ALATIKE AKO 23
KATIKO 2 Ko Tou Huafa Ko Sehova
ʼE Tonu Ke Maʼuhiga Kia Tatou Te Huafa ʼo Sehova
“ ʼE ui e Sehova: ‘Ko koutou ko ʼaku fakamoʼoni.’”—ESA. 43:10.
TE MANATU TAFITO
ʼE tou vakaʼi anai pe kotea ʼe tonu ke tou fai ke tou fakatapuha pea mo puipui ia te huafaʼo Sehova.
1-2. ʼE tou iloʼi feafeaʼi neʼe maʼuhiga ʼaupito kia Sesu ia te huafa ʼo Sehova?
NEʼE maʼuhiga ʼaupito kia Sesu ia te huafa ʼo Sehova. Neʼe ko ia tokotahi pe ʼae neʼe lahi age ia tana fakaha ia te huafa ʼo Sehova. Neʼe tou vakaʼi ʼi te alatike ʼae kua ʼosi, neʼe lotolelei ia Sesu ʼo mate mo fakamoʼoni ko Sehova ʼe maʼoniʼoni, pea ko ʼona ala fuli ʼe faitotonu. (Mko. 14:36; Hep. 10:7-9) Pea ʼi te ʼosi ʼo tana ʼAfio Ia Taʼu ʼe ʼAfe, ʼe ina toe liufaki anai ia tana pule katoa ki tana Tamai koteʼuhi ʼe ina loto ke maʼu katoa e Sehova ia te kololia. (1 Ko. 15:26-28) ʼE toe ha te ʼofa ʼo Sesu ki te huafa ʼo te ʼAtua ʼi tana ʼu felogoi lelei mo tana Tamai. Neʼe ina fakamoʼoni ʼi te ʼu meʼa fuli ʼae neʼe ina fai ia tona ʼofa mamahi ʼae kia Sehova.
2 Neʼe haʼu ia Sesu ki te kele ʼi te huafa ʼo tana Tamai. (Soa. 5:43; 12:13) Neʼe ina fakaha te huafa ʼo Sehova ki ʼana tisipulo. (Soa. 17:6, 26) Neʼe faiakonaki pea mo ina fakahoko he ʼu milakulo ʼi te huafa ʼo tana Tamai. (Soa. 10:25) Pea neʼe ina kole kia Sehova ke tokaga ki ʼana tisipulo ‘ ʼuhi ko Tona huafa.’ (Soa. 17:11) ʼE mahino ia, neʼe maʼuhiga ʼaupito kia Sesu ia te huafa ʼo Sehova. Koia, kapau ʼe mole iloʼi e he tahi ia te huafa ʼaia pea ʼe mole ina fakaʼaogaʼi, ʼe feala koa ke ina ui ko he tisipulo moʼoni ʼa Kilisito?
3. Kotea ka tou vakaʼi ʼi te alatike ʼaeni?
3 Ka tou faiga fakamalotoloto ke tou mulimuli fakalelei ia Sesu, ʼe tou fakaha ai ʼe maʼuhiga ʼaupito kia tatou ia te huafa ʼo tana Tamai. (1 Pet. 2:21) ʼI te alatike ʼaeni, ʼe tou vakaʼi anai pe koʼe neʼe foaki e Sehova tona huafa kia natou ʼae ʼe natou tala ‘te logo lelei ʼo te Puleʼaga.’ (Mat. 24:14) ʼE tou toe vakaʼi anai pe koʼe ʼe tonu ke maʼuhiga te huafa ʼo Sehova kia tatou takitokotahi.
“HE HAHAʼI KE NATOU FUA TONA HUAFA”
4. (1) Kotea te gaue ʼae neʼe foaki e Sesu ki ʼana tisipulo ʼi muʼa pe ʼo tana toe liliu ki selo? (2) Kotea te fehuʼi ʼe lagaʼi moka ui ʼe kotou liliu anai ko ʼaku fakamoʼoni?
