ʼE Heʼe Gata Te ʼOfa ʼo Te ʼAtua

1-2. Kotea te ʼu manatu ʼe feala ke maʼu e te tokolahi ʼo te ʼu tehina mo tuagaʼane?

FAKAKAUKAUʼI age muʼa he vaka ʼe alu ʼi te tai, kae ʼe to he toe afā. ʼE hake pea hifo te vaka ʼuhi ko te hou ʼo te tai, pea ʼe fetaʼaki e te ʼu peau. Kapau ʼe mole li te foʼi tau, ʼe tafea anai te vaka. ʼE ko te foʼi tau pe ʼae ʼe feala ke ina taʼofi maʼu ke ʼaua naʼa tafea.

² Ka ke tau mo he toe ʼahiʼahi, ʼe ke hage pe ko te vaka ʼaia. ʼE feala ʼi ʼihi temi ke lelei pea ʼi ʼihi temi leva, ʼe mole koia ʼaia. Ohage la, ʼi te ʼaho nei ʼe ke falala ki te ʼofa mo te tokoni ʼa Sehova. Pea ala uhu ake leva, kua ke feuiʼaki pe ʼe ina iloʼi koa te meʼa ʼae ʼe ke tau mo ia. (Pes. 10:1; 13:1) Pea ʼe fai atu e hou kaumeʼa he ʼu palalau fakalotofimalie ʼo ke lotomalohi ai, kae ʼe mole fualoa ia. (Taag. 17:17; 25:11) Kae kua ke toe kamata lotolotolua ʼo ke manatu ʼe mole kei ʼofa Sehova ia koe. Kotea te “foʼi tau” ʼae ʼe tokoni atu ke ke tuʼu malohi ʼi te ʼu ʼahiʼahi? Ko tona fakaʼuhiga, kotea ʼe tokoni atu ke ke haga tui papau ʼe ʼofa mo tokoni atu ia Sehova?

3. Kotea te fakaʼuhiga ʼo te kupuʼi palalau “ ʼofa agatonu,” ʼae ʼe talanoa ki ai ia Pesalemo 31:7 mo 136:1? Pea he koʼe ʼe tou ui ko Sehova ʼe ko te faʼifaʼitakiʼaga lahi ʼaia ʼo te ʼofa agatonu? (Vakaʼi mo te pāki.)

³ Kapau ʼe ke fia tuʼu malohi ʼi te ʼahiʼahi, ʼe tonu ke ke manatuʼi tuʼumaʼu te ʼofa agatonu ʼo Sehova. (Lau ia Pesalemo 31:7; 136:1.) Ko te kupuʼi palalau “ ʼofa agatonu,” ʼe fakaʼuhiga ki te feʼofaʼofani mamahi pea mo tologa ʼa he foʼi toko lua. ʼE ko Sehova te faʼifaʼitakiʼaga lahi ʼo te ʼofa agatonu. Koia, ʼe ui ʼi te Tohi-Tapu ʼo ʼuhiga mo ia ʼe “fonu ʼi te ʼofa agatonu.” (Eke. 34:​6, 7) Pea ʼe toe ui fenei ʼi te Tohi-Tapu ʼo ʼuhiga mo Sehova: “ ʼE ke mahu ʼi te ʼofa agatonu kia natou fuli ʼae ʼe pauʼi atu kia te koe.” (Pes. 86:5) Fakakaukauʼi age muʼa koe ʼe mole ina liʼaki anai ʼana kaugana agatonu ʼi he temi. Ka ke manatuʼi ʼe agatonu ia Sehova, ʼe feala hau tuʼu malohi moka ke tau mo he ʼahiʼahi.​—Pes. 23:4.

