Ko He Tokoni Ki Te Hahaʼi

ʼE kau te kau Kilisitiano moʼoni ʼi te minisitelio, moʼo faka mafola te logo lelei. (Filp. 2:​17) Moʼo fakahoko te faʼahi ʼaia, ko te ʼu kaupepa lalahi, mo te ʼu pepa lotu, pea mo te ʼu alatike ia lea e 20 ʼe maʼu ʼi te Internet ʼi te tuʼasila www.watchtower.org. Ko te tuʼasila ʼaia ʼi te Internet, neʼe mole fai moʼo tufa te ʼu nusipepa fakamuli ki te kau Fakamoʼoni ʼa Sehova. Neʼe fakatuʼutuʼu moʼo foaki he ʼu fakamahinohino ʼe totonu ki te hahaʼi ʼo ʼuhiga mo te meʼa ʼaē ʼe akoʼi e te kau Fakamoʼoni ʼa Sehova mai te Tohi-Tapu.

Mole heʼeki faʼa fualoa, neʼe hilifaki te kaupepa maʼuhiga kiai. Ko te kaupepa lahi Koteā ʼAē ʼe Fakamaʼua Mai e Te ʼAtua Kia Tatou? ia lea e 220. Pea ʼo kamata mai Te Tule Leʼo ʼo te ʼaho 1 ʼo Sanualio pea mo te Réveillez-vous ! ʼo te ʼaho 8 ʼo Sanualio 2004, neʼe fakahā ai ʼi te tuʼa pasina ʼo te ʼu nusipepa te tuʼasila ʼi te Internet.

E feafeaʼi hakotou fakaʼaogaʼi te tuʼasila ʼaia ʼo te Internet? ʼE feala ke koutou felāveʼi mo he tahi ʼe fia logo kae ʼe mahino ia ki te tahi lea. Kapau ʼe ina maʼu te Internet, pea ʼe feala ke koutou fakahā age te tuʼasila ʼo te Internet ʼi te tuʼa pasina ʼo Te Tule Leʼo peʼe ko te Réveillez-vous ! ʼE feala ai leva kia ia ke ina vakaʼi ʼi tana olotinatea te kaupepa Fakamaʼua ʼi tana lea ʼo aʼu ki takotou toe liliu age mo te kaupepa ʼi tana lea. Peʼe feala ke koutou foaki te ʼaʼahi ki te kokelekasio peʼe ko te kūtuga ʼaē ʼe nātou palalau ʼi te lea ʼaia.