Ke Alu Tahi ʼAtatou Gaue Mo Te Faikole ʼa Sesu

1, 2. Kotea ʼae neʼe fai e Sesu ʼi te hili ʼo tana fai te Pasikate mo ʼana kau apositolo ʼi te taʼu 33 H.T.S.?

NEʼE hoki ʼosi age pe te fai ʼo te Pasikate e Sesu mo ʼona kaumeʼa lelei, ʼi te afiafi ʼo te ʼaho 14 ʼo Nisani ʼo te taʼu 33 H.T.S.a Ko te toʼotoʼoga ʼaia, neʼe ina fakamanatuʼi kia natou pe neʼe haofaki feafeaʼi e te ʼAtua ia te kau Iselaele mai Esipito. Kaʼe ʼe maʼuhiga age anai te haofaki ʼo te kau tisipulo agatonu ʼa Sesu. ʼI te ʼaho ake (ʼi te ʼaho 14 pe ʼo Nisani) ʼe matehi anai ia Sesu e ʼona fili. Pea ʼaki te sakilifisio ʼo tona maʼuli haohaoa, ʼe feala ai anai ke ʼateaina te hahaʼi fuli mai te agahala pea mo te mate.—Hep. 9:12-14.

² Koia, ke ʼaua naʼa tou galoʼi te meʼa ʼofa ʼaia mai te ʼAtua, neʼe fakatuʼu ai e Sesu he toʼotoʼoga foʼou moʼo fetogi ʼaki te Pasikate ʼae neʼe fai ʼi te taʼu fuli. Neʼe ina toʼo leva he pane ʼe mole hona meʼa fakatupu, mo ina tofitofi pea mo ina foaki age ki ʼana kau apositolo agatonu ʼe toko 11 takitokotahi. Neʼe ina ui fenei kia natou: “Ko te mea aeni ko toku sino ia, ae nee foaki o uhi ko koutou; koutou fai te mea aeni o fakamanatu kia te au.” Pea neʼe ina toe fai feia mo te ipu vino, ʼo ina ui fenei kia natou: “Ko te ipu aeni o te hai foou i toku [taʼataʼa], ae nee liligi o uhi ko koutou.”—Luka 22:19, 20.

3. (1) Kotea te fetogi neʼe hoko hili te mate ʼa Sesu? (2) Kotea te ʼu fehuʼi ʼe tonu ke tou fakakaukauʼi ʼi tatatou vakaʼi te faikole ʼa Sesu?

³ Neʼe kua vave fakagata te fuakava ʼo te Lao ʼae neʼe fai e te ʼAtua mo te puleʼaga ʼo Iselaele. ʼE ʼi ai anai te fuakava foʼou ka fai e Sehova pea mo te ʼu tisipulo fakanofo ʼa Sesu. Neʼe mole loto e Sesu ke hage ʼana tisipulo ko te puleʼaga ʼo Iselaele. Neʼe mole logo tahi te kau Iselaele ʼi tanatou tauhi ki te ʼAtua, pea neʼe manukiʼi ai te huafa ʼo te ʼAtua. (Soa. 7:45-49; Gaue 23:6-9) Neʼe loto e Sesu ke gaue ʼana tisipulo ʼi te logo tahi ke natou vikiʼi ai te huafa ʼo te ʼAtua. Kotea ʼae neʼe fai e Sesu? Neʼe ina kole te tokoni ʼo tana Tamai ʼi te faikole malie tokotahi ʼae neʼe heʼeki tohi. (Vakaʼi te ʼuluaki pakī.) ʼE tou maʼu te faikole ʼaia ia Soane 17:1-26. Pea ʼi tatatou vakaʼi te faikole ʼaia, tou fakakaukauʼi te ʼu fehuʼi ʼaeni: “Neʼe tali koa te ʼAtua ki te faikole ʼa Sesu? ʼE alu tahi koa ʼaku gaue mo te faikole ʼaia?”

