ʼE Feafeaʼi Hatatou Iloʼi ʼe ʼOfa Sehova Kia Tatou?

1. Kotea ʼae ʼe uga ai tatou e te apositolo ko Soane ke tou fakakaukauʼi, pea kotea tona tupuʼaga?

ʼE UGA tatou e te apositolo ko Soane ke tou toʼo he temi ke tou fakakaukauʼi te ʼofa ʼae ʼo Sehova kia tatou. Neʼe ina ui fenei ia 1 Soane 3:1: “Kotou sisio ki te lahi o te ofa ae nee foaki mai kia tatou e te Tamai.” Ko te ʼofa ʼo te ʼAtua kia tatou ʼe mole hona fakatatau. Kapau ʼe tou metitasio ki te loloto ʼo tona ʼofa pea mo tana faʼahiga fakaha mai ʼo tona ʼofa, ʼe tou fakaovi ai kia te ia pea mo toe laka age totatou ʼofa ʼae kia te ia.

2. He koʼe ʼe faigataʼa ki ʼihi hanatou mahino ʼe ʼofa ia Sehova kia natou?

² Kaʼe ʼi te manatu ʼa ʼihi, ʼe mole feala ke ʼofa te ʼAtua kia natou pea ʼe mole tokaga ia ki te hahaʼi. ʼE lagi natou ui ʼe fai pe e te ʼAtua ni lekula pea ʼe ina tauteaʼi natou ʼae ʼe mole fakalogo kia te ia. ʼUhi ko te ʼu akonaki loi, ʼe manatu ʼihi ko te ʼAtua ʼe agakovi pea ʼe mole feala hatatou ʼoʼofa kia te ia. Pea ko ʼihi, ʼe natou manatu ʼe ʼofa te ʼAtua ki te hahaʼi fuli logo pe te meʼa ʼae ʼe natou fai. Kaʼe ʼaki takotou ako te Tohi-Tapu, ʼe feala ai takotou iloʼi te moʼoni ʼo ʼuhiga mo Sehova. Ko te ʼofa, ʼe ko tona kalitate maʼuhiga ʼaia pea neʼe ina foaki mai tona ʼAlo ko he totogi maʼa koutou. (Soane 3:16; 1 Soane 4:8) Kaʼe ʼuhi ko te ʼu aluʼaga ʼae neʼe hoko ʼi tokotou maʼuli, ʼe lagi faigataʼa takotou mahino ʼe ʼofa ia Sehova kia koutou.

3. Kotea ka tokoni mai anai ke tou mahino ki te ʼofa ʼae ʼo Sehova kia tatou?

³ Ke feala hatatou mahino ki te ʼofa ʼae ʼo Sehova kia tatou, ʼe tonu muʼa ke tou mahino ko Sehova ʼae neʼe ina fakatupu tatou. Neʼe ina foaki mai te maʼuli. (Lau ia Pesalemo 100:3-5.) Ko te tupuʼaga la ʼaia ʼo te ui ʼi te Tohi-Tapu ʼo ʼuhiga mo te ʼuluaki tagata, ko te “foha o te Atua.” (Luka 3:38) Pea neʼe akoʼi tatou e Sesu ke tou fakahigoaʼi ia Sehova ko ‘tamatou Tamai ʼae ʼe ʼi selo.’ (Mateo 6:9) Koia ko Sehova ʼe ko tatatou Tamai, pea ʼe ʼofa ia kia tatou ohage pe ko te ʼofa ʼa he tamai ki tana fanau.

4. (1) Ko he Tamai feafeaʼi ia Sehova? (2) Kotea ʼae ka tou talanoa anai ki ai ʼi te alatike ʼaeni pea mo ʼae ka hoa mai?