4 Neʼe ui fenei e Sesu ki ʼana tisipulo, ʼi muʼa pe ʼo tana toe liliu ki selo: “ ʼE kotou maʼu anai te malohi moka hifo mai ia te laumalie maʼoniʼoni kia koutou, pea ʼe kotou liliu anai ko ʼaku fakamoʼoni ʼi Selusalemi, mo Sutea katoa pea mo Samalia, ʼo kaku ki te ʼu potu taupotu ʼo te kele.” (Gaue 1:8) Koia, ʼe fakamafola anai te logo lelei ʼo mole gata pe ʼi Iselaele. ʼAki te temi, ʼe feala anai ke liliu te hahaʼi ʼo te ʼu puleʼaga fuli ko he ʼu tisipulo ʼa Kilisito. (Mat. 28:19, 20) ʼE ke toe fakatokagaʼi neʼe ui fenei e Sesu: “ ʼE kotou liliu anai ko ʼaku fakamoʼoni.” ʼE liliu anai koa te ʼu tisipulo foʼou ʼaia ko he ʼu fakamoʼoni pe ʼa Sesu peʼe tonu anai koa ke natou toe iloʼi ia te huafa ʼo Sehova? Tou tali ki te fehuʼi ʼaia ʼo tou vakaʼi ia te ʼu aluʼaga ʼae ʼe talanoa ki ai ia Gaue kapite 15.
5. Neʼe fakaha feafeaʼi e te kau apositolo mo te kau tagata ʼafeā ʼo Selusalemi ʼe tonu ke iloʼi e te hahaʼi fuli te huafa ʼo Sehova? (Vakaʼi mo te pāki.)
5 ʼI te taʼu 49 H.T.S., neʼe fakatahitahi te kau apositolo pea mo te kau tagata ʼafeā ʼo Selusalemi. Kotea tona tupuʼaga? Koteʼuhi ke natou iloiʼi ai pe ʼe tonu ke silikosisioʼi ia natou ʼae ʼe mole Sutea ke natou liliu ai ko he ʼu tisipulo ʼa Sesu. Neʼe fakaʼosi fenei e Sakopo, te tehina ʼo Sesu, ia te faipalalau: ‘Kua fakamatala fakalelei mai e Petelo te hoki tokaga ʼae ʼa te ʼAtua ki te hahaʼi ʼae ʼe mole Sutea, ke ina filifili mai ia natou he hahaʼi ke natou fua tona huafa.’ Ko te huafa ʼo ai ʼae neʼe palalau ki ai ia Sakopo? Neʼe ina fakaʼaogaʼi te ʼu palalau ʼa te polofeta ko Amosi, ʼo ina toe ui fenei: “Ke feala ki te ʼu tagata ʼae ʼe kei toe, ke natou kumi fakamalotoloto ia Sehova fakatahi mo te hahaʼi fuli ʼe mole Sutea, ʼae ʼe natou fua toku huafa, ko te ui ʼaia ʼa Sehova.” (Gaue 15:14-18) ʼE akoʼi anai e te ʼu tisipulo foʼou ke natou iloʼi ia Sehova kae ʼe natou toe ‘fua anai ia tona huafa.’ Ko tona fakaʼuhiga ʼe natou fua anai ia te huafa ʼo te ʼAtua, pea ʼe iloʼi ai anai ia natou ʼuhi ko te huafa ʼaia.
ʼI te ʼuluaki sekulo, neʼe fono ia te kolesi pule pea neʼe natou mahino ai, ʼe tonu ke liliu ia te kau Kilisitiano ko te hahaʼi maʼa te huafa ʼo Sehova (Vakaʼi te palakalafe 5)
6-7. (1) He koʼe neʼe hifo mai ia Sesu ki te kele? (2) Kotea te tahi tupuʼaga ʼo tana hifo mai ki te kele ʼe maʼuhiga ʼaupito age?
6 Ko te fakaʼuhiga ʼo te higoa ʼo Sesu ʼe “Ko Sehova ʼe Ina Haofaki.” Koia, ʼaki ia ia ʼe haofaki e Sehova ia natou ʼae ʼe tui kia te ia. Neʼe hifo mai ia Sesu ki te kele ʼo foaki tona maʼuli maʼa te tagata. (Mat. 20:28) Neʼe ina foaki te totogi, koia neʼe feala ai hana haofaki te tagata mo foaki te fealagia ʼae ke natou maʼuʼuli ʼo heʼe gata.—Soa. 3:16.