TE FAʼAHI ʼAE NEʼE MAʼUHIGA TOKOTAHI KIA SESU

4, 5. (1) Kotea ʼae ʼe tou ako mai te faʼahi tafitō ʼae neʼe faikole ki ai ia Sesu? (2) Neʼe tali feafeaʼi ia Sehova ki te kole ʼa Sesu ʼo ʼuhiga mo ia totonu?

⁴ Neʼe akoʼi e Sesu he ʼu meʼa fakaofoofo ki ʼana tisipulo ʼi te po katoa. Pea ina hiki ake leva tona fofoga ki te lagi pea mo faikole fenei: “Tamai, kua hoko mai te hola! Fakakololiai tou Alo, o tupu ke fakakololiai koe e tou Alo. O hage ko tau foaki age kia ia te pule ki te kakano fuli, koteuhi ke ina foaki te mauli heegata kia natou fuli ae nee ke foaki age ki ai. . . . Nee au fakakololiai koe i te kele, nee au fakaosi te gaue nee ke foaki mai kia au ke au fai. Pea i te lakaga nei, Tamai, fakakololiai au i ou tafa totonu aki te kololia ae nee au mau i ou tafa ia mua o te fakatupu o te malamanei.”—Soa. 17:1-5.

⁵ Neʼe kamata e Sesu tana faikole ʼaki tana talanoa ki te ʼu faʼahi ʼae neʼe maʼuhiga tokotahi kia te ia. Neʼe ina kole tafitō ke fakakololiaʼi ia tana Tamai. Neʼe toe kamata e Sesu tana faikole ʼae ko te Tamai ʼe ʼi selo ʼaki tana kole te faʼahi ʼaia. (Luka 11:2) Lua, neʼe faikole ʼo ʼuhiga mo ʼana tisipulo ke feala hana “foaki te mauli heegata kia natou.” ʼOsi ʼaia, neʼe fai leva e Sesu tana kole ʼo ʼuhiga mo ia totonu, ʼo ina ui fenei: “Tamai, fakakololiai au i ou tafa totonu aki te kololia ae nee au mau i ou tafa ia mua o te fakatupu o te malamanei.” Neʼe logo ia Sehova ki te faikole ʼo tona ʼAlo pea neʼe laka age te ʼu meʼa ʼae neʼe ina foaki ki ai ʼi te ʼu meʼa ʼae neʼe ina kole. Pea neʼe foaki e te ʼAtua ki ai “he higoa e lelei pau age” ʼi te ʼu higoa ʼo te kau ʼaselo fuli.—Hep. 1:4.

KE TOU “ILOI” TE ʼATUA MOʼONI PE ʼE TAHI

6. Kotea ʼae neʼe ʼaoga ke fai e te kau apositolo ke natou maʼu ai te maʼuli heʼe gata? Pea ʼe feafeaʼi hatatou iloʼi neʼe fai e te kau apositolo te faʼahi ʼaia?

⁶ ʼI tana faikole, neʼe toe talanoa ia Sesu ki te faʼahi ʼe tonu ke tou fai ke tou maʼu ai te meʼa ʼofa ʼae ko te maʼuli heʼe gata. (Lau ia Soane 17:3.) Neʼe ina ui ʼe tonu ke tou haga “iloi” te ʼAtua pea mo Kilisito. ʼO feafeaʼi? ʼUluaki, ʼe tonu ke tou faiga malohi ke tou iloʼi lelei age ia Sehova pea mo tona ʼAlo. Lua, ʼe ʼaoga ke tou maʼuliʼi te ʼu manatu ʼae neʼe tou ako. Neʼe kua fai e te kau apositolo te ʼu faʼahi ʼaia ʼe lua, he neʼe ui fenei e Sesu ʼi tana faikole: “Nee au foaki age kia natou te u folafola ae nee ke foaki mai kia au; pea nee natou tali natou.” (Soa. 17:8) Kaʼe ke natou maʼu te maʼuli heʼe gata, neʼe ʼaoga ke natou haga metitasioʼi te Folafola ʼa te ʼAtua pea mo maʼuliʼi ʼi te ʼaho fuli te ʼu manatu ʼae neʼe natou ako. Neʼe fai koa e te kau apositolo te faʼahi ʼaia ʼo kaku ki te fakaʼosi ʼo tonatou maʼuli ʼi te kele? ʼEi. ʼE tou iloʼi te faʼahi ʼaia, heʼe kua tohi ʼonatou higoa takitahi ʼo talu ai ʼi te ʼu maka fakatafito ʼe 12 ʼo te Selusalemi Foʼou ʼi selo.—Apk. 21:14.

