Kotou “Alaala, o Tokaga Ki Te Faikole”

1, 2. (1) He ko ʼe ʼe maʼuhiga ʼaupito ke tou nonofo “alaala, o tokaga ki te faikole”? (2) Kotea te ʼu fehuʼi ʼae ʼe tonu ke tou fai kia tatou?

NEʼE ui fenei e te tagata neʼe gaue poʼuli: “Ko te temi ʼae ʼe faigataʼa ʼaupito ai te nofo ʼalaʼala, ʼe ko te temi ʼi muʼa pe ʼo te hopo ake ʼo te laʼa.” ʼE lagi manatu tahi anai mo ia te hahaʼi ʼae ʼe fakamaʼua ke natou nonofo ʼalaʼala ʼi he po katoa. ʼE feala ke fakatatau te moʼi temi ʼaia ki te temi fakaʼosi ʼo te malama ʼa Satana ʼae ʼe tou maʼuʼuli ai. ʼE faigataʼa ʼaupito te temi ʼaia, koia la ʼae ʼe tonu ai ke faiga malohi te kau Kilisitiano ʼo te temi nei ke natou nonofo ʼalaʼala. (Loma 13:12) ʼE fakatupu kovi anai kia tatou moka tou maʼumoea ʼi te faʼahi fakalaumalie. ʼE tonu ke tou “popoto” pea mo tou haga “alaala, o tokaga ki te faikole.”—1 Pet. 4:7.

² Kua vave hoko te fakaʼosi ʼo te malama ʼa Satana, koia ʼe ʼaoga ke tou feʼekeʼaki fenei: “ ʼE au tokaga koa ki taku faʼahiga faikole? ʼE au fakaʼaogaʼi koa te ʼu faʼahiga faikole kehekehe? ʼE au faikole koa tuʼumaʼu? ʼE au tau faikole koa maʼa ʼihi, peʼe au faikole pe ʼo ʼuhiga mo te ʼu meʼa ʼae ʼe ʼaoga kia au pea mo au loto ki ai? Kotea te pikipikiga ʼo te faikole mo toku haofaki?

KOTOU HAGA FAI NI FAʼAHIGA KOLE KEHEKEHE

3. Kotea te ʼu faʼahiga faikole kehekehe?

³ Neʼe talanoa ia Paulo ki “te u kole kehekehe” ʼi tana tohi ki te kau Efeso. (Efe. 6:18) Moka tou faikole kia Sehova, ʼe tou tau kole kia te ia ke ina foaki mai te meʼa ʼae ʼe ʼaoga kia tatou pea mo tokoni mai ke tou fakatokatoka ʼotatou fihifihia. ʼE ui ʼi te Tohi-Tapu, ko Sehova ʼe “fakalogo ki te kole” pea ʼe fakalogo ki ʼatatou kole tokoni koteʼuhi ʼe ʼofa mai kia tatou. (Pes. 65:3) Kaʼe ʼe mole tonu pe ke tou faikole ʼo ʼuhiga mo te ʼu meʼa ʼae ʼe ʼaoga kia tatou. ʼE toe tonu ke tou fai ni fakavikiviki, mo ni fakafetaʼi pea mo ni kole mamahi kia Sehova.

4. He ko ʼe ʼe tonu ke tou fakavikiviki tuʼumaʼu kia Sehova ʼi ʼatatou faikole?

⁴ ʼE lahi te ʼu tupuʼaga ke tou fakavikiviki ai kia Sehova ʼi ʼatatou faikole. Ohage la, ʼe tou fia fakavikiviki kia te ia ʼuhi ko “ana gaue lalahi” pea mo “te lahi o tona mafimafi.” (Lau ia Pesalemo 150:1-6.) Kotou fakakaukauʼi te ʼu vaega ʼo Pesalemo 150. Ko vaega ʼe ono, kaʼe ʼe tuʼa 13 te talanoa ki te fakavikiviki kia Sehova. Neʼe fakaha e te tahi tagata faipesalemo tana ʼofa kia Sehova ʼi tana hiva fenei: “Tua fitu i te aho e au fakafetai kia koe, o tupu ko te u lao o tou faitotonu.” (Pes. 119:164) ʼE tuha mo Sehova te fakavikiviki. Koia ʼe tonu ke tou fakavikiviki kia te ia “tua fitu i te aho” ʼi ʼatatou faikole, ko tona fakaʼuhiga ʼe tonu ke tou fai tuʼumaʼu.

