Tou Fakafetaʼi Kia Sehova Pea Mo Maʼu Tapuakina

1. He koʼe ʼe tou fakafetaʼi kia Sehova?

ʼE FOAKI mai e Sehova “te me’a ’ofa lelei fuli pea mo te molaga haohaoa fuli.” (Sakopo 1:17, MN) Ko ia ko totatou Tauhi Ovi ʼofa, pea ʼe tokaga ia ki te ʼu meʼa ʼae ʼe aoga kia tatou. (Pesalemo 23:1-3) ʼI tona fakahagatonu, ko ʼatatou fakafetaʼi ʼe tuha mo Sehova. Pea ko he ‘holaʼaga mo he malohi,’ tafitō ʼi te ʼu temi ʼae ʼe tou lotomamahi ai. (Pesalemo 46:2) Koia ʼe tou manatu tahi anai mo te tagata faipesalemo ʼae neʼe ina tohi fenei: “Kotou fakafetaʼi kia Sehova, koteʼuhi ʼe agalelei ia ia, pea ko tona lotoʼofa ʼe heʼe gata anai ia.”—Pesalemo 106:1, MN.

2, 3. (1) Kotea te ʼu tuʼutamaki ʼo tatatou liliu ʼae ʼo maʼuligalo? (2) Kotea te ʼu fehuʼi ʼae ka tou talanoa anai ki ai ʼi te alatike ʼaeni?

² He koʼe ʼe tonu ke tou lotofakafetaʼi kia Sehova? Ohage ko tona fakakikite, ko te hahaʼi ʼo te ʼu aho fakamuli kua natou maʼuligalo ʼaupito. (2 Timoteo 3:2) Tokolahi ʼe mole natou fakafetaʼi ki te ʼu meʼa lelei ʼae neʼe fai e Sehova maʼa natou. ʼE tou maʼuʼuli nei ʼi he malama ʼe manumanū koloa, ʼe ina uga te toko lauʼi miliona hahaʼi ke natou toʼo he ʼu meʼa ʼe mole ʼaoga kia natou. Ki muli age, tokolahi ʼe mole natou feʼaugaʼia ia te ʼu meʼa ʼae kua natou maʼu. Ohage ko te kau Iselaele ʼo te temi mua, ʼe feala ke tou maʼuligalo mo meʼa noaʼi ʼotatou tapuakina pea mo ʼatatou felogoʼi lelei ʼae mo Sehova.—Pesalemo 106:7, 11-13.

³ Tou toe fakakaukauʼi ia te ʼu aluʼaga ʼe feala ke hoko moka tou tau mo he ʼu faigataʼaʼia. ʼI te lahi fau ʼo totatou lotomamahi, ʼe feala ke tou tokakaga lahi age ki ʼotatou faigataʼaʼia ʼi ʼotatou tapuakina. (Pesalemo 116:3) ʼE feafeaʼi hatatou lotofakafetaʼi tuʼumau? ʼE tou lava taupau feafeaʼi ia he manatu ʼe lelei logo la te ʼu faigataʼaʼia? Tou vakaʼi te faʼahi aia.

SEHOVA “NEE KE LIULIUGA AU GAUE”

4. ʼE tou lava taupau feafeaʼi ia tatatou lotofakafetaʼi kia Sehova?

⁴ Ke tou taupau tatatou lotofakafetaʼi kia Sehova, ʼe ʼaoga ki ai he ʼu faiga. ʼUluaki, ʼe tonu ke tou manatuʼi ia te ʼu tapuakina ʼae neʼe foaki mai e Sehova kia tatou takitokotahi. ʼOsi ʼaia, ʼe tonu ke tou metitasio ki te ʼu tapuakina ʼaia, ʼae ʼe ha ai ia te ʼofa ʼo te ʼAtua kia tatou. Neʼe toe fai e te tagata faipesalemo ia te faʼahi aia, pea neʼe ʼofolele ki te ʼu meʼa taulekaleka ʼae neʼe fai e Sehova maʼa ia.—Lau ia Pesalemo 40:6; 107:43.

