Ko Te Logo Lelei ʼi Te Internet

ʼI te temi ʼaenī ʼaē kua lahi ai te ʼu masini foʼou moʼo fakahoko ʼo te faka felogoi, ko ʼihi hahaʼi ʼe nātou maʼu he ʼu naunau ʼi te ʼu olotinatea, ʼo nātou fakaʼaogaʼi te meʼa faka felogoi ʼaē ko te Internet. Koia, neʼe fakatuʼutuʼu e te Sosiete ke ina fakahā ʼi te Internet he ʼu naunau ʼo ʼuhiga mo te ʼu akonaki pea mo te gāue ʼa te kau Fakamoʼoni ʼa Sehova.

Ko te tuʼasila ʼaenī ʼo te Sosiete ʼi te Internet: http://www.watchtower.org pea ʼe maʼu ai he ʼu kiʼi pepa lotu kehekehe, mo he ʼu kaupepa lalahi, pea mo he ʼu alatike ʼo Te Tule Leʼo pea mo te Réveillez-vous! ʼi te lea Fakapilitānia, faka Siaina (faigafua), faka Siamani, faka Lusia pea mo faka Sepania, ʼo toe feiā aipe mo te tahi ʼu lea. Ko te ʼu tohi kehekehe ʼaia ʼe maʼu ʼi te Internet, pea kua tou maʼu fuli ʼi totatou ʼu kokelekasio pea mo tou fakaʼaogaʼi ʼi te gāue fai faka mafola. ʼAki te fakaʼaogaʼi ʼo te Internet, ʼe mole fai e te Sosiete he ʼu fakatuʼutuʼu moʼo tufa ʼo he ʼu tohi foʼou, kae ʼe ina foaki pe he ʼu naunau ki te hahaʼi fuli ʼaē ʼe nātou fakaʼaogaʼi te olotinatea. ʼE mole ʼaoga ke teuteuʼi e he tahi he ʼu naunau ʼi te Internet ʼo ʼuhiga mo te kau Fakamoʼoni ʼa Sehova, mo tanatou gāue, pea mo tanatou ʼu akonaki. Kua fakatuʼutuʼu e te Sosiete ke fakahā ʼi te Internet he ʼu naunau ʼe totonu ke fakaʼaogaʼi e te hahaʼi fuli.

Logope la ʼe mole feala ki te hahaʼi ke nātou fakaʼaogaʼi te olotinatea moʼo faitohi ki te Sosiete, ʼe fakahā ʼi ai te ʼu tuʼasila ʼo te ʼu Filiale kehekehe ʼo te malamanei katoa. ʼO feala ai ke faitohi te hahaʼi ʼo ʼuhiga mo he tahi ʼu fakamatala peʼe ke tokoni kia nātou te kau Fakamoʼoni ʼa Sehova ʼo tonatou fenua. ʼAua naʼa koutou fakameʼameʼa ʼi te fakahā ʼo te tuʼasila ʼaia ʼo te Internet ki te hahaʼi fuli pe ʼaē ʼe nātou fia ʼiloʼi te moʼoni ʼo ʼuhiga mo te Tohi-Tapu ʼaki te olotinatea.