ʼE KAU TE ʼOFA ʼO SEHOVA KIA TATOU KI TE ʼU MOʼONI TAFITO ʼO TE TOHI-TAPU

4. Kotea ʼihi moʼoni tafito ʼo te Tohi-Tapu neʼe tou ako? Pea fakamahino pe koʼe ʼe tou tui papau ki ai.

⁴ ʼE feala ke toe tokoni atu te manatu ʼaeni mo kapau ʼe ke fia tuʼu malohi ʼi he ʼahiʼahi: Ko te ʼofa ʼo Sehova ia tatou ʼe kau ki te ʼu moʼoni tafito ʼo te Tohi-Tapu. Kotea ʼe ke mahino ki ai moka ui ʼe ko he “moʼoni tafito ʼo te Tohi-Tapu”? ʼE lagi ʼe ke manatu ki te ʼu moʼoni tafito ʼae neʼe ke ako ʼi te Folafola ʼa te ʼAtua. Ohage la, neʼe ke ako ko te huafa ʼo te ʼAtua ʼe ko Sehova, ko Sesu ʼe ko te ʼAlo ʼulu tokotahi ʼo te ʼAtua. Pea neʼe ke toe ako ai ʼe mole kei iloʼi he meʼa e te kau mate, pea kua vave liliu te kele ko he palatiso ʼo maʼuli ai te tagata ʼo heʼe gata. (Pes. 83:18; Ekl. 9:5; Soa. 3:​16; Fkha. 21:​3, 4) Talu tau iloʼi te moʼoni ʼo te ʼu akonaki ʼaia, pea ʼe malohi tuʼumaʼu aipe tau tui. Kotea tona tupuʼaga? Koteʼuhi neʼe ke mahino ʼe fakatafito ki he ʼu fakamoʼoni. ʼO toe feia pe, kapau ʼe ke tui papau ko te ʼofa ʼo Sehova ia tatou ʼe ko he moʼoni tafito ʼaia ʼo te Tohi-Tapu, pea ʼe tokoni atu anai ke ke liʼaki te manatu ʼae ʼe mole tokagaʼi e Sehova te aluʼaga ʼe ke tau mo ia. Tou vakaʼi pe ʼe feafeaʼi hau maʼu te faʼahiga sio ʼaia.

5. Fakamahino pe ʼe feafeaʼi hau lava holoʼi he akonaki hala.

⁵ ʼI tau kamata ako te Tohi-Tapu, kotea ʼae neʼe tokoni atu ke ke liʼaki te ʼu akonaki hala? ʼE mahino ia, neʼe ke fakatatau te meʼa ʼae neʼe akoʼi atu e tau lotu mo ʼae neʼe ke ako ʼi te Tohi-Tapu. Ohage la, neʼe ke tui ko Sesu ʼe ko te ʼAtua mafimafi. Kae, ʼi tau ako te Tohi-Tapu, neʼe ke feuiʼaki ‘ ʼe moʼoni koa te akonaki ʼaia?’ Hili tau vakaʼi te ʼu fakamoʼoni ʼi te Tohi-Tapu, neʼe ke mahino ai ʼe hala te manatu ʼaia. Neʼe ke liʼaki ai te akonaki hala ʼaia ʼae neʼe ke tui ki ai, pea neʼe ke tui leva ki te moʼoni tafito ʼaeni ʼo te Tohi-Tapu: Ko Sesu ʼe ko “te ʼuluaki tupu ʼo meʼa fuli ʼae neʼe fakatupu,” pea ko “te ʼAlo ʼulu tokotahi ʼo te ʼAtua.” (Kol. 1:​15; Soa. 3:​18) ʼE moʼoni, ʼe feala ke hage te ʼu akonaki hala ko he ʼu “tule,” pea ʼe faigataʼa honatou holoʼi. (2 Ko. 10:​4, 5) Kae ʼi tau lava holoʼi te ʼu tule ʼaia, neʼe mole ke toe tui ki te ʼu akonaki hala ʼaia neʼe kua ke lituʼa ki ai.​—Flp. 3:​13.