7. Kotea te fakaʼuhiga ʼo te “iloi” ʼo te ʼAtua? He ko ʼe ʼe maʼuhiga ʼaupito ke tou iloʼi te ʼAtua?

⁷ Mo kapau ʼe tou fia maʼuʼuli ʼo heʼe gata, pea ʼe tonu ke tou haga “iloi” te ʼAtua. Kotea tona fakaʼuhiga? Ko te kupu Fakakeleka ʼae ʼe fakaʼaogaʼi ʼi heni, ʼe feala ke toe fakaliliu “ ʼe tonu ke hoholo atu te iloʼi.” Koia ko te “iloi” ʼo te ʼAtua, ko tona fakaʼuhiga, ke lahi tuʼumaʼu te ʼu manatu ʼae ʼe tou haga ako ʼo ʼuhiga mo ia. Kaʼe ʼe mole fakaʼuhiga leva ʼe tonu pe ke tou iloʼi ʼona kalitate mo tana fakatuʼutuʼu. ʼE tonu ke tou ʼofa lahi kia te ia pea mo tou kaumeʼa lelei mo ia. Pea ʼe tonu ke tou ʼoʼofa ki ʼotatou tehina mo tuagaʼane. ʼE fakamahino fenei ʼi te Tohi-Tapu: “Ko ae e mole ofa, nee mole ina iloi te Atua.” (1 Soa. 4:8) Ko tatatou iloʼi te ʼAtua ʼe toe kau ki ai tatatou fakalogo kia te ia. (Lau ia 1 Soane 2:3-5.) ʼE ko he toe pilivilesio lahi tatatou kau ia natou ʼae ʼe natou iloʼi ia Sehova! Kaʼe ʼe tonu ke tou tokakaga naʼa puli tatatou fakakaumeʼa maʼuhiga ʼae mo ia ohage ko tona fai e Sutasi Isekaliote. Koia tou gaue malohi moʼo fakamalohi tatatou fakakaumeʼa ʼae mo Sehova. Kapau ʼe tou fai te faʼahi ʼaia, pea ʼe foaki mai anai e Sehova te meʼa ʼofa taulekaleka ʼae ko te maʼuli heʼe gata.—Mat. 24:13.

“I TOU HUAFA”

8, 9. Neʼe kotea te faʼahi ʼae neʼe maʼuhiga tokotahi kia Sesu ʼi tana kei ʼi te kele? Kotea te talatisio ʼae neʼe fehiʼa ki ai Sesu?

⁸ Ohage ko tatatou lau ʼi te faikole ʼa Sesu ʼi te kapite 17 ʼo Soane, ʼe ha lelei mai ai neʼe ʼofa lahi Sesu ki tana kau apositolo pea mo tatou foki. (Soa. 17:20) Lolotoga te maʼuli ʼa Sesu ʼi te kele, ko te faʼahi ʼae neʼe maʼuhiga tokotahi kia te ia neʼe mole ko totatou haofaki, kaʼe neʼe ko te fakakololiaʼi ʼo te huafa ʼo tana Tamai. Ohage la, ʼi te temi ʼae neʼe ʼuluaki fakamahino ai e Sesu pe ko ʼe neʼe haʼu ki te kele, neʼe ina lau mai te takaiga tohi ʼo Esaia te ʼu folafola ʼaeni: “E ia te au te Laumalie o [Sehova], koteuhi kua ina takai lolo au ke au fakaha te logo lelei ki te kau masiva.” ʼE feala hatatou tui papau neʼe puʼaki fakalelei e Sesu te huafa ʼo te ʼAtua ʼi te temi ʼae neʼe ina lau ai te fakatotonu ʼaia.—Luka 4:16-21.

