Te Tali Ki ʼAkotou ʼu Fehuʼi

◼ ʼE lelei koa hatatou tohi ʼi te ʼu tohi ʼaē ʼe tou tufa totatou tuʼasila takitokotahi ʼaē ʼi te Itineti?

Ko ʼihi kau fai faka mafola neʼe natou tohi ki te ʼu nusipepa peʼe ko te ʼu kiʼi pepa lotu ʼaē ʼe natou tufa ki te hahaʼi tonatou tuʼasila ʼaē ʼi te Itineti. ʼO feala ai kiā nātou ʼaē ʼe natou toʼo te tohi ke natou fefaitohiʼaki mo ia ʼaē ʼe fai faka mafola moʼo kole he tahi ʼu fakamahino. Ko te kau fai faka mafola ʼaē ʼe natou fai ia te faʼahi ʼaia, ʼe natou fai ʼuhi ko hanatou fia tokoni ki te hahaʼi ʼaē ʼe fia logo ki te moʼoni. Kae kua ʼosi tohi ia te tuʼasila ʼaē ʼi te Itineti ʼo te Sōsiete ʼi te tuʼa pāsina ʼo te ʼu nusipepa pea mo te ʼu kiʼi pepa lotu. Koia, ʼe lelei age mo kapau ʼe mole tou tohi ʼi te ʼu tohi totatou tuʼasila takitokotahi ʼaē ʼi te Itineti.

ʼE fakalogo ki te kau fai faka mafola takitokotahi mo kapau ʼe natou fia tohi ki he moʼi pepa tonatou tuʼasila ʼaē ʼi te Itineti, tāfito lā mokā ʼe natou fai tanatou ʼu ʼaʼahi. ʼE tonu ke tou toe liliu ki te hahaʼi ʼaē neʼe fia logo ki te moʼoni, kae mole tou tuku ke hoki natou faitohi mai mo kapau ʼe natou fia maʼu he tahi ʼu fakamahino. ʼE lelei age hatatou fakahā ʼe tou loto tokaga moʼoni ki te hahaʼi mo kapau ʼe tou fai palalau mo nātou.