6. He koʼe ʼe ke tui papau ‘ ʼe ʼofa agatonu ia Sehova ʼo talu ai’?

⁶ ʼE feala ke ke toe fai te faʼahi ʼaia mo kapau ʼe ke tau mo he ʼahiʼahi, ʼo ke lotolotolua ai ʼo ʼuhiga mo te ʼofa ʼo Sehova. Ke ke fai te fehuʼi ʼaeni: ‘ ʼE lelei koa taku faʼahiga manatu ʼaia?’ Pea ke ke fakatatau te ʼu meʼa ʼae ʼe ke lotolotolua ki ai mo te ʼu palalau ʼae ia Pesalemo 136:​1, te vaega tafito ʼo te alatike ʼaeni. He koʼe ʼe ui e Sehova ʼo ʼuhiga mo tona ʼofa ʼe “agatonu”? He koʼe ʼe ha tuʼa 26 ʼi te pesalemo ʼaia te kupusiga palalau ʼaeni “ ʼofa agatonu ʼo talu ai”? Ohage ko tatatou vakaʼi, ʼe ʼofa agatonu ia Sehova ki ʼana kaugana. Pea ʼe kau te manatu ʼaia ki te ʼu moʼoni tafito ʼo te Tohi-Tapu ʼae neʼe ke tali leleiʼi. Koia, kapau ʼe ke manatu ʼe mole hou ʼuhiga kia Sehova pea ʼe mole ke tuha mo tona ʼofa, ʼe ko he manatu hala ia. Koia, ke ke fakatotonu malohi ke ke liʼaki te manatu ʼaia ohage ko tau liʼaki ʼihi akonaki hala.

7. Tuku mai he tahi ʼu vaega Tohi-Tapu ʼe fakamoʼoni ai te ʼofa ʼo Sehova kia tatou.

⁷ ʼE lahi te tahi ʼu vaega Tohi-Tapu ʼe fakamoʼoni ai te ʼofa ʼo Sehova kia tatou. Ohage la, neʼe ui fenei e Sesu ki ʼana tisipulo: “ ʼE kotou maʼuhiga age ʼi he faga misi.” (Mat. 10:31) Pea neʼe ui totonu e Sehova ki tana hahaʼi: “ ʼE au fakamalohiʼi anai koe. ʼEi, ʼe au tokoni atu anai. ʼE au lagolago moʼoni anai kia koe ʼaki toku nima mataʼu, toku nima ʼae ʼe ina fakahoko te faitotonu.” (Esa. 41:10) ʼE ke tokagaʼi ʼe tasilo te ʼu palalau ʼaia. Neʼe mole ui e Sesu ‘ ʼE lagi ʼe kotou maʼuhiga age.’ Pea neʼe mole ui e Sehova ‘ ʼE feala ke au tokoni atu.’ Kae neʼe nā ui fenei: “ ʼE kotou maʼuhiga age” pea “ ʼE au tokoni atu anai.” Kapau ʼe ke tau mo he ʼahiʼahi ʼo ke lotolotolua ai ki te ʼofa ʼo Sehova, ʼe feala ke tokoni atu te ʼu vaega ʼaia ke ke lotofimalie pea mo tui papau ki te ʼofa ʼo tou ʼAtua kia koe. ʼE fakatafito te ʼu palalau ʼaia ki he ʼu fakamoʼoni. Kapau ʼe ke fakakaukauʼi te ʼu palalau ʼaia ʼi te faikole, ʼe uga ai anai koe ke ke toe fakaʼuhiga kia koe te ʼu palalau ʼaeni ia 1 Soane 4:​16: “Kua tou iloʼi pea mo tui ʼe ʼofa te ʼAtua ia tatou.”a

8. ʼE feafeaʼi mo kapau ʼi ʼihi temi ʼe ke lotolotolua pe ki te ʼofa ʼo Sehova?