5. Kotea ia te ako ʼe tou taʼofi mai te apositolo ko Paulo ʼo ʼuhiga mo te lotofakafetaʼi?

⁵ ʼE feala ke tou ako ke tou lotofakafetaʼi kia Sehova ʼaki tatatou vakaʼi ia te faʼifaʼitaki ʼa te apositolo ko Paulo. ʼE tou iloʼi neʼe metitasio ki ʼona tapuakina koteʼuhi neʼe fakafetaʼi liuliuga ki te ʼAtua ʼi te faikole. Neʼe fakamoʼoni ia Paulo neʼe ko ia “ko he tagata laukovi ki te Atua, ko he tagata fakataga, ko he tagata pauu.” Pea neʼe lotofakafetaʼi ki te ʼAtua mo Kilisito ʼi tanā manavaʼofa ki ai, mo tanā foaki age ia te pilivilesio ʼae ke fakamafola ki ʼihi logo la ia te ʼu aga ʼae neʼe ina fai. (Lau ia 1 Timoteo 1:12-14.) Neʼe toe lotofakafetaʼi lahi ia Paulo ki ʼona tehina mo tuagaʼane Kilisitiano, pea neʼe tautau fakafetaʼi kia Sehova ki ʼonatou kalitate matalelei pea mo tanatou tauhi agatonu. (Filipe 1:3-5, 7; 1 Tesalonika 1:2, 3) ʼI te ʼu temi ʼae neʼe felaveʼi ai ia Paulo mo te ʼu faigataʼaʼia, neʼe foimo fakafetaʼi atu aipe kia Sehova ʼuhi ko te tokoni ʼa te ʼu tehina mo tuagaʼane. (Gaue 28:15; 2 Kolinito 7:5-7) Koia ʼe mole tou punamaʼuli ai ki te fakalotomalohiʼi fenei e Paulo ia te kau Kilisitiano: “Kotou loto fakafetai . . . pea mo fetokoniaki . . . aki ni pesalemo, mo ni katiko, pea mo ni hiva fakalaumalie, o hiva ki te Atua.”—Kolose 3:15-17.

ʼE TOKONI MAI TE METITASIO MO TE FAIKOLE KE TOU TAUPAU IA TE LOTOFAKAFETAʼI

6. He koe ʼe ke lotofakafetaʼi kia Sehova?

⁶ ʼE tou lava faʼifaʼitakiʼi feafeaʼi ia Paulo? ʼAki tatatou metitasio ki te ʼu meʼa ʼae neʼe fai e Sehova maʼa tatou takitokotahi. (Pesalemo 116:12) Kotea anai tau tali mo kapau ʼe fehuʼi atu e he tahi, “Ko te ʼu tapuakina fea ʼae mai ia Sehova ʼe ke lotofakafetaʼi ki ai?” ʼE ke tali anai koa ko ʼau felogoʼi lelei ʼae mo Sehova? Peʼe ko te fakamolemole ʼo ʼau agahala ʼuhi ko te sakilifisio faitotogi ʼa Kilisito? Peʼe ke talanoa anai koa ki te ʼu tehina mo tuagaʼane Kilisitiano ʼae neʼe tokoni atu ʼi te ʼu temi faigataʼa? Peʼe ko tau maʼu hou ʼohoana mo hau fanau? Koia tou toʼo he temi moʼo metitasioʼi ia te ʼu tapuakina ʼaia mai te ʼAtua. Pea ʼe ina uga anai koe ke ke fakafetaʼi kia te ia ʼi te ʼaho fuli.—Lau ia Pesalemo 92:2, 3.

7. (1) He koʼe ʼe tonu ke tou fakafetaʼi kia Sehova ʼi ʼatatou faikole? (2) Kotea ia te ʼu fua lelei ʼo tau fakafetaʼi kia Sehova ʼi te faikole?

⁷ Ka tou metitasio ki ʼotatou tapuakina fuli, pea ʼe tou fia fakafetaʼi anai kia Sehova ʼi te faikole. (Pesalemo 95:2; 100:4, 5) Ko ʼihi hahaʼi ʼe natou faikole pe ki te ʼAtua moʼo kole he ʼu meʼa. Kae ko Sehova ʼe fiafia moka tou fakafetaʼi ʼi ʼatatou faikole ki te ʼu meʼa ʼae neʼe kua tou maʼu. ʼI te Tohi-Tapu, ʼe lahi ia te ʼu faʼifaʼitaki ʼa te ʼu kaugana ʼa te ʼAtua neʼe natou fakafetaʼi kia te ia ʼi te faikole, ohage la ko Ana mo Esekiasi. (1 Samuele 2:1-10; Esaia 38:9-20) Koia faʼifaʼitakiʼi tanā lotofakafetaʼi pea mo ke fakafetaʼi kia Sehova ki te ʼu meʼa ʼae neʼe ina fai maʼa koe. (1 Tesalonika 5:17, 18) ʼI tau fai te faʼahi ʼaia, ʼe ke malohi anai pea ʼe tuputupu anai tou ʼofa ʼae ki te ʼAtua pea ʼe ke liliu anai ko hona kaumeʼa.—Sakopo 4:8.

