Tou Tokoni Kia Nātou ʼe Foʼofoʼou Mai Ke Nātou Haʼele Ki Muʼa
1 Ko te ʼaho 17 ʼo ʼapelili 1992, ʼi te malamanei katoa, neʼe fakakatoa te toko 11,5 miliona hahaʼi neʼe nātou fakatahitahi ki te ʼaho Fakamanatu ʼo te mate ʼo Kilisito. ʼO fakakatoa ʼo laka tuʼa lua vaelua ʼi te lahi ʼo te kau faka mafola ʼi te ʼu kokelekasio ʼa te kau Fakamoʼoni ʼa Sehova. ʼE ko he meʼa lelei te sio ki te hahaʼi ʼe nātou ʼolo kaugamālie “ki te moʼuga ʼo Sehova”! (Mikea 4:2.) ʼI te temi nei, ko te toko fitu miliona hahaʼi ʼe tokakaga ki te tauhi moʼoni, kae ʼe mole heʼeki nātou vikiviki ia Sehova ʼi muʼa ʼo te hahaʼi. ʼIo, ko te ʼu palalau ʼa Sesu ʼaē “ko te taʼukai ʼe lahi”, e kua hoki ʼiloga lelei ia ʼaho nei. — Mat. 9:37, 38.
2 ʼI ʼapelili, ʼe tou faiga fuli anai ʼo tokoniʼi nātou fuli ʼaē ʼe nātou fai te ʼu aga tāfito ke nātou kau ki te fai faka mafola. Ko te tagata takitaki ʼo te ako tohi, ʼo tokoni ki ai te kau faka mafola ʼaē kua māhani pea mo te ʼu pionie ʼo te kaugā faka mafola, e nātou fai anai he gāue tāfito ʼi te faʼahi ʼaia. Ko ʼatatou fakatuʼutuʼu e tolu 1) ko te fai ʼo he ʼu fakatuʼutuʼu moʼo kamata ʼo he ako faka tohi-tapu ʼi te ʼu ʼapi mo te hahaʼi ʼaē neʼe ʼomai ki te akonaki makehe pea mo te ʼaho Fakamanatu ʼo te taʼu ʼaenī; 2) fakaloto mālohiʼi nātou ʼaē ʼe ako ke nātou maʼu te ʼu aga tāfito ke nātou liliu ai ko he kau faka mafola mole heʼeki papitema; pea 3) mo hikihiki tatatou kau ki te fai faka mafola.
3 Ko tatou fuli ʼe tonu ke tou fai he faiga makehe moʼo fakatalitali ʼonatou ʼe foʼofoʼou ʼomai ki tatatou ʼu fono pea ke tou ʼiloʼi lelei ia nātou. E feafeaʼi te fakaloto mālohiʼi ʼo he tokolahi ʼi te hahaʼi lotolelei ʼaia ke fai hanatou ako faka tohi-tapu ʼi tonatou ʼapi?
4 Lolotoga te taʼu gāue 1992, ko te ʼu ako faka tohi-tapu e 1 362 neʼe fai ʼi te māhina fuli ʼi Niu-Kaletonia. Ko te kau faka mafola ʼe feala ke nātou fakaafe te tagata takitaki ʼo tanatou ako tohi ke nātou kaugā ʼolo ki tanatou ʼu ako ke feala ai hana ʼiloʼi te hahaʼi ʼaē ʼe ako (km 6/81 p. 8). Ko ʼihi ia nātou ʼaia ʼe lagi kua nātou kau foki ki te ʼu fono pea ʼe nātou fai te ʼu aga tāfito moʼo kau ki te fai faka mafola ʼi te ʼu ʼapi. E nātou tautau fai koa te fagonogono faigamalie? E nātou fai koa te ʼu aga tāfito ke nātou liliu ko te kau faka mafola mole heʼeki papitema, ko te ʼu aga tāfito ʼaia ʼe tuʼu ʼi te tohi Notre ministère, ʼu pasina 98 pea 99? Kapau kua nātou fai te faʼahi ʼaia, tou fakamahino age ka ʼe hinoʼi nātou ko te kau faka mafola mole heʼeki papitema, pea ʼe feala anai tanatou faka mafola ʼi te ʼu ʼapi.
5 E mole tonu ke galo ia tatou ke tou fefakaloto mālohi ʼaki mokā tou fakatahi mo ʼihi kilisitiano (Hep. 10:24, 25). Kapau kua tōtō ʼihi ʼi te fai faka mafola, ko te ʼu tagata takitaki ʼo te ako tohi ʼe tonu anai ke nātou fai he ʼu fakatuʼutuʼu moʼo tokoniʼi pea mo fakaloto mālohiʼi ʼonatou. ʼE feala pe ke fakaafe fakafiafia ia nātou ke nātou kaugā ʼolo mo tatou ʼi te minisitelio.
6 ʼE tonu ke gāue tahi ke feala ai te fakatuʼutuʼu ʼo ʼapelili ko he māhina makehe ʼo ʼuhiga mo te fai faka mafola. Ko te faʼahi ʼaia ʼe lagi hoko anai mokā ʼe tuku e te tagata takitaki ʼo te ako tohi he faʼifaʼitaki fakafiafia ʼo tokoniʼi ia nātou takitahi ʼi tona ako tohi ke nātou kau katoa ki te minisitelio. ʼE feala ke fakatuʼutuʼu niʼihi fono ki te fai faka mafola. Ko nātou ʼaē kua matutuʼa ʼe fai anai kia nātou he fakasiosio makehe. Kae ki te kau tūpulaga, ʼe feala tonatou tokoniʼi ʼi ʼihi faʼahi. ʼE tonu ke tokaga te ʼu mātuʼa ke kau fuli te famili ki te fai faka mafola ʼi ʼapelili. ʼE mole gata anai totatou tapuaki e Sehova ʼo lahi ake mokā ʼe tou foaki fakalelei ia tatou ʼi te temi ʼaenī ʼo te taʼukai.