Ko Taku Manatuʼi Te ʼUluaki ʼOfa Neʼe Au Maʼu Ai Te Faʼa Kataki

ʼI TE mahina ʼo Sunio ʼi te taʼu 1970, neʼe au takoto ʼi te lopitali ʼi Pennsylvania, ʼi Amelika. Neʼe ko au ko he tama solia neʼe taʼu 20, pea neʼe au tau mo he mahaki kovi. Neʼe haʼu ia te afilimie tagata neʼe kua fotufotuʼa ʼo vakaʼi toku tosio ʼi te ʼu vaeluaʼi hola fuli pea neʼe hoha. ʼI te haga hifo ʼo toku tosio, neʼe au ui fenei age: “Neʼe heʼeki ke sio koa koe ki he tahi kua mate?” Neʼe lotohoha pea mo ina tali fenei mai: “Kailoa.” ʼI te temi ʼaia neʼe tonu pe ʼe au mate. Kaʼe he koʼe neʼe au nofo ʼi te lopitali? ʼE au fakamatala atu anai he koga ʼo toku maʼuli.

TE KAMATAʼAGA ʼO TAKU SOLIA

Neʼe au maʼu ia he mahaki ʼi taku gaue ʼi te fale tafa lolotoga te tau ʼi Vietnam. Neʼe au fia tokoni kia natou mahahaki, mo lavelavea pea neʼe au fakatuʼutuʼu ke au liliu ʼo toketa faitafa. Neʼe au tau atu ki Vietnam ʼi Sulio 1969. Pea neʼe tuku mai toku vahaʼa katoa ke au fakamamahani mo te ʼu hola pea mo te vevela ʼo te fenua, ohage ko natou fuli ʼae neʼe foʼofoʼou mai.

Neʼe hinoʼi au ki te lopitali ʼo te solia ʼi Mekong Delta. Hili ʼaia, neʼe tau mai te ʼu pupū neʼe fonu ai te kau lavelavea. Neʼe au leleiʼia toku fenua pea mo taku gaue, koia neʼe au fia tokoni atu aipe ki te hahaʼi ʼae ʼe matou fenua tahi. Neʼe teuteuʼi te kau lavelavea ke ʼave ki he ʼu kiʼi koga fale faitafa. ʼI te ʼu kiʼi koga fale ʼaia neʼe ʼi ai te toketa faitafa, mo te toketa faihuki fakamate pea mo afilimie ʼe toko lua neʼe natou faigaʼi te haofaki ʼo te ʼu maʼuli. Neʼe au fakatokagaʼi ʼi te ʼu pupū neʼe ʼi ai te ʼu foʼi kato ʼuli neʼe mole fakahifo. Pea neʼe ui mai ko te toega sino ʼo ʼihi kau solia. Neʼe ko te kamataʼaga ʼaia ʼo taku solia.

NEʼE AU KUMI LEVA IA TE ʼATUA

ʼI taku kei veliveli, neʼe kua au logo ki te moʼoni ʼae neʼe akoʼi e te kau Fakamoʼoni ʼa Sehova. Neʼe ako e taku faʼe ia te Tohi-Tapu mo te kau Fakamoʼoni, kaʼe neʼe mole papitema ia. Kaʼe, neʼe au leleiʼia taku kau ki te fai ʼo te ako ʼo taku faʼe. ʼI te tahi ʼaho, neʼe au fakalaka ia muʼa ʼo he Fale Fono mo taku tamai. Pea neʼe au fehuʼi fenei age: “Kotea ʼae?” Neʼe ina tali fenei mai: “ʼAua naʼa ke fakaovi ki te hahaʼi ʼaia.” Pea ʼi toku ʼofa pea mo falala ki taku tamai neʼe au mulimuli ki tana tokoni. ʼO tupu ai taku mole kei felogoʼi mo te kau Fakamoʼoni ʼa Sehova.

Hili taku mavae mai Vietnam, neʼe au mamahi ʼuhi ko te ʼu suvenia fakalotomamahi ʼae neʼe au maʼu. ʼE hage neʼe mole he tahi neʼe mahino ki te ʼu meʼa ʼae neʼe hoko moʼoni ʼi Vietnam. Kei au manatuʼi pe te ʼu fakatahitahi fakafeagai ʼae neʼe fakahigoaʼi ai e te hahaʼi ia te kau solia Amelika ko te kau faifakapo ʼuhi ko te tamaliki ʼae neʼe mamate ʼi te tau. Neʼe au logoʼi ai ʼe ʼaoga te ʼAtua ki toku maʼuli.