⁹ Fualoa ʼi muʼa ʼo te haʼu ʼa Sesu ki te kele, neʼe akoʼi e te kau takitaki lotu Sutea ki te hahaʼi ke mole natou fakaʼaogaʼi te huafa ʼo te ʼAtua. ʼE mahino ia neʼe fehiʼa Sesu ki te talatisio ʼaia. Neʼe ina ui fenei ki te kau takitaki lotu ʼaia: “Nee au hau i te huafa o taku Tamai, pea e mole kotou tali au: Kapau e hau he tahi i tona higoa totonu, e kotou tali anai ia.” (Neʼe matou fakaʼiloga keheʼi; Soa. 5:43) ʼI ni kiʼi ʼaho pe ʼi muʼa ʼo tana mate, neʼe toe talanoa Sesu ki te faʼahi ʼae neʼe maʼuhiga tokotahi kia te ia ʼi tana faikole fenei: “Tamai, fakakololia tou huafa!” (Soa. 12:28) Pea ʼi tana faikole ʼae ʼe tou lolotoga vakaʼi, ʼe ha lelei mai ai ko te faʼahi ʼae neʼe maʼuhiga tokotahi ʼi te maʼuli ʼo Sesu, neʼe ko te fakakololiaʼi ʼo te huafa ʼo tana Tamai.

10, 11. (1) Neʼe fakaʼilo feafeaʼi e Sesu te huafa ʼo tana Tamai? (2) He ko ʼe ʼe fakaʼilo e te kau tisipulo ʼa Sesu te huafa ʼo Sehova?

¹⁰ Neʼe faikole fenei ia Sesu: “Nee au fakaha tou huafa ki te u tagata ae nee ke foaki mai kia au mai te lotomalie o te malamanei. Ko te u tagata natou a au, pea nee ke foaki mai natou kia au; pea nee natou taupau tau folafola. E mole au toe nofo i te malamanei, kae e natou nonofo i te malamanei, pea e au alu atu kia koe. Tamai Maonioni, taupau i tou huafa natou ae nee ke foaki mai kia au, koteuhi ke natou tahi o hage ko taua.”—Soa. 17:6, 11.

¹¹ ʼI te temi ʼae neʼe fakaha peʼe fakaʼilo ai e Sesu te huafa ʼo tana Tamai ki ʼana tisipulo, neʼe mole gata pe ki tana fakaʼaogaʼi te huafa ʼo Sehova. Kaʼe neʼe tokoni kia natou ke natou mahino pe ko ai ia Sehova. Neʼe ina akoʼi age kia natou te ʼu kalitate fakaofoofo ʼo te ʼAtua pea mo tona ʼofa ʼae kia tatou. (Eke. 34:5-7) Kua ʼafio nei Sesu ʼi selo, pea ʼe kei tokoni aipe ki ʼana tisipulo ke natou fakaʼilo te huafa ʼo Sehova ʼi te kele katoa. He ko ʼe ʼe fai te gaue ʼaia? Moʼo tokoni ki te tokolahi ke natou ako ʼo ʼuhiga mo Sehova, ʼi muʼa ʼo te fakaʼauha ʼo te tuʼu agakovi ʼaeni. Pea moka hoko mai te ʼaho ʼaia, ʼe ina haofaki anai tana kau fakamoʼoni agatonu, pea ʼe iloʼi anai e te hahaʼi fuli te huafa taulekaleka ʼo Sehova!—Esk. 36:23.

