Moka Mate He Tahi Neʼe Ke ʼOfa Ai
KAPAU neʼe mate he tahi neʼe ke ʼofa ai, neʼe lagi hanu ai tou loto pea neʼe ke logoʼi ai tau nofo tokotahi pea neʼe mole kei ʼi ai hau tapikiʼaga. ʼE mahino ia neʼe ke toe ita mo ke fakahemala peʼe ke mataku. Neʼe lagi ke manatu ai ʼe mole kei ke fia maʼuli.
ʼE mole kovi ia tau lotomamahi. ʼE ʼasi aipe neʼe ke ʼofa mamahi ki te kilisitiano ʼaia kua mate. Kae ʼe feala koa ke ke maʼu he fimalie?
NI PULEʼAKI NEʼE ʼAOGA KI ʼIHI
ʼE tokoni atu anai te ʼu puani ʼaeni mo kapau ʼe mole kei ke lava katakiʼi tou lotomamahi:
ʼAUA NAʼA KE LOLOMI TOU MAMAHI
ʼE tahi alu pe te kilisitiano mo tana faʼahiga fakaha tona lotomamahi. Kae ʼe logo fimalie anai moka ʼe mole ina fakamaʼumaʼu tana tagi. Neʼe toe ui fenei e Vanessa: “Neʼe au tagi pea neʼe au maʼu aipe he fimalie.” Neʼe mate fakafokifa te kiʼi tehina ʼa te tahi fafine ko Sofía. ʼE ui fenei e Sofía: “ ʼE mamahi ʼosi toku loto moka au toe manatuʼi te meʼa ʼae neʼe hoko. ʼE hage pe ʼe au faiga ke ava hoku mataʼi lavea kua ʼaukau ke au faitoʼo. ʼE kovi ʼosi te mamahi kae ʼe hoki feala ai ke lelei te mataʼi lavea.”
PALALAU FAʼIFAʼITALIHA KI ʼAU MANATU
ʼE moʼoni ʼi ʼihi temi ʼe ke fia nofo tokotahi pe. Kae ʼe ko he kavega ʼe mamafa fau ki he foʼi tokotahi. ʼE ui e Jared ʼe taʼu 17, kua hala mo tamai: “ ʼE au vaevae mo ʼihi ia te ʼu meʼa ʼae ʼe au logoʼi ʼi toku loto. Neʼe feala pe ke mole au palalau ki ai kae ʼe au logo lelei ai.” ʼE talanoa ia Janice ki te tahi lelei neʼe ina maʼu: “Neʼe au lotomalohi ʼi taku faipalalau mo ʼihi. Neʼe natou lotomahino pea neʼe hage neʼe mole kei au ʼamo tokotahi taku kavega.”
TALI TE TOKONI ʼA ʼIHI
ʼE ui fenei e te toketa: “ ʼE faigafua anai ki he tahi hana ʼutaki tona mamahi moka ʼe ina tali te tokoni ʼo ʼona kaumeʼa mo ʼona kaiga.” Koia, fakaha fakahagatonu ki ʼou kaumeʼa te faʼahiga tokoni ʼae ʼe ʼaoga atu. ʼE mahalo ia ʼe natou fia tokoni atu kae ʼe mole natou iloʼi hanatou faʼahiga fai.—Taaga Lea 17:17.
FAKAOVI KI TE ʼATUA
ʼE ui fenei e Tina: “Neʼe mate toku ʼohoana ʼi te kosea, pea neʼe mole kei ʼi ai hoku falalaʼaga. Neʼe gata pe ko te ʼAtua. Neʼe au faikole kia te ia ʼi te ʼaho fuli ke au lava katakiʼi ia te toe fetogi ʼaia ʼi toku maʼuli. Pea neʼe lahi ʼaupito tana tokoni mai.” Neʼe kei taʼu 22 ia Tarsha ʼi te mate ʼo tana faʼe. ʼE ina ui fenei: “Neʼe au maʼu te fimalie ʼi taku lau te Tohi-Tapu ʼi te ʼaho fuli. Neʼe ʼaoga mai te ʼu manatu fakalotomalohi ʼae neʼe au maʼu ai.”
MANATUʼI IA TE FAKATUʼUAKE
ʼE hoko atu fenei e Tina: “ ʼI te kamata, neʼe mole pe la au maʼu he fimalie ʼi te ʼamanaki ʼae ʼe toe fakatuʼuake anai toku ʼohoana. Koteʼuhi neʼe kei au fia sio mo fāfā ki ai. Pea neʼe kei fia sisio mo ʼaku tama ki tanatou matuʼa. Kae kua hili leva ki ai taʼu ʼe fa, pea kua maʼuhiga leva kia au te ʼamanaki ʼaia ʼo te fakatuʼuake. ʼE au fiafia ʼaupito he ʼe au iloʼi ʼe mā toe felaveʼi anai mo toku ʼohoana.”
ʼE ʼaoga he temi fualoa ke siʼisiʼi ai tou lotomamahi. ʼE ui e Vanessa: “ ʼE feala ke ke ui ʼe mole he puleʼaki ki tou mamahi. Kae ʼaki pe te temi ʼe ke tokagaʼi anai kua siasiaʼa pea ʼe mole kei ke mamahi ohage ko te kamata mai.”
ʼE tonu ke ke manatuʼi, ʼe kei ʼi ai pe he ʼuhiga ʼo tou maʼuli logo la kua puli te kilisitiano ʼae neʼe ke ʼofa ai. ʼAki ia te tokoni ʼa te ʼAtua, ʼe feala pe hau fakatahi mo ʼou kaumeʼa mo maʼu ai te fiafia. Pea ʼe kua vave fakatuʼuake e te ʼAtua te kau mate. ʼE loto e te ʼAtua ke ke toe felaveʼi mo ʼou famili mo kaumeʼa ʼae kua mamate. Pea ʼe puli anai tou mamahi ʼo talu ai!