Ke Ke Tui Papau ʼe ʼOfa Ia Sehova Ia Koe

1. He koʼe neʼe ke foaki tou maʼuli kia Sehova? (Vakaʼi mo te pāki.)

ʼE KEI ke manatuʼi koa te ʼaho ʼae neʼe ke foaki ai tou maʼuli kia Sehova? Kapau neʼe ke fai te tonu ʼaia koteʼuhi neʼe kua ke iloʼi ia ia pea mo ʼofa ia te ia. Neʼe ke fakapapau kia te ia ʼe ke fakamuʼamuʼa anai tona finegalo. Pea ʼe ke haga ʼofa anai kia te ia mo tou loto katoa, mo tou maʼuli katoa, mo tou ʼatamai katoa pea mo tou malohi katoa. (Mko. 12:30) Talu mai ai mo tau fakamalohiʼi tuʼumaʼu pe tou ʼofa kia te ia. Kotea anai tau tali moka fehuʼi fenei atu e he tahi: “ ʼE ke ʼofa moʼoni koa ia Sehova?” ʼE mahino ia, ʼe ke foimo tali fenei age anai: “Ko toku ʼofa kia te ia ʼe mole hona ia fakatatau, he ʼe au ʼofa mamahi ia te ia.”

2-3. Kotea ʼe loto e Sehova ke tou tui papau ki ai? Pea kotea ka tou vakaʼi ʼi te alatike ʼaeni? (Selemia 31:3)

² Kae kotea anai tau tali moka fehuʼi fenei atu e he tahi: “ ʼE ke tui papau koa ʼe ʼofa moʼoni ia Sehova ia koe?” ʼE ke lotolotolua anai koa moka ke tali age koteʼuhi ʼe mole tuha mo koe tona ʼofa? Neʼe ui fenei e he tuagaʼane, ko tona maʼuli neʼe fakaʼofaʼofa ʼi tana kei veliveli: “ ʼE au iloʼi ʼe au ʼofa moʼoni ia Sehova. Pea ʼe au tui papau ki te fahaʼi ʼaia. Kae ʼe au tau feuiʼaki pe ʼe ʼofa moʼoni ia Sehova ia au.” ʼE ke iloʼi feafeaʼi te meʼa ʼae ʼe logoʼi moʼoni e Sehova ʼo ʼuhiga mo koe?

³ ʼE loto e Sehova ke ke tui papau ʼe ʼofa moʼoni ia koe. (Lau ia Selemia 31:3.) Fakakaukauʼi age muʼa te aluʼaga ʼaeni: Neʼe ina taki mai koe kia te ia. Pea ʼi tau foaki tou maʼuli kia te ia pea mo papitema, neʼe ina foaki atu he aluʼaga ʼe maʼuhiga ʼaupito, ʼe ko tona ʼofa agatonu. Ko tona fakaʼuhiga ʼe ʼofa mamahi ia koe, pea ʼe mole ina liʼaki anai koe ʼi he temi. ʼE ina fakaha tona ʼofa agatonu ki ʼana kaugana agatonu fuli, pea ʼe ina fakaʼuhiga ia natou takitokotahi ko hona “koloa maʼuhiga.” Koia, ʼe ke toe maʼuhiga ʼaupito kia te ia. (Mala. 3:​17, nota.) ʼE loto e Sehova ke ke tui papau ʼe ʼofa moʼoni ia koe ohage pe ko tona ʼofa ʼae ki te apositolo ko Paulo. Neʼe tui papau ia Paulo ki te fahaʼi ʼaia, koia neʼe ina tohi fenei ai: “ ʼE au tui papau ʼe mole ko te mate, peʼe ko te maʼuli, peʼe ko te ʼu ʼaselo, peʼe ko te ʼu puleʼaga, peʼe ko te ʼu meʼa ʼo te temi ʼaeni, peʼe ko te ʼu meʼa ka hoko mai, peʼe ko te ʼu malohi, peʼe ko te maʼoluga, peʼe ko te loloto, peʼe ko he tahi age meʼa neʼe fakatupu ʼe feala anai ke ina fakamavae tatou mai te ʼofa ʼo te ʼAtua.” (Loma 8:​38, 39) ʼI te alatike ʼaeni, ʼe tou vakaʼi anai pe koʼe ʼe tonu ke tou fakamalohiʼi tatatou tui papau ʼae ʼe ʼofa ia Sehova ia tatou, pea kotea ʼe feala ke tou fai moʼo fakahoko te fahaʼi ʼaia.