5. He ko ʼe ʼe lelei ke tou lotofakafetaʼi ʼi ʼatatou faikole?

⁵ Ko te tahi faʼahiga faikole ʼe ko tatatou fai ni fakafetaʼi. Neʼe tohi fenei e Paulo ki te kau Kilisitiano ʼo te kolo ko Filipe: “Aua naa koutou tuania o uhiga mo he mea e tahi, kae koutou fakaha ki te Atua te u mea ae e aoga kia koutou aki ni kole, mo ni kolekole, pea mo ni fakafetai.” (Filp. 4:6) ʼE tou maʼuʼuli ʼi te ʼu ʼaho fakamuli ʼo te malama ʼa Satana pea tokolahi te hahaʼi ʼe “maʼuli galo.” Koia ʼe maʼuhiga ke tou manatuʼi te ʼu tapuakina fuli ʼa Sehova mo tou lotofakafetaʼi kia te ia, naʼa tou hoko ki te hahaʼi ʼo te malama. (2 Tim. 3:1, 2, MN) Kua mafola ʼi te malama ia te maʼuli galo. Kapau ʼe mole tou nofo tokaga, ʼe feala ke tou maʼu te faʼahiga manatu kovi ʼaia. Kaʼe kapau ʼe tou fai ni fakafetaʼi ʼi ʼatatou faikole, ʼe tou fiafia anai pea ʼe mole tou lauga anai ʼo ʼuhiga mo totatou maʼuli. (Suta 16) Moka faikole te ʼu pule famili ʼo fai ai he ʼu fakafetaʼi, ʼe uga ai anai ʼonatou ʼohoana pea mo ʼanatou fanau ke natou lotofakafetaʼi.

6, 7. Kotea te kolekole? Kotea te ʼu faʼahi ʼae ʼe feala ke tou kole mamahi kia Sehova?

⁶ Ko te kolekole ʼe ko he kole mamahi ʼe fai ʼaki he loto katoa. Kotea ʼae ʼe feala ke tou kole mamahi kia Sehova? ʼE feala ke tou kole tokoni kia Sehova moka fakatagaʼi tatou, peʼe tou tau mo he mahaki kovi. ʼE mahino ia, ʼi te ʼu aluʼaga faigataʼa feia, ʼe tou kole mamahi kia Sehova ke tokoni mai. Kaʼe ʼe gata pe koa ki te ʼu aluʼaga ʼaia ʼe tonu ke tou fai ai he ʼu kolekole?

⁷ Tou vakaʼi te ʼu palalau ʼa Sesu moʼo tali ki te fehuʼi ʼaia. ʼI te faikole ʼae neʼe ina akoʼi ki ʼana tisipulo, neʼe talanoa ia Sesu ki te huafa ʼo te ʼAtua, mo tona Puleʼaga pea mo tona finegalo. (Lau ia Mateo 6:9, 10.) ʼE lahi te agakovi ʼi te malama ʼaeni, pea ʼe mole lava foaki e te ʼu puleʼaga ki te hahaʼi te ʼu meʼa ʼae ʼe ʼaoga tafitō kia natou. Koia la ʼae ʼe tou faikole ai ʼo ʼuhiga mo te fakatapuha ʼo te huafa ʼo te ʼAtua pea mo te pulihi e tona Puleʼaga ia te pule ʼa Satana ʼi te kele. Pea ʼe ko te temi totonu ʼaeni ke tou faikole kia Sehova ke fai tona finegalo ʼi te kele ohage ko selo. Koia ʼe tonu ke tou nonofo ʼalaʼala pea mo tou fai he ʼu faʼahiga faikole kehekehe.

KOTOU FAIKOLE TUʼUMAʼU

8, 9. He ko ʼe ʼe mole tonu ke tou fakamauʼi ia Petelo mo te kau apositolo ʼuhi ko tanatou maʼumoea ʼi te ʼoloto ʼo Setesemani?

⁸ Neʼe uga e te apositolo ko Petelo te kau Kilisitiano ke natou nonofo “alaala, o tokaga ki te faikole.” Kaʼe ʼi te tahi lakaga neʼe mole ina lava fai te faʼahi ʼaia. Neʼe kau ia ia ʼi te kau tisipulo ʼae neʼe maʼumoea ʼi te temi ʼae neʼe lolotoga faikole ai ia Sesu ʼi te ʼoloto ʼo Setesemani. Neʼe natou maʼumoea logo la te fakatotonu ʼa Sesu ke natou nonofo ʼalaʼala pea mo faikole tuʼumaʼu.—Mat. 26:41, 45, MN.a

