“E Tui Te Tagata Vale Ki Te u Mea Fuli”

TALU mai taʼu ʼe 200 tupu, ko te tokolahi neʼe mole natou tui ki te ʼu logo fuli neʼe fakamatala ʼi te sulunale. ʼI temi nei, ʼe mole feala ke tou tui ki te ʼu logo ʼae ʼe tou maʼu ʼi te Neti. Pea ʼe lahi te ʼu logo ʼe tou maʼu ʼi te Neti. ʼAki te ʼu masini foʼou, kua feala ke tou maʼu te ʼu logo ʼaia. ʼE ʼi ai te ʼu logo ʼe moʼoni pea mo ʼaoga, kaʼe ʼe toe lahi ai te ʼu logo ko te ʼu loi, ʼe mole ʼaoga pea ʼe fakatupu tuʼutamaki. Koia ʼe tonu ai ke tou tokakaga ki te ʼu meʼa ʼae ʼe tou lau. Ka fakaʼaogaʼi e ʼihi te Neti, ʼe lagi natou manatu ko te ʼu logo ʼae ʼe maʼu ai, ʼe moʼoni koteʼuhi neʼe momoli age e honatou kaumeʼa. ʼE feala pe ke natou tui ki he hisitolia logo la ʼe mata faikehe. Kaʼe ʼe fakatokaga fenei mai ʼi te Tohi-Tapu: “E tui te tagata vale ki te u mea fuli e fakaha kia ia, kae e tokaga te tagata poto ki ona lakaaga.”—Taaga Lea 14:15.

Ko te vale ʼe tui ki te ʼu meʼa fuli ʼe logo ki ai. ʼE mole tatau mo ia ʼae ʼe fakapotopoto. Kapau ʼe tou fakapotopoto, ʼe tou tokakaga pea mo tou tui pe anai ki te ʼu faʼahi ʼae ʼe tou iloʼi ko te moʼoni. Koia ʼe mole feala anai ke kakāʼi tatou pea ʼe mole tou hoko tui anai ki te ʼu hisitolia fuli ʼe tou lau ʼi te Neti, tatau aipe pe ʼe lau e te tokolahi. Kotea ʼae ka tokoni atu ke ke fakapotopoto? ʼUluaki, fai te ʼu fehuʼi ʼaeni: “Kua fakamoʼoni koa te tuʼasila ʼae ʼe maʼu ai te hisitolia ʼaeni? Peʼe ko he tuʼasila koa ʼe mole tou iloʼi tona haʼuʼaga? Neʼe kua fakaha koa ʼi he tuʼasila ʼe tuha mo te falala ʼe mole moʼoni te hisitolia ʼaia?”a (Vakaʼi te kiʼi nota.) Koia fakaʼaogaʼi tau “fakapotopoto.” (1 Petelo 5:8) Kapau ko he logo foʼou ʼe faigataʼa te tui ki ai, ʼe lagi ko he loi. Pea tahi, ka ke lau ni logo ʼe mole lelei ʼo ʼuhiga mo ʼihi, fakakaukauʼi pe ʼe ko ai ʼae ʼe ina fia maʼu te ʼu logo ʼaia. Toe fakakaukauʼi mo te tupuʼaga ʼae ʼe loto ai he tahi ke mafola te ʼu logo ʼaia.

ʼE KE FEʼAVEʼAKI TUʼUMAʼU KOA TE ʼU LOGO ʼI TE NETI?

ʼE feala ke feʼaveʼaki ʼi te Neti e ʼihi ni logo ki ʼonatou feʼilo fuli, kaʼe ʼe mole natou vakaʼi muʼa pe ʼe moʼoni te ʼu logo ʼaia. Peʼe mole natou fakakaukauʼi te ʼu nunuʼa ʼo tanatou momoli te ʼu logo ʼaia. ʼE lagi natou loto ke tokagaʼi tuʼumaʼu natou e te hahaʼi pea ʼe natou loto ke natou mumuʼa ʼi te fakamafola ʼo te ʼu logo ʼaia. (2 Samuele 13:28-33) Kaʼe ko ia ʼae ʼe fakapotopoto ʼe ina fakakaukauʼi te ʼu nunuʼa kovi ʼae ʼe feala ke hoko. Ohage la, ʼe feala ke fakatupu tuʼutamaki ki te matagafua ʼo he tahi peʼe ki he kautahi.

Ka momoli e he tahi ni logo ki ʼihi, ʼe lagi mole ina vakaʼi pe ʼe moʼoni, koteʼuhi ʼe ʼaoga ki ai he temi mo ni faiga. ʼI tana manatu, ʼe fai pe anai te faʼahi ʼaia e natou ʼae ka natou maʼu te ʼu logo. Kaʼe ʼe toe fakapuli temi foki kia natou. (Efeso 5:15, 16) Koia ʼaua tatatou feʼaveʼaki ni logo ʼe mole tou iloʼi papau pe ʼe ko he ʼu moʼoni. Kaʼe ʼe lelei age ke tou liaki te ʼu logo ʼaia mo kapau ʼe tou lakilua ki ai.