ʼI taku kumi leva te ʼAtua, neʼe au kamata alu ai ki te ʼu lotu kehekehe. Neʼe kei au ʼofa pe ki te ʼAtua kaʼe neʼe mole au leleiʼia te ʼu meʼa ʼae neʼe au logo ʼi te ʼu lotu ʼaia. ʼOsi ʼaia, pea au alu leva ki te Fale Fono ʼo te kau Fakamoʼoni ʼa Sehova ʼi Delray Beach, ʼi Floride. Neʼe ko te ʼAhotapu ʼo Fepualio 1971.

ʼI taku hu atu ki te Fale Fono, neʼe kua vave ʼosi te akonaki ki te kaugā malie, pea neʼe au nofo ai ki te fai ʼo Te Tule Leʼo. Neʼe mole au manatuʼi pe neʼe kotea ʼae neʼe palalau ki ai ia te fono, kaʼe neʼe au manatuʼi te fuli e te ʼu kiʼi tamaliki ia te Tohi-Tapu, ke natou maʼu ia te ʼu vaega. Neʼe malave ʼaupito kia au pea neʼe au fakalogo mo sivisivi. Pea ʼi taku hu mai ki tuʼa, neʼe fakaovi mai ia he tehina neʼe taʼu 80. Ko tona higoa ko Jim Gardner. Neʼe ina foaki mai ia te tohi La vérité qui conduit à la vie éternelle, pea ina fakalavelave mai, “ʼE ke tali leleiʼi la ia te tohi ʼaeni?” Pea neʼe ma fakatuʼutuʼu ai ki te Felianima uhu ke kamata ai haku ako.

Hili te fono ʼo te ʼAhotapu afiafi, neʼe tonu ke au gaue. Neʼe au gaue ʼi te lopitali ʼi Boca Raton, ʼi Floride. Neʼe au gaue ʼi te hola 11 poʼuli ki te hola 7 uhu. Neʼe mole hahaʼi te kau mahaki ʼi te po ʼaia, pea neʼe feala ke au lau ai te kiʼi tohi Vérité. Neʼe fakaovi mai ia he afilimie fafine ʼo toʼo ia te tohi ʼi ʼoku nima pea ina sioʼi ia te takafi pea mo kalaga fenei: “Ui mai, ʼe mole ke liliu anai ohage ko natou?” Neʼe au toe toʼo te tohi Vérité pea au ui age, “Kei au alu pe ʼi te lotomalie ʼo te tohi, kaʼe ʼe mahino papau ia ʼe au liliu anai ko he Fakamoʼoni ʼa Sehova.” Neʼe haga noa ai kia au pea au fakaʼosi ai te lau ʼo te tohi ʼi te po ʼaia.

Neʼe kamata taku ako Tohi-Tapu pea mo te tehina ko Gardner, pea neʼe au fehuʼi age “Kotea ʼae ka ta ako?” Neʼe ina tali mai, “Ko te tohi ʼae neʼe au foaki atu.” Pea au ui age, “Kua ʼosi fuli ʼi taku lau.” Pea neʼe ui mai e te tehina ko Gardner, “ʼIo, kaʼe ʼe lelei ke ta toe vakavakaʼi ia te kapite ʼuluaki.” Neʼe au punamaʼuli he neʼe lahi te ʼu faʼahi neʼe mole au iloʼi. Neʼe ina fakaha mai te ʼu vaega ʼaki taku Tohi-Tapu. Pea neʼe au ako ai ia te moʼoni ʼo ʼuhiga mo te ʼAtua, ia Sehova. ʼI te uhu ʼaia neʼe au ako mo Jim, ia kapite ʼe tolu ʼo te tohi Vérité. Pea ʼi te ʼu Felianima uhu fuli, ʼe ma ako kapite ʼe tolu. Neʼe au leleiʼia ʼaupito taku ako. Neʼe ko he toe pilivilesio lahi kia au toku akoʼi e te tehina fakanofo ʼaia ʼae neʼe ina iloʼi lelei ia Charles T. Russell.

Hili ki ai he ʼu kiʼi vahaʼa, neʼe au liliu ko he kaugā fagona ʼo te logo lelei. Neʼe mole faigafua ia te faifakamafola ʼi te ʼu ʼapi, kaʼe neʼe tokoni mai ia Jim ke au tauʼi ʼoku tuʼania. (Gaue 20:20) Pea neʼe au leleiʼia ia te faifakamafola ʼuhi ko taku gaue mo Jim. ʼE au fakaʼuhigaʼi tuʼumaʼu te faifakamafola ko he pilivilesio lahi. ʼI meʼa fakafiafia takita liliu ko he kaugā gaue ʼo te ʼAtua.—1 Kolinito 3:9.

