He koʼe ʼe natou faifakamafola?

ʼE lagi ko te faʼahi ʼae ʼe ina fakakeheʼi ai natou, ʼe ko te gaue faifakamafola ʼi te ʼu ʼapi, mo te ʼu koga meʼa ʼae ʼe feʼoloʼaki mo maʼu ai te hahaʼi. He koʼe ʼe natou fai te faʼahi ʼaia?

ʼE faifakamafola ia te kau Fakamoʼoni ʼa Sehova moʼo fakakololiaʼi te ʼAtua pea mo fakaha tona huafa. (Hepeleo 13:15) ʼE natou toe fakalogo ki te fakatotonu ʼaeni ʼa Sesu Kilisito: “Koutou olo, kotou fai ni tisipulo i te u puleaga fuli, . . . kotou ako natou ki te taupau o te u mea fuli nee au fakatotonu atu kia koutou.”—Mateo 28:19, 20.

Pea tahi, ʼe natou ʼoʼofa ki ʼonatou kaiga. (Mateo 22:39) ʼE mahino ia, tokolahi ʼe kua ʼi ai tanatou lotu pea ʼe mole ko te hahaʼi fuli anai ʼae ka natou tali te logo. Kaʼe, ʼe iloʼi e te kau Fakamoʼoni ʼa Sehova ko te ʼu akonaki Fakatohi-tapu ʼe feala ke ina haofaki ai te maʼuli ʼo te tokolahi. Koia ʼae ʼe natou haga “akonaki pea mo . . . fakaha te logo lelei o Sesu-Kilisito,” ohage ko tona fai e te kau Kilisitiano ʼi te temi ʼo te kau apositolo.—Gaue 5:41, 42.

Ko te tokolahi ʼae ʼe natou lau ʼanatou tohi ʼe mole ko he kau Fakamoʼoni ʼa Sehova. Pea ko te toko lauʼi miliona ʼae ʼe ako mo natou, ʼe kau ki ʼihi lotu. Kaʼe, ʼe natou lotofakafetaʼi ki te ʼomai ʼa te kau Fakamoʼoni ʼa Sehova ʼo ʼaʼahi natou.

ʼE mahino ia, ʼe feala ke ʼi ai hakotou ʼu fehuʼi ʼo ʼuhiga mo te kau Fakamoʼoni ʼa Sehova. ʼE natou fakaafe koutou ke kotou kumi he ʼu tali ki ʼakotou fehuʼi ʼaki

• takotou fehuʼi ki he Fakamoʼoni ʼa Sehova.

• takotou olo ʼo vakaʼi tonatou tuʼasila ʼi te Neti www.jw.org/wls.

• takotou kau ki te ʼu fono ʼae ʼe mole totogi pea ʼe ava ki te hahaʼi fuli.