Tatatou Fakafetaʼi Ki Te Mate ʼo Kilisito
1 “Ko te ʼAlo ʼo te tagata neʼe haʼu, mole ke tauhi age kia ia, kae haʼu ʼo tauhi mo foaki tona nefesi ko he totogi ʼo te tokolahi.” (Mat. 20:28). ʼE mole he tagata ʼi te kele neʼe feala ke ina fai te fahaʼi ʼaē neʼe fai e Sesu Kilisito maʼa te malamanei. ʼAki tona maʼuli pea mo tana mate ʼi te pou mamahi, neʼe ina fakahā mai kia tatou te ala ʼaē ʼe feala ai ke tou maʼu te ʼofa lahi ʼaē: ko te maʼuli heʼe gata. Kae, tokolahi te hahaʼi ʼe mole ia nātou te fakafetaʼi ʼo ʼuhiga mo te meʼa ʼaē neʼe fai e Kilisito.
2 Tou vakaʼi muʼa te felāveʼi ʼa Sesu mo te ʼu kilia e hogofulu. ʼI tanatou sisio atu ki ai, neʼe nātou kalaga ʼo leʼo lahi: “Sesu, Faiako, ʼofa mai kia mātou!” (Luka 17:13). Pea neʼe ʼofa ia kia nātou: neʼe ina ʼui age ke nātou ʼolo ʼo fakahā nātou ki te ʼu pelepitelo, ohage ko tona tuʼu mai ʼi te Lao. Lolotoga tanatou ʼolo ʼi te ala, neʼe lelei ai te kilia ʼo te ʼu tagata ʼaia e hogofulu.
3 Kae, neʼe ko te tokotahi pe neʼe liliu mai ʼo fakamālo kia Sesu. Pea neʼe ʼifea te toko hiva ʼaē? Neʼe hoko atu tanatou fagona ʼo mole nātou manatu ke nātou liliu ʼo fakamālo kia ia ʼaē neʼe ina faitoʼo nātou (Luka 17:15-17). ʼE tou hoko koa kia ai? ʼE tou holi ke tou hage ko te tagata ʼaē neʼe liliu mai. Neʼe loto fakafetaʼi moʼoni ia. ʼE tou logoʼi koa te fahaʼi ʼaia mokā tou manatuʼi te mate ʼo Kilisito?
4 Tou fakahā totatou fakafetaʼi: ʼI te taʼu fuli, ʼe fakatuʼutuʼu e te Sosiete he ʼu vaega ʼo te Tohi-Tapu ke tou lau lolotoga te vahaʼa ki muʼa atu ʼo te ʼaho Fakamanatu. Ko te ʼu vaega ʼaia ʼe tuʼu ʼi te Calendrier des Témoins de Jéhovah 1992, ʼo kamata ʼi te ʼaho 12 ki te ʼaho 17 ʼo ʼapelili. ʼE tou fakahā anai tatatou fakafetaʼi ʼo tou lau pea mo metitasio ki te ʼu meʼa neʼe hoko ia muʼa ʼo te mate ʼa Sesu.
5 Ko tatatou gāue faka mafola ʼe ʼalu tahi mo tatatou fakafetaʼi ki te ʼuhiga ʼo te ʼaho Fakamanatu. Ko te ʼu tagata ʼāfea ʼe nātou fai anai he ʼu fakatuʼutuʼu lelei moʼo tokoniʼi te kau pionie pea mo te kau faka mafola ke nātou hikihiki ki muʼa tanatou gāue ʼi ʼapelili.
6 Ko te māhina ʼo te ʼaho Fakamanatu ʼe ko he māhina ʼe lauʼi afe ia nātou ʼaē ʼe pionie vaeluaʼi temi. ʼI malesio 1991, neʼe ko te toko 122 kau faka mafola ʼi Niu-Kaletonia. ʼE feala koa hatatou fai feiā ʼi te taʼu ʼaenī? Kapau ʼe mole feala hatatou pionie vaeluaʼi temi, tou faigaʼi ke lahi tatatou kau ki te fai faka mafola, mokā ʼe feala tatatou fai te fahaʼi ʼaia.
7 Ke tou ʼuga te fakafetaʼi ki niʼihi atu: ʼI te taʼu fuli, lolotoga te ʼaho Fakamanatu, tokolahi te ʼu hahaʼi ʼe nātou fakatahi mo tatou. ʼI malesio 1991, ʼi te toko 10 650 158 ʼaē neʼe ʼomai ki te ʼaho Fakamanatu neʼe fai ʼi te malamanei katoa, neʼe ko te toko 6 370 000 hahaʼi neʼe fia logo ki te moʼoni. ʼO hā ai te tuputupu lelei ka hoko ki te kautahi ʼa te ʼAtua.
8 ʼE tonu ke tou fakaʼaogaʼi te ʼu pepa fakaafe neʼe ta e te Sosiete pea mo fakatuʼutuʼu he fahaʼi ʼe ʼaoga ki te ʼave haʼele ʼo te kau ako ʼo te Tohi-Tapu pea mo nātou ʼe fia logo mai. Ke ia tatou te lotolelei pea mo fiafia mokā tou fakaafe mai nātou.
9 Tou fakamahino age pe koʼe neʼe fakatuʼutuʼu te ʼaho Fakamanatu, ko ai ʼaē ka kai ki te pane mo ʼinu te vino pea koteā te ʼuhiga ʼo te pane mo te vino (1 Ko. 11:23-26). Tou fakahā kia nātou pe ko te maʼuli fea ʼaē ʼe falala ki ai nātou ʼaē ʼe kai ki te pane mo ʼinu te vino pea mo nātou ʼaē ʼe ʼomai ʼi te ʼaho ʼaia (Soane 10:16; Fkhā. 14:3, 4). Ko te fahaʼi ʼaia ʼe tokoniʼi ai nātou ʼaē ʼe fia logo ke nātou mahino ko te hahaʼi ʼe tonu ke ‘maʼuliʼi tanatou tui’ kae mole gata ʼaki pe tanatou ʼomai ki te Fakamanatu ʼo te mate ʼo Kilisito ʼe fai tuʼa tahi ʼi te taʼu. — Soane 3:16.
10 Ko te ʼaho Fakamanatu ʼo te mate ʼo Kilisito ʼe ko te ʼaho makehe ia. ʼAki tatatou teuteu lelei, ʼe tou fakahā ai tatatou fakafetaʼi moʼoni kia Sehova pea mo Kilisito ʼo ʼuhiga mo te ʼu meʼa fuli neʼe nā fai maʼa tatou. Kapau ʼe tou uga te fakafetaʼi kia nātou ʼe ako faka tohi-tapu pea mo nātou ʼaē ʼe fia logo ki te ʼaho ʼaia, ʼe tou tokoniʼi anai nātou ke nātou maʼuliʼi te tui ki te totogi, ko te fakatuʼutuʼu ʼaia neʼe fai e Sehova ʼaki ia Sesu Kilisito.