7 Kae he koʼe neʼe tonu ke haofaki ia te tagata? ʼUhi ko te aluʼaga ʼae neʼe hoko ʼi te ʼoloto ʼo Eteni. Neʼe tou vakaʼi ʼi te alatike ʼae kua ʼosi, neʼe agatuʼu ʼatatou ʼuluaki matuʼā ia Atama mo Eva, kia Sehova, ʼo mole kei nā maʼu ai ia te maʼuli heʼe gata. (Sen. 3:6, 24) Kae neʼe haʼu ia Sesu ki te kele ʼo fai ia he tahi aluʼaga neʼe maʼuhiga age ia ʼi te haofaki ʼo te tagata. Neʼe faifasituʼu ia Satana ki te huafa ʼo Sehova. (Sen. 3:4, 5) Koia, neʼe ʼi ai te pikipikiga ʼo te haofaki ʼo te hologa ʼo Atama mo Eva pea mo te fakatapuha ʼo te huafa ʼo Sehova. Neʼe fakafofoga e Sesu ia Sehova pea mo fua ia tona huafa. Koia neʼe ina fakahoko ia he gaue maʼuhiga ʼi te fakatapuha ʼaia ʼo te huafa ʼo Sehova.
Kapau ʼe mole iloʼi e he tahi te huafa ʼaia peʼe mole ina fakaʼaogaʼi, ʼe feala koa ke ina ui ko he tisipulo moʼoni ʼa Kilisito?
8. Kotea ʼae neʼe tonu ke mahino ki ai ia natou fuli ʼae neʼe tui kia Sesu?
8 Neʼe tui te kau Sutea mo natou ʼae ʼe mole Sutea kia Sesu. Koia, neʼe tonu ke natou mahino ko Sehova ia tanatou Tamai ʼae neʼe ina haofaki natou. (Soa. 17:3) ʼE iloʼi anai ia natou ʼuhi ko te huafa ʼo Sehova, ohage pe ko Sesu. Neʼe tonu ke natou mahino ki te maʼuhiga ʼae ke natou fakatapuha ia te huafa ʼaia. Neʼe fakalogo ki ai ia tonatou haofaki. (Gaue 2:21, 22) Koia, neʼe tonu ki te ʼu tisipulo agatonu fuli ʼa Sesu ke natou ako ke natou iloʼi ia ia ʼo feia pe mo Sehova. Koia ʼae neʼe fakaʼosi fenei ai e Sesu ia tana faikole, ʼae ʼe tuʼu ia Soane kapite 17: “Neʼe au fakaha age tou huafa pea ʼe au haga fakaha anai, ke feala ke nofo ia natou te ʼofa ʼae neʼe ke fakaha mai pea ke au fakatahi mo natou.”—Soa. 17:26.
“KO KOUTOU KO ʼAKU FAKAMOʼONI”
9. ʼE tou fakaha feafeaʼi anai ʼe maʼuhiga kia tatou ia te huafa ʼo Sehova?
9 Koia, ʼe tonu ki te ʼu tisipulo moʼoni ʼa Sesu ke natou toʼo fakamalotoloto ia te fakatapuha ʼo te huafa ʼo Sehova. (Mat. 6:9, 10) ʼE tonu ke natou fakaʼuhiga ia te huafa ʼaia ʼe maʼoluga ʼi ʼihi atu higoa pea mo fakaha ʼaki ʼanatou aga ʼe maʼuhiga kia natou. Kae ʼe feafeaʼi hatatou lagolago ki te fakatapuha ʼo te huafa ʼo te ʼAtua, ʼae ke tou fakamaʼa mai te ʼu fasituʼu ʼe fakamafola e Satana ʼo ʼuhiga mo ia?
10. Kotea te faifakamau fakata ʼae ʼe talanoa ki ai te ʼu kapite 42-44 ʼo te tohi ʼo Esaia? (Esaia 43:9; 44:7-9) (Vakaʼi mo te pāki.)
10 ʼE maʼuhiga ia te meʼa ʼae ʼe tonu ke tou fai moʼo fakatapuha ia te huafa ʼo Sehova. Pea ʼe ha ia te fahaʼi ʼaia ʼi te ʼu kapite 42-44 ʼo te tohi ʼo Esaia. ʼE fakaha ʼi te ʼu kapite ʼaia he fihi pe ko ai ia te ʼAtua moʼoni, ohage pe ko he aluʼaga ʼe fai ʼi he faifakamau. ʼE kole e Sehova kia natou fuli ʼae ʼe natou ui ko he ʼu ʼatua ke natou fakamoʼoni pe ʼe ko natou ko he ʼu ʼatua moʼoni. ʼE ina toe fakaafe ʼihi ke omai ʼo fakamoʼoni kia natou. Kae neʼe mole he tahi neʼe feala ke ina fakahoko ia te fahaʼi ʼaia.—Lau ia Esaia 43:9; 44:7-9.