⁴ ʼE mata faigataʼa ki ʼihi tanatou manatu ko he tamai ʼe ko he tahi ʼe ʼofa. ʼE lagi natou manatuʼi ni aluʼaga fakalotomamahi ʼi tanatou kei veliveli neʼe gaohi koviʼi ai natou e tanatou tamai. Kaʼe ʼe mole feia anai Sehova ki ʼana fanau ʼi he temi. Ko tatatou Tamai agalelei tokotahi pe ʼaia. (Pesalemo 27:10) ʼE ʼofa lahi ia pea mo tokaga kia tatou ʼi ni aluʼaga kehekehe. Pea kapau ʼe tou logoʼi ia tona ʼofa, ʼe mahino papau ia ʼe tou ʼoʼofa anai kia te ia. (Sakopo 4:8) ʼI te alatike ʼaeni, ʼe tou talanoa anai kia faʼahi ʼe fa ʼe fakaha mai ai e Sehova ia tona ʼofa kia tatou. Pea ʼi te alatike ʼae ka hoa mai, ʼe tou vakaʼi anai faʼahi ʼe fa ʼe feala ai ke tou fakaha totatou ʼofa kia Sehova.

KO SEHOVA ʼE ʼOFA MO LOTOFOAKI

5. Kotea ʼae ʼe foaki e te ʼAtua ki te hahaʼi fuli?

⁵ ʼI te kei nofo ʼa te apositolo ko Paulo ʼi Atena, ʼi Keleka, neʼe lahi te ʼu fakatata neʼe sio ki ai. Pea neʼe tui te hahaʼi ko tonatou maʼuli neʼe foaki age e ʼonatou ʼatua. Koia neʼe palalau ai ia Paulo kia natou ʼo ʼuhiga mo te “Atua ae nee ina fakatupu te malamanei mo mea fuli i ai.” Neʼe ina ui ko te ʼAtua ʼe ina ‘foaki ki te tagata fuli te maʼuli, mo te manava, mo te ʼu meʼa fuli’ pea ʼe tou ‘maʼu te maʼuli mai ia te ia.’ (Gaue 17:24, 25, 28) ʼE foaki mai e Sehova ia meʼa fuli ʼae ʼe ʼaoga ki totatou maʼuli pea ke tou fiafia ai. Kotou fakakaukauʼi muʼa te ʼu meʼa ʼae neʼe ina foaki mai ʼuhi pe ko tona ʼofa ʼae kia tatou.

6. Neʼe feafeaʼi te nofoʼaga ʼae neʼe foaki mai e Sehova maʼa tatou? (Vakaʼi te ʼuluaki pāki.)

⁶ Ohage la, neʼe teuteuʼi e Sehova maʼa tatou totatou nofoʼaga taulekaleka. (Pesalemo 115:15, 16) ʼI te ʼu kele fuli ʼae neʼe ina fakatupu, ʼe makehe pe totatou kele. Kua olo te kau popoto ki te ʼatulaulau ʼo natou iloʼi ai ʼihi atu kele. Kaʼe ʼe mole heʼeki natou maʼu he tahi age kele ʼe feala ke maʼuli ai te tagata. Neʼe mole foaki mai pe e Sehova ia meʼa fuli ʼae ʼe ʼaoga ke tou maʼuʼuli ai, kaʼe neʼe ina teuteuʼi te kele ke matalelei, ke tou maʼuli fimalie pea mo fiafia ai. (Esaia 45:18) Kapau ʼe tou fakakaukauʼi totatou nofoʼaga ʼae neʼe foaki mai e tatatou Tamai ko Sehova, ʼe tou logoʼi moʼoni ai tona ʼofa lahi ʼae kia tatou.—Lau ia Sopo 38:4, 7; Pesalemo 8:4-6.

7. ʼI tana fakatupu tatou, ʼe ha feafeaʼi ai te ʼofa moʼoni ʼo Sehova?

