Ke Malave Ki Te Loto ʼo Totatou Famili ʼAe ʼe Mole Tou Lotu Tahi

NEʼE ui fenei e Sesu Kilisito ki te tagata neʼe fia liliu ko hana tisipulo: “Alu ki tou fale, ki tou famili, pea ke fakamatala kia natou te u mea fuli ae nee fai e [Sehova] kia koe, pe nee feafeai tona manavaofa kia koe.” ʼI te temi ʼaia neʼe lagi nofo ia Sesu ʼi Gadara, ʼi te potu saute esite ʼo te Tai ʼo Kalilea. Pea ʼe ha ʼi te ʼu palalau ʼa Sesu, neʼe mahino ia ko te tagata fuli ʼe ina fia vaevae tuʼumaʼu mo tona famili ni faʼahi ʼe natou leleiʼia mo maʼuhiga.—Mko. 5:19.

Ia ʼaho nei, ʼe tou tau sio ki te agaaga ʼaia, tafitō ʼi ʼihi atu aga ʼi fenua. Koia ʼi te agamahani moka liliu he tahi ʼo tauhi ki te ʼAtua moʼoni, ia Sehova, ʼe ina fia fakaha tana tui ki tona famili. Kaʼe ʼe feafeaʼi anai hana fakahoko te faʼahi ʼaia? ʼE feafeaʼi anai hana faiga ke malave te loto ʼo tona famili ʼae ʼe mole lotu tahi mo ia peʼe mole tui tuʼa tahi? ʼE tou maʼu ʼi te Tohi-Tapu ni tokoni lelei pea mo moʼoni ki ai.

“KUA MA MAU TE MESIA”

ʼI te temi ʼo te kau apositolo, neʼe kau ia Atelea ia natou ʼae neʼe natou ʼuluaki iloʼi ko Sesu neʼe ko te Mesia. Pea ko ai ʼae neʼe ina foimo tala ki ai te logo? “Nee uluaki felavei (ia Atelea) mo tona tehina ko Simone, pea nee ui leva kia ia: Kua ma mau te Mesia (ko tona uhiga, te Kilisito).” Neʼe taki leva e Atelea ia Petelo kia Sesu, ʼo maʼu ai e Petelo te fealagia ʼae ke liliu ko he tisipulo ʼa Sesu.—Soa. 1:35-42.

Hili taʼu ʼe ono ʼape ki ai, ʼi te nofo ʼa Petelo ʼi Sope, neʼe kole age ke alu ki te potu noleto ʼi Sesalea ʼo ʼaʼahi te loto fale ʼo te setulio Loma ko Kolenelio. Ko ai natou ʼae neʼe maʼu atu e Petelo ʼe fakatahitahi ʼi te loto fale ʼaia? “Nee talitali Kolenelio kia natou, [ia Petelo mo natou ʼae neʼe kauga fagona mo ia] pea nee ina fakaafe age ona [kaiga] mo ona kaumea totonu.” Koia, neʼe foaki ai e Kolenelio ki ʼona kaiga te faiga malie ʼae ke natou logo ki te ʼu palalau ʼa Petelo pea ke natou fai he tonu ʼe fakatafito ki te ʼu meʼa ʼae neʼe natou logo ki ai.—Gaue 10:22-33.

Kotea te ako ʼe tou lava taʼofi mai te aga ʼa Atelea pea mo Kolenelio ki ʼonā kaiga?

Neʼe mole tuku feiaʼi pe e Atelea mo Kolenelio ʼonā kaiga ke natou iloʼi fakafokifa te moʼoni. Koteʼuhi ko Atelea tonu ʼae neʼe ina taki ia Petelo kia Sesu, pea ko Kolenelio ʼae neʼe ina fakatuʼutuʼu leva ke logo ʼona kaiga ki te ʼu palalau ʼa Petelo. Kaʼe neʼe mole fakaneke e Atelea mo Kolenelio peʼe nā fakaoloolo ʼonā kaiga ke natou liliu ko ni tisipulo ʼa Kilisito. Kotea te ako ʼae ʼe tou maʼu mai ai? ʼE lagi lelei ke tou toe vaevae ʼihi manatu mo totatou famili pea mo tou faiga ke natou logo ki te ʼu moʼoni Fakatohi-tapu mai ni tehina mo tuagaʼane. Kaʼe ʼe tou fakaʼapaʼapa ki tonatou lotofaʼitaliha pea ʼaua naʼa tou fakakinauʼi fau ia natou. Ke tou iloʼi pe feafeaʼi hatatou lava tokoni ki totatou famili, tou vakaʼi te faʼifaʼitaki ʼo te taumatuʼa ʼi Siamani ko Jürgen pea mo Petra.

