Te ʼu Hahaʼi Toʼo Mālama Ki ʼOnatou Vāhaʼa Fale
1 ʼI te ʼosi ʼo tatatou kau ki te fakatahi faka tisitilike ʼi te taʼu ʼaenī, ʼe tou toe mahino lelei ai foki ki te maʼuhiga ʼaē ko tatou ko te ʼu hahaʼi toʼo mālama ki ʼotatou vāhaʼa fale (Mat. 5:14). Kapau ʼe tou metitasio ki te ʼu tokoni fuli ʼaē neʼe foaki mai ʼi te fakatahi ʼaia pea kapau ʼe tou faiga mālohi ʼo maʼuliʼi ʼi te ʼaho fuli, ʼe tou fakaōvi anai kia Sehova ʼi te tauhi moʼoni pea mo tokoni ki te kāiga ke nātou ʼiloʼi te ʼu fakapapau fakaʼatua.
2 Ko te ʼu fealagia ʼaē ia tatou moʼo ʼave te mālama ʼe lahi ia, heʼe, ʼi te ʼosi ʼo te fakatahi ʼi te feliaono uhu, ʼe hā ai te kiʼi pepa lotu ʼaē Ko te malamanei ʼo te temi ʼaenī ʼe hāo anai koa? Ko te ʼu faʼifaʼitaki ʼi te moeaki uhu neʼe ʼaoga ia, moʼo fakahā ai pe ʼe feafeaʼi tona fakaʼaogaʼi. Neʼe fakahā ai foki ʼihi ʼu kiʼi pepa lotu e tolu Te fakafimālie ʼo ʼuhiga mo te kau lotovaivai, Fiafia ʼi he maʼuli faka famili pea mo Ko ai koa te ʼu pule ʼo te malamanei? Neʼe fakaloto mālohiʼi tatou ke tou ʼave tuʼumaʼu te ʼu kiʼi pepa lotu ʼaoga ʼaia ke feala ai hatatou fakaʼaogaʼi mokā hoko mai tona temi faigamalie.
3 Ko te moeaki hōʼata, ʼi te ʼosi ʼo te akonaki ʼaē “Te hāofaki lolotoga te haʼu ʼa Sesu Kilisito”, ʼe fakahā ai te kaupepa foʼou ko tona kupu ʼE tokaga moʼoni koa te ʼAtua kia tatou? Ko te kaupepa ʼaia ʼe lanu pea ʼe matalelei tona ʼu paki, ʼe tali anai ki te ʼu ʼatu fehuʼi ʼe fai e te hahaʼi, ohage la: He koʼe neʼe fakagafua e te ʼAtua te mamahi? ʼE pulihi anai koa te ʼu mamahi ʼi he ʼaho? ʼE feafeaʼi tatatou ʼiloʼi ʼe tou maʼuli nei ʼi te ʼu ʼaho fakamuli? ʼE feafeaʼi anai te liliu ʼo te kele ko he palatiso? ʼE feafeaʼi hatatou maʼuli ʼo heʼegata ʼi te mālama foʼou ʼa te ʼAtua? Ko te kaupepa ʼaia ʼe ko he meʼa gāue lelei moʼo kamata ʼo he ʼu ako faka tohi-tapu.
4 ʼE lahi ʼaupito tatatou fakafetaʼi ki te mahu ʼo te meʼa kai fakalaumālie ʼaē neʼe tou maʼu ʼi te fakatahi faka tisitilike “Te ʼu hahaʼi toʼo mālama”! Ke tou faiga ia tatou, ko te ʼu hahaʼi toʼo ʼo te mālama fakalaumālie ʼo te ʼAtua, ʼo faigaʼi ke tou fakahā tatatou fakafetaʼi fakamalotoloto ʼo fakaʼaogaʼi fakalelei te meʼa neʼe tou akoʼi, pea mo fakaʼaogaʼi fakapotopoto te ʼu tohi foʼou ʼaia moʼo tokoniʼi ʼo te hahaʼi ʼi te fahaʼi fuli ke nātou ʼiloʼi pea mo tauhi kia Sehova!