TOKU ʼULUAKI ʼOFA ʼAE KIA SEHOVA

ʼE au fakamatala atu leva ʼi te temi ʼaeni ia he aluʼaga maʼuhiga ʼo ʼuhiga mo au. Ko toku ʼuluaki ʼofa ʼae kia Sehova. (Apokalipisi 2:4) Ko toku ʼofa ʼae kia Sehova, neʼe tokoni mai ke au tauʼi ia taku manatuʼi te ʼu mamahi ʼo te tau pea mo ʼihi atu faigataʼaia.—Esaia 65:17.

ʼE au manatuʼi ia te ʼaho makehe ʼo te taʼu 1971. Neʼe fekau’i mai ke au mavae ʼi te koga fale ʼae neʼe foaki mai e ʼaku matuʼā ke au maʼuli ai. Koteʼuhi neʼe mole loto e taku tamai ke maʼuli ai he kau Fakamoʼoni ʼa Sehova. ʼI te temi ʼaia, neʼe heʼeki lahi haku falā. Ko te lopitali neʼe ina totogi au ʼi te ʼu vahaʼa lua fuli. Pea tahi, neʼe kua au fakaʼaogaʼi te falā lahi moʼo toʼo ʼaki ʼoku mutuʼi meʼa ki te faifakamafola, koteʼuhi neʼe au fia fakafofoga leleiʼi ia Sehova. Neʼe au tanaki ia he foʼi falā kaʼe neʼe tuku ʼi he fale paʼaga ʼi Michigan, te kolo ʼae neʼe au tupu ai. Koia neʼe tonu ke au maʼuli ai ʼi taku motoka ʼi ni kiʼi ʼaho. Pea neʼe au alu ʼo maʼanu mo tele kava ʼi te ʼu fale mamaʼo ʼo te ʼu ʼuʼutuʼaga penisini.

ʼI te tahi ʼaho kaʼe kei au maʼuli ʼi taku motoka, ʼi te ʼosi pe ʼaia ʼo taku gaue ʼi te lopitali, neʼe au alu fakatomuʼa ia hola ʼe lua peʼe tolu ki te Fale Fono ʼi muʼa ʼo te fai ʼo te vahe gaue. Neʼe au nofo ʼi te tuʼa Fale Fono ke mole tokagaʼi au e he tahi. Pea neʼe ʼasi fakafokifa mai ki toku fakakaukau te ʼu aluʼaga ʼae neʼe hoko ʼi Vietnam, ia te mamanu ʼo te ʼu sino ʼae neʼe vela pea mo au sio ki te toto. ʼI toku ʼatamai, neʼe au logo pea mo sio ki te ʼu tagata tupulaga ʼae neʼe faiga mai, “ʼE mole au fia mate. ʼE mole au fia mate.” Neʼe au iloʼi ʼe natou mamate anai, kaʼe neʼe au fakalotofimalieʼi natou ke natou manatu ʼe lelei pe ia. ʼI taku heka ʼaia neʼe au lotomamahi ʼaupito.

Neʼe au faikole pea mo tagi mamahi. (Pesalemo 56:9) Pea neʼe au kamata fakakaukauʼi lelei ia te ʼamanaki ʼo te fakatuʼuake. Neʼe malave kia au, koteʼuhi ʼaki te fakatuʼuake ʼe pulihi anai e Sehova ia te ʼu mateā fuli mo te ʼu mamahi ʼae neʼe au sio ki ai pea mo ʼihi atu aluʼaga fakalotomamahi. ʼE fakatuʼuake anai e te ʼAtua ia te kau tupulaga ʼaia pea ʼe natou maʼu anai ia te faigamalie ʼae ke natou ako ia te moʼoni ʼo ʼuhiga mo Sehova. (Gaue 24:15) ʼI te lakaga ʼaia, neʼe malohi age ai ia toku ʼofa ʼae kia Sehova. Pea ʼe makehe tuʼumaʼu pe anai kia au te ʼaho ʼaia. Talu mai ai mo taku faiga ke ʼaua naʼa puli ia toku ʼuluaki ʼofa ʼae kia Sehova tafitō la mo kapau ʼe au tau mo he ʼu ʼahiʼahi pea mo he ʼu faigataʼaia.