⁹ ʼAua naʼa tou fakamauʼi ia Petelo mo te kau apositolo ʼuhi ko tanatou maʼumoea. Tou manatuʼi neʼe natou gaʼegaʼe ʼaupito he neʼe lahi tanatou maʼumaʼua ʼi te ʼaho ʼaia. Neʼe natou teuteuʼi pea mo fai te Pasikate ʼi te po ʼaia. Neʼe toe foaki ai e Sesu he ʼu fakatotonu ʼo ʼuhiga mo te Taumafa ʼa Te ʼAliki ke iloʼi ai e tana kau tisipulo pe feafeaʼi te fai ʼo te Fakamanatu ʼo tana mate. (1 Ko. 11:23-25) ʼE ui ʼi te Tohi-Tapu, “i te osi o te hiva o te u katiko, nee natou olo leva ki te mouga o Oliveto,” ʼo natou haʼele leva ʼi te ʼu ala ʼo Selusalemi. (Mat. 26:30, 36) Koia neʼe kua fakalaka te maʼupo ʼi tanatou kaku ki ai. Kapau neʼe tou ʼi te ʼoloto ʼo Setesemani ʼi te po ʼaia, pea ʼe lagi tou toe maʼumoea anai mo tatou. Neʼe mole valokiʼi e Sesu tana kau apositolo ʼae neʼe kua gaʼegaʼe. Kaʼe neʼe ina fakamoʼoni ki te vaivai ʼo te kakano logo la ʼe malohi te laumalie.

10, 11. (1) Kotea te ako ʼae neʼe taʼofi e Petelo mai te aluʼaga ʼae neʼe hoko kia ia ʼi te ʼoloto ʼo Setesemani? (2) Kotea te ako ʼe kotou taʼofi mai te aluʼaga ʼaia?

¹⁰ Neʼe taʼofi e Petelo he ako maʼuhiga ʼi te po ʼae neʼe maʼumoea ai ʼi te ʼoloto ʼo Setesemani. Ki muʼa atu, neʼe ui fenei e Sesu: “E au liliu anai kia koutou fuli, i te po aeni, ko he mea fakatupu higa.” Neʼe tali fenei leva e Petelo: “E tatau aipe, kapau e natou higa fuli anai o uhi ko koe, kae ko au, e mole au higa anai i he aho.” Neʼe ui age e Sesu ʼe tuʼa tolu anai tana fakafisi kia te ia. Kaʼe neʼe mole tui ia Petelo ki ʼana palalau ʼo ina ui fenei: “Tatau aipe, kapau e tonu foki ke au mate mo koe, e mole au fakafisi anai kia koe.” (Mat. 26:31-35) Kaʼe ki muli age neʼe hoko moʼoni te ʼu palalau ʼa Sesu he neʼe ui e Petelo ʼe mole ina iloʼi ia Sesu. ʼI tana ʼosi mahino leva ki te kovi ʼo tana aga, neʼe “tagi mamahi.”—Luka 22:60-62.

¹¹ ʼAki te aluʼaga ʼaia, neʼe mahino ia Petelo ʼe mole tonu ke falala fau kia ia totonu. Pea neʼe tokoni ʼana faikole kia ia ke tokaga ki te faʼahi ʼaia. ʼE tou iloʼi feafeaʼi te faʼahi ʼaia? Koteʼuhi ko Petelo ʼae neʼe ina fakalotomalohiʼi tatou ke tou nonofo “alaala, o tokaga ki te faikole.” ʼE tou mulimuli koa ki te tokoni Fakatohi-tapu ʼaia? ʼE tou faikole tuʼumaʼu koa, ʼo ha ai ʼe tou tuku tatatou falala kia Sehova? (Pes. 78:7) ʼE tonu ke tou toe maʼuliʼi te tokoni ʼaeni ʼa Paulo: “Ko ae e manatu e tuu ia i oluga, ke tokaga ia naa higa!”—1 Ko. 10:12.

NEʼE TALI IA TE ʼU FAIKOLE ʼA NEEMIA

12. He ko ʼe ko Neemia ko he faʼifaʼitaki lelei kia tatou?

¹² Neʼe toe tuku mai e Neemia te faʼifaʼitaki lelei. Neʼe ina tauhi te Hau Pelesia ko Aletasese ʼo tokaga ki tana meʼa inu, lagi ia taʼu ʼe 450 I.M.T.S.b Ko Neemia ko he faʼifaʼitaki lelei he neʼe faikole kia Sehova ʼaki tona loto katoa. ʼE ui ʼi te Tohi-Tapu neʼe sesunio mo faikole lolotoga ni ʼaho ʼo ʼuhiga mo te aluʼaga kovi ʼo te kau Sutea ʼi Selusalemi. (Nee. 1:4) ʼI te fehuʼi age e Aletasese pe ko ʼe neʼe mata mamahi, neʼe foimo “faikole . . . ki te Atua o te atu lagi.” (Nee. 2:2-4) Neʼe iku kitea? Ko te faʼahiga tali ʼa Sehova ki ʼana faikole neʼe fua lelei ki Tana hahaʼi. (Nee. 2:5, 6) ʼE mahino papau ia, neʼe fakamalohi ai te tui ʼa Neemia.