Ohage pe ko he faifakamau, ʼe lahi te ʼu aluʼaga ʼe tou fakamoʼoni ai ko tatou ko he ʼu Fakamoʼoni ʼa Sehova (Vakaʼi te palakalafe 10-11)
11. Ka tou lau ia Esaia 43:10-12, kotea ʼae ʼe ui e Sehova ki ʼana kaugana?
11 Lau ia Esaia 43:10-12. Lolotoga te faifakamau fakata ʼaia, neʼe ui fenei e Sehova ki ʼana kaugana: “Ko koutou ko ʼaku fakamoʼoni pea ko au ko te ʼAtua.” Pea neʼe ina kole age ke natou tali ki te fehuʼi ʼaeni: “ ʼE ʼi ai koa he tahi age ʼAtua ia te au?” (Esa. 44:8) Koia, ʼe maʼu tatou te pilivilesio ʼae ke tou lava tali ki ai. ʼE feala ke tou fakamoʼoni ko Sehova ʼe ko te ʼAtua moʼoni pe ʼaia ʼe tahi ʼaki ʼatatou palalau mo ʼatatou aga. ʼE maʼoluga tokotahi pe ia te huafa ʼo Sehova. ʼE lahi te ʼu fakaneke ʼe fai mai e Satana kia tatou. Kotea pe te ʼu fakaneke ʼaia, kae ʼe feala ke tou fakaha ʼi totatou faʼahiga maʼuli ʼe tou ʼoʼofa moʼoni ia Sehova pea mo fia nofo agatonu kia te ia. ʼEi, ʼe tou maʼu te pilivilesio ʼae ke tou lagolago ki te fakatapuha ʼo te huafa ʼo Sehova.
12. Neʼe hoko moʼoni feafeaʼi ia te lea fakapolofeta ʼae ia Esaia 40:3, 5?
12 Ka tou puipui ia te huafa ʼo Sehova, ʼe tou faʼifaʼitakiʼi ia Sesu. Neʼe toe fakakikite e Esaia ‘ ʼe teuteuʼi anai e he tahi ia te ala ʼo Sehova.’ (Esa. 40:3) Neʼe hoko feafeaʼi te fahaʼi ʼaia? Neʼe teuteuʼi e Soane Patita ia te ala ʼae kia Sesu, ʼae neʼe haʼu ki te kele pea mo fakaha ia te huafa ʼo Sehova. (Mat. 3:3; Mko. 1:2-4; Luka 3:3-6) ʼE toe ui fenei pe ʼi te lea fakapolofeta ʼaia: “ ʼE ha anai te kololia ʼo Sehova.” (Esa. 40:5) ʼO feafeaʼi? ʼI te nofo ʼa Sesu ʼi te kele, neʼe ina faʼifaʼitakiʼi lelei ia Sehova ohage pe neʼe nofo ia Sehova ʼi te kele.—Soa. 12:45.
13. ʼE feafeaʼi hatatou faʼifaʼitakiʼi ia Sesu?
13 ʼE tou hage ko Sesu he ʼe ko tatou ko te ʼu fakamoʼoni ʼa Sehova. ʼE tou fua ia te huafa ʼo Sehova pea mo fakaha ki te hahaʼi fuli ia te ʼu gaue taulekaleka ʼae neʼe fai e Sehova. Kae kapau ʼe tou loto ke ui ko tatou ko he fakamoʼoni ʼa Sehova, ʼe tonu foki ke tou toe fakaha te gaue maʼuhiga neʼe fai e Sesu ʼi tana fakatapuha ʼo te huafa ʼo te ʼAtua. (Gaue 1:8) Ko Sesu ʼe ko te fakamoʼoni ʼa Sehova ʼae ʼe lelei tukupau. Pea ʼe tou muliʼi lelei ia tana faʼifaʼitaki. (Fkha. 1:5) Kae ʼe tonu ke maʼuhiga feafeaʼi kia tatou takitokotahi ia te huafa ʼo Sehova?