8. Kotea ʼae ʼe feala ke tupu ai hatatou maʼuligalo?

⁸ Kapau ʼe mole tou tokakaga, ʼe feala ke puli ai tatatou lotofakafetaʼi ki te ʼu meʼa ʼofa lelei mai ia Sehova. Kotea tona tupuʼaga? Koteʼuhi ʼe tou agahala pea ʼe tou maʼu mai ʼatatou ʼuluaki matuʼā ia te maʼuligalo. Neʼe foaki e Sehova kia Atama mo Eva ia he palatiso pea mo tokaga ki te ʼu meʼa ʼae neʼe ʼaoga kia naua. Pea neʼe feala ke nā maʼuʼuli heʼe gata ʼi te tokalelei. (Senesi 1:28) Kaʼe neʼe mole nā leleiʼia ʼonā tapuakina. Neʼe nā manumanū pea neʼe nā holi ki he ʼu meʼa ʼe lahi age. Ki muli age, neʼe puli fuli te ʼu lelei ʼae neʼe nā maʼu. (Senesi 3:6, 7, 17-19) ʼE tou maʼuʼuli ʼi he malama ʼe maʼuligalo, koia ʼae ʼe feala ai hatatou liliu ʼo maʼuligalo ʼo ʼuhiga mo te ʼu meʼa fuli ʼae neʼe fai e Sehova maʼa tatou. ʼE feala ke mole kei tou lotofakafetaʼi ki tatatou fakakaumeʼa ʼae mo te ʼAtua, peʼe ko tatatou pilivilesio ʼae ko te kau ki te fale tau tehina fakamalamanei. Pea ʼe feala ke fakaleluʼi tatou e te ʼu meʼa ʼo te malama ʼaeni. (1 Soane 2:15-17) Ke tou tekeʼi te hele ʼaia, ʼe tonu ke tou metitasio ki te lahi ʼo ʼotatou tapuakina pea mo fakafetaʼi tuʼumaʼu ki te ʼAtua ki te pilivilesio ʼae ko te kau ki tana hahaʼi.—Lau ia Pesalemo 27:4.

MOKA TOU TAU MO HEʼU FAIGATAʼAʼIA

9. Moka tou tau mo he ʼu faigataʼaʼia, he koʼe ʼe tonu ke tou metitasio ki ʼotatou tapuakina?

⁹ Ka tou maʼu ia te lotofakafetaʼi, ʼe tokoni mai anai ke tou utakiʼi ia te ʼu faigataʼaʼia. ʼE feala ke tou mafasia ʼuhi ko he ʼu aluʼaga mamahi ʼe ina fetogi fakafokifa ia totatou maʼuli, ohage la ko he ʼohoana ʼe hala ki tuʼa, he mahaki ʼe kovi, he mate ʼa he tahi neʼe tou ʼoʼofa ai, peʼe ko he ʼu maumau ʼa he tuʼutamaki fakanatula. Ko takita metitasio ki te ʼu tapuakina ʼa Sehova, ʼe ina foaki mai he fakalotofimalie pea mo te malohi ke tou maʼu ia te faʼa kataki. Tou vakaʼi he ʼu aluʼaga neʼe hoko.

10. Neʼe fua lelei feafeaʼi kia Irina ia tana metitasio ki ʼona tapuakina?

¹⁰ Ko Irina ʼe ko he pionie katoa ʼi te potu noleto ʼo Amelika, neʼe ʼohoana mo he tagata ʼafeā neʼe hala ki tuʼa pea mo ina liakī ia ia mo tanā ʼu fanau.a (Vakaʼi te kiʼi nota.) Kotea ʼae neʼe tokoni kia Irina ke hoko atu tana tauhi agatonu kia Sehova? ʼE ina ui fenei: “ ʼE au fakafetaʼi ki te tokaga moʼoni ʼa Sehova kia au. ʼI taku filifili ke au lau ʼoku tapuakina ʼi te ʼaho fuli, ʼe feala ke au mahino ai ki te pilivilesio ʼae ʼe au maʼu ke iloʼi au mo ʼofainaʼi au pea mo pupui au e tatatou Tamai ʼae ʼi selo. ʼE au iloʼi ʼe mole ina liʼakina anai au.” Logo la neʼe ʼutakiʼi e Irina ia he ʼu aluʼaga mamahi ʼi tona maʼuli, kaʼe ko tana fiafia ʼe tokoni kia ia ke ina tauʼi te ʼu aluʼaga ʼaia pea mo fakamalotomalohiʼi ʼihi.