⁷ Neʼe fakaha mai e Sehova ia tona ʼofa ʼi hona tahi age aluʼaga. Neʼe ina fakatupu tatou mo te fealagia ʼae ke tou faʼifaʼitakiʼi ia ia. (Senesi 1:27) Ko tona fakaʼuhiga, ʼe feala hatatou logoʼi tona ʼofa pea ʼe toe feala ke tou fakaha totatou ʼofa kia te ia. ʼE iloʼi e Sehova, ʼe ko he faʼahi ʼe tou fiafia moʼoni ai. Ohage la, ʼe fiafia lahi te ʼu fanau ka natou logoʼi ʼe ʼoʼofa ʼanatou matuʼā kia natou. Tou manatuʼi totatou akoʼi ʼae e Sesu ke tou fakaovi ki tatatou Tamai ko Sehova, koteʼuhi ʼe tou fiafia moʼoni ai anai. (Mateo 5:3) ʼE ina foaki mai “te u mea fuli, ke tou fakafiafia ai.” ʼO ha lelei mai ai ia tana lotofoaki pea mo tona ʼofa lahi ʼae kia tatou.—1 Timoteo 6:17; Pesalemo 145:16.

ʼE AKOʼI MAI E SEHOVA TE MOʼONI

8. He koʼe ʼe tou loto ke akoʼi tatou e Sehova?

⁸ Ko te ʼu tamai ʼe ʼoʼofa ki ʼanatou fanau pea ʼe mole natou loto ke kakāʼi natou. Kaʼe ia ʼaho nei, tokolahi te ʼu matuʼā ʼe mole feala hanatou takitaki lelei ʼanatou fanau, koteʼuhi neʼe natou liaki te ʼu lekula ʼae ʼe maʼu ʼi te Folafola ʼa te ʼAtua. Ko te tupuʼaga la ʼaia ʼo tanatou maʼuli mamahi pea mo tanatou maʼu te ʼu manatu hala. (Taaga Lea 14:12) Kaʼe ʼe foaki e Sehova ki ʼana fanau ia te takitaki ʼae ʼe lelei tokotahi koteʼuhi ʼe ko te “Atua o te mooni.” (Pesalemo 31:6) ʼAki he lotofiafia ʼe ina akoʼi mai te moʼoni ʼo ʼuhiga mo ia. ʼE ina toe akoʼi mai mo tatatou faʼahiga tauhi ʼae kia te ia. Pea ʼe ina fakaha mai te faʼahiga maʼuli ʼae ʼe lelei age. (Lau ia Pesalemo 43:3.) ʼE ha feafeaʼi mai ia tona ʼofa ʼae kia tatou ʼi tana faʼahiga akoʼi tatou?

9, 10. (1) He koʼe ʼe fakaha mai e Sehova te moʼoni ʼo ʼuhiga mo ia? (2) Kotea ʼae ʼe ina akoʼi mai ʼo ʼuhiga mo tana fakatuʼutuʼu maʼa tatou?

⁹ Ko te ʼuluaki faʼahi ʼae ʼe fakaha mai e Sehova ʼe ko te moʼoni ʼo ʼuhiga mo ia, koteʼuhi ʼe ina loto ke tou iloʼi ia ia. (Sakopo 4:8) ʼE ina fakaha mai ia tona huafa, ʼae ʼe lahi tokotahi tona maʼu ʼi te Tohi-Tapu. ʼE toe fakaha mai e Sehova ia tona ʼulugaaga. Ka tou sioʼi ia tana fakatupu, ʼe tou ako ai ʼe mafimafi pea mo poto. (Loma 1:20) Pea ka tou lau ia te Tohi-Tapu, ʼe tou ako ai ʼe faitotonu mo ʼofa lahi kia tatou. Koia kapau ʼe tou ako ke tou iloʼi ia te ʼulugaaga ʼo Sehova, ʼe toe malohi ai ʼatatou felogoʼi mo ia.