ʼE MAʼUHIGA TE HUAFA ʼO SEHOVA KIA TATOU
14. Ka tou lau ia Pesalemo 105:3, kotea ʼe tou logoʼi ʼo ʼuhiga mo te huafa ʼo Sehova?
14 ʼE tou fiameʼameʼa ʼuhi ko te huafa ʼo Sehova. (Lau ia Pesalemo 105:3.) Ka tou laupisiʼi ia tatou ʼuhi ko tona huafa, pea ko he aluʼaga ʼe fiafia ʼaupito ai ia Sehova. (Sel. 9:23, 24; 1 Ko. 1:31; 2 Ko. 10:17) Kapau ʼe tou fai te faʼahi ʼaia ʼuhi he ʼe tou fiameʼameʼa ʼi tatatou tauhi ʼae kia te ia. ʼE tou fiafia ʼaupito ʼi te fakamaʼuhigaʼi pea ʼo te puipui ʼo tona huafa. ʼAua naʼa tou ufiufi te fakaha ki ʼotatou ʼu kauga gaue mo kauga ako, mo ʼotatou vahaʼa fale pea mo ʼihi ko tatou ko te ʼu kau Fakamoʼoni ʼa Sehova. ʼE loto e te Tevolo ke tou tuku tatatou palalau ki te huafa ʼo Sehova ki te hahaʼi. (Sel. 11:21; Fkha. 12:17) ʼEi, ʼe ina loto mo ʼana ʼu polofeta loi ke galoʼi ia te hahaʼi ia tona huafa. (Sel. 23:26, 27) Kae ʼe tou ʼofa ʼi tona huafa ʼaia. Koia ʼae ʼe tou fakafiafia ai “ ʼi te ʼaho katoa.”—Pes. 5:11; 89:16.
15. Kotea te fakaʼuhiga ʼae ke tou pauʼi ʼi te huafa ʼo Sehova?
15 ʼE tou pauʼi tuʼumaʼu ʼi te huafa ʼo Sehova. (Soe. 2:32; Loma 10:13, 14) Ka tou pauʼi ʼi te huafa ʼo Sehova ʼe mole gata pe, ki tatatou iloʼi mo fakaʼaogaʼi te huafa ʼaia. Kae ʼe fakaʼuhiga ki tatatou ako ke tou iloʼi ia te ʼuhiga totonu ʼo te ʼAtua, mo tou falala kia te ia pea mo kumi tana takitaki mo ʼana tokoni. (Pes. 20:7; 99:6; 116:4; 145:18) ʼE toe fakaʼuhiga ke tou palalau ʼi tona huafa, pea mo fakaha ki ʼihi ʼona kalitate. Kapau ʼe tou fai feia, ʼe tou fakamalohiʼi ai natou ke natou fakahemala mo fai he ʼu faiga ke natou maʼu ia te ʼofa ʼo Sehova.—Esa. 12:4; Gaue 2:21, 38.
16. ʼE feafeaʼi hatatou fakamoʼoni ko Satana ʼe gutu loi?
16 ʼE tou lotolelei ke tou mamahi maʼa te huafa ʼo Sehova. (Sakp. 5:10, 11) Ka tou agatonu kia Sehova ʼi te ʼu temi ʼahiʼahi, ʼe tou fakamoʼoni ai ko Satana ʼe gutu loi. ʼI te temi ʼo Sopo, neʼe tukugakoviʼi fenei e Satana te ʼu kaugana ʼa Sehova: “ ʼE foaki anai e te tagata ia meʼa fuli ʼe ina maʼu moʼo fetogi ʼaki tona maʼuli.” (Sopo 2:4) Neʼe ui e te Tevolo, ʼe tauhi pe te ʼu kaugana ʼa Sehova kia te ia moka ʼe natou maʼuli fimalie. Pea ka natou tau mo ni ʼahiʼahi, ʼe natou liʼaki anai ia ia. ʼI te nofo agatonu ʼa Sopo, neʼe ina fakamoʼoni ai neʼe hala te tukugakovi ʼaia. ʼE feala mo tatou ke tou toe fakamoʼoni ko te manatu ʼaia ʼe hala. ʼO feafeaʼi? ʼE mole tou lituʼa kia Sehova, tatau aipe he ʼu ʼahiʼahi ʼe fakatupu e Satana kia tatou. Koia, ʼe tou tui papau ʼe tokaga tuʼumaʼu anai Sehova kia tatou, ʼuhi ko tona huafa.—Soa. 17:11.