Neʼe ako e Petra ia te Tohi-Tapu mo te kau Fakamoʼoni ʼa Sehova pea ʼaki te temi neʼe papitema leva. Ko tona ʼohoana ia Jürgen, neʼe ko he ofisie ʼi te solia pea ʼi te kamata neʼe ita ki tona ʼohoana ʼuhi ko te tonu ʼae neʼe ina fai. Kaʼe ʼaki te alu ʼo te temi, neʼe mahino kia ia ʼe fakamafola e te kau Fakamoʼoni ʼa Sehova ia te moʼoni mai te Tohi-Tapu. Neʼe ina toe foaki mo ia tona maʼuli kia Sehova pea kua tagata ʼafeā nei ʼi tana kokelekasio. Kotea he tokoni ʼe ina foaki ke malave ai te loto ʼo he tahi ʼi totatou famili ʼe mole lotu tahi mo tatou?

ʼE ui fenei e Jürgen: “ ʼAua naʼa tou fakakinauʼi pea mo tou fakamafasia totatou famili ʼaki te ʼu moʼoni Fakatohi-tapu. Koteʼuhi ʼe feala ke toe ʼaʼasili ai tanatou mole fia logo ki te moʼoni. ʼAki te temi ʼe lagi lelei age ke tou ʼaveʼave mamalie mo he fakaʼeteʼete ia te ʼu manatu Fakatohi-tapu pea mo fakatuʼakoi tona fai. ʼE toe ʼaoga foki ke tou faiga ke felaveʼi totatou famili mo te ʼu tehina ʼae ʼe natou taʼu tahi pea mo tatau te ʼu faʼahi ʼe natou leleiʼia. Pea ʼe faigafua ai anai hatatou tokoni kia natou ke natou fia logo ki te moʼoni.”

Ko te apositolo ko Petelo pea mo te ʼu kaiga ʼo Kolenelio, neʼe natou foimo tali te logo ʼo te Tohi-Tapu. Kaʼe ko ʼihi ia neʼe ʼaoga kia natou he temi loaloaga ke feala hanatou fai he tonu.

KAʼE ʼE FEAFEAʼI KI TE ʼU TEHINA ʼO SESU?

Tokolahi ʼi te famili ʼo Sesu neʼe natou tui kia te ia lolotoga tana minisitelio. Ohage la, ko te apositolo ko Sakopo mo Soane neʼe lagi ko he ʼu tehina mataʼi tama ʼo Sesu pea ko tanā faʼe ia Salome, neʼe ko tona mahikitaga. Pea neʼe lagi kau ia ʼi ‘te ʼu fafine kauga malie ʼae neʼe natou tauhi kia Sesu mo te kau apositolo ʼaki ʼonatou koloa.’—Luka 8:1-3.

Kaʼe ko ʼihi ʼi te famili ʼo Sesu neʼe mole natou foimo tui atu aipe kia te ia. Ohage la, ʼi te tahi ʼaho kaʼe kua fakalaka te taʼu katoa mo ni mahina ki te papitema ʼa Sesu, neʼe fakatahitahi te tokolahi ʼi te ʼapi moʼo fagono kia te ia. Kaʼe “i te logo a te [famili] a Sesu ki te mea nee hoko, nee natou olo leva ke puke ia ia; koteuhi nee natou ui kua vale ia ia.” Hili ki ai he kiʼi temi siʼi, ʼi te temi ʼae neʼe fehuʼi age e ʼona tehina ʼo ʼuhiga mo tana faifagona, neʼe mole tali Sesu kia natou. Kotea tona tupuʼaga? “Koteuhi nee mole tui ona tehina kia ia.”—Mko. 3:21; Soa. 7:5.

