe tokoni mai anai ke tou haga fai te faʼahi ʼaeni neʼe ui e Paulo: “Kotou siaki te tagata afea mo ana gaue, pea kua kotou kofu te tagata foou ae e fakafoou i te poto.” (Kol. 3:9, 10) Kapau ʼe tou mahino moʼoni pe kotea ʼae ʼe akoʼi mai ʼi te Tohi-Tapu pea mo maʼuliʼi te ʼu faʼahi ʼae ʼe tou ako, pea ʼe uga ai anai tatou ke tou kofuʼi te ʼuluagaaga foʼou Fakakilisitiano ʼae ʼe lava puipui tatou mai te ʼu hele ʼa Satana.

²⁰ ʼE fakamanatuʼi fenei mai e te apositolo ko Petelo: “O hage ko ni fanau logogafua, ke aua naa kotou fakatatau ki te u holi ae nee kotou mau i mua. . . . Kae, . . . ke kotou maonioni i tokotou mauli katoa.” (1 Pet. 1:14, 15) ʼE fakamahino anai ʼi te alatike ʼae ka hoa mai pe tapuakina feafeaʼi anai tatou e Sehova moka ʼe tou faiga malohi ke tou fetogi tatatou faʼahiga manatu pea mo tatatou aga.