17. Ka tou lau ia 1 Petelo 2:12, kotea te tahi aluʼaga ʼe feala ke tou fakakololiaʼi ai te huafa ʼo Sehova?
17 ʼE tou fakaʼapaʼapa ki te huafa ʼo Sehova. (Taag. 30:9; Sel. 7:8-11) ʼE tou fakafofoga ia Sehova pea mo fua tona huafa, koia ʼe feala ai ke tou vikiʼi te huafa ʼaia, peʼe ke tou fakalainoaʼi. (Lau ia 1 Petelo 2:12.) Koia, ʼe tou fai anai ia meʼa fuli ke tou vikiʼi ai ia Sehova ʼaki ʼatatou palalau mo tatatou aga. Ka tou fai feia, ʼe tou fakakololiaʼi ai tona huafa, logo la totatou ʼuhiga agahala.
18. Kotea te tahi aluʼaga ke tou fakamoʼoni ai ʼe maʼuhiga kia tatou te huafa ʼo Sehova? (Vakaʼi mo te nota.)
18 ʼE maʼuhiga ʼaupito age kia tatou te huafa ʼo Sehova ʼi totatou matagafua. (Pes. 138:2) He koʼe ʼe maʼuhiga te faʼahi ʼaia? Koteʼuhi ʼe feala ki ʼihi hahaʼi ke natou valokiʼi tatou, ʼuhi ko totatou ʼofa ki te huafa ʼo Sehova.a Neʼe lotolelei ia Sesu ke mate ohage ko he tagata faifakapo ke fakakololiaʼi ai te huafa ʼo tana Tamai. Neʼe ina ‘meʼa noaʼi tona ufiufi.’ Ko tona fakaʼuhiga, neʼe mole ina toe tokagaʼi he ʼu manatu peʼe ko he ʼu palalau neʼe fai e ʼihi ʼo ʼuhiga mo ia. (Hep. 12:2-4) Neʼe kua ina fakatotonu ke ina fai te finegalo ʼo tona ʼAtua.—Mat. 26:39.
19. Kotea ʼe ke logoʼi ʼo ʼuhiga mo te huafa ʼo Sehova? Pea kotea tona tupuʼaga?
19 ʼE tou fiameʼameʼa ʼi te huafa ʼo Sehova. ʼE tou maʼu te pilivilesio ʼae ke fakahigoaʼi tatou ko he ʼu Fakamoʼoni ʼa Sehova. Koia, ʼe tou lotolelei ke tou tali ia lainoa fuli ʼe fai kia tatou. ʼE maʼuhiga age kia tatou te huafa ʼo totatou ʼAtua ʼi totatou matagafua. Koia, tou haga hoko atu tatatou fakavikiviki te huafa ʼo Sehova, tatau aipe pe kotea te ʼu ʼahiʼahi ʼe fakatupu e Satana kia tatou. ʼE tou fakamoʼoni ai anai ʼe maʼuhiga ʼaupito te huafa ʼo Sehova kia tatou ohage pe ko tona maʼuhiga kia Sesu.
KATIKO 10 Tou Vikiʼi Ia Sehova, Totatou ʼAtua
a Ko Sopo, neʼe ko he tagata agatonu. Neʼe mole kei ina iloʼi he meʼa ke ina fai ʼi tona fakalainoaʼi e ʼona kaumeʼa ʼe toko tolu. ʼI te kamata ʼi te mamate ʼo tana ʼu fanau, pea mo te puli fuli ʼo ʼana koloa, “neʼe mole agahala ia Sopo pea neʼe mole ina tukugakoviʼi te ʼAtua.” (Sopo 1:22; 2:10) Kae, ʼi tona tukugakoviʼi, neʼe “hoko palalau” ai. Neʼe ina fia tauʼi muʼa tona matagafua, kae mole ko te fakatapuha ʼo te huafa ʼo te ʼAtua.—Sopo 6:3; 13:4, 5; 32:2; 34:5.