Te Tali Ki ʼAkotou ʼu Fehuʼi
◼ ʼI muʼa ʼo te tali ʼa he kaugā fagona ke papitema, ʼe tonu ke feafeaʼi tana lagolago ki te minisitelio?
Ko he tahi ʼe kaugā fagona, ʼe kua ina fakahā ʼi ni ʼu ʼaluʼaga kehekehe, tana fia liliu ʼaē ko he Fakamoʼoni ʼa Sehova. (Pes. 110:3) Ko he tahi ʼe ina ako fakalelei ia te Tohi-Tapu, kua ina fetogi tana faʼahiga fakakaukau pea mo tona faʼahiga maʼuli. ʼI tana fia fakafiafia ia Sehova pea mo fai Tona finegalo, ko ia ʼaē ʼe ina ako fakalelei ia te Tohi-Tapu, ʼe fakatahi tuʼumaʼu mo te hahaʼi ʼa Sehova ʼi te ʼu fono pea mo te ʼu fakatahi lalahi. (Hep. 10:24, 25) ʼO hilifaki ki tana kau tuʼumaʼu ʼaia ki te ʼu fono mo te ʼu fakatahi, ʼe ina toe loto foki ke ina tala tana tui iā muʼa ʼo te hahaʼi, ʼo fai hana ʼu tali ʼi te ʼu fono pea kua kau ki te Ako Faka Teokalatike.—Pes. 40:9, 10; km 09/06 p. 4
Kā tali te moʼoni e ia ʼaē ʼe ina ako te Tohi-Tapu pea mo ina fakahā tana leleiʼia moʼoni te logo ʼa te Puleʼaga, pea ʼe feala ke ina maʼu te pilivilesio ʼaē ke kau ki te fai faka mafola ʼi te ʼu ʼapi. ʼE ko te gāue maʼuhiga ʼaia ʼa te kau Fakamoʼoni ʼa Sehova. (Mat. 24:14; 28:19, 20; od p. 110) ʼI te faʼahi ʼaia, ʼe ko te maʼua ʼo ia ʼaē ʼe ina fai te ako Tohi-Tapu pea mo te kau tagata ʼāfea, ke natou ʼiloʼi papau peʼe ko ia ʼaē ʼe ako ʼe ina maʼuliʼi koa ia te ʼu pelesepeto faka Kilisitiano. ʼE tonu ke fia liliu moʼoni ko he Fakamoʼoni ʼa Sehova pea mo ina leleiʼia te pilivilesio ʼaē ko te lagolago ki te gāue ʼaē ko te faka mafola ʼo te Puleʼaga pea mo fai ʼo ni ʼu tisipulo.—Kal. 6:6; wF88 15/11 p. 17; od pp. 79-81, 218.
Ko he tahi kua kaugā fagona, ʼe mole ʼaoga anai ke tuku he temi loaloaga ke feala hana kole ke papitema. Heʼe kua lagi mulimuli kātoa tona maʼuli ki te ʼu pelesepeto faka Kilisitiano, kae mole heʼeki faʼa poto lelei ʼi te gāue fai faka mafola. ʼE tonu ke tuku hona temi feʼauga ke ina fakahā ʼe fia lagolago mālohi pea mo faʼafai ʼi te minisitelio.—Pes. 40:8; Loma 10:9, 10, 14, 15.
ʼI te temi ʼaē kua feala ai ke papitema, ʼe tonu ke ʼiloga ʼe lagolago lelei ki te tala ʼo te logo lelei, ʼo laka atu ʼi he hola e tahi peʼe lua tana fai faka mafola ʼaē ʼi te māhina fuli. (wF84 1/9 p. 8 pal. 2) ʼE mahino papau ia, ʼe vakavakaʼi anai te ʼu ʼaluʼaga ʼo nātou takitokotahi ʼaē ʼe natou kole ke papitema, ʼo vakaʼi tonatou haʼuʼaga, tonatou taʼu, tonatou ʼu tuʼakoi, pea mo te tahi atu ʼu meʼa. ʼE tonu anai ke mulimuli te kau tagata ʼāfea ki te tokoni ʼaenī ʼe tuku age kiā nātou ʼi te pāsina 218 ʼo te tohi Organisés: “ ʼE tou tokoni anai kiā nātou ʼaē kua natou foaki tonatou loto kiā Sehova pea mo natou mahino ki te faka ʼuhiga tāfito ʼo te ʼu moʼoni ʼa te Tohi-Tapu. ʼAki takotou tokoni ʼofa, ko nātou ʼaē kā papitema, ʼe natou kamata anai tonatou minisitelio faka Kilisitiano, kua natou tokalelei moʼo fai ia te gāue maʼuhiga ʼaia.”—Mat. 16:24; Soa. 4:34; 1 Pet. 2:21.