HE KOʼE ʼE TONU KE KE TUI PAPAU ʼE ʼOFA SEHOVA IA KOE?

4. ʼE tou lava tauʼi feafeaʼi te ʼu kaka ʼa Satana?

⁴ Ka tou tui papau ʼe ʼofa ia Sehova ia tatou, ʼe tou lava tauʼi te ʼu “kaka” ʼa Satana. (Efe. 6:​11) ʼE faiga malohi ia Satana ke mole tou tauhi kia Sehova. ʼE kau ʼi tana ʼu kaka ʼaia tana fakamafola he loi ʼe mole ʼofa ia Sehova ia tatou. ʼAua naʼa galo kia koe ko Satana ʼe ina kumi ia faigamalie fuli moʼo kakaʼi tatou. ʼE ina ʼohofi tuʼumaʼu tatou moka tou vaivai. Ohage la, ʼi te temi ʼae ʼe tou vaivai ai ʼi te faʼahi ʼo te loto mo te fakakaukau, ʼuhi ko he ʼu aluʼaga neʼe hoko ʼi muʼa atu, peʼe ko he ʼu fihifihia ʼe tou tau mo ia ʼi te temi nei, peʼe ko tatatou mole iloʼi totatou ka haʼu. (Taag. 24:10) ʼE hage ia Satana ko he laione ʼe ina kumi ke ina kai he manu kua vaivai. ʼE ina toʼo te faigamalie ʼaia kua tou lotovaivai ai ke tou lituʼa kia Sehova. Kae kapau ʼe tou fakamalohiʼi tuʼumaʼu totatou ʼofa kia Sehova, ʼe tou lava “fakafeagai” kia Satana mo ʼana kaka.​—1 Pet. 5:​8, 9; Sakp. 4:7.

5. He koʼe ʼe ʼaoga ke tou logoʼi ʼe ʼofa ia Sehova ia tatou?

⁵ Ka tou tui papau ʼe ʼofa Sehova ia tatou, pea ʼe tou fakaovi kia te ia. He koʼe ʼe tou ui te fahaʼi ʼaia? Koteʼuhi neʼe fakatupu tatou e Sehova mo te fealagia ʼae ke tou ʼoʼofa ki he tahi pea ke ʼofainaʼi tatou. Ka ʼofa he tahi ia tatou, pea ʼe toe uga ai tatou ke tou toe ʼofa ia ia. Koia, ka tou logoʼi ʼe ʼofa moʼoni ia Sehova ia tatou, pea ʼe toe malohi age anai totatou ʼofa kia te ia. (1 Soa. 4:​19) Pea tahi, kapau ʼe malohi totatou ʼofa kia te ia, pea ʼe toe malohi age anai tona ʼofa kia tatou. Pea ʼe ha te moʼoni ʼaia ʼi te vaega ʼaeni: “Kotou fakaovi ki te ʼAtua, pea ʼe fakaovi atu anai kia koutou.” (Sakp. 4:8) ʼE feafeaʼi hatatou fakamalohiʼi tatatou tui ʼae ʼe ʼofa Sehova ia tatou?

ʼE FEAFEAʼI HAU TUI PAPAU ʼE ʼOFA SEHOVA IA KOE?

