ʼE Maʼuhiga ʼAupito Kia Sesu Ia Te Huafa ʼo Sehova

1-2. (1) Kotea ʼae neʼe fai e Sesu ʼi te po ʼi muʼa ʼo tana mate? (2) Kotea te ʼu fehuʼi ka tou tali anai ʼi te alatike ʼaeni?

ʼE TOU ʼi te ʼaho 14 ʼo Nisani 33 H.T.S. ʼE ko te felianima, pea kua poʼuli. Kua vave pe te kakaʼi ʼo Sesu, mo tona fakamauʼi, mo tona fakatuʼa, mo tona gaohi koviʼi pea mo tona matehi. Neʼe hoki ʼosi age pe tana kai fakatahi mo ʼana apositolo ʼi he koga fale lahi ʼi te laufata, pea neʼe makehe ia tanatou taumafa ʼaia. Hili te taumafa ʼaia, neʼe ina fai age kia natou hana ʼu palalau fakaʼosi, ʼo ina fakalotomalohiʼi natou. Pea ʼi muʼa ʼo tanatou mavae fuli ʼi te koga fale, neʼe fai e Sesu ia he kole ʼe maʼuhiga ʼaupito. Neʼe tohi e te apositolo ko Soane te faikole ʼaia, pea ʼe tou maʼu ia Soane kapite 17.

² Kotea ʼae ʼe tou ako mai te faikole ʼa Sesu ʼo ʼuhiga mo te aluʼaga neʼe hoha ki ai ʼi te temi ʼaia? Pea kotea ʼe tou toe ako mai ai ʼo ʼuhiga mo te aluʼaga ʼae neʼe maʼuhiga kia te ia lolotoga tana minisitelio? Tou tali ki te ʼu fehuʼi ʼaia.

“NEʼE AU FAKAHA AGE TOU HUAFA”

3. Kotea ʼae neʼe talanoa tuʼa lua ki ai ia Sesu ʼi tana faikole? Pea kotea te fakaʼuhiga ʼo tana ʼu palalau ʼaia? (Soane 17:6, 26)

³ Neʼe ui fenei e Sesu ʼi tana faikole: “Neʼe au fakaha age tou huafa.” Koia, neʼe talanoa tuʼa lua ia Sesu ki te manatu ʼaia ʼi tana faikole. (Lau ia Soane 17:6, 26.) Kotea te fakaʼuhiga ʼo tana ʼu palalau ʼaia? Neʼe ina fakaha koa ki ʼana tisipulo ia te huafa ʼo tana Tamai koteʼuhi neʼe mole natou iloʼi? Kailoa. Ko tana ʼu tisipulo neʼe ko te ʼu Sutea. Pea neʼe kua natou iloʼi ia te huafa ʼo te ʼAtua ʼe ko Sehova. ʼE ha tuʼa lauʼi ʼafe ia te huafa ʼaia ʼi te Koga Tohi-Tapu Fakahepeleo. Koia, neʼe mole talanoa ia Sesu ki te huafa totonu ʼo te ʼAtua kae ki te fakaʼuhiga ʼo te huafa ʼaia. Neʼe tokoni ki ʼana tisipulo ke natou iloʼi lelei age ia Sehova, tafito la te fakatuʼutuʼu ʼa Sehova ki te kele mo te tagata, mo te ʼu gaue neʼe ina fai mo ʼae ka ina fakahoko anai, ʼo feia pe mo tona ʼu kalitate. Ko Sesu tokotahi pe ʼae ʼe ina iloʼi lelei age ia Sehova.

4-5. (1) Tuku mai he faʼifaʼitaki ʼe ha ai ʼe feala ke lahi age te ʼu aluʼaga ʼe tou iloʼi ʼo ʼuhiga mo he tahi kae mole gata pe ki tatatou iloʼi ia tona higoa. (2) Kotea ʼae neʼe fai e te ʼu tisipulo ʼa Sesu ke natou iloʼi lelei ai ia te huafa ʼo Sehova?

⁴ Fakakaukauʼi age muʼa koe ia te aluʼaga ʼaeni: ʼI tau kokelekasio, ʼe ʼi ai te tagata ʼafeā ʼe higoa ko David, pea ʼe ko te toketa faitafa. ʼE ke iloʼi ia ia talu mai fualoa. Kae ʼi te tahi ʼaho, ʼe tonu ke foimo ʼave fakavilivili koe ki te lopitali ʼo taʼofi ai. ʼE ʼave koe ki te lopitali ʼae ʼe gaue ai te tehina ʼaia. Pea ʼe ina tafa koe mo ina haofaki tou maʼuli. ʼE mahino ia, ʼi te lakaga ʼaia kua toe lahi age tou ʼofa ki te tehina ʼaia. Pea ka ke logo ki tona higoa ʼe ke manatuʼi te meʼa ʼae neʼe ina fai maʼa koe. ʼE mole ke iloʼi pe ia David ʼuhi he ko te tagata ʼafeā, kae ʼe ke toe iloʼi ia ia ʼuhi ko he toketa faitafa he neʼe ina haofaki koe.