NEʼE AGALELEI IA SEHOVA KIA AU

Lolotoga te tau, ʼe fai e te hahaʼi ni aga fakalialia. ʼO toe feia mo au. Kaʼe ko te meʼa ʼae neʼe tokoni mai neʼe ko taku metitasio ki te ʼu vaega ʼe lua ʼae neʼe au leleiʼia. Ko te ʼuluaki ko Apokalipisi 12:10, 11, ʼae ʼe ui ai kua tou malo ʼi te Tevolo, ʼaki tatatou faifakamafola pea mo te taʼataʼa ʼo te Akeno. Te lua vaega ko Kalate 2:20, ʼae ʼe fakamanatuʼi mai ai neʼe mate ia Sesu ʼuhi ko au. ʼAki te sakilifisio ʼo Kilisito, neʼe fakamolemole e Sehova ia te ʼu meʼa ʼae neʼe au fai. Koia, kua au maʼu ia he leʼo ʼo loto ʼe maʼa pea neʼe ina uga au ke au fai ia meʼa fuli moʼo tokoni ki ʼihi ke natou iloʼi ia te moʼoni ʼo ʼuhiga mo totatou ʼAtua manavaʼofa ʼae ko Sehova.—Hepeleo 9:14.

Ka au fakakaukauʼi toku maʼuli, ʼe au lotofakafetaʼi kia Sehova he neʼe tokaga tuʼumaʼu kia au. Ohage la, ʼi te ʼaho ʼae neʼe iloʼi ai e Jim ʼe au maʼuli ʼi taku motoka, neʼe pauʼi atu aipe ki he tuagaʼane neʼe ʼi ai ʼona koga fale neʼe ina fakalue. Neʼe au iloʼi neʼe fakaʼaogaʼi e Sehova ia Jim pea mo te tuagaʼane ʼaia ke au maʼu he koga meʼa ke au nofo ai. ʼE agalelei ʼaupito ia Sehova pea mo tokaga ki ʼana kaugana agatonu.

NEʼE AU AKO KE AU FAʼAFAI PEA MO PALALAU FAKAʼETEʼETE

ʼI te mahina ʼo Maio 1971, neʼe tonu ke au alu ki Michigan. Kaʼe ʼi muʼa ʼo taku mavae ʼi Floride, neʼe lahi te ʼu tohi neʼe au fakafonuʼaki te taumuli ʼo taku motoka, ʼo au alu ai ki te potu noleto. Pea ʼi muʼa ʼo taku mavae ʼi Géorgie, neʼe au tufa fuli ʼaku tohi. Neʼe au fakamafola ia te logo lelei ʼaki he faʼafai ʼi te ʼu potu fenua fuli ʼae neʼe alu ki ai. Neʼe au faifakamafola ʼi te ʼu fale pilisoni pea neʼe au tufa te ʼu kiʼi pepa lotu ki ni tagata ʼi te ʼu fale mamaʼo ʼo te ʼu maloloʼaga. Pea ʼe kei au feʼekeʼaki, pe neʼe ako e te hahaʼi ʼaia ia te moʼoni.—1 Kolinito 3:6, 7.

ʼI tona fakahagatonu, neʼe mole au palalau fakaʼeteʼete ki te hahaʼi ʼi taku kamata ako ia te moʼoni, tafitō ki toku famili. ʼI ʼihi temi, neʼe au palalau fakahagatonu. ʼI toku ʼofa mamahi ki ʼoku tehina, ia John mo Ron neʼe au fakakinauʼi naua ke nā tali te ʼu akonaki foʼou ʼae neʼe au tui ki ai pea neʼe au fai fakalelei age kia naua ki ʼamuli. Pea ʼe au haga faikole aipe ke nā tali anai ʼi he ʼaho ia te moʼoni. Talu mai ai, neʼe tokoni mai ia Sehova ke au faifakamafola pea mo faiako ʼaki he aga fakaʼeteʼete.—Kolose 4:6.