6. Kapau ʼe mole tou tui papau ʼe ʼofa Sehova ia tatou, kotea ʼae ʼe feala ke tou kole kia te ia?

⁶ Faikole tuʼumaʼu mo kole ke tokoni atu ke ke mahino pe ʼe ʼofa moʼoni ia koe. (Luka 18:1; Loma 12:12) Kole kia Sehova ke tokoni atu ke ke maʼu tana faʼahiga sio ʼo ʼuhiga mo koe. ʼE feala tau fai te fahaʼi ʼaia tuʼa lahi ʼi te ʼaho. ʼE moʼoni, ka tauteaʼi kita e tokita loto, pea ʼe faigataʼa takita tui ʼe ʼofa moʼoni ia Sehova ia kita. Kae ke ke manatuʼi ʼe maʼoluga age ia Sehova ʼi tou loto. (1 Soa. 3:​19, 20) ʼE ina iloʼi lelei age ia koe. ʼE sio ki te meʼa ʼae ʼe mole feala hau sio ki ai. (1 Sam. 16:7; 2 Klk. 6:​30) Koia, ʼaua naʼa ke tuʼania ʼi te “avahi” ʼo tou loto kia te ia, pea mo kole ke tokoni atu ke ke tui papau ʼe ʼofa ia koe. (Pes. 62:8) Pea hili tau faikole kia te ia, ʼe maʼuhiga ke ke fai te ʼu aluʼaga ʼae ka hoa mai.

7-8. ʼE fakalotofimalieʼi feafeaʼi tatou ʼi te ʼu Pesalemo ʼo ʼuhiga mo te ʼofa ʼo Sehova kia tatou?

⁷ Falala ki te meʼa ʼae ʼe ui atu e Sehova. ʼE feala tau falala ki te ʼu meʼa ʼae neʼe tohi e te ʼu tagata faitohi ʼo ʼuhiga mo ia koteʼuhi ʼe haʼu te ʼu folafola ʼaia mai ia te ia. Neʼe talanoa ia Tavite ʼi hana Pesalemo ki te agalelei ʼo Sehova. Neʼe ina ui fenei: “ ʼE ovi ia Sehova kia natou ʼae ʼe lotomamahi, ʼe ina haofaki ia natou fuli ʼae ʼe lotovaivai.” (Pes. 34:18.) Ka ke lotovaivai mo lotomamahi, ʼe feala ke ke logoʼi ʼe mole lotomahino atu he tahi kia koe pea ʼe mole feala ke tokoni atu. Kae ʼe fakapapau atu e Sehova, ʼe nofo ovi kia koe ʼi te ʼu lakaga ʼaia he ʼe ina iloʼi ʼe ʼaoga lahi kia koe tana tokoni. Neʼe toe ui fenei e Tavite ʼi tana tahi Pesalemo: “Tanaki ʼoku loʼimata ʼi tau ʼaiʼaga vai.” (Pes. 56:8) Ka ke mamahi ʼe sio ia Sehova. ʼE tokaga fakamalotoloto kia koe pea mo te ʼu meʼa ʼae ʼe ke logoʼi. ʼE hage pe ʼe ina tanaki ʼou loʼimata pea ʼe natou maʼuhiga kia te ia. ʼI te temi muʼa, neʼe maʼuhiga ki te tagata faifolau te vai ʼae ʼi tana ʼaiʼaga vai. ʼO toe feia pe mo ʼou loʼimata, ʼe toe maʼuhiga ʼaupito kia Sehova. ʼE tou toe lau fenei ia Pesalemo 139:3: “Kua ke [Sehova] mahani pe ki ʼoku ala fuli.” ʼEi, ʼe sio ia Sehova ki ʼau gaue fuli, kae ʼe ina tokagaʼi tafito pe ʼau gaue lelei. (Hep. 6:​10) Kotea tona tupuʼaga? Koteʼuhi ʼe ina leleiʼia mo maʼuhiga kia te ia te ʼu faiga ʼae ʼe ke fai moʼo fakafiafiaʼi tona loto.a