⁵ ʼO toe feia pe, neʼe kua iloʼi e te ʼu tisipulo ʼa Sesu ia te huafa ʼo Sehova. Kae neʼe lahi leva te ʼu aluʼaga neʼe natou iloʼi ʼo ʼuhiga mo te huafa ʼaia ʼuhi ko te minisitelio ʼa Sesu. Kotea tona tupuʼaga? Koteʼuhi neʼe fakaʼata lelei e Sesu ia te agaaga ʼo tana Tamai ʼi ʼana palalau fuli mo te ʼu meʼa fuli ʼae neʼe ina fai. Neʼe tokagaʼi e tana ʼu apositolo ia tana faʼahiga faiakonaki pea mo sisio ki tana aga ʼae ki ʼihi. Koia, neʼe natou ako ai ke natou “iloʼi” lelei age ia Sehova.—Soa. 14:9; 17:3.

“TOU HUAFA ʼAE NEʼE KE FOAKI MAI”

6. Kotea te fakaʼuhiga ʼo te ui ʼae neʼe foaki e Sehova ia Tona huafa kia Sesu? (Soane 17:11, 12)

⁶ Neʼe faikole ia Sesu ʼo ʼuhiga mo ʼana tisipulo, ʼo ina kole fenei kia Sehova: “Tokaga kia natou ʼuhi ko tou huafa ʼae neʼe ke foaki mai.” (Lau ia Soane 17:11, 12.) Ko tona fakaʼuhiga koa kua fakahigoaʼi leva ia Sesu ko Sehova? Kailoa ia. ʼE ke fakatokagaʼi neʼe ui e Sesu “tou huafa.” Koia, neʼe mole liliu leva te huafa ʼo Sehova ko te higoa totonu ʼo Sesu. Kotea ʼae neʼe manatu ki ai ia Sesu ʼi tana ui ʼae neʼe foaki age ki ai ia te huafa ʼo te ʼAtua? ʼUluaki, neʼe ko ia ʼae neʼe ina Fakafofoga ia Sehova, pea neʼe ko tana Tagata ʼAve Folafola. Neʼe haʼu ki te kele pea mo ina fakahoko ni milakulo ʼi te huafa ʼo tana Tamai. (Soa. 5:43; 10:25) Lua, ko te fakaʼuhiga ʼo te huafa ʼo Sesu ʼe “Ko Sehova ʼe Ina Haofaki.” Koia, neʼe ʼi ai te pikipikiga ʼo te huafa ʼo te ʼAtua pea mo te huafa ʼo Sesu.

7. He koʼe neʼe feala ke palalau ia Sesu ʼi te huafa ʼo Sehova? Fakamahino.

⁷ Tou toʼo he faʼifaʼitaki. Ohage la, ʼe fakafofoga e te ʼuluaki minisi ia te pelesita. Koia, ʼe tau palalau ai ʼi te higoa ʼo te pelesita moka alu ki he fenua. Pea ka palalau, ʼe hage pe ko te pelesita ʼae ʼe palalau. ʼO toe feia pe, neʼe fakafofoga e Sesu ia Sehova, pea neʼe palalau ki te hahaʼi ʼi te huafa ʼo Sehova.—Mat. 21:9; Luka 13:35.