“KE TUI TE MALAMANEI”

12. Kotea te ʼu faʼahi ʼe tolu ʼae ʼe ʼaoga ke tou fai moʼo fakaʼosi te gaue ʼae neʼe kamata e Sesu?

¹² Neʼe fakatotonu e Sesu ki ʼana tisipulo ke natou fakaʼosi te gaue ʼae neʼe ina kamata. Neʼe faikole fenei: “O hage ko tau fekaui mai au ki te malamanei, nee au toe fekaui foki mo natou ki te malamanei.” Kaʼe neʼe mahino Sesu neʼe ʼaoga ki ʼana tisipulo he tokoni moʼo fakahoko te gaue ʼaia. Lolotoga tana nofo mo natou, neʼe gaue malohi ia Sesu moʼo tokoni ki ʼana tisipulo ke natou tauʼi ʼonatou vaivaiʼaga. Pea ʼi tana faikole, neʼe ina kole kia Sehova ke tokoni ki ʼana tisipulo ke natou fai ia faʼahi maʼuhiga ʼe tolu. ʼUluaki, neʼe faikole ke mole kau ʼana tisipulo ki te malama ʼa Satana. Lua, neʼe faikole ke fakalogo ʼana tisipulo ki te Folafola ʼa te ʼAtua pea ke fakamaʼoniʼoni natou. Tolu, neʼe ina kole mamahi ke logo tahi ʼana tisipulo ohage pe ko tana logo tahi mo tana Tamai. Koia, ʼe ʼaoga ke tou tahi fai te fehuʼi ʼaeni: “ ʼE au fai koa te ʼu faʼahi ʼe tolu ʼae ʼe talanoa ki ai Sesu ʼi tana faikole?” Neʼe tui papau Sesu, kapau neʼe fai e ʼana tisipulo te ʼu faʼahi ʼaia, pea ʼe tali anai e te tokolahi te logo lelei.—Lau ia Soane 17:15-21.

13. Neʼe tali feafeaʼi ia Sehova ki te faikole ʼa Sesu ʼi te temi ʼo te kau ʼuluaki Kilisitiano?

¹³ ʼE tou iloʼi neʼe tali ia Sehova ki te faikole ʼa Sesu moka tou ako te tohi ʼo Gaue. ʼI te ʼuluaki kokelekasio Fakakilisitiano, neʼe ʼi ai te kau Sutea mo te kau Senetile, natou ʼae neʼe mole ko he kau Sutea. Neʼe toe ʼi ai mo te hahaʼi maʼu koloa pea mo masisiva, mo te ʼu kaugana pea mo ʼihi neʼe ʼi ai ʼanatou kaugana. Kotou fakakaukauʼi muʼa te ʼu fihi ʼae neʼe feala ke hoko ia natou! Kaʼe neʼe mole hoko he faʼahi feia, he neʼe natou logo tahi. Koia neʼe fakatatau ai natou e te apositolo ko Paulo ki te ʼu koga kehekehe ʼo te sino ʼae ko Sesu te ʼulu. (Efe. 4:15, 16) ʼI te malama maveuveu ʼa Satana, ʼe feala ke maʼu ai te faʼahiga logo tahi ʼaia ʼuhi pe ko te malohi ʼo te laumalie maʼoniʼoni ʼo Sehova.—1 Ko. 3:5-7.

14. Neʼe tali feafeaʼi ia Sehova ki te faikole ʼa Sesu ʼi totatou temi?

¹⁴ Kaʼe meʼa fakaʼofaʼofa, he neʼe fetogi te aluʼaga ʼaia hili te mate ʼa te kau apositolo. Neʼe malaga ake te aposetasia lahi. Neʼe ulu te ʼu akonaki hala ki te kokelekasio ʼo tupu ai te maveuveu. (Gaue 20:29, 30) Kaʼe ʼi te taʼu 1919, neʼe fakaʼateaina e Sesu te kau Kilisitiano fakanofo mai tonatou haʼisia ʼi te lotu hala pea mo fakatahiʼi natou ʼi “te hai o te lelei pau.” (Kol. 3:14) Kotea te fua ʼo tanatou gaue faifakamafola ʼi te logo tahi? ʼE ko te toko fitu miliona tupu hahaʼi mai “te u faahiga fuli, mo te u hahai fuli, mo te u lea fuli” ʼe natou tauhi nei kia Sehova ʼi te logo tahi mo te kau fakanofo. (Apk. 7:9; Soa. 10:16) ʼE ko he tali fakaofoofo ʼaia, ki te faikole ʼaeni neʼe fai e Sesu kia Sehova: “Ke iloi e te malamanei nee ke fekaui mai au, pea nee ke ofa ia natou o hage ko tou ofa ia au.”—Soa. 17:23.