13, 14. Kotea ʼae ʼe tonu ke tou fai ke malohi ai tatatou tui pea ke tou tauʼi te ʼu ʼohofi ʼa Satana?

¹³ Kapau ʼe tou faikole tuʼumaʼu ohage ko Neemia, ʼe malohi ai anai tatatou tui. ʼE agakovi ia Satana pea ʼe ina ʼohofi tatou ʼi te ʼu temi ʼae ʼe tou vaivai ai. Ohage la, ko te ʼu temi ʼae ʼe tou tau ai mo he mahaki kovi pea mo te loto hoha. ʼE lagi tou manatu ai ʼe meʼa noaʼi e Sehova te kiʼi temi ʼae ʼe tou faifakamafola ai ʼi te mahina fuli. Pea ko ʼihi ʼe natou lotomamahi ʼaupito ʼuhi ko te ʼu aluʼaga ʼae neʼe hoko kia natou ʼi muʼa atu. ʼE loto e Satana ke tou manatu ʼe mole hotatou ʼuhiga, ʼo ina fakavaivaiʼi ai tatatou tui. Kaʼe kapau ʼe tou nonofo “alaala, o tokaga ki te faikole,” ʼe feala ke malohi ai tatatou tui. ʼE ui ʼi te Tohi-Tapu ko te tui ʼe hage ko he paletau lahi ʼe feala ʼaki ai ke tou “tamatei te u nahau uloulo fuli” ʼa Satana.—Efe. 6:16.

¹⁴ Kapau ʼe tou nonofo “alaala, o tokaga ki te faikole,” ʼe tou nofo teuteu ai moka hoko fakapunamaʼuli he ʼahiʼahi pea ʼe tou nofo agatonu anai. Kapau ʼe tou tau mo he ʼu ʼahiʼahi, tou manatuʼi te faʼifaʼitaki ʼa Neemia pea tou foimo faikole ki te ʼAtua. ʼE feala hatatou katakiʼi te ʼu ʼahiʼahi pea mo te ʼu fakahala ʼaki pe te tokoni ʼa Sehova.

TOU FAIKOLE ʼO ʼUHIGA MO ʼOTATOU TEHINA MO TUAGAʼANE

15. Kotea ʼae ʼe tonu ke tou feʼekeʼaki ki ai?

¹⁵ Neʼe fai e Sesu he kole mamahi ʼo ʼuhiga mo Petelo ke ʼaua naʼa vaivai tana tui. (Luka 22:32) Ko he Kilisitiano ʼo te temi ʼo te kau apositolo neʼe higoa ko Epafalasi neʼe mulimuli ki te faʼifaʼitaki ʼa Sesu. Neʼe ina faigaʼi malohi ke faikole ʼo ʼuhiga mo ʼona tehina ʼo Kolose. Neʼe tohi fenei e Paulo kia natou: “ ʼE fai tuʼumaʼu [e Epafalasi] he ʼu kole mamahi maʼa koutou, ke kotou nofo malohi, mo kotou fotufotuʼa ʼi te faʼahi fakalaumalie pea ke kotou nofo teuteu moʼo fai te finegalo ʼo te ʼAtua.” (Kol. 4:12, Bible en français courant) ʼE tonu ke tou feʼekeʼaki fenei: “ ʼE au faiga koa ke au faikole ʼo ʼuhiga mo ʼoku tehina mo tuagaʼane ʼi te malamanei katoa? ʼE au tau faikole koa ʼo ʼuhiga mo natou ʼae ʼe faigataʼaia ʼuhi ko he tuʼutamaki fakanatula? Ko ʼanafea ʼae neʼe au faikole ai maʼa natou ʼae ʼe takitaki ʼi te kautahi ʼa Sehova? ʼI te ʼu ʼaho ʼaeni kua hili, neʼe au faikole koa ʼo ʼuhiga mo he tahi ʼo te kokelekasio ʼe tau mo ni fihifihia?”