Kotea te ako ʼe tou lava taʼofi mai te aga ʼa Sesu ki tona famili? Neʼe mole ita ia moka lau e ʼihi kua vale. Maʼia ʼi te hili ʼo tona matehi mo tona fakatuʼuake, neʼe toe foaki e Sesu he ʼu fakalotomalohi ki tona famili ʼaki tana ʼasi ʼae ki tona tehina ko Sakopo. ʼE mahino ia neʼe tokoni tana ʼasi ʼaia kia Sakopo pea mo ʼihi ʼo ʼona tehina ke natou tui pau ʼe ko ia moʼoni ia te Mesia. Koia ʼae neʼe natou nonofo ai mo te kau apositolo pea mo ʼihi atu ʼi te koga fale fata ʼae ʼi Selusalemi pea neʼe natou maʼu ai te laumalie maʼoniʼoni. ʼAki te temi, ko Sakopo mo Suta, te tahi tehina ʼo Sesu, neʼe nā maʼu ʼihi atu pilivilesio fakaofoofo.—Gaue 1:12-14; 2:1-4; 1 Ko. 15:7.

ʼE ʼAOGA KI ʼIHI HE TEMI LOALOAGA

Ohage pe ko te temi ʼo te kau apositolo, ia ʼaho nei ʼe ʼaoga ki ʼihi ʼo totatou famili he temi loaloaga ʼi muʼa ʼo hanatou haʼele ʼi te ala ʼo te maʼuli. Tou vakaʼi te faʼifaʼitaki ʼo Roswitha. Neʼe ko he fafine Loma neʼe faʼafai ʼi te Lotu Katolika ʼi te temi ʼae neʼe papitema ai ia tona ʼohoana ke liliu ko he Fakamoʼoni ʼa Sehova ʼi te taʼu 1978. ʼI te kamata neʼe fakafeagai ia Roswitha ki tona ʼohoana ʼuhi ko tana fakamalotoloto ʼi tana tui. Kaʼe ʼaki te ʼu taʼu, neʼe malū ifo tana fakafeagai pea neʼe mahino kia ia ko te moʼoni ʼae neʼe akoʼi e te kau Fakamoʼoni. Pea ʼi te taʼu 2003 neʼe papitema ai leva. Kotea ʼae neʼe tokoni ki ai ke fetogi tana manatu? Neʼe mole ita tona ʼohoana ki ai ʼi tana kamata fakafeagai pea neʼe ina foaki ai kia Roswitha te ʼu faiga malie ʼae ke ina fetogi tana manatu. Kotea la he tokoni ʼe foaki mai e Roswitha? ‘Moka lahi tatatou kataki fualoa, pea ʼe toe lahi ai mo te ʼu lelei ʼe feala ke fakahoko.’

Ko Monika neʼe papitema ʼi te taʼu 1974, pea ko ʼana tama ʼe tokolua neʼe nā liliu leva ko he ʼu Fakamoʼoni ia taʼu ʼape ʼe hogofulu ki muli age. Logo pe neʼe mole fakafeagai ʼi he temi tona ʼohoana ko Hans ki tana tui, kaʼe neʼe hoki papitema pe ʼi te taʼu 2006. ʼAki te ʼu meʼa ʼae neʼe hoko, kotea he tokoni ʼe foaki mai e te kiʼi famili ʼaia? “Kotou nofo agatonu kia Sehova, pea ʼaua naʼa kotou fai he meʼa ʼe mole alu tahi mo takotou tui.” ʼE moʼoni, neʼe maʼuhiga ke natou fakafimalie te loto ʼo Hans ʼaki tanatou ʼofa tuʼumaʼu kia ia. Pea neʼe natou lotomalohi tuʼumaʼu ʼe ina tali anai tanatou tui.

NEʼE FAKAMOKOMOKO NATOU ʼAKI TE VAI ʼO TE MOʼONI

ʼI te tahi lakaga neʼe fakatatau e Sesu te logo ʼo te moʼoni ki he vai ʼe ina foaki te maʼuli heʼe gata. (Soa. 4:13, 14) Pea ʼe tou loto ke fakamokomoko totatou famili ʼaki tanatou inu te vai ʼo te moʼoni ʼae ʼe tasilo pea mo mokomoko. Kaʼe ʼe moʼoni ʼe mole tou loto anai ke natou malelemo koteʼuhi ʼe lahi fau te vai ʼae ʼe tou foaki fakakinau age pea mo fakavilivili. Pea ko tatatou faʼahiga fakamahino ʼo tatatou tui ʼae ʼe natou mokomoko ai peʼe malelemo ai. ʼE ui ʼi te Tohi-Tapu ‘ ʼe fakakaukau te loto ʼo te tagata faitotonu ki tana tali’ pea “ko ae e poto i tona loto e ina fakaha tona poto i tona gutu, pea e ha te lahi o tona poto i ona laugutu.” ʼE feafeaʼi hatatou lava mulimuli ki te tokoni ʼaia?—Taag. 15:28; 16:23.