⁸ ʼAki te ʼu vaega fakalotofimalie ʼaia pea mo ʼihi atu vaega feia, ʼe hage pe ʼe ui atu e Sehova kia koe: “ ʼE au loto ke ke iloʼi ia toku ʼofa mamahi ia koe, pea mo taku tokaga moʼoni kia koe.” Kae neʼe tou vakaʼi ʼi ʼoluga, ʼe faiga ia Satana ke tou tui ki te loi ʼae ʼe mole ʼofa ia Sehova ia tatou. Koia, kapau ʼe ke lotolotolua ʼi ʼihi temi ki te ʼofa ʼo Sehova kia koe, ke ke fai te fehuʼi ʼaeni: ‘Ko ai anai ka au tui ki ai? ʼE ko “te tamai ʼo te loi” peʼe ko te “ ʼAtua ʼo te moʼoni”?’​—Soa. 8:​44; Pes. 31:5.

9. Kotea ʼae ʼe fakapapau e Sehova kia natou ʼae ʼe ʼoʼofa ia te ia? (Ekesote 20:​5, 6)

⁹ Fakakaukauʼi pe kotea ʼe logoʼi e Sehova ʼo ʼuhiga mo natou ʼae ʼe ʼoʼofa ia ia. Vakaʼi te meʼa ʼae neʼe ina ui kia Moisese pea mo te kau Iselaele. (Lau ia Ekesote 20:​5, 6.) Neʼe fakapapauʼi age e Sehova ʼe ina fakaha tuʼumaʼu pe anai tona ʼofa agatonu kia natou ʼae ʼe ʼoʼofa ia te ia. ʼE ha ʼi tana ʼu palalau ʼaia ʼe agatonu pea ʼe tou tui papau ʼe haga ʼofa pe anai ki he tahi ʼe ʼofa kia ia. (Nee. 1:5) Koia, kapau ʼi ʼihi temi ʼe ʼaoga ke ke iloʼi pe ʼe ʼofa moʼoni ia Sehova ia koe, ke ke fai te fehuʼi ʼaeni: ‘ ʼE au ʼofa koa ia Sehova?’ Pea ke ke manatuʼi te aluʼaga ʼaeni: Kapau ʼe ke ʼofa ia ia pea mo fai ia meʼa fuli moʼo fakafiafiaʼi tona loto, ʼe ke tui papau ai ʼe ʼofa moʼoni ia koe. (Tan. 9:4; 1 Ko. 8:3) Koia, kapau ʼe ke tui papau ʼe ke ʼofa ia Sehova, pea he koʼe ʼe ke lotolotolua anai ʼi tona ʼofa kia koe? Ke ke tui papau ʼe ʼofa tuʼumaʼu anai kia koe pea ʼe mole ina liʼaki anai koe ʼi he temi.

10-11. Kotea ʼe loto e Sehova ke ke manatu ʼo ʼuhiga mo te totogi? (Kalate 2:​20)