ʼE lelei ke ke fai te ʼu fehuʼi ʼaeni: “ ʼE ko haku agamahani koa te feʼaveʼaki ʼi te Neti te ʼu logo? Neʼe kua au faifakalelei koa ki ʼoku feʼilo ki te ʼu logo hala peʼe loi ʼae neʼe au momoli kia natou? Neʼe kua kole mai koa e he tahi ke tuku taku feʼaveʼaki ni logo ʼi te Neti?” Manatuʼi, kapau ʼe maʼu e ʼou kaumeʼa honatou tuʼasila ʼi te Neti, ʼe feala pe hanatou fakaʼaogaʼi. ʼE feala pe ke natou kumi tonu te ʼu faʼahi ʼae ʼe natou leleiʼia. Pea ʼe mole natou loto anai ke ke momoli age ni tuʼuga logo ʼe kau ai ni hisitolia fakakata, mo ni ʼata, pea mo ni pāki. ʼE mole ko he aga fakapotopoto foki tatatou feʼaveʼaki he ʼu nota peʼe ko te puke ʼo he ʼu akonaki.b (Vakaʼi te kiʼi nota.) Ke ke manatuʼi, ʼe lahi age pe te ʼu fua lelei ʼe maʼu e he tahi ʼe ina fai totonu ʼana fekumi, pea mo ina teuteuʼi ʼana tali ki te ʼu fono.

Kaʼe kotea ʼe tonu ke ke fai mo kapau ʼe ke maʼu ʼi te Neti he ʼu loi ʼo ʼuhiga mo te kautahi ʼo Sehova? Liakī te ʼu loi ʼaia. Pea ʼaua tau tui ki ai. ʼE mole ko hau aga fakapotopoto anai tau fia vaevae ki ʼihi te ʼu faʼahi ʼae ʼe ke lau mo kole tanatou manatu. Koteʼuhi ʼe toe lahi aipe te mafola ʼo te ʼu loi ʼaia. Kapau ʼe ke lotohoha ʼi he faʼahi neʼe ke maʼu ʼi te Neti, kole kia Sehova tona poto pea ke palalau ki he ʼu tehina kua fotufotuʼa ʼi te faʼahi fakalaumalie. (Sakopo 1:5, 6; Suta 22, 23) ʼE mole tonu ke tou punamaʼuli ki te tala ʼae e te hahaʼi ni loi ʼo ʼuhiga mo tatou. Neʼe toe loi mo te hahaʼi ʼo ʼuhiga mo Sesu. Pea neʼe ina fakatokaga ʼana tisipulo ʼe fakatagaʼi anai natou e ʼonatou fili pea ʼe natou lau anai kia natou “ni kovi kehekehe i te loi.” (Mateo 5:11; 11:19; Soane 10:19-21) Koia kapau ʼe ke fakapotopoto mo ke fakakaukau lelei, ʼe feala anai ke ke iloʼi pe ʼe loi he tahi, peʼe faiga ke ina kakāʼi ʼihi.—Taaga Lea 2:10-16.

FAKAʼAPAʼAPA KI TE HAHAʼI

ʼE tonu ke tou toe tokakaga ki tatatou fakaha ni logo ʼo ʼuhiga mo ʼotatou tehina mo tuagaʼane, peʼe ko ni aluʼaga neʼe tou logo ki ai. ʼI ʼihi temi, ʼe mole ko hotatou ʼofa anai mo kapau ʼe tou fakamafola ni logo tatau aipe pe ʼe moʼoni. (Mateo 7:12) Ohage la, ʼe mole ko he ʼofa pea ʼe mole ko he fakalotomalohi te feʼaveʼaki ʼo he logo ʼe mole lelei ʼo ʼuhiga mo ʼihi. (2 Tesalonika 3:11; 1 Timoteo 5:13) Pea ko ʼihi logo ʼe lagi mole tonu ke fakaha. Koteʼuhi ʼe lagi fia fakaha anai e te hahaʼi te logo ʼaia ʼi he tahi lakaga peʼe ʼi hona tahi age aluʼaga. Koia ʼe tonu ke tou fakaʼapaʼapa ki te tonu ʼae neʼe natou fai ʼo ʼuhiga mo te temi pea mo te faʼahiga fakaha ʼo te logo ʼaia. Kapau ʼe tou tala fakatomuʼa te logo ʼaia, ʼe feala ke fakatupu kovi ʼaupito.

Ia ʼaho nei, ʼe feala ke mafola fakavilivili te ʼu logo, tatau aipe pe ʼe moʼoni, pe ʼe ʼaoga, pe ʼe lelei peʼe kailoa. Maʼia mo kapau ʼe ke momoli he logo ki he tokotahi, kaʼe ʼe feala pe hana toe momoli ki te hahaʼi ʼi te malamanei katoa ʼi ni sekonita. Koia tekeʼi tau fia feʼaveʼaki fakavilivili he logo ki ʼou feʼilo. Logo la ko te ʼofa “e tui ia ki te mea fuli” pea ʼe mole mahalohalo, kaʼe ʼe tonu ke mole tou vavale ʼo tou tui ki te ʼu logo fuli mo te ʼu hisitolia fakafiafia. (1 Kolinito 13:7) Pea ʼe mole tou tui anai ʼi he temi ki te ʼu loi peʼe ko te ʼu lea kovi ʼo ʼuhiga mo te kautahi ʼo Sehova, mo ʼotatou tehina mo tuagaʼane ʼae ʼe tou ʼoʼofa ai. Manatuʼi ko natou ʼae ʼe natou kamata fakamafola te ʼu loi ʼaia, ʼe natou fakafiafiaʼi Satana te Tevolo, “te tamai ia o te loi.” (Soane 8:44) Koia ʼofa pe ke tou aga fakapotopoto mo tou fakakaukauʼi lelei tuʼumaʼu tatatou fakaʼaogaʼi te ʼu tuʼuga logo ʼae ʼe tou maʼu ʼi te ʼaho fuli. Ohage pe ko tona ui fenei ʼi te Tohi-Tapu: “Ko te vaega o te kau vale ko te vale, kae ko te kolona o te tagata poto ko te poto.”—Taaga Lea 14:18.