Te ʼu Fehuʼi ʼa Te Kau Lautohi

He ko ʼe neʼe tagi Sesu ʼi muʼa ʼo tana fakatuʼuake ia Lasalo, ohage ko tona fakamatala ia Soane 11:35?

Logo la neʼe ʼofa Sesu ia Lasalo, kaʼe neʼe mole tagi ia he neʼe kua mate Lasalo. Neʼe tagi ia he neʼe ʼofa kia natou ʼae neʼe putu, ohage ko tona ui ʼi te fakamatala ʼa Soane.—Soa. 11:36.

ʼI te fakaha age kia Sesu ʼe mahaki Lasalo, neʼe mole alu atu aipe ʼo fakamalolo ia ia. ʼE ui fenei ʼi te fakamatala: “I [te] logo [ʼa Sesu] ki te mahaki o Lasalo, nee toe nofo leva ia o aho lua i te kogamea nee nofo ai.” (Soa. 11:6) He ko ʼe neʼe fakatuatuai ia Sesu? He neʼe ʼi ai tana fakatuʼutuʼu. Neʼe ina ui fenei: “E mole iku te mahaki aeni ki te mate, kae ki te kololia o te Atua, o tupu ke fakakololiai ai te Alo o te Atua.” (Soa. 11:4) Ko te ikuʼaga fakaʼosi ʼo te mahaki ʼo Lasalo neʼe mole ko te mate. Neʼe fakatuʼutuʼu e Sesu ke ina fakaʼaogaʼi te mate ʼo Lasalo “ki te kololia o te Atua.” ʼO feafeaʼi? Neʼe ʼamanaki fakahoko e Sesu he milakulo fakaofoofo ʼaki tana haga ʼae ʼo fakatuʼuake tona kaumeʼa ʼofaina mai te mate.

ʼI tana palalau mo ʼana tisipulo ʼo ʼuhiga mo te aluʼaga ʼaia neʼe hoko, neʼe fakatatau e Sesu te mate ki te moe. Ko tona tupuʼaga la ʼae ʼo tana ui age kia natou ʼe “alu . . . o fafagu ia” Lasalo. (Soa. 11:11) Kia Sesu, ko tana fakatuʼuake ia Lasalo neʼe hage pe ko he tamai peʼe ko he faʼe ʼe ina fafagu tana tamasiʼi ʼae ʼe moe. Koia, neʼe mole tagi Sesu tupu ko te kua mate ʼo Lasalo.

Kaʼe he ko ʼe koa neʼe tagi Sesu? ʼE tou toe maʼu tona tali ʼi te ʼu vaega ʼi muʼa atu. ʼI te felaveʼi ʼa Sesu mo Malia, te tuagaʼane ʼo Lasalo, mo sio ki tana tagi ʼo feia mo ʼihi atu, “nee mamahi lahi ia i tona laumalie, pea nee fonu ia i te ofa.” ʼI te sio ʼa Sesu ki tanatou lotomamahi, neʼe mamahi lahi tona loto. Neʼe ko te faʼahi ʼaia ʼae neʼe tupu ai te “tagi leva [ʼa] Sesu.” Neʼe lotomamahi ʼaupito Sesu ʼi tana sio ki te fetagihi ʼo ʼona kaumeʼa ʼofaina ʼi te putu.—Soa. 11:33, 35.

ʼE fakaha ʼi te fakamatala ʼaia, ʼe maʼu e Sesu te fealagia ʼae ke ina fakatuʼuake mo fakamalolo ʼi te malama foʼou ka haʼu, ia natou ʼae neʼe tou ʼoʼofa ai kaʼe kua mamate. ʼE toe fakaha ai ko Sesu ʼe mahino kia natou ʼae kua mate he tahi neʼe natou ʼoʼofa ai. Ko te tahi ako ʼe feala ke tou taʼofi mai te fakamatala ʼaia: ke tou loto manavaʼofa kia natou ʼae ʼe putu.

Neʼe iloʼi e Sesu ʼe ina fakatuʼuake ia Lasalo. Kaʼe neʼe tagi, he neʼe ʼofa mo manavaʼofa lahi ki ʼona kaumeʼa. ʼO toe feia, ko tatatou loto mahino ʼe ina uga anai tatou ke tou “fetagihi mo natou e fetagihi.” (Loma 12:15) Ka fakaha feia e he tahi tana lotomamahi, pea ʼe mole fakaʼuhiga leva ʼe mole kei tui ia ki te fakatuʼuake. Koia, ʼe ko he meʼa lelei foki te tuku mai e Sesu he faʼifaʼitaki, ʼi tana fakaha tana loto mahino kia natou ʼae neʼe putu, ʼo tagi mo ia logo la neʼe ina fakatuʼuake Lasalo ki muli age.