ʼE lagi fia fakamahino anai e he fafine ia tana tui ki tona ʼohoana. Kapau ʼe fakakaukau ʼi muʼa ʼo hana palalau, pea ʼe ina fakafuafua lelei anai ʼana palalau pea ʼe mole palalau fakavilivili anai. ʼE mole tonu anai ke ina fai he meʼa ʼe ha ai ʼe manatu ʼe faitotonu peʼe maʼoluga age ia. Pea ʼe feala ki he ʼu palalau neʼe teuteuʼi lelei ke ina fakamokomoko ai he tahi pea mo maʼu ai te tokalelei. Ko te temi fea ʼae ʼe fimalie ai tona ʼohoana pea mo faigafua te fakaovi ki ai? Kotea te ʼu faʼahi ʼae ʼe fia faipalalau ki ai peʼe ina fia lau? ʼE ina leleiʼia koa te sienesia, mo te politike pea mo te ʼu fai gaoʼi? ʼI tana faiga ʼae ke fia iloilo tona ʼohoana ki te Tohi-Tapu, ʼe lava feafeaʼi ki te fafine hana fakaʼapaʼapa ki te ʼu meʼa ʼae ʼe logoʼi e tona ʼohoana pea mo ʼana manatu? Kapau ʼe manatu feia, pea ʼe tokoni anai ki ai ke palalau pea mo agafakapotopoto.

ʼE mole gata ʼaki pe tatatou fakamahino mamalie tatatou tui ke malave ai te loto ʼa ʼihi ʼo totatou famili ʼae ʼe mole ko ni kau Fakamoʼoni. Kaʼe ʼe tonu ke tou fakaalu tahi tatatou aga mo te ʼu meʼa ʼae ʼe tou palalau ki ai.

HE AGA ʼE LELEI

ʼE fakamahino fenei e Jürgen ʼae neʼe kua tou talanoa ki ai ʼi muʼa atu: “Kotou maʼuliʼi tuʼumaʼu te ʼu pelesepeto Fakatohi-tapu ʼi te ʼaho fuli. ʼE ko he faʼahiga fai ʼaia ʼe lelei ʼaupito koteʼuhi logo la ʼe mole fakamoʼoni ki ai totatou famili kaʼe ʼe natou tokagaʼi.” Pea ʼe toe manatu feia mo Hans ʼae neʼe papitema ia taʼu ʼape ʼe 30 ki muli age ʼi tona ʼohoana. “Ko tatatou tuku he faʼifaʼitaki lelei, ʼe maʼuhiga he ʼe feala ai ki totatou famili hanatou sio ki te ʼu fua lelei ʼo te moʼoni ʼi totatou maʼuli.” ʼE tonu ke mahino ki totatou famili, ʼe ko tatatou tui ʼae ʼe tou kehekehe ai mo ʼihi pea ʼe fua lelei te faʼahi ʼaia kia tatou.

Neʼe foaki e te apositolo ko Petelo te tokoni ʼaoga ʼaeni ki te ʼu fafine ʼae ko tonatou ʼohoana ʼe mole lotu tahi mo natou: “Kotou fakamalalo i te u mea fuli ki okotou ohoana, koteuhi, kapau e mole fakalogo ni ihi ki te folafola, ke aumai natou ki te tui e te aga a te fafine, hala folafola, i tanatou sisio ki tokotou mauli maa mo fakaapaapa. Kotou mau, mole te u teu i tua ae ko te fi o te lauulu, mo te tau o te u mea aulo, mo te tui o ni kofu gigila, kae ke kotou mau te u teu ugia o te loto ae ko te mea hee popo o he loto agamalu mo tokalelei, ae e mauhiga lahi ia mua o te Atua.”—1 Pet. 3:1-4.

