Ko Te ʼu Tali Ki ʼa Kotou ʼu Fehuʼi

◼ ʼE feafeaʼi te kau ʼa te ʼu fānau ʼa te ʼu mātuʼa kilisitiano ki te fai faka mafola ʼi muʼa ʼo tanatou fakamoʼoni ko te kau faka mafola mole heʼeki papitema?

Ko te ʼu mātuʼa kilisitiano ʼe nātou loto ke liliu tanatou ʼu fānau ko te ʼu kaugana ʼa Sehova fakapotopoto pea mo faiva (1 Sam. 2:18, 26; Luka 2:40). Tatau aipe pe kei veliveli, ko te ʼu fānau ʼo te ʼu famili faka kilisitiano ʼe tonu ke nātou popoto ʼi te fakahā fakaleleiʼi ʼo tanatou tui ʼo fakatafito ki te Tohi-Tapu. ʼE vave ai te tuputupu fakalaumālie ʼo te ʼu fānau ki muʼa mokā ʼe nātou ʼolo mo tanatou ʼu mātuʼa ki te minisitelio ʼi tonatou kei veliveli. Kae ʼe maʼuhiga ke haʼu te fahaʼi ʼaia mai tonatou loto ke feala ai hanatou leleiʼia te faka mafola, ke nātou fia liliu ko he kau faka mafola mole heʼeki papitema pea ke nātou faʼafai ʼi te minisitelio ʼo te Puleʼaga. ʼE ʼaoga ke foaki age e te ʼu mātuʼa kia nātou he ako fakapotopoto (1 Tim. 4:6; 2 Tim. 2:15). Ko ʼihi kau faka mafola faiva ʼe feala ke nātou tautau faka mafola mo nātou mokā ʼe lotolelei ki ai tanatou ʼu mātuʼa. — Vakaʼi Notre ministère, ʼu pasina 100, 101.

Kapau ko he ʼu fānau ʼe lelei tanatou aga ʼonatou muliʼi tanatou ʼu mātuʼa ʼi te faka mafola ʼi te ʼu ʼapi, ʼe nātou ako ai pe ʼe feafeaʼi te fai faka mafola. Kae ʼe mole fakamoʼoni anai nātou ko te kau faka mafola mole heʼeki papitema ʼi muʼa ʼo hanatou mafai ʼi te fahaʼi ʼaia. Ko te ʼu mātuʼa kilisitiano ʼe nātou fakatuʼutuʼu anai peʼe feafeaʼi he kau ʼa te fānau ki te fai faka mafola mokā nātou ʼolo fakatahi ʼo fai faka mafola. Ko te ʼu fānau ʼaē mole heʼeki kau ki te kau faka mafola ʼe mole tonu ke nātou faka mafola tokotahi peʼe mo niʼihi atu ʼu fānau. ʼE feala ke teuteuʼi e te ʼu mātuʼa tanatou fānau ki te fai faka mafola pea mo tuku kia nātou te fealagia ke nātou kau ki tona ʼu faʼahiga fai, ohage la ko te lau ʼo he vaega faka tohi-tapu, pe ko he fakahā ʼo he kiʼi pepa lotu pe ko he nusipepa, peʼe ko te fakahā ʼo he fakatā ʼi he tohi. ʼI te temi ʼaē kua lahi ai, ʼe lagi ʼe feala anai ke kau he fānau ki te fai palalau.

Ka ʼe lelei te ako, ʼe mahino lelei ai ki te kau tūpulaga te maʼuhiga ʼo te minisitelio; ʼe nātou tali te ʼu fakatuʼutuʼu ʼa tanatou ʼu mātuʼa pea ʼe nātou faiga ke lelei tanatou aga. ʼE mole tonu ke tuku e te ʼu mātuʼa tanatou ʼu fānau ʼaē mole heʼeki kau ki te kau faka mafola ʼi te fono ʼo te fai faka mafola, ʼaki tanatou falala ʼaē ke tokaga niʼihi kia nātou. Ko te ʼu mātuʼa ʼaē ʼe manatu ki tanatou fānau ʼe natou ʼiloʼi ko tonatou maʼua ko te tokaga ki te gāue ʼa tanatou ʼu fānau. ʼE moʼoni, ko ʼihi kau faka mafola ʼe tau mo nātou te falala ʼe lagi ʼe nātou foaki anai tonatou temi moʼo kau ki te ako ʼo te ʼu tūpulaga ʼo te kokelekasio ʼaē ʼe nātou fakahā tanatou lotolelei ʼo kaugana kia Sehova ʼi te minisitelio.