¹⁰ ʼE toe akoʼi mai e Sehova kia tatou ia tana fakatuʼutuʼu. ʼE ina ui mai kia tatou ʼe tou kau ki tona famili. Pea ʼe ina fakamahino mai pe ʼe kotea ʼae ʼe ina loto ke tou fai, ke feala hatatou gaue mo tona famili katoa ʼi te logotahi mo te tokalelei. Ko te Tohi-Tapu ʼe ina fakaha lelei mai neʼe fakatupu tatou e te ʼAtua mo te fealagia ʼae ke tou filifili te meʼa ʼae ʼe lelei mo ʼae ʼe kovi maʼa tatou totonu. (Selemia 10:23) ʼE ina iloʼi te meʼa ʼae ʼe lelei kia tatou. Pea ʼe hoki feala pe ke tou maʼuli fimalie mo fiafia mo kapau ʼe tou tali tana pule mo tou fakalogo kia te ia. Neʼe akoʼi mai e Sehova te moʼoni maʼuhiga ʼaia, koteʼuhi ʼe ʼofa ia tatou.

11. Ko he ka haʼu feafeaʼi ʼae ʼe fakapapauʼi mai e tatatou Tamai ʼofa?

¹¹ Ko he tamai ʼofa, ʼe tuʼania ki te ka haʼu ʼo ʼana fanau. ʼE ina loto ke natou maʼuli fiafia. Kaʼe meʼa fakaʼofaʼofa, koteʼuhi tokolahi ia ʼaho nei ʼe mole natou iloʼi pe kotea ʼae ka hoko ʼi te ka haʼu, peʼe pulinoa tonatou temi ki he ʼu meʼa ʼe mole tologa. (Pesalemo 90:10) Koia ʼe tou lotofakafetaʼi ki tatatou Tamai ko Sehova, koteʼuhi neʼe ina akoʼi mai pe ʼe feafeaʼi hatatou maʼu he maʼuli fiafia ʼi te temi nei. Kaʼe ʼe mole gata ai, he neʼe ina fakapapauʼi mai he ka haʼu taulekaleka.

ʼE TAKITAKI PEA MO FAKATONUTONUʼI E SEHOVA ʼANA FANAU

12. Neʼe faiga feafeaʼi e Sehova ke tokoni kia Kaino mo Paluke?

¹² Neʼe tuʼutamakiʼia ia Kaino he neʼe ina ʼamanaki fai te meʼa ʼe kovi, kaʼe neʼe faigaʼi e Sehova ke tokoni ki ai, ʼo ina fehuʼi fenei age: “Kotea ʼae ʼe ke ita ai, pea he koʼe ʼe ke mata mamahi? Kapau ʼe ke fai te meʼa ʼae ʼe lelei, ʼe mole ke toe maʼu anai koa te ʼofa ʼo te ʼAtua?” (Senesi 4:6, 7, MN) Neʼe fakafisi ia Kaino ki te tokoni ʼa Sehova pea neʼe lotomamahi ki ʼamuli. (Senesi 4:11-13) ʼI te tahi temi, neʼe tokagaʼi e Sehova neʼe ogosia pea mo lotovaivai ia Paluke, ʼuhi ko tana faʼahiga manatu. Koia neʼe tokoni ai ia Sehova kia Paluke ke ina fetogi ʼana faʼahiga manatu. Neʼe fakalogo ia Paluke ki te tokoni ʼa Sehova pea neʼe haofaki ai tona maʼuli.—Selemia 45:2-5.

