Neʼe Tonu Ke Tou Maʼuʼuli ʼO Heʼe gata

He koʼe koa ʼe tou holi ki te maʼuli heʼe gata? ʼE ui ʼi te Tohi-Tapu neʼe ʼai e te ʼAtua te holi ʼaia ki ʼotatou loto. (Ekelesiasi 3:11) ʼE toe ui ai “ko te ʼAtua ʼe ko te ʼofa.” (1 Soane 4:8) Pea kapau ʼe ʼofa moʼoni ia te ʼAtua pea neʼe feala moʼoni pe ke tou maʼuʼuli ʼo heʼe gata.

ʼE mole he tahi ia tatou ʼe fia mate. ʼI te Tohi-Tapu ʼe fakatatau ia te mate ki hotatou “fili.” (1 Kolonito 15:26) Pea ʼe mole feala ke hao he tahi mai ai. ʼE ʼi ai ʼihi ʼe mamate tautonu mo ʼihi ʼe maʼuli fualoa. Koia la ʼae ʼe tuʼania ai te tokolahi. Kae ʼe feala koa ke puli ia te mate ʼo talu ai?

HE ʼU FAKAMOʼONI ʼE FAKALOTOMALOHI

Neʼe mole ko te loto ʼa te ʼAtua ke mate ia te tagata kae neʼe ko tana fakatuʼutuʼu ke maʼuli ʼi te kele ʼo heʼe gata. ʼE ko he manatu foʼou koa kia koe? ʼE lelei ke tou vakavakaʼi te tohi ʼo Senesi ʼi te Tohi-Tapu. Neʼe teuteuʼi lelei e Sehova ʼAtua ia te kele maʼa te tagata, ʼosi pea neʼe ina fakatupu ia te ʼuluaki tagata, ia Atama. Neʼe maʼuli ʼi te palatiso ʼi te ʼoloto ʼo Eteni. “Nee sio leva te Atua ki te u mea fuli ae nee ina fakatupu, pea koeni nee lelei tukupau” ia meʼa fuli.—Senesi 1:26, 31.

Neʼe haohaoa ia Atama. (Tetelonome 32:4) Neʼe toe heʼe mele mo tona ʼohoana, ia Eva. Neʼe ui fenei age e Sehova kia naua: “Kolua fanaunau, kolua liuliuga, kolua fakahahai te kele, pea kolua pulei ia ia; kolua pule ki te u ika o te tai, mo te u manulele o te lagi, pea mo te u manu fuli ae e taka i te kele.”—Senesi 1:28.

Neʼe ʼaoga he temi fualoa kia Atama mo Eva ke nā fakahahaʼi te kele. Neʼe tonu ke maʼu fanau ia Eva ʼo feia ki ʼana fanau ʼo kaku pe ki hanatou fakahahaʼi te kele katoa ohage ko te fakaʼamu ʼa te ʼAtua. (Esaia 45:18) ʼE matatonu koa moka neʼe fakafealagia pe e Sehova ke sisio ia Atama mo Eva ki ʼana fanau mo ʼana mokopuna pea ke nā mamate leva?

Tou manatuʼi te fakatotonu ʼa te ʼAtua ke pule ia Atama mo Eva ki te ʼu manu ʼo te kele. Neʼe tonu ke kumi e Atama te ʼu higoa ʼo te ʼu manu pea neʼe mole ʼaho tahi pe te gaue ʼaia. (Senesi 2:19) Pea neʼe mole faigafua hanā fakalalata te ʼu manu, neʼe tonu ke nā sivi ia te agaaga ʼo te ʼu manu takitahi pea ke nā popoto ʼi te tokakaga fakalelei kia natou. Koia, neʼe toe ʼaoga kia naua he temi loaloaga ki te gaue ʼaia.

Neʼe foaki e te ʼAtua te ʼu gaue maʼuhiga ʼaia ʼe lua kia Atama mo Eva he neʼe ina iloʼi ʼe nā maʼu feʼauga pe anai he temi ki ai. Pea ʼe moʼoni, neʼe maʼuli fualoa ia Atama.

NEʼE NATOU MAʼUʼULI FUALOA

Neʼe ʼi ai te temi neʼe maʼuli fualoa ai te tagata. ʼE tou lau fenei ʼi te Tohi-Tapu: “Ko te u aho fuli o te mauli o Atama ko tau e hivageau tolugofulu.” Pea ʼe talanoa ki ni tagata ʼe ono neʼe natou taʼu 900 tupu. Ko Seti, Enosi, Kenani, Seleti, Metusela mo Noe. Neʼe natou maʼuʼuli ʼi muʼa ʼo te Tulivio. Neʼe gata pe ko Noe, neʼe kua taʼu 600 ʼi te to ifo ʼo te Tulivio. (Senesi 5:5-27; 7:6; 9:29) Kotea ʼae neʼe tupu ai te loaloaga ʼo tonatou maʼuli?

Neʼe maʼuʼuli te ʼu tagata ʼaia ʼo feovi mo te temi ʼae neʼe kei haohaoa ai te tagata. Kae kotea ia te pikipikiga ʼo te maʼuli haohaoa mo te maʼuli loa? ʼE pulihi feafeaʼi anai ia te mate? ʼE hoki tou maʼu anai te ʼu tali ki te ʼu fehuʼi ʼaia moka ʼe tou mahino muʼa ki te tupuʼaga ʼo tatatou liliu ʼo matutuʼa pea mo mamate.