He ʼu ʼUluaki Palalau ʼe Uga Ai He Tahi
1 Ko Te Tule Leʼo pea mo te Koutou ʼaʼala! ʼe nā ʼaoga lualua moʼo to ʼo te moʼoni ʼi te ʼatamai pea mo te loto ʼo te kau lautohi ʼo te ʼu nusipepa ʼaia. ʼE tou loto foki ke tou maʼu he ʼu faʼahiga meʼa fakapotopoto moʼo fakahu ai ki te ʼapi ʼo te ʼu hahaʼi ke feala ai hanatou leleiʼia te ʼu koloā fakalaumālie ʼe tuʼu ʼi te ʼu nusipepa ʼaia.
2 ʼE feafeaʼi hatatou uga nātou ʼe fai palalau mo tatou ke nātou tali pea mo lau tatatou ʼu nusipepa? Ko tatatou faʼahiga fakahā ʼe ko he faʼahi maʼuhiga ia. ʼE tou maʼu te ʼu manatu lelei moʼo teuteuʼi ʼo te ʼu ʼuluaki palalau fakapotopoto ʼi te tohi Comment raisonner, ʼu pasina 9 ki te 15.
3 Moʼo fakahā ʼo Te Tule Leʼo ʼo te ʼaho 1 ʼo ʼoketopeli, ʼe feala anai ke tou muliʼi te talanoa tolu ʼaē ʼo te ʼu manatu ʼo te kupu “Actualité”, ʼu pasina 9 ki te 10 ʼo te tohi Comment raisonner.
ʼI te ʼosi ʼo tatatou fakahā totatou higoa, ʼe feala ke tou ʼui age:
◼ “Kapau ʼe feala hakotou fili ʼi te ʼu faigataʼaʼia lahi ʼaē ʼe tau mo te mālama ʼi totatou temi, koteā anai te meʼa ʼe koutou fakaʼamu ke ʼuluaki pulihi?” Tou fakalogo ki tana tali pea tou manatuʼi te meʼa ʼaē ʼe hoha ia ki ai. ʼOsi ʼaia, pea hoko atu ʼo tou ʼui age ki ai he meʼa ohage la ko te palalau ʼaenī: “Koutou vakaʼi ifo muʼa pe ko te tonu fea ʼe foaki mai e te Tohi-Tapu ʼo ʼuhiga mo te ʼu faigataʼaʼia ʼaia. [Lau ia Isaia 9:6, 7.] Ko te puleʼaga faitotonu ʼa te Mesia, ia Sesu Kilisito, ʼe ko te tonu moʼoni ʼaia ki te ʼu faigataʼaʼia fuli ʼo te malamanei.” ʼOsi ʼaia, tou avahi te nusipepa ʼi te pasina 8 pea tou fakatokagaʼi age ia ke ina fakasiosio te ʼu palakalafe fakamuli ʼaē e tolu ʼo te alatike ʼaē “Te Mesia: ko he ʼamanaki moʼoni koa?”
4 ʼE feala anai ke tou fakahā Te Tule Leʼo ʼo te ʼaho 1 ʼo ʼoketopeli ʼo fakaʼaoga te tahi ʼuluaki palalau e lua ʼe tuʼu ʼi te ʼu pasina 11 ki te 12 ʼo te tohi Comment raisonner, ʼi te kupu ʼaē “Emploi/Logement”. ʼE feala tatatou fakahā te ʼu manatu ʼaia pea mo fai he ʼu fehuʼi ʼaki tatatou ʼu faʼahiga palalau, peʼe ko te fakaʼaogaʼi ʼo te ʼu ʼuluaki palalau ʼaē ʼe tuʼu ʼi te tohi. ʼI te ʼosi fakalogo ki te tali ʼa ia ʼaē ʼe palalau mo tatou, tou hoko atu te fai palalau ʼo fakahā ki ai te manatu maʼuhiga ʼo te ʼuluaki palakalafe ʼo te pasina 4, ʼi te kupu ʼaē “ ʼE ʼi ai koa he puleʼaki?” ʼOsi ʼaia tou lau ia Isaia 65:21-23, ʼe ina fakahāhā mai te ʼu tapuakina ʼe foaki mai anai e te ʼafio ʼa te Mesia.
5 Kapau ʼe tou fakahā te Koutou ʼaʼala! ʼo te ʼaho 8 ʼo ʼoketopeli ko tona kupu “ ʼE feala takotou tauʼi te ʼu manatu ʼe mole totonu”, he koʼe ʼe mole koutou fakaʼaogaʼi te tolu ʼo te ʼu ʼuluaki palalau ʼaē ʼe tuʼu ʼi te kupu ʼaē “Vie/Bonheur” ʼi te ʼu pasina 13 ki te 14 ʼo te tohi Comment raisonner? ʼI te ʼosi ʼo tona fakapipiki kia Pesalemo 1:1, 2, tou fakatokagaʼi ia ʼaki he manatu ʼaoga ʼo te nusipepa Koutou ʼaʼala!
6 ʼE lagi ʼe tou felāveʼi anai mo he ʼu hahaʼi ʼe nātou ʼui mai ʼe ʼi ai tanatou ʼu tohi faka lotu. ʼE feala pe ke tou fakamahino age kia nātou, mo tatou foki, ʼe ʼi ai tatatou ʼu tohi ʼe tou fakaʼaoga takitokotahi (ohage la Ko te minisitelio ʼo te Puleʼaga); kae, ko tatatou ʼu nusipepa ʼe lau e te ʼu hahaʼi ʼe lauʼi miliona ʼe mole ko he kau Fakamoʼoni ʼa Sehova.
7 Neʼe ʼui fēnei e Paulo ia 1 Kolonito 3:6: “Ko ʼau neʼe ʼau to, ko Apolosi neʼe ina fakavai, kae ko te ʼAtua ʼaē neʼe ina fakatuputupu.” Kapau ʼe tou loto ke fakatuputupu e Sehova te moʼoni ʼi te loto ʼo te ʼu hahaʼi ʼaē ʼe nātou fakahā tanatou fia logo, ʼe tonu ke tou tokaga ʼo to fakapotopoto ʼo fakaʼaogaʼi te ʼu ʼuluaki palalau ʼe uga ai he tahi.