13. Kotea ʼae neʼe ako e te ʼu kaugana agatonu ʼa Sehova mai te ʼu ʼahiʼahi?

¹³ ʼE takitaki mo fakatonutonuʼi tatou e Sehova, koteʼuhi ʼe ʼofa ia tatou. ʼE ina akoʼi pea mo fakatonutonuʼi tatou mo kapau ʼe ʼaoga. (Hepeleo 12:6) ʼI te Tohi-Tapu, ʼe tou lau ai te ʼu fakamatala ʼo ʼuhiga mo ni kaugana agatonu neʼe akoʼi e Sehova. Ohage la, neʼe felaveʼi ia Sosefo, mo Moisese pea mo Tavite mo ni faigataʼaia. Neʼe nofo ia Sehova mo natou lolotoga ʼonatou ʼahiʼahi. Pea ko te ʼu faʼahi ʼae neʼe natou ako lolotoga ʼonatou ʼahiʼahi ʼaia, neʼe ʼaoga kia natou ʼi te temi ʼae neʼe foaki age ai e Sehova ʼonatou maʼua. ʼI tatatou lau ʼi te Tohi-Tapu pe neʼe lagolago mo akoʼi feafeaʼi e Sehova ia tana hahaʼi, ʼe tou logoʼi moʼoni ai ʼe ʼofa ia Sehova kia tatou.—Lau ia Taaga Lea 3:11, 12.

14. Kapau ʼe tou fai he meʼa ʼe kovi, ʼe fakaha feafeaʼi mai e Sehova tona ʼofa?

¹⁴ Logo la pe ʼe tou fai he meʼa ʼe kovi, kaʼe ʼe fakaha mai aipe e Sehova ia tona ʼofa. Kapau ʼe tou tali ia tana fakatonutonu pea mo tou fakahemala, ʼe fakamolemole lahi anai ia kia tatou. (Esaia 55:7) Kotea tona fakaʼuhiga? ʼE ui fenei e Tavite: “Ko ia ae e ina fakamolemole au agakovi fuli, ae e ina fakamauli ou mahaki fuli; Ko ia ae e ina haofaki tou mauli mai te luo, ae e ina fakakolona koe aki te agalelei mo te manavaofa; O hage ko te potu esite e mamao mai te potu uesite, e ina toe fakamamao feia foki atatou agahala ia tatou.” (Pesalemo 103:3, 4, 12) ʼE ha ʼi te ʼu palalau ʼaeni ʼa Tavite ki te lotofakamolemole ʼa Sehova, ko tatatou Tamai ʼe manavaʼofa. Ko Sehova ʼe ina fakatonutonuʼi mo takitaki tatou ʼi ni aluʼaga kehekehe. Koia ʼe kotou foimo fai koa he ʼu fetogi? ʼAua naʼa galo kia tatou, ʼe fakatonutonuʼi tatou e Sehova koteʼuhi ʼe ʼofa kia tatou.—Pesalemo 30:6.

ʼE PUIPUI TATOU E SEHOVA

15. ʼE fakaha feafeaʼi e Sehova ʼe maʼuhiga ia tana hahaʼi kia te ia?

¹⁵ Ko he tamai ʼofa, ʼe ina puipui tona kiʼi famili mai te tuʼutamaki. ʼE toe fakahoko te faʼahi ʼaia e tatatou Tamai ko Sehova kia tatou. ʼE ui fenei e te tagata faipesalemo ʼo ʼuhiga mo Sehova: “E ina taupau te u laumalie [“te ʼu maʼuli,” MN] o tana kau agatonu, pea e ina haofaki natou mai te nima o te kau agakovi.” (Pesalemo 97:10) Kotou fakakaukauʼi te faʼifaʼitaki ʼaeni: ʼE puipui fakavilivili e Sehova ia tana hahaʼi ohage pe ko takotou puipui fakavilivili ʼokotou kanoʼi mata mai te tuʼutamaki. ʼO ha lelei mai ai ʼe maʼuhiga ia tana hahaʼi kia te ia.—Lau ia Sakalia 2:8.

16, 17. Neʼe puipui feafeaʼi e Sehova ia tana hahaʼi ʼi te temi muʼa pea mo te temi nei?