11. Kotea ʼae neʼe tokoni kia Kyung-sook ke ina tauʼi ia he mahaki ʼe kovi?

¹¹ Ko Kyung-sook, ʼe maʼuli ʼi Asia, neʼe pionie lolotoga taʼu ʼe 20 tupu mo tona ʼohoana. Fokifa pe, neʼe ina iloʼi ʼe kau ʼi te kosea ʼo te ʼatefefe pea neʼe kei toe ʼona mahina ʼe tolu peʼe ono. Logo la neʼe ina tauʼi mo tona ʼohoana ia he ʼu toe ʼahiʼahi, kaʼe neʼe nā maʼuli malolō pe. ʼE ina ui fenei: “Ko te mahaki ʼaia neʼe au lotomamahi ai. Neʼe hage kia au neʼe mole kei ʼi ai he puleʼaki, pea neʼe au mataku ʼaupito.” Kotea ʼae neʼe tokoni kia Kyung-sook ke ina tauʼi ia te faʼahi ʼaia? ʼE ina ui fenei: “ ʼI te po fuli ʼi muʼa ʼo taku alu ʼo moe, ʼe au kake ki te ʼato pea ʼe au faikole leʼo lahi kia faʼahi ʼe nima neʼe au lotofakafetaʼi ai ʼo ʼuhiga mo te ʼaho katoa. Hili ʼaia pea au logo fimalie ai, pea ʼe uga ai au ke au fakaha toku ʼofa ʼae kia Sehova.” Kotea te ʼu lelei neʼe maʼu e Kyun-sook mai ʼana faikole ʼae ʼi te po fuli? ʼE ina ui fenei: “Kua au mahino ko Sehova ʼe lagolago mai ʼi te ʼu aluʼaga faigataʼa ʼaupito pea ʼe lahi age ʼoku tapuakina ʼi ʼoku mamahi.”

12. Kotea ʼae neʼe ina fakalotofimalieʼi ia Jason hili te mate ʼo tona ʼohoana?

¹² Ko Jason, ʼe gaue ʼi te filiale ʼi Afelika, neʼe kau ʼi te selevisi temi katoa lolotoga taʼu 30 tupu. ʼE ina ui fenei: “Neʼe mate toku ʼohoana kua hili nei ki ai taʼu ʼe fitu, pea ʼe mole au lava tekeʼi ia toku lotomamahi. Ko taku manatu tuʼumau ki te aluʼaga ʼae neʼe hoko ʼi tana tauʼi ia tona kosea, ʼe fakatupu lotovaivai ʼaupito.” Kotea ʼae neʼe tokoni kia Jason ke ina tauʼi ia te faʼahi ʼaia? ʼE ina ui fenei: “ ʼI te tahi ʼaho, neʼe au manatuʼi ai he temi fakafiafia neʼe au fakatahi ai mo toku ʼohoana, pea neʼe au fakafetaʼi kia Sehova ki te suvenia ʼaia. Neʼe au logo fimalie pea au kamata fakafetaʼi tuʼumau ai kia Sehova ki te ʼu suvenia fakafiafia ʼaia. Ko taku lotofakafetaʼi neʼe ina fetogi taku faʼahiga sio ki te maʼuli. ʼE kei au lotomamahi pe ʼi te mate ʼo toku ʼohoana. Kaʼe neʼe au fakafetaʼi kia Sehova ʼo ʼuhiga mo te fiafia ʼo toku maʼuli fakataumatuʼa, pea mo te pilivilesio ʼae ke au tauhi kia te ia mo toku ʼohoana ʼae neʼe ofa ia te ia. Pea neʼe hikihiki ai ia taku faʼahiga sio ki te maʼuli.”