⁸ Kae ʼe feafeaʼi mo kapau ʼi ʼihi temi ʼe ke lotolotolua pe ki te ʼofa ʼo Sehova? Ke ke fakatatau te meʼa ʼae ʼe ke logoʼi mo ʼae ʼe ke iloʼi. ʼE mole feala ke tou ui ko te ʼu meʼa ʼae ʼe tou logoʼi ʼe moʼoni age ia ʼi he ʼu fakamoʼoni ʼe tou maʼu. Koia ʼe moʼoni te ui ʼae ʼe ʼofa Sehova ia tatou pea ʼe toe fakamoʼoni ki ai te Tohi-Tapu. Kapau ʼe tou manatu ʼe mole ʼofa Sehova ia tatou, ʼe hage pe ʼe tou galoʼi tona kalitate tafito ʼae ko te ʼofa.​—1 Soa. 4:8.

FAKAKAUKAUʼI TE ʼOFA ʼO SEHOVA IA KOE

9-10. Ko te lakaga fea ʼae neʼe fai ai e Sesu te ʼu palalau ʼaeni ia Soane 16:​26, 27: “ ʼE ʼofa te Tamai ia koutou”? (Vakaʼi mo te pāki.)

⁹ ʼE lahi te ʼu faʼahi ʼe feala ke tou ako ʼo ʼuhiga mo te ʼofa ʼo Sehova. Koia, tou vakaʼi te ʼu palalau ʼaeni neʼe fai e Sesu ki ʼana tisipulo: “ ʼE ʼofa te Tamai ia koutou.” (Lau ia Soane 16:​26, 27.) Neʼe mole ui age pe e Sesu te ʼu palalau ʼaia ke natou fiafia ai. ʼE ha ʼi ʼihi vaega neʼe mole talanoa ia ki te ʼu meʼa ʼae neʼe natou logoʼi ʼi te lakaga ʼaia. Kae neʼe talanoa Sesu ia ki te faikole.

¹⁰ Neʼe hoki fakamahino age pe e Sesu ki ʼana tisipulo ʼe tonu ke natou faikole ʼaki ia ia, kae mole kia te ia. (Soa. 16:​23, 24) Neʼe maʼuhiga ʼaupito ke natou mahino ki te faʼahi ʼaia. Hili te fakatuʼuake ʼo Sesu, neʼe feala pe ke natou manatu ke natou faikole kia te ia. Neʼe natou ako ke natou iloʼi ia ia pea neʼe liliu ko tonatou kaumeʼa. Neʼe feala pe ke natou feuiʼaki kapau la ʼe ʼofa ia natou, ʼe uga ai ia ia ke ina tokagaʼi ʼanatou kole pea mo tuku ki tana Tamai. Kae neʼe ui age e Sesu ʼe mole tonu ke natou nonofo mo he ʼu fakakaukau feia. Kotea tona tupuʼaga? Koteʼuhi neʼe ina ui fenei age kia natou: “ ʼE ʼofa te Tamai ia koutou.” ʼE kau te fakamoʼoni ʼaia ki te ʼu moʼoni tafito ʼo te Tohi-Tapu ʼo ʼuhiga mo te faikole. Ke ke fakakaukauʼi ia tona fakaʼuhiga kia koe. Neʼe tokoni atu tau ako te Tohi-Tapu ke ke iloʼi pea mo ʼofa ia Sesu. (Soa. 14:21) Kae ohage pe ko te ʼu tisipulo ʼo te ʼuluaki sekulo, ʼe feala hau faikole mo he lotofalala ki te ʼAtua, he ʼe ke iloʼi ‘ ʼe ʼofa ia koe.’ ʼE ke fakaha tau tui ki te ʼu palalau ʼaia moka ke faikole tuʼumaʼu kia Sehova.​—1 Soa. 5:​14.