HE ʼU PALALAU FAKAʼOSI ʼE MALAVE LOTO

15. Kotea te kole makehe ʼae neʼe fai e Sesu maʼa tana kau tisipulo fakanofo?

¹⁵ ʼI te malu ʼo te afiafi ʼo te ʼaho 14 ʼo Nisani, neʼe fakakololiaʼi mo fakamaʼuhigaʼi e Sesu ʼana apositolo, ʼaki tana fai he fuakava mo natou ke natou pule mo ia ʼi tona Puleʼaga. (Soa. 17:22; Luka 22:28-30) Koia neʼe faikole fenei ai leva Sesu maʼa natou fuli ʼae ka natou liliu anai ko ʼana tisipulo fakanofo: “Tamai, e au loto ko te kogamea ae e au nofo ai ke toe nofo ai mo natou ae nee ke foaki mai kia au, koteuhi ke natou sisio ki toku kololia, te kololia ae nee ke foaki mai kia au, koteuhi nee ke ofa ia au i mua o te fakatafito o te malamanei.” (Soa. 17:24) Ko te tahi ʼu ovi ʼe mole natou fuaʼa ki te fakapale ʼae ka maʼu e te kau fakanofo, kaʼe ʼe natou fiafia ki ai. ʼE ko he tahi fakamoʼoni ʼaia, ʼe logo tahi moʼoni te kau Kilisitiano ia ʼaho nei.

16, 17. (1) ʼI te fakaʼosi ʼo tana faikole, kotea ʼae neʼe ui e Sesu ʼe ina haga fai anai? (2) Kotea ʼae ʼe tonu ke tou haga fai?

¹⁶ Tokolahi ʼi te malama ʼe mole natou fia mahino, ʼe ʼi ai te hahaʼi ʼa Sehova ʼe natou logo tahi pea mo natou iloʼi moʼoni ia ia. ʼE tau hoko te faʼahi ʼaia ʼuhi ko te ʼu loi ʼae neʼe akoʼi age e te kau takitaki lotu. Neʼe toe hoko pe la te faʼahi ʼaia ʼi te temi ʼo Sesu. Koia neʼe ina fakaʼosi ai tana faikole ʼaki te ʼu palalau malave loto ʼaeni: “Tamai agatonu, nee mole iloi koe e te malamanei; kae nee au iloi koe, pea kua iloi e natou aeni nee ke fekaui mai au. Pea nee au fakailoilo kia natou tou huafa, pea e au toe fakailoilo anai ia kia natou, koteuhi ke nofo ia natou te ofa ae nee ke ofa ai ia au, pea ke au nofo ia natou.”—Soa. 17:25, 26.

¹⁷ Ko Sesu neʼe ina fakaʼilo moʼoni te huafa ʼo tana Tamai. Pea ʼi te temi nei, ʼi tona ʼuhiga Pule ʼo te kokelekasio, ʼe kei tokoni mai pe ke tou fakaʼilo ki te hahaʼi ia te huafa ʼo tana Tamai pea mo ʼana fakatuʼutuʼu. Tou fakalogo ki te takitaki ʼa Sesu mo tou faʼafai ʼi te faifakamafola pea mo te fai ʼo ni tisipulo. (Mat. 28:19, 20; Gaue 10:42) Tou toe gaue malohi ke tou logo tahi ʼi totatou ʼuhiga hahaʼi ʼa te ʼAtua. Pea ʼe alu tahi leva anai ʼatatou gaue mo te faikole ʼa Sesu. ʼE tou fakakololiaʼi ai anai te huafa ʼo Sehova pea mo tou fiafia ai anai ʼo heʼe gata.