13. Kotea ʼae neʼe tokoni kia Sheryl ke ina katakiʼi ia te mamate ʼo te tokolahi ʼo tona famili?

¹³ ʼI te to ʼa te afā lahi Haiyan ʼi te loto fenua ʼo Philippines ʼi te fakaʼosi ʼo te taʼu 2013, ko Sheryl ʼi te temi ʼaia neʼe taʼu 13 pea neʼe teitei ke puli ʼana meʼa fuli. ʼE ina ui fenei: “Neʼe mole kei ʼi ai hoku ʼapi pea ko te tokolahi ʼi toku famili neʼe mamate.” Ko taku tamai, mo taku faʼe, pea mo ʼoku tehina mo tokolua ʼe toko tolu neʼe mamate ʼi te afā. Kotea ʼae neʼe tokoni kia Sheryl ke ina katakiʼi te tuʼutamaki ʼaia kaʼe mole ita? Ko Sheryl ʼe fakafetaʼi tuʼumau kia Sehova ʼuhi ʼae ko tana metitasio ki te ʼu tapuakina fuli ʼae ʼe ina maʼu. ʼE ina ui fenei: “Neʼe au sio ki te ʼu meʼa fuli ʼae neʼe fai ʼe te ʼu tehina mo tuagaʼane moʼo fakalotofimalieʼi pea mo fakalotomalohiʼi ia natou ʼae neʼe ʼaoga ki ai he tokoni. Neʼe au iloʼi neʼe faikole ia te ʼu tehina mo tuagaʼane ʼae ʼi te malamanei ʼo ʼuhiga mo au.” ʼE ina toe ui fenei: “ʼE au lotofakafetaʼi lahi ki toku ʼAtua ʼae ko Sehova. ʼE ina foaki tuʼumau mai te ʼu meʼa ʼae ʼe aoga kia tatou.” Io, ka tou lotofakafetaʼi ki ʼotatou tapuakina, ʼe tokoni mai ke ʼaua naʼa tou lotomamahi fau. ʼE toe tokoni mai anai ke tou katakiʼi te ʼu faigataʼaʼia kehekehe ʼae ʼe feala ke tou tau mo ia.—Efeso 5:20; lau ia Filipe 4:6, 7.

“ ʼE AU LOTO KE AU FAKAFIAFIA” IA SEHOVA

14. Ko te ʼamanaki taulekaleka fea ʼae ʼe tou maʼu? (Vakaʼi te ʼuluaki pāki.)

¹⁴ ʼI te temi muʼa neʼe lotofakafetaʼi ia te hahaʼi ʼa Sehova ki ʼonatou tapuakina. Hili ia tonatou haofaki mai ia Falaone pea mo tana kautau ʼi te Tai Kula, ko te kau Iselaele neʼe natou hiva fakafiafia ia he ʼu katiko, mo fakavikiviki pea mo fakafetaʼi kia Sehova. (Ekesote 15:1-21) Ia ʼaho nei, ko te tahi tapuakina ʼae ʼe tou fakamaʼuhigaʼi, ʼe ko tatatou iloʼi ʼae ʼe mole toe ʼi ai anai ia he mamahi. (Pesalemo 37:9-11; Esaia 25:8; 33:24) Fakakaukauʼi te meʼa ʼae ka ke logoʼi moka fakaʼauha anai e Sehova ʼona fili fuli pea mo ina fakatalitali anai tatou ʼi he malama foʼou ʼe tokalelei mo faitotonu. ʼE ko he ʼaho anai ke tou fakafetaʼi ai kia Sehova.—Apokalipisi 20:1-3; 21:3, 4.

15. Lolotoga te taʼu 2015, kotea ʼae ka tou fakatotonu ke tou fai?

¹⁵ ʼI te lolotoga ʼo te taʼu 2015, ʼe tou ʼamanaki ki he ʼu tapuakina lahi mai ia Sehova. ʼE mahino ia ʼe feala ke tou felaveʼi mo he ʼu ʼahiʼahi. Kaʼe tatau aipe pe kotea he faʼahiga aluʼaga pe ʼe hoko, ʼe tou iloʼi ʼe mole liʼakina anai tatou e Sehova. (Tetelonome 31:8; Pesalemo 9:10, 11) ʼE hoko atu pe anai tana foaki mai ia te ʼu meʼa ʼae ʼe ʼaoga kia tatou ke tou tauhi agatonu kia te ia. Tou fakatotonu malohi ke tou faʼifaʼitakiʼi ia te polofeta ko Hapakuke ʼae neʼe ina ui fenei: “Koteuhi e mole matala anai te fiki, e mole tuku anai e te vite he mea, e puli anai te fua o te oliveto, e mole tuku anai e te u gaueaga he meakai; e pupuli anai te u ovi i te u lotoa manu, pea e mole toe mau anai ni pipi i te u fale manu. Kae, e au loto ke au fakafiafia [ia Sehova], e au loto ke au fakafiafia i te Atua o toku fakamauli.” (Hapakuke 3:17, 18) Lolotoga ia te taʼu ʼaeni, ʼofa pe ke tou hoko atu ia tatatou metitasio ki ʼotatou tapuakina fuli pea mo tou lotomalohi ʼo mulimuli ki te tokoni ʼo te vaega ʼo te taʼu 2015 ʼaeni: “Kotou fakafetaʼi kia Sehova, koteʼuhi ʼe agalelei ia ia.”—Pesalemo 106:1, MN.