Te ʼu Tali Ki Te ʼu Fehuʼi Fakatohi-tapu
Neʼe fakatuʼuake moʼoni koa e Sesu ia he hahaʼi mai te mate?
Neʼe fakatuʼuake e Sesu ia Lasalo, ʼae neʼe kua ʼaho fa ia tana mate
ʼE ui lelei ʼi te Tohi-Tapu, neʼe fakatuʼuake e Sesu ia he hahaʼi mai te mate. Pea ko te ʼu fakamatala ʼaia ʼe mole ko he ʼu fagana. Koteʼuhi neʼe hoko moʼoni ʼi he ʼu koga meʼa pea mo he ʼu temi ʼe totonu. Ohage la, ʼi te temi vela ʼo te taʼu 31 Hili te Temi ʼo Sesu, neʼe fagona fakatahi ia te toe hahaʼi tokolahi mo Sesu mai Kafanaume ki Naini. ʼI tanatou tau atu, neʼe natou toe felaveʼi mo te tahi hahaʼi kaugā malie. Koia ʼe feala hau falala ki te fakamatala ʼo te fakatuʼuake ʼae neʼe hoko ʼi te lakaga ʼaia, koteʼuhi ʼe tuʼu ʼi te Folafola ʼa te ʼAtua, ia te Tohi-Tapu. Pea neʼe tokolahi natou ʼae neʼe sisio mata ki ai.—Lau ia Luka 7:11-15.
Neʼe toe fakatuʼuake foki e Sesu ia tona kaumeʼa ko Lasalo, ʼae neʼe kua ʼaho fa ia tana mate. ʼE feala hau falala ki te fakamatala ʼo te ʼu gaue ʼae neʼe fakahoko e Sesu ʼi te ʼaho ʼaia, koteʼuhi neʼe toe hahaʼi ia natou ʼae neʼe sisio mata ki ai.—Lau ia Soane 11:39-45.
He koʼe neʼe fakatuʼuake e Sesu ia he hahaʼi mai te mate?
Neʼe ko te ʼofa ʼae neʼe ina uga ai ia Sesu ke ina fakatuʼuake ia he hahaʼi mai te mate. Pea tahi, neʼe ina fakahoko te faʼahi ʼaia ke iloʼi ai e te hahaʼi neʼe ina maʼu ia te malohi ki te mate, mai tana Tamai, ia te Tupuʼaga ʼo te maʼuli.—Lau ia Soane 5:21, 28, 29.
ʼAki ia te ʼu fakatuʼuake ʼae neʼe fakahoko e Sesu, ʼe tou tui papau ai ki ʼana fakapapau ʼo ʼuhiga mo te ka haʼu. ʼE ina fakatuʼuake anai ia he toe hahaʼi tokolahi, ʼe kau ai ia te kau heʼe faitotonu ʼae neʼe heʼeki natou iloʼi ia te ʼAtua moʼoni. Pea ʼe natou maʼu anai ia te fealagia ʼae ke natou iloʼi mo ʼoʼofa kia Sehova ʼAtua.—Lau ia Gaue 24:15.