¹⁰ Fakakaukauʼi ia te totogi. Neʼe foaki e Sesu tona maʼuli ko he totogi, pea ʼe ko he meʼa ʼofa taulekaleka ʼaupito neʼe foaki e Sehova ki te hahaʼi. (Soa. 3:​16) Kae neʼe ina toe foaki koa maʼa koe te meʼa ʼofa ʼaia? ʼEi foki. Tou vakaʼi te faʼifaʼitaki ʼo Paulo. ʼI muʼa ʼo tana liliu ko he tisipulo ʼa Sesu, neʼe ina fai he ʼu agahala mamafa, pea neʼe tonu ke ina haga tauʼi ʼona vaivaiʼaga. (Loma 7:​24, 25; 1 Tim. 1:​12-​14) Kae, neʼe mahino papau kia ia ko te totogi neʼe ko he meʼa ʼofa neʼe foaki age e Sehova maʼa ia totonu. (Lau ia Kalate 2:​20.) Ke ke manatuʼi neʼe tohi e Paulo te ʼu palalau ʼaia ʼaki te takitaki ʼa Sehova. Pea ko meʼa fuli ʼe tuʼu ʼi te Tohi-Tapu neʼe tohi moʼotatou akoʼi. (Loma 15:4) ʼE ha ʼi te ʼu palalau ʼa Paulo pe kotea ʼe loto ʼe Sehova ke ke manatu ʼo ʼuhiga mo te totogi, ʼae neʼe ko hana meʼa ʼofa ʼaia maʼa koe totonu. Ka ke maʼu te faʼahiga sio ʼaia ʼo ʼuhiga mo te totogi, ʼe ke fakamalohiʼi ai anai tau tui papau ʼe ʼofa Sehova ia koe.

¹¹ ʼE tou lotofakafetaʼi lahi kia Sehova ʼi tana fekauʼi ifo ia Sesu ki te kele ke haʼu ʼo mate maʼa tatou. Kae kapau neʼe haʼu ki te kele, he neʼe ina fia fakaha te moʼoni ʼo ʼuhiga mo tana Tamai. (Soa. 18:37) Neʼe ina toe fakamahino tafito pe kotea ʼe logoʼi e Sehova ʼo ʼuhiga mo ʼana fanau.

ʼE TOKONI FEAFEAʼI ATU IA SESU KE KE TUI PAPAU ʼE ʼOFA SEHOVA IA KOE?

12. He koʼe ʼe feala ke tou falala ki te ʼu meʼa ʼae neʼe ui e Sesu ʼo ʼuhiga mo Sehova?

¹² ʼI tana ʼi te kele, neʼe fiafia ia Sesu ʼi tana fakaha pe ko ai ia Sehova. (Luka 10:22) ʼE lahi te ʼu tupuʼaga ke tou falala ai ki te ʼu meʼa ʼae neʼe ui e Sesu ʼo ʼuhiga mo tana Tamai. Pea tahi, neʼe ko ia tokotahi pe ʼae neʼe fualoa tana maʼuli fakatahi mo tana Tamai ʼe ʼi selo ʼi muʼa ʼo tana haʼu ki te kele. (Kol. 1:​15) Neʼe iloʼi mo sio mata ia Sesu ki te ʼofa mamahi ʼo tana Tamai ia ia. Neʼe toe sio mata foki ki te ʼofa mamahi ʼo Sehova ki ʼona foha mo ʼofafine ʼae ʼe agatonu kia te ia. Koia, ʼe tokoni feafeaʼi mai ia Sesu ke tou tui papau ʼe ʼofa ia Sehova ia tatou?

13. ʼE loto e Sesu ke tou maʼu ia he faʼahiga sio feafeaʼi ʼo ʼuhiga mo Sehova?

¹³ ʼE loto e Sesu ke tou maʼu tana faʼahiga sio ʼo ʼuhiga mo Sehova. ʼI te ʼu Evaselio, neʼe tuʼa 160 tupu ia tana fakahigoaʼi ia ia “Tamai.” Pea ka palalau ki ʼana tisipulo, ʼe ina fakaʼaogaʼi te ʼu kupusiga palalau ʼaeni “takotou Tamai” peʼe “takotou Tamai ʼae ʼe ʼi selo.” (Mat. 5:​16; 6:​26) ʼE ui ʼi te Tohi-Tapu ako Fakafalani ʼo ʼuhiga mo Mateo 5:​16: “Kapau neʼe fia palalau te ʼu kaugana ʼa Sehova ʼo te temi muʼa kia te ia, neʼe lahi te ʼu higoa fakatuʼulaga neʼe natou fakaʼaogaʼi, ohage la ko ‘Mafimafi,’ ‘Te Maʼoluga,’ pea mo te ‘Tupuʼaga Lahi.’ Kae neʼe tau fakahigoaʼi e Sesu te kupu ‘Tamai,’ ko he kupu ʼe mahino gafua pea mo mahani ki ai te hahaʼi. Pea ʼe ha ai te ʼu felogoi lelei ʼe maʼu e te ʼAtua mo ʼana kaugana.” Koia, ʼe tou mahino ai ʼe loto e Sesu ke tou maʼu tana faʼahiga sio ʼo ʼuhiga mo Sehova, ʼe ko he tamai ʼofa pea ʼe ʼofa mamahi ʼi ʼana fanau. Tou vakaʼi he ʼu vaega ʼe lua ʼo te ʼu Evaselio ʼe ha ai neʼe fakaʼaogaʼi e Sesu te kupu “Tamai,” pea mo tou taʼofi ai he ʼu ako.

