ʼAua Naʼa Koutou Kumi “Te ʼu Meʼa Noa”
1 Ia ʼaho nei, ʼe lahi te hahaʼi ʼe nātou fakaʼaogaʼi te E-mail moʼo fefaitohiʼaki. Logola ʼe lelei te faʼahi ʼaia moʼo fefakahāʼaki he ʼu hisitolia pea mo he ʼu manatu lelei ʼi te famili pea mo te ʼu kaumeʼa, kae koteā “te ʼu meʼa noa” ʼaē ʼe feala ke fefakahāʼaki mo kapau ʼe mole faka tuʼakoi te fakaʼaogaʼi ʼo te E-mail?—Taag. 12:11.
2 Te ʼu Fakatokaga ʼo ʼUhiga Mo Te E-Mail: Ko ʼihi ʼe nātou ʼui, ʼe nātou felogoi lelei age mo te kautahi ʼa Sehova, mokā fakahā age kia nātou he ʼu logo foʼou ʼaki te E-mail. Ohage la ko he ʼu fakamatala foʼou, he ʼu meʼa neʼe hoko ʼi te Petele, he ʼu fakamatala ʼo ʼuhiga mo he tuʼutāmaki peʼe ko he ʼu fakataga, ʼo feiā mo he ʼu logo ʼe mole tonu ke ʼiloʼi neʼe tala ʼi te Ako ʼo Te Minisitelio ʼo Te Puleʼaga. Ko ʼihi ʼe nātou fakahā fakavilivili te ʼu logo ʼaia, heʼe nātou loto ke ʼiloʼi ʼe ko nātou ʼaē neʼe nātou ʼuluaki tala te ʼu logo ʼaia ki tonatou ʼu kaumeʼa.
3 ʼI ʼihi temi, ko te ʼu logo ʼaē neʼe feʼāveʼaki neʼe mole totonu. Peʼe lagi neʼe faiga e he tahi ke makehe te logo ʼaē ʼe ina fakamatala, kae ʼaki te faʼahi ʼaia neʼe mole kei moʼoni tana fakamatala. Ko nātou ʼaē ʼe holi fakavilivili ke nātou fakahā te ʼu meʼa ʼaia, ʼi te agamāhani ʼe mole nātou ʼiloʼi katoa te ʼu faʼahi ʼaē ʼe nātou fia talanoa kiai. (Taag. 29:20) ʼI te tahi ʼu ʼaluʼaga, logola ʼe mata faigataʼa hakita tui ki he fakamatala, kae ʼe kita fia ʼiloʼi te fakamatala ʼaia. Ko te ʼu fakamatala loi ʼaia pea mole totonu, ʼe hage ko te ʼu “fakamatala loi,” ʼaē ʼe mole lagolago ki te tauhi fakaʼatua moʼoni.—1 Tim. 4:6, 7, MN.
4 Kapau ʼaki te E-mail, ʼe koutou toe fakamatala ki he tahi he hisitolia ʼe mole moʼoni, pea ʼe feala ke koutou kau ki te lotomamahi ʼaē ka tupu ʼaki te fakamatala ʼaia, peʼe ko te mole kei ʼiloʼi ʼo te moʼoni. ʼI te fakahā age kia Tavite te loi ʼaē kua mamate fuli tona ʼu foha, neʼe lotomamahi ʼo “ina haeʼi tona ʼu mutuʼi meʼa.” Kae ʼi tona fakahagatonu, neʼe ko tona foha pe e tahi ʼaē neʼe mate. Neʼe ko he logo fakaloto mamahi, kae ko te loi ʼaē neʼe tala age kia Tavite, neʼe ina fakaʼāsili tona lotomamahi. (2 Sam. 13:30-33) ʼE mahino ia, ʼe mole tou fia momoli anai he loi ʼi he E-mail ki totatou ʼu tēhina peʼe ko he logo ʼe fakatupu lotovaivai ai.
5 Te ʼu Hahaʼi Neʼe Fakanofo e Te ʼAtua Moʼo Faka Felogoi Mo Tatou: Tou manatuʼi ko tatatou Tāmai ʼi selo, neʼe ina fakanofo te ʼu hahaʼi moʼo faka felogoi mo tatou, ko “te tagata kaugana agatonu mo poto.” Ko te “tagata kaugana” ʼaia ʼe ko hona maʼua ke ina vakaʼi te ʼu logo ʼaē ʼe lelei ki te hahaʼi tui, pea mo te “temi totonu” ʼaē ʼe tonu ke ina fakahā ai te ʼu logo ʼaia. Ko te meʼa kai fakalaumālie ʼaia ʼe maʼu ʼi te kautahi faka teokalatike. ʼE tonu ke tou kumi logo tuʼumaʼu ki te ʼu hahaʼi ʼaia neʼe fakanofo e te ʼAtua, mo kapau ʼe tou fia maʼu he ʼu logo moʼoni, kae ʼaua naʼa tou kumi kia nātou ʼaē ʼe nātou fakaʼaogaʼi te Internet.—Mat. 24:45, MN.
6 Te Tuʼasila ʼi Te Internet: ʼE ʼi ai tatatou tuʼasila ʼe feala hakotou faitohi kiai pea mo ʼiloʼi ai te ʼu faʼahi ʼo ʼuhiga mo tatatou kautahi: www.watchtower.org. ʼI te tuʼasila ʼaia ʼe tou lava maʼu ai te ʼu logo totonu. ʼE mole hona ʼaoga ke fai e he tahi, peʼe ko he komite, peʼe ko he kokelekasio he tahi tuʼasila ʼi te Internet ʼo ʼuhiga mo te kau Fakamoʼoni ʼa Sehova. Ko ʼihi neʼe nātou momoli te ʼu tohi katoa mo te ʼu vaega fuli, pea mo te ʼu tohi ʼo te ʼu fakatahi kae totogi age kia nātou te ʼu faʼahi ʼaia. Peʼe kita maʼu ai he falā peʼe kailoa, kae ʼe tapuʼi e te lao te toe hiki peʼe ko te tufa ʼo te ʼu tohi ʼa te kau Fakamoʼoni ʼa Sehova ʼi te olotinatea. Logola ko ʼihi ʼe nātou manatu ʼe ko he tokoni ʼaia ki te ʼu tēhina, kae ʼe mole lelei te faʼahi pea ʼe tonu ke fakagata.
7 Kapau ʼe tou aga fakapotopoto pea mo tokaga fakalelei mokā tou fakahā he ʼu logo ʼi te olotinatea, ʼe tou vakaʼi anai ke fonu totatou ʼatamai ʼaki “te ʼu meʼa maʼuhiga kehekehe pea mo fakafiafia.”—Taag. 24:4.