ʼE AU ʼOFA KI ʼIHI

Neʼe au fakamuʼamuʼa tuʼumaʼu ʼi toku maʼuli ʼaku felogoʼi ʼae mo Sehova. Kaʼe ʼe ʼi ai ʼihi ʼe au ʼofa mamahi ai, tafitō la ia toku ʼohoana, ia Susan. Tuʼumaʼu pe neʼe au fia maʼu hoku ʼohoana ʼe tokoni mai anai ke au haga tauhi aipe kia Sehova. Pea ko Susan neʼe ko he fafine lotomalohi mo ʼofa moʼoni kia Sehova. ʼI te tahi ʼaho neʼe au alu ai kia ia ʼi te ʼapi ʼo ʼana matuʼā ʼi Rhode Island, ʼi te temi ʼae neʼe kei ma fakatahi ai. Neʼe heka ʼi tonatou muʼa ʼapi mo lau Te Tule Leʼo pea mo tana Tohi-Tapu. Kaʼe ko te faʼahi ʼae neʼe malave kia au, neʼe ina vakaʼi ia te ʼu vaega fuli tatau aipe pe neʼe mole ko he alatike ako ʼae neʼe ina lau. Neʼe feala ai ke au mahino ʼe maʼuhiga ʼaupito kia ia ʼana felogoʼi ʼae mo Sehova. Pea neʼe ma ʼohoana ʼi Tesepeli 1971. ʼE au fakafetaʼi ʼi taku maʼu hoku ʼohoana ʼe lagolago mai. Pea ko te faʼahi ʼae ʼe au leleiʼia tafitō, ʼe ko te lahi age ʼo tona ʼofa ʼae ia Sehova ʼi tona ʼofa ʼae ia au.

Neʼe foaki mai e Sehova hamā fanau, ko tama ʼe toko lua ko Jesse pea mo Paul. ʼI te alu ʼo tonā lalahi, neʼe takitaki naua e Sehova. (1 Samuele 3:19) Neʼe maʼu e tamā fanau he ’u felogoʼi lelei mo ia pea neʼe ma fiafia ʼaupito ai. Neʼe nā tahi gaue pe kia Sehova temi katoa lolotoga taʼu ʼe 20 tupu. Pea kei hoko atu pe tanā tauhi kia Sehova heʼe nā manatuʼi te ʼuluaki ʼofa ʼae neʼe nā maʼu. Pea ʼe au toe fiameʼameʼa ʼi te ’u ʼohoana ʼo ʼoku foha ko Stephanie mo Racquel pea kua hage pe hoku ʼu ʼofafine. ʼE au fiafia ʼaupito ʼi te ʼohoanaʼi e ʼoku foha he ’u taʼahine ʼe nā ʼoʼofa kia Sehova mo tonā loto katoa pea ʼe nā fakaʼaogaʼi tonā maʼuli moʼo tauhi kia te ia.

Neʼe au gaue lolotoga taʼu ʼe 16 ʼi te kolo lahi o Rhode Island, pea neʼe au maʼu ai ʼoku kaumeʼa lelei. Kei au manatuʼi te ’u tagata ʼafeā faiva neʼe matou gaue pea ʼe au toe loto fakafetaʼi ki te ’u tagata taupau feʼoloʼaki ʼae neʼe tokoni mai ki au. Neʼe ko te pilivilesio kia au taku tauhi kia Sehova mo te ’u tagata ʼae neʼe natou taupau tonatou ʼuluaki ʼofa ʼae kia Sehova. ʼI te taʼu 1987, neʼe matou mavae ki Caroline du Nord ʼae neʼe ʼaoga lahi ai he kau faifakamafola pea neʼe matou toe maʼu aipe ʼomatou kaumeʼa lelei.a—Vakaʼi te kiʼi nota.

ʼI te mahina ʼo ʼAukusito 2002, ko Susan pea mo au neʼe ma tali te fakaafe ke ma kau ki te famili ʼo te Petele ʼae ʼi Amelika ʼi te kolo ʼo Patterson. Neʼe au gaue ʼi te Selevisi Gaue, pea ko Susan neʼe gaue ʼi te fale fo pea neʼe ina leleiʼia tana gaue. ʼI ʼAukusito 2005, neʼe au maʼu te pilivilesio ʼae ke au kau ki te Kolesi Pule, logo la neʼe au logoʼi ʼe mole au lavaʼi te gaue foʼou ʼaia. ʼI te gaue foʼou ʼaia, neʼe lahi te ’u gaue ʼe pipiki mai ki ai, pea toe lahi ai foki mo te faifolau. Neʼe ko he ’u toe maʼua kia Susan. Neʼe mole ina leleiʼia ia te fai folau ʼi te vakalele kaʼe neʼe ina fakahoko pe. Ko te ’u tokoni ʼofa ʼo te ’u ʼohoana ʼo te ’u tehina ʼae ʼe kau ki te Kolesi Pule neʼe fua lelei kia ia. Neʼe uga ai ia ia ke lagolago mai pea mo au ʼofa ai kia ia.

ʼI toku pilo ʼe lahi ai te ’u pāki matalelei ʼe fakamanatuʼi mai ai he ’u aluʼaga fakafiafia ʼo toku maʼuli. Neʼe lahi te ’u tapuakina neʼe au maʼu koteʼuhi neʼe au faiga malohi ke au toe manatuʼi toku ʼuluaki ʼofa ʼae kia Sehova.