16. He ko ʼe ʼe maʼuhiga ke tou faikole ʼo ʼuhiga mo ʼotatou tehina mo tuagaʼane?

¹⁶ ʼE lava tokoni moʼoni ʼatatou faikole ki ʼotatou tehina mo tuagaʼane. (Lau ia 2 Kolinito 1:11.) ʼE mole fakahoko pe e Sehova te ʼu kole ʼo ʼana kaugana ʼuhi ko tanatou faikole liuliuga. Kaʼe ʼe fiafia ʼi tana tali ki te ʼu kole ʼaia heʼe sio ifo ki tanatou fetokagaʼaki. Koia ʼe maʼuhiga ke tou faikole maʼa ʼihi. ʼE tonu ke tou faʼifaʼitakiʼi ia Epafalasi pea mo tou fakaha tatatou ʼofa ki ʼotatou tehina mo tuagaʼane ʼo tou faikole maʼa natou. Kapau ʼe tou fai te faʼahi ʼaia, ʼe tuputupu ai anai tatatou fiafia koteʼuhi “e lahi age te manuia i te foaki i te tali.”—Gaue 20:35.

KUA OVI MAI TOTATOU HAOFAKI

17, 18. Kotea te ʼu lelei ʼae ka tou maʼu mo kapau ʼe tou nonofo “alaala, o tokaga ki te faikole”?

¹⁷ ʼI muʼa pe ʼo te ui e Paulo “kua vave pe te osi o te pouli, kua ovi pe te aho,” neʼe ina tohi fenei: “Kua kotou iloi foki te temi kua tou nonofo ai: Ko te hola aeni ke kotou alaala ai mai te moe, koteuhi i te temi nei kua toe asilisili ovi mai kia tatou te haofaki i te temi ae nee tou tui ai.” (Loma 13:11, 12) Kua ovi mai te malama foʼou ʼa te ʼAtua pea kua lesili ovi mai totatou haofaki. ʼAua naʼa tou maʼumoea ʼi te faʼahi fakalaumalie. Ke ʼaua naʼa pulinoa totatou temi ʼi te ʼu fakahala ʼo te malama, tou toʼo he temi ke tou nofo tokotahi ai moʼo faikole kia Sehova. ʼE ʼaoga ke tou nonofo “alaala, o tokaga ki te faikole.” Kapau ʼe tou fai te faʼahi ʼaia, ʼe tokoni mai anai ke maʼoniʼoni tatatou aga ʼo ha ai tatatou ʼofa ki te ʼAtua ʼi tatatou talitali ki te ʼaho ʼo Sehova. (2 Pet. 3:11, 12) ʼE ha anai ʼi totatou maʼuli tatatou ʼalaʼala ʼi te faʼahi fakalaumalie pea mo tatatou tui malohi ki te kua ovi mai ʼo te fakaʼosi ʼo te malama agakovi ʼaeni. Tou faikole tuʼumaʼu. (1 Tes. 5:17) ʼE tonu ke tou faʼifaʼitakiʼi ia Sesu ʼae neʼe ina maʼu he koga meʼa ke faikole tokotahi ai kia Sehova. ʼE tou ovi age anai kia Sehova mo kapau ʼe tou toʼo he temi feʼauga moʼo faikole kia te ia. (Sakp. 4:7, 8) ʼE ko he tapuakina lahi anai kia tatou.

¹⁸ ʼE ui fenei ʼi te Tohi-Tapu: “I te u aho o tona kakano, nee ina momoli ai ni hu, mo ni kole, o fakatahi mo ni tagi mamahi, pea mo ni loimata kia ia ae nee feala ke ina fakamauli ia mai te mate; pea nee ina tali ia uhi ko tana fakalogo ki te Atua.” (Hep. 5:7) Neʼe fai e Sesu ni kole pea mo ni tagi mamahi kia Sehova pea neʼe nofo agatonu ʼo kaku ki te fakaʼosi ʼo tona maʼuli ʼi te kele. ʼUhi ko tana nofo agatonu, neʼe fakatuʼuake e Sehova tona ʼAlo pea mo foaki age te maʼuli tuputupua ʼi selo. ʼE toe feala kia tatou ke tou nofo agatonu ki tatatou Tamai ʼae ʼi selo tatau aipe pe kotea te ʼu ʼahiʼahi mo te ʼu fakahala ʼe hoko. ʼE tou lava maʼu anai te fakapale ʼae ko te maʼuli heʼe gata mo kapau ʼe tou nonofo “alaala, o tokaga ki te faikole.”