14. Neʼe fakaha feafeaʼi e Sesu ʼe tou tahi maʼuhiga ʼaupito ki tana Tamai? (Mateo 10:​29-​31) (Vakaʼi mo te pāki.)

¹⁴ Tou vakaʼi muʼa te ʼu palalau ʼa Sesu ʼe tuʼu ia Mateo 10:​29-​31. (Lau.) Ko te ʼu misi ʼe ko he ʼu kiʼi manulele ʼe mole atolasio pea mo ʼoʼofa ia Sehova. Kae ʼe natou maʼuhiga kia Sehova he ʼe ka to he misi ki te kele, ʼe ina tokagaʼi. Koia, ʼe mole toe maʼuhiga lahi age koa kia te ia ʼana kaugana agatonu takitokotahi? ʼE mole koa la tokaga lahi age tatatou Tamai kia tatou takitokotahi? ʼE ui fenei ʼi te nota ʼo te vaega 30 ʼi te Tohi-Tapu ako Fakafalani ʼo ʼuhiga mo te kupusiga palalau “lau fuli ʼokotou fuluʼi ʼulu”: “Kapau ʼe iloʼi e Sehova ia te ʼu kiʼi fahaʼi fuli pe, ʼe tou tui papau ʼe tokaga moʼoni ki te ʼu tisipulo takitokotahi ʼa Sesu.” ʼE ha mai ai, ʼe loto e Sesu ke tou mahino ʼe tou tahi maʼuhiga ʼaupito ki tana Tamai.

15. Kotea ʼae ʼe ke ako mai te ʼu palalau ʼa Sesu ia Soane 6:​44 ʼo ʼuhiga mo tau Tamai ʼae ʼe ʼi selo?

¹⁵ Tou vakaʼi he tahi vaega ʼe fakaʼaogaʼi ai e Sesu ia te kupu “Tamai.” (Lau ia Soane 6:​44.) ʼAki he agalelei, neʼe taki mai koe ʼe tau Tamai ʼae ʼe ʼi selo ki te moʼoni. He koʼe neʼe ina taki mai koe? Koteʼuhi neʼe sio ʼe ke maʼu he ʼu kalitate matamatalelei. (Gaue 13:48) ʼE ui ʼi te nota ia Soane 6:​44 ʼi te Tohi-Tapu ako Fakafalani, ʼe lagi neʼe palalau ia Sesu ki te ʼu palalau ʼa Selemia, ʼae ko te vaega tafito ʼo te alatike: “Neʼe au taki . . . mai ia koe kia te au ʼaki toku ʼofa agatonu [peʼe, haga fakaha atu ia toku ʼofa agatonu].” (Sel. 31:3; nota; vakaʼi mo Oseo 11:4.) Fakakaukauʼi age pe kotea ia tona fakaʼuhiga. ʼE haga sio pe tatatou Tamai ʼofa ʼae ʼe ʼi selo ki te meʼa ʼae ʼe lelei kia koe, kae lagi mole ke sio ki ai.