8. Kotea te fakaʼuhiga ʼae ‘neʼe fua e Sesu ia te huafa’ ʼo Sehova ʼi muʼa ʼo tana haʼu ki te kele? (Ekesote 23:20, 21)

⁸ ʼE ui ʼi te Tohi-Tapu ko Sesu ʼe ko te Folafola. Kotea tona tupuʼaga? Koteʼuhi neʼe ina fakaha he ʼu logo pea mo he ʼu fakatotonu ki te kau ʼaselo ʼo feia mo te tagata. Koia ʼae ʼe ui ai ko te Tagata ʼAve Folafola ʼa Sehova. (Soa. 1:1-3) Neʼe tuku age e Sehova ki he ʼaselo ia he gaue ke ina fai. Neʼe tonu ke tokaga lelei ki te kau Iselaele lolotoga tanatou feoloʼaki ʼi te toafa. Pea ko te ʼaselo ʼaia neʼe ko Sesu. Neʼe kole e Sehova ki tana hahaʼi ke naou fakalogo ki te ʼaselo ʼaia. Neʼe ina ui fenei: “Koteʼuhi ʼe ina fua toku huafa.”a (Lau ia Ekesote 23:20, 21.) ʼE mole he tahi ʼe hage ko Sesu koteʼuhi ʼe ina fakafofoga ia Sehova mo puipui pea mo fakatapuha ia tona huafa. Ko te fakaʼuhiga la ʼaia ʼo te ui ʼae ‘ ʼe ina fua te huafa’ ʼo tana Tamai.

“TAMAI, FAKAKOLOLIAʼI TOU HUAFA”

9. Neʼe maʼuhiga feafeaʼi te huafa ʼo Sehova kia Sesu?

⁹ Neʼe kua tou ʼosi fakamahino pe, ʼi muʼa ʼo te haʼu ʼa Sesu ki te kele, neʼe maʼuhiga ʼaupito kia te ia ia te huafa ʼo Sehova. Koia, ʼe mole ʼaoga hatatou punamaʼuli ki ai he neʼe ha te fahaʼi ʼaia ʼi te ʼu meʼa fuli ʼae neʼe ina fai ʼi tana ʼi te kele. ʼI te vave ʼosi ʼo te minisitelio ʼa Sesu, neʼe faikole fenei: “Tamai, fakakololiaʼi tou huafa.” Neʼe foimo tali atu aipe ia Sehova kia ia. Neʼe ʼi ai he leʼo malohi mai te lagi ohage ko te ʼuʼulu ʼo te mana, neʼe ina ui fenei: “Neʼe au fakakololiaʼi pea ʼe au toe fakakololiaʼi anai.”—Soa. 12:28.

10-11. (1) Neʼe fakakololiaʼi feafeaʼi e Sesu ia te huafa ʼo Sehova? (Vakaʼi mo te pāki.) (2) He koʼe ʼe tonu ke fakatapuha mo puipui ia te huafa ʼo Sehova?

¹⁰ Neʼe toe fakakololiaʼi e Sesu ia te huafa ʼo tana Tamai. ʼO feafeaʼi? ʼAki tana fakaha ki ʼihi ʼona kalitate pea mo ʼana gaue taulekaleka. Kae neʼe ʼi ai te tahi fahaʼi maʼuhiga neʼe tonu ke ina fai. Neʼe tonu foki ke fakalakatonuʼi ia Sehova. Ko tona fakaʼuhiga ke fakamaʼa ia tona huafa mai te ʼu tukugakovi hala fuli pe, pea ke ina fakatapuha tona huafa.b Neʼe fakaha e Sesu ia te maʼuhiga ʼo te fai ʼo te faʼahi ʼaia, ʼi tana akoʼi ki ʼana tisipulo ia te faikole te Tamai ʼae ʼe ʼi selo. Neʼe ina fakalotomalohiʼi natou ke natou faikole fenei: “Ko tamatou Tamai ʼae ʼe ʼi selo, ke tapuha tou huafa.”—Mat. 6:9.

¹¹ He koʼe ʼe tonu ke fakatapuha mo puipui ia te huafa ʼo Sehova? Koteʼuhi neʼe fakalainoaʼi mo fasituʼu ia Satana ʼo ʼuhiga mo Sehova ʼAtua ʼi te ʼoloto ʼo Eteni. Neʼe ina ui ko Sehova ko he tahi ʼe gutuloi, pea neʼe ina tapuʼi kia Atama mo Eva ia he meʼa ʼe lelei. (Sen. 3:1-5) Neʼe ina toe ui neʼe mole lelei te ʼu meʼa ʼae neʼe fai e Sehova. Neʼe fai e Satana he ʼu tukugakovi hala ʼo ʼuluhi ai te huafa ʼo Sehova. Ki muli age, ʼi te temi ʼo Sopo neʼe ui e ia ʼaia neʼe fasituʼu ko natou ʼae ʼe tauhi kia Sehova, ʼe fai pe natou ke natou maʼu ai hanatou ʼu meʼa. Pea neʼe ina toe ui ka natou tau mo he ʼu ʼahiʼahi ʼe mole malohi anai tonatou ʼofa kia Sehova, pea mo hoko atu anai tanatou tauhi kia te ia. (Sopo 1:9-11; 2:4) Ko ai ʼae neʼe gutuloi ko Sehova peʼe ko Satana? Neʼe hoki tou iloʼi ʼaki te temi.