MANATUʼI PE ʼE TUPU KOTEA TAU LOTOLOTOLUA

11. He koʼe ʼe fiafia anai ia Satana mo kapau ʼe tou manatu ʼe mole ʼofa Sehova ia tatou?

¹¹ Kotea ʼae ʼe tupu ai tau lotolotolua ʼo ʼuhiga mo te ʼofa ʼo Sehova? ʼE feala ke tou tali ʼe tupu mai ia Satana pea ʼe moʼoni te faʼahi ʼaia. ʼE tou iloʼi ko te Tevolo ‘ ʼe ina kumi ke ina kai tatou.’ Pea ʼe mahino ia, ʼe fiafia anai mo kapau ʼe tou manatu ʼe mole ʼofa Sehova ia tatou. (1 Pet. 5:8) ʼE ʼofa Sehova ia tatou, koia neʼe ina foaki mai ai te totogi. Pea ʼe loto e Satana ke tou manatu ʼe mole tou tuha mo te totogi ʼaia. (Hep. 2:9) Kae ko ai ʼae ʼe fiafia mo kapau ʼe tou lotolotolua ki te ʼofa ʼo Sehova? Ko Satana. Pea ko ai ʼae ʼe fiafia moka ʼe tou lotovaivai ʼi te ʼu ʼahiʼahi ʼae ʼe tou tau mo ia? Ko Satana. ʼE ko hana ia agavale tana faiga ʼae ke tou lotolotolua ʼo ʼuhiga mo te ʼofa ʼo Sehova. Kae ʼe ko ia ʼae ʼe mole kei ʼofa ai ia Sehova. ʼE kau ʼi tana ʼu “kaka” ʼaia ia tana loto ʼae ke tou tui ʼe mole ʼofa Sehova ia tatou pea ʼe ina tauteaʼi tatou. (Efe. 6:​11) Koia, kapau ʼe tou mahino ki te meʼa ʼae ʼe faiga ki ai totatou fili, te Tevolo, ʼe tou fakatotonu malohi anai ke tou “fakafeagai” ki ai.​—Sakp. 4:7.

12-13. Kotea te tahi aluʼaga ʼe tupu ai tatatou lotolotolua ʼo ʼuhiga mo te ʼofa ʼo Sehova?

¹² Kotea te tahi aluʼaga ʼe tupu ai tatatou lotolotolua ʼo ʼuhiga mo te ʼofa ʼo Sehova? ʼE ko totatou ʼuhiga agahala. (Pes. 51:5; Loma 5:​12) Neʼe fakamamaʼo te tagata mai tona Tupuʼaga ʼuhi pe ko te agahala. Neʼe toe ʼi ai ʼona fua kovi kia ia ʼi te faʼahi ʼo te fakakaukau, mo te loto, pea mo te sino.

¹³ Neʼe fakatupu e te agahala he ʼu aluʼaga ʼe mole lelei ia tatou. Ohage la, ʼe tou tukugakoviʼi ia tatou totonu, mo hoha, mole tou maʼuli fimalie pea ʼe tou ufiufi. Pea ko te aluʼaga ʼaia ʼe tou logoʼi moka ʼe tou fai he agahala. Kae ʼe tou toe logoʼi te faʼahi ʼaia he ʼe tou mahino tuʼumaʼu ki totatou ʼuhiga agahala. ʼE tou iloʼi neʼe mole ko te fakatuʼutuʼu ʼaia ʼa te ʼAtua ʼi tana fakatupu te tagata ʼi te kamata. (Loma 8:​20, 21) ʼE feala pe ke tou toʼo he faʼifaʼitaki. ʼE tou iloʼi ʼe mole feala ke haʼele lelei he motoka moka pu hona foʼi teka. Pea ʼe toe feia pe, ʼe mole feala ke lelei tukupau te ʼu manatu mo te ʼu meʼa ʼae ʼe tou fai ʼuhi ko totatou ʼuhiga agahala. Koia, ʼe mole tou punamaʼuli ai moka ʼe tou manatu ʼi ʼihi temi, ʼe mole ʼofa moʼoni ia Sehova ia tatou. Kapau ʼe tou logoʼi te faʼahi ʼaia, ʼe tonu ke tou manatuʼi, ko Sehova ʼe ko ‘te ʼAtua lahi mo fakamanavahe, ʼae ʼe ina fakaha tona ʼofa agatonu kia natou ʼae ʼe ʼoʼofa kia te ia, pea mo fakalogo ki ʼana fakatotonu.’​—Nee. 1:5.

