Ko Tatatou Gāue ʼi Te ʼu Telituale ʼAē ʼe Fai Tuʼumaʼu
1 ʼE tou fiafia ʼi tatatou maʼu te ʼu tānaki ʼo te ʼu kokelekasio ʼaē ʼe gāue tuʼumaʼu ʼi tonatou telituale! (Mat. 24:14; 1 Tim. 2:3, 4) Logope la ko te faʼahi ʼaia ʼe mole faigafua tona fai, ʼe hā ʼaki mai ʼe feala ke fua lelei te faʼahi ʼaia mokā ʼe tou teuteu lelei pea mo tokalelei ia meʼa fuli ʼo ʼuhiga mo te ʼu ʼaluʼaga kehekehe ka hoko mai.
2 ʼE ʼAoga Ke Lelei Te ʼu ʼUluaki Palalau: ʼE maʼuhiga ʼaupito te teuteuʼi ʼo he ʼu ʼuluaki palalau ʼe ʼaoga. ʼE tonu ke kau kiai te ʼu manatu ʼaoga moʼo fakahā te ʼu tupuʼaga tāfito ʼaē ʼo tatatou ʼu ʼaʼahi tuʼumaʼu.
3 ʼI te tohi Comment raisonner ʼe lahi ai te ʼu faʼifaʼitaki lelei ʼo te ʼu ʼuluaki palalau ʼe ʼaoga ke tou fakaʼaogaʼi. Ko te ʼu faʼifaʼitaki e tolu e tuʼu ʼi te pasina 15 ʼi lalo ʼo te kupu “Dans les territoires ou les gens entendent souvent le message.” (ʼI te ʼu telituale ʼaē ʼe logo tuʼumaʼu te hahaʼi ki te logo). Koutou lau ʼo liuliuga te ʼu faʼifaʼitaki ʼaē ʼe koutou fia fakaʼaogaʼi ʼi tokotou telituale.
4 Ko he ʼu kau faka mafola neʼe nātou maʼu te fua lelei ʼi tanatou fakaʼaogaʼi te sulunale moʼo kamata ʼaki he ʼu fai palalau ʼi te ʼu telituale ʼaē ʼe fai tuʼumaʼu. Ko te tohi Comment raisonner ʼe ina tuku mai te ʼu faʼifaʼitaki e tolu ʼo fakahā mai ai peʼe feafeaʼi tona fai. Koutou vakaʼi te lua ʼuluaki palalau ʼi lalo ʼo te kupu “Crime/Sécurité” ʼi te pasina 11 pea mo te ʼu ʼuluaki palalau e lua ʼi lalo ʼo te kupu “Actualité” ʼi te pasina 9.
5 Koutou Teuteuʼi ʼAkotou ʼu ʼUluaki Palalau: ʼAua naʼa koutou fakameʼameʼa ʼo fakahā pea mo koutou fakaʼaogaʼi te ʼu ʼuluaki palalau ʼo mulimuli pe ki tona fakahā mai ʼi te tohi Comment raisonner. Koutou fakahā te faʼahi ʼaki ʼakotou ʼu faʼahiga palalau māhani. ʼE feala ke koutou fai ʼo liuliuga mo he tahi ʼe faiva ʼi te fai faka mafola ia muʼa ʼo tanatou fakaʼaogaʼi ʼi te fai faka mafola.
6 Ohage la, ʼe feala ke koutou ʼui age he meʼa fēnei:
◼ “Talu taku haʼu fakamuli, [talanoa ki te logo foʼou ʼaē ʼe palalauʼi ʼi te kolo]. Koteʼuhi ʼe tou tau fuli mo he faʼahiga faigataʼa, tokolahi ʼi totatou vāhaʼa fale neʼe nātou ʼui mai fakamalotoloto ʼe nātou tau mo te faigataʼa ʼaia. E lagi ʼe ʼi ai hakotou manatu ʼo ʼuhiga mo te faʼahi ʼaia. [Tuʼu fakanounou ke fai mai hana tali.] ʼE mātou loto moʼoni ke fai he tonu moʼo fetogi ʼo te faʼahi ʼaia. Kae, ʼo ʼuhiga mo te tonu fakaʼosi, ʼe mole koutou loto tahi anai koa mo te meʼa neʼe tohi e te polofeta ko Selemia ʼi te kapite 10 vaega 23?” ʼI te ʼosi lau ʼo te vaega, koutou fakalogo ki tana ʼu manatu, pea koutou fakatokagaʼi ia ia ki he vaega faka Tohi-Tapu ʼe fakahā ai peʼe feafeaʼi anai te fakatokatoka e Sehova te faigataʼaʼia ʼaē ʼe tou palalau kiai.
7 Peʼe feala ke koutou ʼui age:
◼ “E lagi neʼe koutou tāʼofi ʼi te ʼu logo ʼi te ʼaho ʼaenī [talanoa ki he meʼa tāfito neʼe hoko]. E lagi ʼe koutou ʼiloʼi ʼe tou tau fuli mo te ʼu meʼa ʼaia. [Tuʼu fakanounou ke fai mai hana tali.] ʼE feala hatatou falala ʼe ʼaumai anai e te ʼu puleʼaga he tonu ka mole fualoa; kae, ʼe fakahā mai e te Tohi-Tapu peʼe feafeaʼi anai te pulihi fakaʼosi ʼo te faigataʼaʼia ʼaia.” Fakatokagaʼi ia ki he vaega tāfito ʼe fakamahino ai te meʼa ka fai anai e te ʼAtua.
8 “He Koʼe ʼe Koutou ’Ōmai Tuʼumaʼu?” Ko te ʼu tali ʼe ʼaoga ki te taʼi fehuʼi ʼaia ʼe maʼu ʼi te tohi Comment raisonner ʼi te pasina 20 ʼi te kupu “Pourquoi repassez-vous si souvent?” (He koʼe ʼe koutou ʼōmai tuʼumaʼu?) Tatau aipe peʼe mole heʼeki nātou fehuʼi mai, ʼe feala ke tou tuku age he fakamoʼoni lelei ʼo tou fakaʼaogaʼi te ʼu faigamālie fuli ʼe ʼaoga moʼo tokoni ki niʼihi ke nātou ʼiloʼi ko totatou ʼofa ʼaē ki te ʼAtua pea mo totatou kāiga ʼaē ʼe ina uga tatou ke tou ʼōmai tuʼumaʼu. Ko he fai palalau ki te talanoa ʼa Sesu ia Soane 21:15-17 ʼe hā lelei mai ai ʼe fua manuʼia tona maʼuliʼi.
9 ʼE tonu ke hoko atu tatatou fai te gāue maʼuhiga ʼaia ʼo tou gāue tuʼumaʼu ʼi totatou telituale ʼo aʼu ki te temi ʼe ʼui mai ai e Sehova kua feʼauga. ʼAki tatatou faiga ʼaia, ʼe feala ke tou maʼu ai tana takitaki, tana taupau, pea mo tana tapuakina ʼo aʼu ki te fakaʼosi.—Mat. 28:19, 20.