Tou Tokoni Kia Natou ʼAe ʼe Faigataʼaia
ʼE FAKAMATALA fenei e François, ko te tagata ʼafeā ʼe maʼuli ʼi te fenua masiva: “Neʼe malaga te tau ʼi tomatou fenua ʼi te ʼosi ʼo te vote neʼe fakafihiʼi. Pea neʼe feholaki ai te toko lau ʼi afe kau Fakamoʼoni ʼa Sehova ʼi ʼonatou ʼapi. Neʼe kua tahitahiga te maʼu ʼo te meʼa kai mo te ʼu faitoʼo, pea neʼe totogi kovi ʼaupito. Neʼe mapunuʼi te ʼu fale paʼaga pea neʼe mole kei ʼi ai he falā ʼi te ʼu masini toho.”
Neʼe momoli fakavilivili e te filiale te foʼi falā pea mo te ʼu meʼa ʼae neʼe ʼaoga moʼo tokoni ki te kau Fakamoʼoni ʼae neʼe natou kumi nofoʼaga ʼi te ʼu Fale Fono ʼi te fenua katoa. Ko te ʼu kutuga ʼae neʼe fefakafeagaiʼaki neʼe natou pupunu te ʼu ala, kaʼe neʼe natou iloʼi ʼe mole kau te kau Fakamoʼoni ki te ʼu fihi fakapolitike. Koia neʼe natou tautau fakagafua ai ki te ʼu motoka ʼo te filiale ke natou fakalaka ʼi te ala.
ʼE ui fenei e François: “ ʼI tamatou fagona ki te tahi Fale Fono, neʼe fana tamatou kamioneti, kaʼe neʼe mole lave mai he foʼi pulu. ʼI tamatou sisio ʼae ki te lele mai ʼa te tagata solia mo tana fana, neʼe matou ofeʼi fakavilivili tamatou kamioneti pea mo toe liliu ki te filiale. Neʼe matou fakafetaʼi kia Sehova he neʼe matou hao. ʼI te ʼaho ake, ko te toko 130 tehina mo tuagaʼane ʼae neʼe nonofo ʼi te Fale Fono ʼaia, neʼe natou toe feholaki ki he tahi nofoʼaga pea neʼe natou hao ai. Ko ʼihi neʼe natou ʼomai ki te filiale, pea neʼe matou tokakaga kia natou ʼi te faʼahi fakalaumalie mo fakasino ʼo kaku ki te ʼosi ʼo te fihifihia.”
ʼE toe ui fenei e François: “Ki muli age, neʼe faitohi te ʼu tehina mo tuagaʼane ʼo te fenua ki te filiale, moʼo fakaha tanatou lotofakafetaʼi. ʼI tanatou sisio ʼae ki te tokoni age ʼo ʼonatou tehina mo tuagaʼane ʼi te ʼu potu kehekehe, neʼe malohi ai tanatou falala kia Sehova.”
Moka hoko ni tuʼutamaki fakanatula pea mo ʼae ʼe fakatupu e te tagata, ʼe mole tou ui age anai ki ʼotatou tehina mo tuagaʼane ke natou “fakamafana pea ke [natou] makokona.” (Sakp. 2:15, 16) Kaʼe ʼe tou faiga anai ke tou foaki age te ʼu meʼa ʼae ʼe ʼaoga kia natou ʼi te faʼahi fakasino. Neʼe feia ʼi te temi ʼo te kau ʼuluaki Kilisitiano, heʼe hili te fakatokaga ʼae neʼe fai ʼo ʼuhiga mo te hoko mai ʼo te hoge, “nee fai leva he tonu e te kau tisipulo ke ave he tokoni ki te u tehina i Sutea, o fakalogo ki te mea e fealagia e te tagata takitahi.”—Gaue 11:28-30.
ʼI totatou ʼuhiga kaugana ʼa Sehova, ʼe tou fia tokoni kia natou ʼae ʼe faigataʼaia ʼi te faʼahi fakakoloa. Kaʼe ʼe toe ʼaoga foki kia natou te ʼu meʼa fakalaumalie. (Mat. 5:3, MN) Moʼo tokoni ki te hahaʼi ke natou mahino ʼe ʼaoga kia natou te ʼu meʼa fakalaumalie, neʼe fakatotonu e Sesu ki te kau Kilisitiano ke natou fai ni tisipulo. (Mat. 28:19, 20) ʼE tou tahi fakaʼaogaʼi lahi totatou temi, mo totatou malohi pea mo ʼotatou koloa moʼo fakahoko te gaue ʼaia. ʼE tuku keheʼi e te kautahi te tahi koga ʼo te ʼu falā meʼa ʼofa moʼo foaki he tokoni fakakoloa. Kaʼe ʼe fakaʼaogaʼi tafitō te ʼu meʼa ʼofa moʼo fakalakalaka ki muʼa te ʼu gaue ʼo te Puleʼaga pea mo te fakamafola ʼo te logo lelei. Koia, tou fakaha totatou ʼofa ki te ʼAtua pea mo ʼotatou tatau.—Mat. 22:37-39.
Ko natou ʼae ʼe lagolago ki te gaue fakamalamanei ʼa te kau Fakamoʼoni ʼa Sehova, ʼe natou lava tui papau ʼe fakaʼaogaʼi lelei pea mo fakapotopoto ʼanatou meʼa ʼofa. ʼE feala koa hakotou tokoni ki ʼokotou tehina ʼae ʼe faigataʼaia? ʼE kotou fia lagolago koa ki te gaue ʼae ko te fai ʼo ni tisipulo? Kapau koia, pea “aua naa [kotou] fakafisi he mealelei ki ae e tonu ke fai ki ai, mo kapau e [kotou] fealagia.”—Taag. 3:27.