Neʼe tohi e Petelo, ʼe feala ki he tagata ʼohoana ke tafoki ki te moʼoni ʼuhi ko te faʼifaʼitaki lelei ʼo tona ʼohoana. ʼAki tana manatuʼi tuʼumaʼu te fakatotonu Fakatohi-tapu ʼaia, neʼe faigaʼi e te tuagaʼane ko Christa talu mai tana papitema ʼi te taʼu 1972 ke malave ki te loto ʼo tona ʼohoana ia tana aga. Logo pe neʼe kua ako ia tona ʼohoana ʼi te tahi temi mo te kau Fakamoʼoni, kaʼe neʼe heʼeki ina fakamalotolotoʼi te moʼoni. Neʼe kua kau ʼi te ʼu fono Fakakilisitiano pea mo felogoʼi lelei mo te kokelekasio. Pea neʼe natou fakaʼapaʼapa ki te filifili neʼe ina fai. ʼE faigaʼi feafeaʼi anai e Christa ke malave te loto ʼo tona ʼohoana?

“Neʼe au fakatotonu ke au muliʼi te ala ʼae ʼe loto e Sehova ke au alu ai. Pea ʼi te tahi faʼahi, ʼe au faiga ke au ʼaumai toku ʼohoana ki te moʼoni ʼaki pe taku aga kaʼe mole ʼaki ni palalau. ʼE au faiga malohi ke au mulimuli ki te ʼu meʼa ʼae ʼe loto ki ai toku ʼohoana moka ʼe mole fakafeagai ki te ʼu pelesepeto Fakatohi-tapu. Kaʼe ʼe moʼoni, ʼe au fakaʼapaʼapa ki tona lotofaʼitaliha pea ʼe au tuku te faʼahi ʼaia kia Sehova.”

ʼE ha ʼi te maʼuli ʼo Christa ia te maʼuhiga ʼae ʼo te fakapotopoto. ʼE ina taupau ni agamahani ke malohi ai ʼi te faʼahi fakalaumalie, ohage ko te kau tuʼumaʼu ki te ʼu fono pea mo te kau lahi ki te faifakamafola. Kaʼe neʼe mahino kia Christa ʼe ko tona maʼua ke ʼofa ki tona ʼohoana mo fakaʼaogaʼi tona temi pea mo tokaga ki ai. Ko tatatou fakapotopoto pea mo lotomahino, ʼe ko he faʼahi lelei ia kia tatou ʼae ʼe ʼi ai hotatou famili ʼe mole tou lotu tahi. ʼE fakamahino fenei ʼi te Tohi-Tapu: “E i ai he temi ki te u mea fuli.” ʼE kau ki ai te temi ʼae ʼe tou fakaʼaogaʼi ki totatou famili, tafitō totatou ʼohoana, ʼae ʼe mole tou lotu tahi. Pea ko te temi ʼae ʼe kolua fakatahi fakataumatuʼa ai ʼe fua lelei anai ki ʼakolua felogoʼi. Koia ʼe ha ʼi te ʼu aluʼaga ʼae neʼe hoko, ko he felogoʼi lelei ʼe ina fakasiʼisiʼi tanatou manatu ʼae ʼe mole tokagaʼi natou peʼe liʼakina natou peʼe ko tanatou fuaʼa.—Ekl. 3:1.

ʼAUA NAʼA KOTOU LOTOVAIVAI

Ko Holger ʼae ko tana tamai neʼe papitema ia taʼu ʼe 20 ki muli age ʼi ʼihi ʼo tona famili, neʼe ina ui fenei: “ ʼE maʼuhiga ke tou fakaha ʼe tou ʼofa ki totatou famili pea ʼe tou faikole maʼa natou.” Neʼe ui e Christa ‘ ʼe tui pau ʼe tauhi anai tona ʼohoana kia Sehova pea mo ina tali te moʼoni ki muli age.’ Koia ʼe tonu ke lelei tuʼumaʼu tatatou aga ki totatou kiʼi famili ʼae ʼe mole tou tauhi tahi pea mo manatu tuʼumaʼu ʼe natou tafoki mai anai ʼi he temi.

ʼE tou fakatuʼutuʼu ke tou taupau lelei ʼatatou felogoʼi, ke maʼu ai e totatou famili te faiga malie ʼae ke natou iloʼi te moʼoni pea ke malave ki tonatou loto ia te logo ʼo te Tohi-Tapu. Pea ʼe tonu ke tou ‘agamalu mo fakaʼapaʼapa’ ia meʼa fuli.—1 Pet. 3:15.