¹⁶ Neʼe toe puipui e Sehova ia tana hahaʼi ʼi te temi muʼa pea mo te temi nei, ʼaki ʼana ʼaselo. (Pesalemo 91:11) Ohage la, neʼe matehi e te ʼaselo ʼe tahi ia te toko 185 000 kau solia Asilia ʼi te po pe ʼe tahi, ʼo ina haofaki ai te hahaʼi ʼa te ʼAtua. (2 Hau 19:35) ʼI te temi ʼo te kau apositolo, neʼe fakaʼateaina e te ʼu ʼaselo ia Petelo, mo Paulo pea mo ʼihi atu mai te pilisoni. (Gaue 5:18-20; 12:6-11) Neʼe heʼeki faʼa fualoa, neʼe hoko te tau fakamataku ʼi te fenua Afelika. Neʼe lahi te ʼu maveuveu ʼi te fenua ʼuhi ko te ʼu fetauʼaki, mo te kaihaʼa, mo te fakaʼalikiʼi pea mo te matematehi ʼo te hahaʼi. Logo la neʼe mole mate he tahi ʼi ʼotatou tehina mo tuagaʼane, kaʼe neʼe puli fuli ʼanatou meʼa. Kaʼe neʼe natou logoʼi fuli te ʼofa ʼo Sehova pea mo natou mahino ʼe tokaga ia kia natou. Tatau aipe pe neʼe natou tau mo ni aluʼaga fakalotomamahi, kaʼe neʼe natou fiafia aipe. Neʼe ʼaʼahi natou e te fakafofoga ʼo totatou pilo fakamalamanei pea neʼe ina fehuʼi ki te ʼu tehina mo tuagaʼane pe ʼe feafeaʼi tonatou maʼuli. Neʼe natou tali fenei age: “ʼE lelei pe matou, ʼuhi ko Sehova.”

¹⁷ ʼE moʼoni, ko ʼihi kaugana ʼa Sehova ohage ko Setefano, neʼe natou mamate ʼuhi ko tanatou nonofo agatonu. Koia ʼe mole taʼofi tuʼumaʼu e Sehova te ʼu aluʼaga ʼaia ʼe hoko. Kaʼe ʼe ina puipui fakakutuga ia tana hahaʼi ʼaki tana fakaha kia natou te ʼu faʼahiga kakā kehekehe ʼa Satana. (Efeso 6:10-12) Pea ʼe ina fakaha mai te ʼu faʼahi ʼaia ʼi te Tohi-Tapu mo te ʼu tohi mai tana kautahi. Ohage la, ʼe tou iloʼi ai te ʼu tuʼutamaki ʼo te Neti, te manako ki te paʼaga, pea mo te ʼu ʼata, te ʼu tohi peʼe ko te ʼu gaoʼi heʼe ʼaoga mo agamalohi. Koia, ʼe ha lelei mai ʼe ʼofa ia Sehova kia tatou pea ʼe ina fia puipui tatou.

KO HE TOE PILIVILESIO

18. Kotea ʼae ʼe kotou logoʼi ʼo ʼuhiga mo te ʼofa ʼae ʼo Sehova kia koutou?

¹⁸ Neʼe manatuʼi e Moisese ia te ʼu taʼu ʼae neʼe tauhi ai kia Sehova. Pea neʼe tui papau ia Moisese neʼe ʼofa Sehova ia ia, ʼo ina ui fenei ai: “Fafaga matou ke matou makona i te uhu fuli ki tou agalelei, pea e matou nonofo anai i tomatou mauli katoa i te fiafia mo te nekenekea.” (Pesalemo 90:14) Ko tatatou lava mahino pea mo logoʼi ia te ʼofa ʼo Sehova kia tatou, ʼe ko he toe tapuakina ia. Pea ʼe ko he toe pilivilesio ia te ʼofa ʼae ʼo Sehova kia tatou. ʼE tou manatu tahi mo te apositolo ko Soane ʼae neʼe ina ui fenei: “Kotou sisio ki te lahi o te ofa ae nee foaki mai kia tatou e te Tamai.”—1 Soane 3:1.