“ ʼE AU FOAKI TOKU MAʼULI”

12. Kotea ʼae neʼe fia fai e Sesu ʼuhi ko tona ʼofa kia Sehova?

¹² Neʼe ʼofa mamahi ia Sesu ia Sehova, koia neʼe ina fai ia meʼa fuli moʼo fakatapuha pea mo puipui tona huafa. Neʼe ina ui fenei: “ ʼE au foaki toku maʼuli.” (Soa. 10:17, 18) Pea neʼe lotolelei ke mate ʼuhi ko te huafa ʼo Sehova.c Neʼe lituʼa ia Atama mo Eva ʼae neʼe haohaoa ki tanā Tamai, kae nā kau mo Satana. Kae neʼe lotolelei ia Sesu ia ke haʼu ki te kele ʼo fakamoʼoni ʼe ʼofa ʼi tana Tamai. Pea neʼe ina fai te faʼahi ʼaia ʼaki tana nofo agatonu. (Hep. 4:15; 5:7-10) ʼEi, neʼe nofo agatonu ʼi tona maʼuli katoa ʼo kaku ki tona mate. Neʼe ina tali ke fakamamahiʼi pea mo matehi. (Hep. 12:2) Koia, neʼe ina fakamoʼoni ai tona ʼofa kia Sehova pea mo Tona huafa.

13. He koʼe neʼe ko Sesu tokotahi pe ʼae neʼe feala ke ina fakamoʼoni ko Satana ʼe gutuloi? (Vakaʼi mo te pāki.)

¹³ Neʼe fakamoʼoni e Sesu ʼi tona maʼuli ko Satana ʼe gutuloi kae mole ko Sehova. (Soa. 8:44) Neʼe mole he tahi neʼe ina iloʼi lelei age ia Sehova, neʼe ko Sesu tokotahi pe. Ka na neʼe ʼi ai la he faʼahi pe ʼe moʼoni ʼi te ʼu tukugakovi ʼa Satana ʼo ʼuhiga mo Sehova, ʼe mahino ia ʼe ina iloʼi pe. Kae neʼe ina puipui tuʼumaʼu ia te huafa ʼo tana Tamai ʼofa. Logo la ʼi ʼihi temi neʼe hage kia Sesu neʼe liʼaki ia ia e Sehova, kae neʼe ina taliʼia ke mate agatonu ʼi hana lituʼa kia te ia.—Mat. 27:46.d

“NEʼE AU FAKAʼOSI IA TE GAUE ʼAE NEʼE KE FOAKI MAI KE AU FAI”

14. Neʼe fakapale feafeaʼi e Sehova ia Sesu ʼuhi ko tana nofo agatonu?

¹⁴ ʼI te faikole ʼa Sesu ʼi te po ʼi muʼa ʼo tana mate, neʼe feala ke ina ui fenei: “Neʼe au fakaʼosi ia te gaue ʼae neʼe ke foaki mai ke au fai.” Neʼe tui papau ʼe fakapale anai e Sehova ʼuhi ko tana nofo agatonu. (Soa. 17:4, 5) Pea neʼe tonu pe ia tana falala ʼae ki tana Tamai. Neʼe mole loto e Sehova ke haga nofo pe ʼi te faitoka. (Gaue 2:23, 24) Neʼe ina fakatuʼuake ia Sesu pea mo foaki age ia he tuʼulaga maʼoluga ʼi selo. (Flp. 2:8, 9) Ki muli age, neʼe Hau leva ia Sesu ʼi te Puleʼaga ʼo te ʼAtua. Kotea anai ka fai e te Puleʼaga ʼaia? ʼE tou maʼu tona tali ʼi te lua koga ʼo te faikole te Tamai ʼae ʼe ʼi selo,ʼae ʼe ui fenei ai: “Ke hoko mai tou Puleʼaga. Ke fai tou finegalo ʼi te kele ohage ko selo.”—Mat. 6:10.

15. Kotea ka fai anai e Sesu?

¹⁵ Kua vave tauʼi pe e Sesu ia te ʼu fili ʼo te ʼAtua, pea mo pulihi ia te kau agakovi ʼi Alamaketone. (Fkha. 16:14, 16; 19:11-16) Hili ia, ʼe ina li anai ia Satana ki “te vanu,” ʼae ʼe pilisoni ai anai pea ʼe mole feala ke ina fai he meʼa. (Fkha. 20:1-3) Lolotoga tana ʼAfio Ia Taʼu ʼe ʼAfe, ʼe ina toe fakatuʼu anai te tokalelei ʼi te kele pea mo fakaliliu anai te tagata ʼo haohaoa. ʼE ina fakatuʼuake anai mo te kau mate. Pea ʼe ina fakaliliu anai te kele katoa ko he palatiso. ʼEi, ʼe hoko moʼoni anai ia te finegalo ʼo Sehova.—Fkha. 21:1-4.

