MANATU TAFITŌ | ʼE TONU KOA KE TOU FAIKOLE?
He Koʼe ʼe Faikole Te Hahaʼi?
“Neʼe ko au ko he tahi ʼe gaoʼi paʼaga lahi. Neʼe au faikole ke au maʼu he toe paʼaga lahi. Kaʼe neʼe mole he temi neʼe hoko ai te faʼahi ʼaia.”—Samuel,a Kenya.
“ ʼI te fale ako, neʼe tonu ke matou ako fakaʼatamai te ʼu faikole.”—Teresa, Philippines.
“ ʼE au faikole moka au tau mo he ʼu faigataʼaia. ʼE au faikole ke fakamolemole ʼaku agahala pea mo au liliu ko he Kilisitiano ʼe lelei age.”—Magdalene, Ghana.
Ko te ʼu talamanatu ʼae neʼe fai e Samuel, mo Teresa, pea mo Magdalene, ʼe ha mai ai ʼe lahi te ʼu tupuʼaga ʼo te faikole ʼa te hahaʼi. Ko ʼihi hahaʼi ʼe natou faikole fakamalotoloto kaʼe ʼe mole feia ʼihi. Kaʼe, ko ʼihi ʼe natou faikole ki he sivi ʼi te fale ako, peʼe ke malo he kau faigaoʼi ʼe natou leleiʼia, peʼe ke natou maʼu te takitaki ʼa te ʼAtua ʼi tonatou maʼuli fakafamili peʼe ko he tahi atu ʼu tupuʼaga. Koia, ʼe ha mai ai ko te toko lauʼi teau miliona hahaʼi ʼe natou logoʼi te ʼaoga ʼae ke natou faikole. ʼI te ʼu fekumi ʼae neʼe fai, ko ʼihi ʼe mole hanatou lotu kaʼe ʼe natou faikole tuʼumaʼu.
ʼE kotou faikole koa? Kapau koia, kotea ʼae ʼe kotou kole? Kapau ʼe ko hakotou agamahani te faikole peʼe kailoa, ʼe lagi kotou feʼekeʼaki fenei: “ ʼE tonu koa ke tou faikole? ʼE fagono mai koa he tahi ki ʼatatou faikole?” ʼE ui e he tagata faitohi ko te faikole ʼe hage ko he “faʼahiga faitoʼo.” ʼE toe manatu feia mo ʼihi toketa, ʼe natou fakahigoaʼi te faikole ko he “puleʼaki moʼo fetogi he faitoʼo.” ʼE hoko faikole feia pe koa te hahaʼi? Peʼe natou maʼu koa he ʼu lelei mai tanatou fai te faʼahi ʼaia?
Kaʼe, ʼe fakaha ʼi te Tohi-Tapu, ko te faikole ʼe maʼuhiga age ia ʼi he faʼahiga faitoʼo. ʼE ui mai ai ʼe fagono moʼoni he tahi ki te ʼu faikole mo kapau ʼe tou fai ʼi hona aluʼaga ʼe lelei pea mo alu tahi mo tona finegalo. ʼE moʼoni koa te faʼahi ʼaia? Tou vakaʼi ʼona fakamoʼoni.
a Neʼe fetogi te ʼu higoa.