14. Ka tou fakakaukauʼi te totogi ʼae neʼe foaki mai e Sehova, ʼe tokoni feafeaʼi mai ke tou liʼaki te manatu ʼae ʼe mole ʼofa anai Sehova ia tatou? (Loma 5:8) (Vakaʼi mo te ʼa takai “Ke Ke Tokaga Ki ‘Te Malohi Kaka ʼo Te Agahala.’ ”)

¹⁴ ʼE moʼoni, ʼi ʼihi temi ʼe tou logoʼi fuli ʼe mole tou tuha mo te ʼofa ʼo Sehova. Pea ʼe moʼoni ia he ʼe mole tou tuha moʼoni mo tona ʼofa. Koia ʼae ʼe ui ai ʼe makehe tona ʼofa kia tatou. ʼE mole feala ke tou fai he meʼa ke tou tuha ai mo te ʼofa ʼo Sehova. Kae ʼe ʼuʼufi ʼatatou agahala ʼaki te totogi. Pea kapau neʼe foaki e Sehova te totogi ʼaia he neʼe ina fai pe ʼuhi ko tona ʼofa ia tatou. (1 Soa. 4:​10) Ke ke manatuʼi neʼe hifo mai ia Sesu ki te kele ʼo haofaki te kau agahala, kae mole ko he ʼu hahaʼi haohaoa. (Lau ia Loma 5:8.) ʼE mole he tahi ia tatou ʼe ina fai tuʼumaʼu te meʼa ʼae ʼe lelei, pea ʼe mahino lelei ia Sehova ki te faʼahi ʼaia. Kapau ʼe tou mahino ʼe feala ke tou lotolotolua ʼo ʼuhiga mo te ʼofa ʼo Sehova ʼuhi ko totatou ʼuhiga agahala, ʼe tou fakatotonu malohi anai ke ʼaua naʼa ina puleʼi ʼatatou manatu.​—Loma 7:​24, 25.

FILIFILI KE KE NOFO AGATONU

15-16. Kapau ʼe tou nofo agatonu kia Sehova, kotea ʼae ʼe tou tui papau ki ai? Pea kotea tona tupuʼaga? (2 Samuele 22:26)

¹⁵ ʼE loto e Sehova ke tou fai te tonu ʼae ʼe lelei, ʼo tou “pipiki kia te ia.” (Tet. 30:​19, 20) Kapau ʼe tou pipiki kia te ia, ʼe tou tui papau ʼe agatonu anai kia tatou. (Lau ia 2 Samuele 22:26.) Pea ka tou nofo agatonu kia Sehova, ʼe tou falala ki tana tokoni, tatau aipe pe kotea te aluʼaga ʼe tou tau mo ia.

¹⁶ Neʼe tou vakaʼi ʼe lahi te ʼu tupuʼaga ke tou tui papau ai ki te ʼofa ʼo Sehova kia tatou. Pea ʼe tokoni mai anai ke tou tutuʼu malohi moka tou tau mo he ʼahiʼahi. ʼE tou iloʼi ʼe ʼofa mo tokoni mai kia tatou, he ʼe ko te aluʼaga ʼaia ʼe akoʼi mai ʼi te Tohi-Tapu. Kapau ʼi ʼihi temi ʼe tou lotolotolua ki tona ʼofa kia tatou, tou fakakaukauʼi te meʼa ʼae ʼe tou iloʼi ʼe moʼoni, kae mole tou falala ki te ʼu meʼa ʼae ʼe tou logoʼi. ʼEi, tou tui papau ki te moʼoni Fakatohi-tapu ʼaeni: Ko te ʼofa agatonu ʼo Sehova ʼe heʼe gata.