16. ʼE feafeaʼi anai te maʼuli ʼi te fakaʼosi ʼo te ʼAfio ʼa Sesu?

¹⁶ ʼE feafeaʼi anai te maʼuli ʼi te fakaʼosi ʼo te ʼAfio ʼa Sesu? ʼE mole kei agahala anai he tahi. ʼE mole kei ʼaoga anai ki te tagata ke ina kole ke fakamolemole tana ʼu agahala ʼo fakatafito ki te totogi. ʼE mole kei ʼaoga anai kia natou he tagata fakafofoga peʼe ko he pelepitelo. Pea “ko te fili fakamuli, ia te mate [ʼae neʼe tupu mai ia Atama], ʼe pulihi anai ia.” ʼE mole toe ʼi ai anai he tahi ʼi te ʼu fale maka. ʼE fakatuʼuake anai te kau mate. ʼE haohaoa anai te tagata fuli pe.—1 Ko. 15:25, 26.

17-18. (1) Kotea ʼe hoko anai ʼi te ʼosi ʼAfio ʼa Sesu Ia Taʼu ʼe ʼAfe? (b)Kotea anai ka fai e Sesu moka ʼosi ia tona temi ʼafio? (1 Kolonito 15:24, 28) (Vakaʼi mo te pāki.)

¹⁷ Kotea anai he tahi aluʼaga makehe ka hoko ʼi te fakaʼosi ʼo te ʼAfio ʼa Sesu Ia Taʼu ʼe ʼAfe? ʼE mole toe palalau anai ki te fihi ʼae neʼe hoko ʼo ʼuhiga mo te fakatapuha ʼo te huafa ʼo Sehova. Kotea tona tupuʼaga? Neʼe ui e Satana ʼi te ʼoloto ʼo Eteni ko Sehova ʼe gutuloi, pea neʼe mole ina puleʼi te kele ʼaki te ʼofa. Talu mai ai neʼe fakatapuha tuʼumaʼu tona huafa e natou ʼae neʼe natou fakamaʼuhigaʼi mo fakaʼapaʼapa lahi ki ai. Koia, ʼi te ʼosi ʼo te ʼAfio ʼa Sesu Ia Taʼu ʼe ʼAfe, ʼe fakamaʼa katoa anai ia te huafa ʼo Sehova. ʼE mahino ia, ʼe fakamoʼoni ai anai e Sehova ʼe ko ia ko he Tamai ʼofa.

¹⁸ Koia, ʼe tou iloʼi ai anai ko te ʼu tukugakovi ʼa Satana neʼe mole moʼoni. Kotea anai ka fai e Sesu moka ʼosi ia tona temi ʼafio? ʼE fakafeagai anai koa kia Sehova ohage ko Satana? Kailoa ia. (Lau ia 1 Kolonito 15:24, 28.) ʼE ina fakatoʼo anai te Puleʼaga ki tana Tamai pea mo fakalogo ki tana pule. ʼEi, ʼe mole hage ia Sesu ko Satana, ʼe lotolelei ia ke fakafisi kia meʼa fuli, maʼia mo tana pule ʼuhi ko tona ʼofa kia Sehova.

19. Neʼe maʼuhiga feafeaʼi te huafa ʼo Sehova kia Sesu?

¹⁹ Koia, ʼe mole tou punamaʼuli ʼi te fia foaki e Sehova ia Tona huafa ki tona ʼAlo. Neʼe faʼifaʼitakiʼi lelei e Sesu ia tana Tamai. Neʼe mole he meʼa neʼe maʼuhiga age kia te ia ʼi te huafa ʼo Sehova. Neʼe lotolelei ke mate ʼuhi ko tona huafa. ʼI te fakaʼosi ʼo te ʼAfio ʼa Sesu Ia Taʼu ʼe ʼAfe, ʼe lotolelei anai ke ina toe liufaki ia meʼa fuli kia Sehova. ʼE feafeaʼi hatatou faʼifaʼitakiʼi anai ia ia? ʼE tou tali anai ki te fehuʼi ʼaia ʼi te alatike ka hoa mai.