ʼE Feafeaʼi Hatatou Fagonogono Ki Totatou ʼu Kāiga?
1. He koʼe ʼe tonu ke tou maʼu te fakasiosio tonu mokā tou fai fagonogono ki totatou ʼu kāiga?
1 ʼI meʼa fakafiafia ʼaupito mo kapau ʼe tou lava hū ki te mālama foʼou mo totatou ʼu kāiga ʼaē ʼe tou ʼoʼofa ai, ʼo tou logo tahi mo nātou ʼi te tauhi kiā Sehova! ʼE feala ke hoko moʼoni te ʼamanaki fakafiafia ʼaia mo kapau ʼe tou fagonogono ki totatou ʼu kāiga. Kae ke feala hatatou fai he ʼu palalau ʼe lave lelei, ʼe tonu ke tou maʼu te fakasiosio tonu. Neʼe ʼui fēnei e te taupau ʼo te ʼu kokelekasio: “ ʼE maʼu te ʼu fua lelei e nātou ʼaē ʼe nātou palalau ʼi ʼihi temi ki he ʼu meʼa ʼe tupu ai te fia logo ʼo tonatou ʼu kāiga.” ʼE tou lava fakahoko feafeaʼi ia te faʼahi ʼaia?
2. Kapau ʼe tou ʼoʼofa moʼoni ki totatou ʼu kāiga, pea koteā ʼaē ʼe tou lava fai moʼo ʼeke ʼo tanatou fia logo?
2 Tou ʼEke Tanatou Fia Logo: Koutou fakakaukauʼi lelei peʼe koteā ʼaē ʼe ina lava ʼeke te fia logo ʼo tokotou ʼu kāiga. (Taag. 15:28) Koteā tonatou ʼu tuʼania? Koteā te ʼu faigataʼaʼia ʼaē ʼe felāveʼi mo nātou? ʼE lagi feala ke koutou fakahā age he ʼalatike peʼe koutou talanoa ki he vaega ʼe ʼalutahi mo te meʼa ʼaē ʼe nātou fia logo kiai. Kapau ʼe mole koutou feʼōviʼaki mo tokotou ʼu kāiga, pea ʼe lagi feala ke koutou fai ia te faʼahi ʼaia ʼo koutou faitohi kiā nātou peʼe koutou fai telefoni. ʼI takotou tō te ʼu pulapula ʼo te moʼoni, koutou tōkakaga ke mole lahi fau takotou ʼu palalau, pea koutou falala ko Sehova ʼe ina fakatuputupu anai te ʼu pulapula ʼaia.—1 Ko. 3:6.
3. Ko te fia ʼiloʼi e totatou ʼu kāiga ia te ʼu meʼa ʼaē ʼe tou fai, ʼe lava liliu feafeaʼi ko he fealagia ke tou fagonogono ai kiā nātou?
3 Neʼe fakatotonu fēnei e Sesu ki te tagata ʼaē neʼe ina kapu mai ia ia te tuʼuga temonio ʼaē neʼe ʼulusino ia ia: “ ʼAlu ki tou ʼapi, ki ʼou kāiga, pea ke fakamatala age kiā nātou te ʼu meʼa fuli ʼaē neʼe fai e Sehova maʼa koe pea mo tona manavaʼofa ʼaē kiā koe.” (Mko. 5:19, MN ) Koutou fakakaukauʼi age muʼa te punamaʼuli ʼo tona ʼu kāiga! Logola neʼe mole hoko kiā koutou he ʼaluʼaga fakatalakitupua feiā, kae ʼe lagi fia ʼiloʼi e tokotou ʼu kāiga te ʼu gāue ʼaē ʼe koutou fai peʼe ko te ʼu gāue ʼaē ʼe fai e takotou fānau. Koutou talanoa ʼo ʼuhiga mo he akonaki neʼe koutou fai ʼi te Ako ʼo te Minisitelio Faka Teokalatike, mo he fakatahi neʼe koutou kau kiai, takotou ʼolo ʼo mamata ki te Petele, peʼe ko he faʼahi maʼuhiga neʼe hoko ʼe feala ai hakotou vaevae mo nātou he ʼu manatu ʼo ʼuhiga mo Sehova pea mo tana kautahi.
4. Koteā ʼaē ʼe mole tonu ke tou fai mokā tou fai faka mafola ki totatou ʼu kāiga?
4 Tou Maʼu Te Fakasiosio Tonu: Ka tou fai fagonogono ki totatou ʼu kāiga, ʼaua naʼa tou palalau age ki he ʼu tuʼuga manatu. ʼI tana manatuʼi te temi ʼaē neʼe ina kamata ako ai te Tohi-Tapu, neʼe ʼui fēnei e te tēhina: “Lolotoga ni ʼu hola, neʼe au fakamatala ai ki taku faʼe te ʼu meʼa fuli ʼaē neʼe au ako ʼi te Tohi-Tapu, pea neʼe tau hoko ai te ʼu fihi, tāfito mo taku tāmai.” Māʼiape la mokā fia logo hotatou kāiga ki te logo ʼa te Tohi-Tapu, tou fai he tali ʼe feala ai hana toe fia ʼiloʼi he tahi age ʼu meʼa. (Taag. 25:7) Koutou fakahā tuʼumaʼu te aga fakaʼapaʼapa, koutou agalelei, pea mo faʼa kātaki, ohage pe ko takotou fai mokā koutou fai faka mafola ki he ʼu hahaʼi ʼe mole koutou feʼiloʼiʼaki.—Kol. 4:6.
5. Koteā ʼaē ʼe tonu ke tou fai mo kapau ʼe mole tali lelei e totatou ʼu kāiga tatatou fai faka mafola age kiā nātou?
5 ʼI te tahi temi, neʼe manatu e te ʼu kāiga ʼo Sesu kua vale ia. (Mko. 3:21) Kae ki muli age, neʼe liliu ʼihi ʼo tui. (Gaue 1:14) Kapau ʼe mole tali lelei e tokotou ʼu kāiga takotou faiga ʼaē ke koutou fai faka mafola age kiā nātou, ʼaua naʼa koutou lotovaivai. ʼAki te temi, ʼe fetogi tonatou ʼu ʼaluʼaga pea mo tanatou aga. Koutou haga kumi he tahi faigamālie ke koutou vaevae mo nātou he manatu ʼe ʼeke ai tanatou fia ʼiloʼi. ʼE koutou maʼu anai te fiafia ʼaē ko te tokoni kiā nātou ke nātou kamata haʼele ʼi te ala ʼaē ʼe ina taki ki te maʼuli heʼegata.—Mat. 7:13, 14.