16. (1) Kotea neʼe fia ui mai e Sesu? Pea he koʼe ʼe tonu ke tou tui ki ai? (2) ʼE ke fakamalohiʼi feafeaʼi tau tui ʼae ko Sehova ʼe ko te Tamai ʼae ʼe ʼaoga moʼoni atu kia koe? (Vakaʼi te ʼa takai “Te Tamai ʼAe ʼe ʼAoga Kia Tatou Fuli.”)

¹⁶ Ka ui e Sesu ko Sehova ʼe hage ko hatatou Tamai, ʼe hage pe ʼe ina ui fenei mai: “Ko Sehova ʼe mole pe ko haku Tamai. Kae ʼe ko tau Tamai foki la. Pea ʼe au tala atu ʼe ʼofa mamahi ia koe, pea ʼe tokaga moʼoni kia koe.” Koia, kapau ʼi ʼihi temi ʼe ke manatu ʼe mole ʼofa ia Sehova ia koe, ke ke fai te fehuʼi ʼaeni: ‘ ʼE mole tonu koa la ke au tui ki te ʼu palalau ʼa Sesu, ʼae ʼe ina iloʼi lelei age tana Tamai ia tatou, pea ʼe mole loi ʼi he temi?’​—1 Pet. 2:​22.

HAGA FAKAMALOHIʼI TAU TUI ʼAE ʼE ʼOFA SEHOVA IA KOE

17. He koʼe ʼe tonu ke tou haga fakamalohiʼi tatatou tui ʼae ʼe ʼofa ia Sehova ia tatou?

¹⁷ ʼE tonu ke tou haga fakamalohiʼi tuʼumaʼu tatatou tui ʼae ʼe ʼofa Sehova ia tatou. Neʼe tou vakaʼi ʼi ʼoluga ʼe kaka totatou fili ko Satana. Pea ʼe mole haga noa anai kia tatou, koteʼuhi ʼe ina loto ke tuku tatatou tauhi ki totatou ʼAtua. ʼE ina fakaʼaogaʼi anai ia aluʼaga fuli moʼo fakalotovaivaiʼi tatou ke mole tou tui ʼe ʼofa ia Sehova ia tatou. ʼAua naʼa tou tuku ke malo ia Satana ia tatou.​—Sopo 27:5.

18. ʼE feafeaʼi hau fakamalohiʼi tau tui ʼae ʼe ʼofa ia Sehova ia koe?

¹⁸ Kapau ʼe ke fia fakamalohiʼi tau tui ʼae ʼe ʼofa Sehova ia koe, kole tuʼumaʼu kia te ia ke tokoni atu ke ke maʼu tana faʼahiga sio ʼo ʼuhiga mo koe. Ke ke fakakaukauʼi te ʼu folafola ʼae neʼe tohi e te ʼu tagata faitohi ʼi te Tohi-Tapu ʼo ʼuhiga mo te ʼofa mamahi ʼo Sehova kia tatou. Ke ke manatuʼi ʼe ʼofa tuʼumaʼu pe anai ia Sehova ki he tahi ʼe ʼofa ia te ia. ʼAua naʼa galo kia koe te ʼu tupuʼaga ke ke fakaʼuhiga te totogi ko he meʼa ʼofa neʼe foaki maʼa koe totonu. Pea ke ke tui moka ui e Sesu ko Sehova ʼe ko tau Tamai ʼae ʼe ʼi selo. Koia, kapau ʼe fehuʼi atu e he tahi: “ ʼE ke tui papau koa ʼe ʼofa ia Sehova ia koe?” ʼe feala anai hau tali age mo he lotofalala: “ ʼEi, ʼe au tui papau au ki te fahaʼi ʼaia. Pea ʼe au fai pe anai ia meʼa fuli ʼe au lavaʼi ʼi te ʼaho fuli moʼo fakaha toku ʼofa kia te ia.”